Wednesday, May 23, 2007

أخت القمر


سعاد حسنى قيل عنها الكثير..لا جديد
.
هى بس بالنسبة لى أجمل واحسن ممثلة مصرية
.
فى زمن لم يكن فيه عمليات تجميل ولا نفخ ولا شفط ولا بوتكس ولا شد ولا تجميل أنف
.
فى زمن كان فيه فاتن حمامة..كانت سعاد حسنى فى رأيى هى الافضل، لأنها لم تخف على صورتها وقدمت كل الادوار، كان عندها الدور أهم من الأثر اللى هتسيبه على صورتها عند المشاهدين (دا اللى خلى فاتن حمامة مثلا متقدرش تمثل فى حياتها ولا دور لنجيب محفوظ لأن شخصياته النسائية كانت غالبا قوية و "معافرة" وتتحدى التقاليد والعرف علشان تبنى حياتها بالشكل اللى هى عايزاه)
.
أما سعاد حسنى فمفيش حاجة وقفت قدامها كممثلة
.
وعلى عكس كل الناس اللى بيحبوا أو بيتخيلوا أن ممثلينهم المفضلين حلوين وملايكة وطيبين..أنا بقى عندى ميل أصدق كل الكلام الغريب اللى بيتقال على الحياة الخاصة لسعاد حسنى، بالعكس الكلام ده بيخلينى أشوفها بطريقة أسطورية أكتر
.
ليها أحيانا حركات صغيرة فى الافلام وفى تعبيرات وشها متتنسيش
.
كلامى هنا موجه لعشاقها الجامدين وبسألهم ادا كانوا فاكرين المقاطع دى من أفلامها
.
ـ غروب وشروق لما النور رجع فى البيت (تلت الفيلم تقريبا) ابتدا وشها يعبر عن انتباهها لعودة النور وبعدين افاقتها من الفلاش باك اللى كان عن ذكرياتها مع ابراهيم خان. المشهد ده كان فى 3 ثوانى بس درجات التغيير فى تعبيرات وشها بجد محصلتش
.
ـ الكرنك. كان فيه مشهد هى وشويكار فى المطبخ بيعملوا الاكل، وجه نور الشريف يحاول يمد ايده فقامت شويكار ضربته وقالت له "ممنوع لحد ما نخلص" أو حاجة زى كده. بعدين سعاد حسنى قامت سارقة سندوتش بسرعة ومناولهوله من الناحية التانية! مشهد غاية فى البساطة والرقة والجمال.
.
ـ أين عقلى . كانت ماشية مع محمود ياسين على البحر وهو بيحاول يفهمها ان الافكار اللى فى دماغها غلط وانها ظالماه. بصت له وقالت له حاجة كده زى : يا سلام. بس تعبيرات وشها مزيج من عدم التصديق والحب والرغبة فى التسامح..الخ برضه جميلة قوى فى بساطتها
.
أجمل تعليق بقى سمعته عن سعاد حسنى هو من الممثل خالد النبوى فى حديث قال
" لما ييجى فيلم لسعاد حسنى فى التليفزيون اللى حواليه بيقعدوا يتفرجوا عليه لما بتفرج عليها"
.
!ممكن برضه ينطبق عليه

8 comments:

Anonymous said...

و مين سمعك عزيزتي و مش بس سعاد حسني صدقيني كل مممثلات الزمن الاصيل زمان ايام مامكناش لسه سمعنا عن البوستوكس و النفخ و الشد و كل العمليات الغريبه دي كان الجمال طبيعي و بجد مش صناعي زي دلوقتي
بس بتهيئلي عزيزتي فاتن حمامه مثلت ادوار المرأه القويه سيده القصر كان فيه قوه برضو و الفيلم اللي عملته مع عمر الشريف و زكي رستم كان اسمه ايه مش فاكره اللي حبت فيه عمر الشريف و سابت جوزها عشانه برضو الي حد ما كانت قويه
مانكرش طبعا ان سعاده حسني ادت ادوار مختلفه و بجراءه تحسد عليها انا بكون مبهوره لما بشوف فيلم الكرنك علي اد ماهو محزن و اليم علي اد مافيه كم ابداع من جميع الناس فيه
فعلا مشهد شروق و غروب مشهد يدرس الفيلم كلو اساسا رائع
و طبعا فيلم الكرنك لا ينسي مشاهده
اين عقلي لا اتذكره معذره عزيزتي
فعلا فيه عشاق لفنانين معينيين بيعتقدوا انه اساطير و مش بيغلطوا هما في الاخر بشر و حياه المممثل او الممثله الخاصه ملك له او لها فلازم مانخلعش عليهم ثوب القدسيه نتعامل مع اعمالهم و نستمتع بها
اشكرك عزيزتي علي جولتك الجميله في عالم سعاد حسني سندريلا الشاشه كما لقبوها هي بجد ممثله شامله و رائعه و ادت جميع الادوار و ابدعت
تحياتي لكي عزيزتي

Integrated Functions said...

جميل قوي الحوار الفني اللي للأسف مش هقدر أشارك فيه
:)

روز كنت عاوزة أقولك أني بجد معجبة جداً بطريقتك في الكلام عن ممثلتك المفضلة
جميل أننا نقدر نشوف ونلمح تلميحات بسيطة غالباً احنا بس اللي بنلقطها .. طبعا بدافع الحب

الشيطان يعظ said...

معاكي حق
سعاد حسني منم اجمل و اعظم الممثلات في تاريخ مصر كلها\
تحياتي
لي موضوعك الجميل

blackcairorose said...

عزيزتى انتجريتد
الحاجات الصغيرة هى اللى بتلفت النظر اكتر ويمكن برضه تكون مؤشر أصح من الحاجات الكبيرة احيانا عن الناس اللى قدامنا.
وخالص الود

blackcairorose said...

عزيزتى اجندا
بجد بحب سعاد حسنى قوى وهى بتفكرنى بنوع جمالها وحياتها المأساوية الى حد ما بالممثلة الامريكية القديمة فيفيان لى واللى برضه عانت من ظروف صعبة فى سنينها الاخيرة.
وصبح الفل

ramy said...

سعاد حسنى هتفضل أسطورة من أساطير السينما الجميلة
بس تصحيح بسيط لمعلومة سابقة
فاتن حمامة قامت ببطولة أحدى قصص نجيب محفوظ الأولى ليك يوم ياظالم وقامت بأدوار المرأة القوية اللى بتتحدى المجتمع زى فيلم الطريق المسدود من سيناريو لنجيب محفوظ وفيلم الباب المفتوح وليلة القبض على فاطمة والخيط الرفيع

Anonymous said...

أشاركك حبك وتقديرك للرائعة السندريللا الشاشة سعاد حسنى لكن لا داعى للمقارنة الظالمة بينها وبين سيدة الشاشة العربية فاتن حمامة الأسطورة الأولى فى السينما والتى عندما بدأت سعاد فى السينما عام 1959 كانت فاتن حمامة فى قمة المجد وأختلف معاك فى أن فاتن حمامة لم تقدم أدوار مختلفة بالعكس فأنت لم تشاهد أدوار مثل لاانام لاتطفىء الشمس الخيط الرفيع وغيرها وكمان أدت جميع الأدوار بتنوع جميل ومنها المحامية الجريئة فى كوميديا فيلم الأستاذة فاطمة وراقصة فى كبارية فى فانتازيا فيلم بابا أمين وبنت البلد فى أحد اهم افلام الواقعية فيلم لك يوم يا ظالم والبنت المراهقة الشقية مع انور وجدى فى فيلم قلوب الناس والبنت الشعبية الجريئة مع يوسف شاهين فى فيلم صراع فى الميناء والفلسطينية الفدائية والفيلم السياسى فى فيلم أرض السلام والغنية المتكبرة فى فيلم لن أبكى أبداًوالشريرة الناعمه فى أحد أجرأ دور لعبته ممثلة فى كل تاريخ السينما فى فيلم لا أنام والصعيدية المنتقمة فى رائعة طه حسين فيلم دعاء الكروان وزوجة الوزير العاشقة فى رائعة تولستوى آنا كارنينا فى فيلم نهرالحب والبنت الجديدة فى المجتمع الحرة والثورية والمتحدية فى أفلام لا تطفىء الشمس والطريق المسدود ولاوقت للحب والباب المفتوح وفاقدة الذاكرة فى فيلم اليلة الأخيرة وعاملة التراحيل فى فيلم الحرام والفدائية الشعبية فى ليلة القبض على فاطمة والمحبة غريبة الأطوار فى فيلم حبيبتى والفلاحة المتمردة فى فيلم الكوميدى أفواة وأرانب والسندريللا فى فيلم الغنائى الاستعراضى فيلم الحب الكبير والغانية صاحبة العلاقات المتعددة فى فيلم الخيط الرفيع والأم القوية فى فيلم امبراطورية م والمجنونة فى فيلم أريد أن أقتل ودورها الممميز فى سن مختلف فى فيلم أرض الأحلام وتجربتها باللغة الإنجليزية فى فيلم كايرو وصراع الملعونين ومسلسلات وجه القمر وضمير أبلة حكمت وحكاية وراء كل باب وغيرها وغيرها عشرات الأدوار والأعمال العظيمة الخالدة وهذه كانت نماذج فقط تدل على ذكاء حاد وحسن اختيار وتنوع فى الادوار والشخصيات التى قامت بها سيدة التمثيل والفن العربى فاتن حمامة أجمل وأصدق وجه عرفته الشاشة العربية والتى حصلت على العديد من الجوائز التى أنفردت بها موهبتها الاستثنائية مثل حصول فيلمها دعاء الكروان على شهادة تقدير من الأوسكار أعلى جائزة سينمائية فى العالم والضجة التى احدثها فيلمها الحرام فى مهرجان كان وهرجان الفيلم العربى بلندن وتم عرضه عرض تجارى لمدة 17 أسبوع فى روسيا وكرمت فى العديد من المهرجانات العالمية مثل مونبليية الفرنسى وجائزة من مهرجان موسكو أحد أكبر المهرجانات السينمائية فى العالم عن فيلم امبراطورية م ودبلوم الشرف من مهرجان طهران عن فيلم اريد حلا وجائزة مهرجان قرطاج والممثلة الأولى فى تاريخ السينما العربية فى استفتاء احس أفلام السينما العربية عام 1996 وكذلك نجمة القرن ودخلت موسوعة لاروس العالمية الشهيرة وكتبت عنها اكبر الصحف العالمية مثل لوموند الفرنسية التى كتبت عنها انها اكثر نساء النيل وعياً وكذلك حصلت على الجائزة الاولى للمرأة العربية وارفع الأوسمة من جمال عبد الناصر والسادات واميل لحود والملك الحسن والملك محمد الخامس وحصلت على الدكتوراة الفخرية من الجامعة الأمريكية فى القاهرة وخصص لها الناقد الفرنسى ميشيل دى بيرو فصل كامل فى مجلد أصدرة فى منتصف السبعينات عن السينما فى العالم تحدث فيها عنها كرمز للسينما العربية وتحدث عن أفلامها لاوقت للحب والحرام والطريق المسدود ودعاء الكروان وغيرها العديد من التكرييمات التى استحقتها عن جدارة وتفرد لموهبة استثنائية أجتمع عليها الجميع من المحيط للخليج وكرمها العالم أجمع فاتن حمامة
وشكراً ليك مرة تانية وفى النهاية فالأسطورتين فاتن حمامة وسعاد حسنى هما أهم نجوم السينما على الإطلاق وتأثيرهما وسحرهما باق إلى ما لانهاية فهما عنوان الصدق على الشاشة

Anonymous said...

في رايي الشخصي الأثنين هما اعظم من بعض فإذا كانت سعاد هي سندريلا الشاشة ففاتن هي سيدة الشاشة و إذا كانت سعاد هي افروديت السينما المصرية ففاتن هي الموناليزاومنذ ان ظهرت فاتن حمامة لانستطيع ان نقول ان هناك ممثلة اخرى توازيها في الكريزما و الحضور الطاغي و و حب الجمهور و الموهبة الفذة ان لم تتفوق عليها الا سعاد حسني