خمسة وسبعه وتلاتين

ـ ماما هوه بابا كان شكله أيه؟
ـ تانى يا ملك؟ يا حبيبتى أنا جاوبتك قبل كده، وكمان انتى شوفتى صوره كتير
ـ معلش يا ماما جاوبينى بس جاوبينى
ـ بابا يا قمر كان قصير وتخين وشعره خفيف
ـ بس تيته بتقول غير كده، بتقول انه كان رفيع وشعره نقيل وناعم
ـ جدتك بتوصفه لما كان فى ثانوى ولا الجامعة
ـ طيب وأيه كمان؟
ـ أبدا كان شكله عادى، بس بقى قلبه كان أطيب قلب وكان بيموت فيكو انتى وليلى وكنتو أغلى حاجه عنده فى الدنيا
ـ طيب كان بيحبنى أنا أكتر ولا ليلى؟
ـ كان بيحبكوا انتو الأتنين قد بعض بالظبط
ـ يعنى مكنش بيزعق خالص؟
ـ لا كان طبعا بيزعق لما حد يعمل حاجة غلط، أو ساعات لما بييجى من الشغل تعبان بيبقى متنرفز شويه، عادى يعنى زى أى حد
ـ طيب كان بيلاعبنى أيه؟
ـ كان بيعملك حج حجيجه أو يرفعك فوق عالى لحد السقف وانتى تقعدى تضحكى، أصلك كنتى البكرية
ـ يعنى أيه؟
ـ يعنى كنتى الكبيره، واحنا فضلنا خمس سنين يعد ما تجوزنا لحد ما حضرتك شرفتى، ولما جيتى وبعديكى بأقل من سنه ليلى جت كنا فرحانين بيكو قوى، وكمان الفتره دى شغل بابا كان مشى كويس جدا يعنى كنا تقريبا حاسين كده ان ربنا ادانا كل اللى احنا عايزينه
ـ وهو مات ازاى؟
ـ انتى ايه اللى خلاكى تسألى السؤال ده يا عسلية؟
ـ الشغاله اللى عند تانت نعمت سألتنى قلت لها معرفش
ـ أبدا كلمونى من الشغل فى يوم عادى وقالولى آجى بسرعة ولما وصلت كان بابا خلاص طلع عند ربنا
ـ وهو مش ممكن ينزل تانى؟
ـ لا مش ممكن، بقول لك ايه يللا عشان نعمل الهومورك بتاعك
ـ طب بس استنى، انتى مش هتتجوزى تانى؟
ـ اتجوز؟ مين قال الكلام ده يا ملك؟
ـ تانت نعمت كانت بتقول لصاحبتها انك مش ممكن تقعدى من غير راجل
ـ لا ياحبيبنى مبفكرش فى الكلام ده وتانت نعمت دى فاضية للكلام ومورهاش حاجة
ـ وبابا يعنى مش ممكن نشوفه تانى؟
ـ قوليلى يا ملوكة انتى مش فاكره بابا خالص؟
ـ لا مش فاكراه
ـ ولا أى حاجة
ـ مش فاكره، لا يعنى فاكرة شويه كده
ـ طب فاكره ايه؟
ـ فاكره فاكره آه فاكره انو كان رفيع وشعره تقيل وناعم لما كان فى ثانوى ولا الجامعة
ـ طيب يا غلباويه يللا على المذاكره