Wednesday, July 18, 2007

خمسة وسبعه وتلاتين

ـ ماما هوه بابا كان شكله أيه؟
ـ تانى يا ملك؟ يا حبيبتى أنا جاوبتك قبل كده، وكمان انتى شوفتى صوره كتير
ـ معلش يا ماما جاوبينى بس جاوبينى
ـ بابا يا قمر كان قصير وتخين وشعره خفيف
ـ بس تيته بتقول غير كده، بتقول انه كان رفيع وشعره نقيل وناعم
ـ جدتك بتوصفه لما كان فى ثانوى ولا الجامعة
ـ طيب وأيه كمان؟
ـ أبدا كان شكله عادى، بس بقى قلبه كان أطيب قلب وكان بيموت فيكو انتى وليلى وكنتو أغلى حاجه عنده فى الدنيا
ـ طيب كان بيحبنى أنا أكتر ولا ليلى؟
ـ كان بيحبكوا انتو الأتنين قد بعض بالظبط
ـ يعنى مكنش بيزعق خالص؟
ـ لا كان طبعا بيزعق لما حد يعمل حاجة غلط، أو ساعات لما بييجى من الشغل تعبان بيبقى متنرفز شويه، عادى يعنى زى أى حد
ـ طيب كان بيلاعبنى أيه؟
ـ كان بيعملك حج حجيجه أو يرفعك فوق عالى لحد السقف وانتى تقعدى تضحكى، أصلك كنتى البكرية
ـ يعنى أيه؟
ـ يعنى كنتى الكبيره، واحنا فضلنا خمس سنين يعد ما تجوزنا لحد ما حضرتك شرفتى، ولما جيتى وبعديكى بأقل من سنه ليلى جت كنا فرحانين بيكو قوى، وكمان الفتره دى شغل بابا كان مشى كويس جدا يعنى كنا تقريبا حاسين كده ان ربنا ادانا كل اللى احنا عايزينه
ـ وهو مات ازاى؟
ـ انتى ايه اللى خلاكى تسألى السؤال ده يا عسلية؟
ـ الشغاله اللى عند تانت نعمت سألتنى قلت لها معرفش
ـ أبدا كلمونى من الشغل فى يوم عادى وقالولى آجى بسرعة ولما وصلت كان بابا خلاص طلع عند ربنا
ـ وهو مش ممكن ينزل تانى؟
ـ لا مش ممكن، بقول لك ايه يللا عشان نعمل الهومورك بتاعك
ـ طب بس استنى، انتى مش هتتجوزى تانى؟
ـ اتجوز؟ مين قال الكلام ده يا ملك؟
ـ تانت نعمت كانت بتقول لصاحبتها انك مش ممكن تقعدى من غير راجل
ـ لا ياحبيبنى مبفكرش فى الكلام ده وتانت نعمت دى فاضية للكلام ومورهاش حاجة
ـ وبابا يعنى مش ممكن نشوفه تانى؟
ـ قوليلى يا ملوكة انتى مش فاكره بابا خالص؟
ـ لا مش فاكراه
ـ ولا أى حاجة
ـ مش فاكره، لا يعنى فاكرة شويه كده
ـ طب فاكره ايه؟
ـ فاكره فاكره آه فاكره انو كان رفيع وشعره تقيل وناعم لما كان فى ثانوى ولا الجامعة
ـ طيب يا غلباويه يللا على المذاكره

7 comments:

kasber said...

اسلوبك في سرد القصه بأسلوب الحوار قويه و منظمه جدا
تملكين سلاسه غريبه في المتابعه فلا تتوه منك الفكره
كتابه عميقة المعاني
وإن بدت بسيظه للفهم
هكذا انتي السهل الممتنع

كتابة said...

BLACKCAIRO ROSE...

يبادر قلبي لتذكير دمعي

بمعاهدة التعاون بينهما لعدم البكاء

حين يجيء أي موضوع بخصوص الأب الغائب

هكذا في فجاءة عارمة أرى موضوعك اليوم قد تجاسر

للتنكيل بالمبادرة لولا فسحة من الإحتمال

تداركتني

ماكتبت كان فعلا بسيطا لكنه كان مدمرا

Heart Beat said...

الله على الاسلوب القصصي الحواري الجميل جدا ده

بقى فاكره والدها لما كان في ثانوي و لا في جامعة

ربنا يا ستي يخليها لوالدتها يارب

blackcairorose said...

شكرا كاسبر
على الاحساس قبل الكلام

blackcairorose said...

أأسف كتابة على النبش فى الجرح القديم

blackcairorose said...

هارت بيت
الاطفال أحيانا يفاجؤنا بلعبة ذكاء غير متوقعة منهم، على الأقل هذا من واقع خبرة معهم

ودمتى على كلامك الحلو

اجندا حمرا said...

عزيزتي
blackcairorose
اسلوبك في عرض القصه شيق و سلس و بسيط
صحيح البنت الصغيره غلباويه بس كميله خالص
مرسي علي البوست الجميل