Thursday, July 5, 2007

دردشة

اليومين دول ونظرا لظروف شخصية بعمل كل يوم المشوار اللذيذ قوى من المهندسين لمصر الجديدة مرتين فى اليوم، وده معناه إنى مرتين فى اليوم بواجه نفسى بالسؤال المصيرى آخد كوبرى اكتوبر ولا نفق الأزهر والظاهر إنى دايما بآخد الاختيار الغلط واللى بيطلع زحمة أكتر
.
بس بجد اترعبت من كام يوم لما كتبوا فى الجرايد أن عربية ولعت فى نفق الأزهر وتم اغلاقه والمرور وقف والناس اللى كانت فى النفق جالهم حالة ذعر زى ما الجرايد كتبت، يا عينى وأكيد كان فيه أطفال كمان، متهيألى لو معايا أطفال وده حصل همسك ايديهم ونسيب العربية وناخد السكة جرى لحد ما نخرج
.
ما علينا، المشوار اليومى ده والراديو مفتوح بيدينى فرصه أسمع أغانى جديدة وأشوف اعلانات افلام الصيف
.
عجبتنى أغنية أنغام الجديدة، كلماتها حلوة والموسيقى وكمان الفيديو لطيف، عامل زى سيدى وصالك كده، يمكن عشان المخرج واحد. أنغام نفسها مش بستظرفها بصراحة لأنى بحس فى حواراتها إنها مرسومة وحاطه نفسها جوه كادر، وبلاقى ان حد مفهمها أو هى مفهمه نفسها إنها حاجة مهمة قوى فى البلد دى. بتفتقد البساطة والتلقائية بس الأغنية حلوة.
.
فيه أغنية جديدة كملن لنجوى كرم بس بجد مبقدرش الاقى سبب يخلى نجوى كرم مميزة، أغانيها عادية كلمات ولحن، مش وحشة بس مفيش حاجة اكسترا، أمال بيكتبوا عنها فى المجلات العربية واللبنانية زى ما تكون فيروز مثلا، برضه بحس انها بتبيع نفسها على أساس انها لبنانية صرف ومش بتغنى مصرى، يعنى هو ده أكبر أست ـ رصيد يعنى ـ بتسوق نفسها بيه
وعلى سيرة نجوى كرم غريبه تعاونها فى فيديو كليب مع سماح أنور من كام سنة، لا سماح مخرجة فيديوكليب أساسا ولا أخرجت بعد كده، ولا نجوى كرم بتخلى أى حد يخرج لها
.
حد ممكن يفيدنى ويقولى لما عمرو دياب اتصور صورته اللى فى اعلانات الشوارع عن البومه الجديد كان تم تمنتاشر ولا لسه
.
لما بقول لحد إنى مشفتش ولا فيلم لمحمد سعد الناس بتبصلى كأنى نزلت من القمر، فعلا مشفتلوش ولا فيلم بس هو باين عليه ظريف وحركاته مميزة، اللى بيعجبنى لأنى شفتله فيلمين هو محمد هنيدى عاجبنى جاءنا البيان التالى بجد بجد دمه خفيف، أما بقى اللى بحس ان تاريخ الصلاحية بتاعه انتهى من زمن هو عادل إمام وسورى لعشاقه بس هو ده زوقى، بحس ان عادل إمام عامل بالضبط زى رئيس دولة متخلفه من العالم التالت عشر لسه متمسك بالحكم رغم فقدانه مؤهلات الاستمرار على الكرسى واللى حواليه والصحافة عمالين يهللوله. ده غير انى مبتعجبنيش طريقته لما بيتكلم فى السياسة، عندك كلام حلو فى صالح الحقوق الأساسية والحريات للمواطن أهلا وسهلا، معندكش يبقى متقعدش تنظر فى كلام احنا عارفين ليه ومقصود بيه أيه
.
أنا مالى النهارده بنتقد فى الناس كده عمال على بطال
.
سيبكوا من كل ده، اللى ضاع منى بقى هو حضور مهرجان الرقص الشرقى فى القاهرة الأسبوع اللى فات ، آه الرقص الشرقى ووووووماله، هى الرقاصة دى مش برضه انسانه على رأى الجملة الخالدة فى افلام حسن الامام، عرفت عنه بعد ما خلص، معلش السنة الجاية ربنا يدينا عمر

6 comments:

roukariri said...

hey
فكرتينى باللذى مضى كنت بروح من مصر الجديده للمهندسين اكتر من مرتن فى اليوم و كنت لازم اختار الطريق الزحمه حتى لو كان الوقت متأخر جدا
المهم بالنسبه للاغانى كويس انه جالك فرصه تسمعى مزيكا و كلام .
عمر دياب لسه تامم ال 18 من شهر هو انتى مرحتيش البارتى بتاعه فى بيروت خساره كانت واووووووووووو
اما عمنا الزعيم فهو زعيم و الحدق يفهم
ياريتك تنشرى قصتك الى اخذتى عليها جائزة و عايزه اعرف اخبار عفاف ايه فى الصيف؟
انا رغيت اوى المرة دى معلش انفتحت نفسى على الكتابه
منتظره بشوق كتاباتك

Lost Love ( Found it now ) said...

عزيزتي ..

خلي بالك من نفسك و انتي ماشية من على الكوبري و الانفاق و في كل حتة كمان.

بس اهي فرصة تتعرفي على اللي احنا بنسمعه طول اليوم يعني.

و النبي و انتي يتسمعي الراديو ما سمعتيش اعلان حمام السباحة ؟ لو لسه اسمعيه و النبي لاني ماقدرش اوصف لك سعادتي اد ايه بالاعلان ده تخيلي انتي ممكن تعملي حمام سباحة في الفيلا و في اسبوعين بس لا استني مش كده و بس ده كمان من غير ما تبوظي الفيلا و الجنينة كمان ياسلام ده انا فرحت جدا ان الفيلا مش هاتبوظ و الجنينة كمان.

يعني مش حتجه تفرس و النبي الناب عماله تدور على خرم ابره زي مابنقول عشان يعيشه فيه و يجي اعلان زي ده يحل مشكلة حمام السباحة اللي في الفيلا.

طبعا اغنية انغام رائعة بحبها جدا كمان معناها حلو اوي و جديد زي ما عودتنا هي على طول.

عمرو دياب بقى يا ستي هو تم 18 فعلا بس الجيرل فريند بتاعته اصرت انه مايقلش عشان الحسد يعني و كده فحط صورته في الاعلان و هو عنده 14 سنة مش 18 .

اما الزعيم هايفضل زعيم طول ما الزعيم موجود و البلد مليانه حيطان للي عايز يخبط راسه فيها .

اغنية نجوى كرم بتعطيش الجيم يعني عشان تبقى لبنانية صرف بتقول فيها جملة كده و الله اعلم يعني حسب ما بسمعها يعني

بتقول احروء عرش المملكيه دي لبناني برضه يعني مش فاهمه بصراحة اي مملكة تقصد اللي هاتحرق عرشها دي اعتقد كده الاغنية ليها مغزي و بعد سياسي ربنا يستر عليها.

الموضة الايام دي محمد سعد حضرتك حتى انا بسبب ظروف عملي يعني غصب عني و الله ما شوفتش غير فيلم واحد ليه و على ما يبدو اني ارتكبت حماقة على راي البعض لان اعتقد كده ان افلامه وثائقية و فيها معلومات جوهرية مش لازم البني ادم يضيعها من ايديه.

و اعتذر بشدة مشدودة جدا كمان اني طولت اوي كده يعني في الرغي بس اعمل لك ايه الموضوع جميل جدا كان لازم يتفصص يعني.

اجندا حمرا said...

بوست يجنن عزيزتي
علي فكره مش انتي بس اللي ماشوفتيش و لا فيلم لمحمد سعد انا شرحه الصراحه دمه مش خفيف علي قلبي خالص و علي سيره محمد سعد كنت مع صحابي وواحده منهم قالتلي حتدخلوا فيلم محمد سعد قمت باصلها و قلتلها لو ادوني فلوس عشان ادخل فيلهم كلا و حاشا و بصيتلها بأستغراب و قلتلها ممكن تفهميني بتدخليلو ليه؟قالتلي عشان عايزه اضحك الصراحه مالاقتش كلام اقوله تضحك؟طب علي ايه و النبي علي التهته اللي بيعملها غريبه فعلا كوميديه اليومين دول
فعلا كليب انغام جميل و علي فكره انا برضه مش بستظرفها اوي زي اليسا كمان في الاحاديث بتكون كبه خالص بس اليسه زي مادايما بقول حبيبه قلبي الاحساس كله كتله مشاعر تمشي علي الأرض
عارفه فيه كتير بحب اسمعهم لكن ماشوفهمش خالص بيتكلموا في احاديث عشان لما بشوفهم في حديث او حتي في الكليب بستهيفهم اوي و بيضيعوا الاحساس اللي الواحد بيعيشوه في الاغنيه و هو بيسمعها
عمرو دياب ياخرابي؟شوفتي يابنتي البوستر حاجه بتعقد
ده شكله اصغر من اخر بوستر اتعمله السنه اللي فاتت حاجه رهيبه فعلا بس شكل الالبوم حيكون جامد يامسهل اهو قرب ينزل اما نشوف
علي فكره ماتنسينيش في تذكره مهرجان الرقص الشرقي السنه الجايه عشان انا جايه معاكي ممكن؟

blackcairorose said...

Merci Roukariri, c'est gentil de toi. On verra ce qu'Afaf ferra en été!

blackcairorose said...

ازيك يا لوست لوف هاجى أزورك وأعلق حالا

اه سمعت بحرق عرش المملكة وهى قبلها بتقول حاجة معناها انه ليه مملكته أو حاجة زى كدهـ المهم أن الظاهر الجملة اللى بتقولها دى المقابل اللبنانى بتاع التعبير المصرى ان شاء الله تتحرق يا بعيد!

blackcairorose said...

اجنده

عمرو دياب مش شكله اصغر من آخر بوستر عمله، ده شكله أصغر من أول بوستر عمله

تذكرتين فى المهرجان الجاى ان شاء الله؟ اوكيه بس هنتفرج ولا نشارك؟