دردشة

اليومين دول ونظرا لظروف شخصية بعمل كل يوم المشوار اللذيذ قوى من المهندسين لمصر الجديدة مرتين فى اليوم، وده معناه إنى مرتين فى اليوم بواجه نفسى بالسؤال المصيرى آخد كوبرى اكتوبر ولا نفق الأزهر والظاهر إنى دايما بآخد الاختيار الغلط واللى بيطلع زحمة أكتر
.
بس بجد اترعبت من كام يوم لما كتبوا فى الجرايد أن عربية ولعت فى نفق الأزهر وتم اغلاقه والمرور وقف والناس اللى كانت فى النفق جالهم حالة ذعر زى ما الجرايد كتبت، يا عينى وأكيد كان فيه أطفال كمان، متهيألى لو معايا أطفال وده حصل همسك ايديهم ونسيب العربية وناخد السكة جرى لحد ما نخرج
.
ما علينا، المشوار اليومى ده والراديو مفتوح بيدينى فرصه أسمع أغانى جديدة وأشوف اعلانات افلام الصيف
.
عجبتنى أغنية أنغام الجديدة، كلماتها حلوة والموسيقى وكمان الفيديو لطيف، عامل زى سيدى وصالك كده، يمكن عشان المخرج واحد. أنغام نفسها مش بستظرفها بصراحة لأنى بحس فى حواراتها إنها مرسومة وحاطه نفسها جوه كادر، وبلاقى ان حد مفهمها أو هى مفهمه نفسها إنها حاجة مهمة قوى فى البلد دى. بتفتقد البساطة والتلقائية بس الأغنية حلوة.
.
فيه أغنية جديدة كملن لنجوى كرم بس بجد مبقدرش الاقى سبب يخلى نجوى كرم مميزة، أغانيها عادية كلمات ولحن، مش وحشة بس مفيش حاجة اكسترا، أمال بيكتبوا عنها فى المجلات العربية واللبنانية زى ما تكون فيروز مثلا، برضه بحس انها بتبيع نفسها على أساس انها لبنانية صرف ومش بتغنى مصرى، يعنى هو ده أكبر أست ـ رصيد يعنى ـ بتسوق نفسها بيه
وعلى سيرة نجوى كرم غريبه تعاونها فى فيديو كليب مع سماح أنور من كام سنة، لا سماح مخرجة فيديوكليب أساسا ولا أخرجت بعد كده، ولا نجوى كرم بتخلى أى حد يخرج لها
.
حد ممكن يفيدنى ويقولى لما عمرو دياب اتصور صورته اللى فى اعلانات الشوارع عن البومه الجديد كان تم تمنتاشر ولا لسه
.
لما بقول لحد إنى مشفتش ولا فيلم لمحمد سعد الناس بتبصلى كأنى نزلت من القمر، فعلا مشفتلوش ولا فيلم بس هو باين عليه ظريف وحركاته مميزة، اللى بيعجبنى لأنى شفتله فيلمين هو محمد هنيدى عاجبنى جاءنا البيان التالى بجد بجد دمه خفيف، أما بقى اللى بحس ان تاريخ الصلاحية بتاعه انتهى من زمن هو عادل إمام وسورى لعشاقه بس هو ده زوقى، بحس ان عادل إمام عامل بالضبط زى رئيس دولة متخلفه من العالم التالت عشر لسه متمسك بالحكم رغم فقدانه مؤهلات الاستمرار على الكرسى واللى حواليه والصحافة عمالين يهللوله. ده غير انى مبتعجبنيش طريقته لما بيتكلم فى السياسة، عندك كلام حلو فى صالح الحقوق الأساسية والحريات للمواطن أهلا وسهلا، معندكش يبقى متقعدش تنظر فى كلام احنا عارفين ليه ومقصود بيه أيه
.
أنا مالى النهارده بنتقد فى الناس كده عمال على بطال
.
سيبكوا من كل ده، اللى ضاع منى بقى هو حضور مهرجان الرقص الشرقى فى القاهرة الأسبوع اللى فات ، آه الرقص الشرقى ووووووماله، هى الرقاصة دى مش برضه انسانه على رأى الجملة الخالدة فى افلام حسن الامام، عرفت عنه بعد ما خلص، معلش السنة الجاية ربنا يدينا عمر