Tuesday, July 10, 2007

اليابان ـ بارت تو

سبق وكتبت جزء أول عن انطباعاتى عن اليابان بعد زيارتها والاقامة فيها لفترة
.
من كتر ما اليابان مميزة تركت فى نفسى العديد من الانطباعات والذكريات التى لا تنسى
.
ـ موضوع الأدب اليابانى ليس مبالغة، الناس هناك تتعامل ظاهريا بأدب شديد ودرجة عالية من الاحترام الغير، وهو ما يمكن ملاحظته فى أمور بسيطة مثل كمية الشكر الرهيبة وترديد عباراتها أكثر من مرة والانحناء الذين يصاحبون مثلا الخروج من محل ما بعد شراء بضاعة منهم، وعلى رأى أحد الاصدقاء أن الشكر الذى نلاقيه يعطينا الانطباع أن العشرين دولار التى دفعنا مقابلها بالين كانت المبلغ المتبقى لسداد ديون المحل وعدم الحجر عليه
.
كذلك من علامات الأدب أن يناولك الشخص شيئا بيديه الأثنين وليس بيد واحدة
.
ـ النظافة شىء مقدس، سواء النظافة الشخصية أو نظافة المكان، أرخص مطعم والذى تأكل فيه وجبة تتكلف 15 دولار أو أغلى مطعم متساويين من ناحية النظافة، وأنا يمكن لم أدخل أغلى مطعم ولكن تمت دعوتنا مرة فى رستوران فرنسى فخيم
.

ـ حادثة لن أنساها ,اقسم بأنه لا توجد ذرة مبالغة فيما أكتبه، مرة وأنا فى طابور شراء تذكرة المترو من الماكينة أن لاحظت أن احد الأشخاص السابقين على مايبدو نسى باقى الفلوس بعد شراء التذكرة ـ مكان نزول التذكرة من الماكينة هو نفس مكان نزول باقى الفلوس ـ كل الافراد الذين كانوا أمامى فى الطابور أو بعدى كانوا يزيحون النقود المنسية جانبا ويأخذوا تذكرتهم وباقى نقودهم فقط، بالنسبة لى ستظل هذه الحادثة أعجوبة
.
ـ التواضع صفة محببة جدا وموجودة بكثرة فى اليابان، وكذلك روح الجماعة، وأبسط مثال رأيته بنفسى أنه فى أوقات هطول الثلج كان جميع العاملين فى فرع البنك القريب من مكان أقامتى بما فيهم المدير يقومون معا بازاحة الثلج من أمام مدخل البنك، فكرة أن المدير ده شخصية كبيرة ومش مفروض يعمل كده مش موجوده فى قاموسهم
.
_ أحب بس الأشارة الى أن اليابان كمجتمع ليس مثالي كما قد يتخيل البعض، واليابانيون كانوا يقولون لى أنه نظرا لكونى ليس من أهل البلد فلا أستطيع أن ألمس ما يعانونه، ولكن مع ذلك بجد رأيت فى اليابان ايجابيات تفوق الوصف وكم أخلاق وذوق وتهذيب واحترام فى التعامل أكثر من رائع
.
ـ بالنسبة لشكاوى اليابانيين من مجتمعهم وجدت أنها تتلخص دائما فى الآتى
الضغط النفسى المستمر من كثرة العمل والرغبة فى الاجادة
الضغط النفسى من تقديس اليابانيين لعادات وتقاليد تدعو للانصياع مع قيم المجتمع ككل ومنها احترام شبه مقدس للأقدم والأكبر سنا والأكثر خبرة الخ
المعاناة من صغر المساحات فى كل شىء بدءا من المنزل
.
ـ من ذكرياتى فى اليابان هناك حادثة طريفة بصراحة ترددت قبل كتابتها، يعنى يمكن يراها البعض خارجة شوية أو تخرج عن الأطار الذى أحب أن تكون مدونتى عليه، ولكن بعد شوية تفكير قلت فى نفسى إذا كنت حكيتها لأصدقائى الذين يعرفونى شخصيا، فمن الهبل أن أخجل من ذكرها ليقرأها اصدقاء النت وبقية قراء المدونة، وهاهى

قبل سفرى كان لى صاحبة صايعة شويتين عندها بوى فريند نقول مثلا أسمه عادل ـ متزعليش يا كتكوته لو قريتى الكلام ده ـ ، المهم لما عرفت أنى هسافر اليابان جت ودار بينا الحوار ده
.
هى: أنا قلت لعادل على موضوع اليابان وسفرك وهو بصراحة قاصدك فى خدمة من هناك بس خايف يكون بيتقل ولا حاجة
أنا: بقى ده أسمه كلام، عادل بيكسف منى؟ بس أمرى لو حاجة أقدر أعملها طبعا مش هتأخر
هى: هو أصله عايزك تشترى له كوندوم فوسفورى
أنا بذبهلال: نعم؟
هى: آه واقى ذكرى فوسفورى يعنى من النوع اللى بينور فى الضلمة، هو بيقول أنه قرا عنه أنه موجود فى اليابان بس
أنا: انتى طبعا بتهزرى، عايزانى أدخل صيدلية وأقول لهم فيه كوندوم فوسفورى، طبعا يعنى انسى انتى وسى عادل بتاعك
هى: لأ، ما هو قال أنه الحاجات دى مش بتبقى موجوده فى الصيدليات، دى عادتا بتبقى فى السكس شوب
أنا: كمان؟ لا دا انتوا خرفتوا انتوا الاتنين، سورى طبعا مقدرش
.
المهم سافرت اليابان وفى المجموعة اللى كانت معايا اتلميت على شخصين كنت معاهم طول الوقت، واحدة بنت أسمها كارمن من بيرو فى أمريكا اللاتينية وشاب أسمه ريكاردو برضه من الاكوادور فى أمريكا اللاتينية، دول كانوا أقرب ناس ليه لان اللاتين فيهم خفة دم وروحهم زى روحنا المصرية ولكنهم بشكل عام مرحيين أكتر مننا بكتير وبيحبوا التهييص والفرفشة زى عنيهم
.
على فكرة كان فيه أخ شنف مصرى فى المجموعة بس ده حكايته حكاية وعمل مرة مشكلة صغيرة تستاهل تتحكى لوحدها، وأنا طبعا كنت بحاول أتجنبه بقدر الإمكان لكن فى حدود الذوق والادب
.
المهم كارمن وريكاردو دول كانوا آخر صياعة ومالهمش كبير، مرة طقت فى دماغهم نروح الرد زون أو منطقة الليل فى طوكيو وأسمها شنجيكو، ولما قلتلهم مش خطر، ريكاردو قالى ان المنطقة مافيهاش أى خطورة وأننا مجرد هنمشى فى الشوارع الهايصة هناك مش أكتر
.
واحنا ماشيين افتكرت الاخت بتاعة الفسفورى، فحكيت لهم الحكاية بضحك، لقيت ريكاردو قاللى طب وفيها أيه ندخل أى شوب ونسألهم، طبعا كارمن العسولة ما صدقت حاجة فيها تهييص وضحك ووافقت على طول، قمت قلتلهم أنا كمان: آه عادى نسأل طب ومالو
محبتش بقى أعمل فيها سهير البابلى فى ريا وسكينة وهى بتقول يا كسوفى يا كسوفى
.
دخلنا الشوب وابتدا ريكاردو يتكلم مع الراجل اليابانى واكتشفنا ان معلوماته فى الانجليزى أقل بكتير من معلوماتى فى لغة شمال الصين فى القرون الوسطى، يعنى حتى كلمة كوندوم مفهماش بس فين وفين ريكاردو اللى دمه بجد شربات وصل معاه لحد ما فهمه كوندوم، جه بقى الدور على كلمة فوسفورى، شمال يمين الراجل مش فاهم احنا عايزين أيه، قام ريكاردو مشاور له تحت عنده وقال له: لايت لايت، طبعا لو تشوفوا التعبير على وش الراجل كان يساوى ميت مليون يورو، طبعا قالك دول جماعة بيرفرتيد ـ أى منحرفين ـ نور أيه اللى عايزينه ينوروه تحت
.
خرجنا من المحل واحنا فطسانين على روحنا من الضحك ومهما أوصف الموقف ده عمل فينا أيه ساعتها كنا ههنقع على الأرض كل ما نفتكر منظر الراجل، أنا بطنى بجت وجعتنى يومها من كتر الضحك وقلت الحادثة دى بالسفرية بحالها، ولحد دلوقتى بضحك لما بفتكرها
.
أيييييييييه ذكريات
والسلام ختام

3 comments:

Anonymous said...

بعرف كتير ناس سفروا اليابان

أنا إطلاعي على اليابان من القراءة فقط

اليابان و بظن دول الشرق الأقصى حكايات لعالم غير مكتشف

يعني ب في 3 بلدان بحب اشوفهم همّ كوريا الجميلة
اليابان المنظمة
الصين الغامضة

نرجع لليابان..

البلد ده قصة نجاحه هي قصة تعبه
الهوّس بضرورة التمدّن الغربي
جعله مدمن عمل
بس مكتئب
حياة

لأن قيمه تم إحلال قيّم غربية مكانها
بالتالي بيلجىء الكثير من كتابهم
إلى الكتابة الغرائبية عن عوالم يختلط فيها الحقيقة و الخيال...

و أما بالنسبة لأدبهم و تراثهم فحاجة
عجيبة و مدهشة جدا

و ربنا ينولنا سفر لليابان :)

المدونة: ما بعتقدش إني حنفع في إن تكون لي
مدونة خاصة بيّ بس شكرا جدا
لتشجيعك

ناردين said...

استمعت جداً وانا قاعدة اقرا حسستيني اني جيت معاكي وشفت الناس وطريقتهم المميزة في التعامل والمطاعم وانتي بتكلمي كارمن وريكاردو يعني من الآخر فسحتيني فسحة حلوة وانا قاعدة مكاني من كتر ما كلامك بيوصف حلو
المهم بقى .. سؤال بيلح على ذهني ..هو عادل كان عايزه فسفوري ليه؟؟؟؟؟؟؟؟؟؟؟؟؟؟؟؟؟؟؟؟؟

Anonymous said...

فعلا عزيزتي بلاك كايرو روز الاحترام و الأدب و النضافه حاجات ساعات بنفتقدها هنا
تلاقي لما حد بيشكر حد هنا كأنه ارتكب فعل فاضح و تلاقي الناس مستغربه مني لما بقول لعامل البوفيه يااستاذ كذا
كأن الادب بقه شئ غريب في مجتمعنا
مش حتكلم بقه عن النضافه دي حاجه مهمه اوي اوي
و اجمل حاجه عجبتني في كلامك في موضوع النضافه فكره ان مفيش فرق بين مطعم غالي او رخيص في موضوع النضافه مش زي هنا حتي الغالي برضه ممكن مايكونش نضيف و يداروه بالبلاوي اللي بيعملوها
روح الجماعه فعلا مهمه اوي
بس اديكي شايفه حتي في الألعاب الجماعيه عندنا تحسي ان كل واحد فاهم انه بيلعب لوحده مش بروح الفريق

القصه تجنن ياروز هاهاهاهاهاها
و في الاخر بعد كل ده ماعرفتوش تجيبوه؟
ابقي يابنتي اتعلمي ياباني عشان المواقف الصعبه دي
:)))