Monday, October 29, 2007

عن الحب

بى عيب وهو عدم قدرتي على النظر لأي شخص فى عينيه لأكثر من ثانيتين، حتى من أحببتهم وملكوا عقلي وقلبي فى أيديهم فى وقت ما، لم أكن أستطيع ـ حتى فى أقصى لحظات الحميمية والمشاعرـ أن أنظر فى العينين لأكثر من ثلاث ثوانى على الأكثر. البعض رأى فى عدم قدرتي هذه سببا للشك فى صدق مشاعري أو فى الانتقاص منها، ولكنى ببساطة لا أستطيع
.
وأندهش حقا حين أجد بعض المحبين يركزون النظر لبعضهما فى العينين لفترة طويلة، فهي تنقل مشاعرهم وتخلق لديهم نوع من التواصل الجميل والعميق
.
ليتنى أستطيع ولكن لا أقدر
ـــــــــــــــــــــــــــــــــــــــــ
ـ رأيت مرتين تجربة أن يعطى أحد الأخوة أبنا أو بنتا من أبنائه إلى أخيه المحروم من نعمة الإنجاب ليقوم بتربيته
هل هذا ينتقص من حب الأبوين لهذا الابن أو هذه الابنة؟
.
لا أدرى، ولكنى اندهشت منها وفى هاتين الحالتين كان الأخ المحروم من الإنجاب أكثر غنا ووفرة من أخيه الأب
في إحدهما عرفت الموضوع من الأبن نفسه حين سألته بعفوية عن سبب إطلاقه لكلمة بابا على شخصين مختلفين، فأجابني وقتها بحدة لم أفهم سببها في بادئ الأمر قائلا : من شدة حب والدي الحقيقي لأخيه الذى لا ينجب، وافق على أن أعيش واسافر معه ومع زوجته وأصبحا بمثابة والدين آخرين لى، هل هناك معلومات أخرى أخبرك بها؟؟
فأجبت وقتها ببساطة : لا لقد كانت مجرد ملحوظة جرنا إليها الحديث، ولا تعنى رغبتي في استطلاع أي أخبار عائلية عنك
.
ولكنى بجد أحسست بنوع من الدفاع الهجومى فى حديثه، وأعتقد أنه طبيعى بالنظر الى أن رد الفعل الشائع لدى أغلب المصريين هو الشعور بالسلبية تجاه عمل كهذا
ـــــــــــــــــــــــــــــــــــــ

هناك مواقف صغيرة جدا تعكس وجود أو عدم وجود الحب
.
حضرت مرة موقفا من هذه المواقف بين خطيبين جديدين لم يكونا قد عرفا بعضهما بعد بما فيه الكفاية، فقد كانت خطوبتهما من نوع زواج الصالونات
.
كنت معهما فى سيارة الخطيب وبعد أن أنهينا مشوارنا كان عليه توصيلنا الى شارع مصدق لأن خطيبته تركت سيارتها هناك
وقفت سيارته على يمين الطريق ونزل هو وخطيبته وأنا، وسلمنا كلنا على بعض للتوديع ثم كانت خطيبته أول من أخذ سيارتها وانطلقت وكان عليها أن تستدير بالسيارة فى الاتجاه المعاكس باتجاه الدقى ونظرا لأن فتحة اليوـ تيرن كانت قريبة فقد أنتظرها خطيبها ليتأكد من أنها لفت صحيح دون مشكلة وسارت فى الاتجاه المعاكس
.
توقعت منها بعد أن تلف وحين تصبح سيارتها وسيارة خطيبها متحاذيتين، أن تنظر له وتحييه برأسها أو بيدها، ولكنها لم تفعل
.
حين رأيت هذا المشهد قلت فى نفسى: اذا كانت لا تحب خطيبها فهذا مفهوم فالزواج مرتب ولم تنشأ بينهما بعد ألفة أو مشاعر حميمية، ولكن هذا التصرف دلالة على عدم مراعاة المشاعر أو عدم الرغبة فى ابداء مشاعر حلوة
.
وقد كان
.
تم فسخ الخطوبة فى أقل من شهر لأسباب أخرى ولكن تدور فى نفس الفلك
.
لا أحب أحيانا أن أحمل بعض التصرفات الصغيرة أكبر مما تحتمل، ولكن أحيانا أخرى بعض التصرفات الصغيرة لها دلالات واضحة، ويبقى علينا أن نعرف متى نفرق بين هذه التصرفات وتلك
.

23 comments:

سمـــــــــا said...

مساء الفل يا جميل

بصى موضوع القدرة على الاستمرار انك تبصى فى عيون اللى بتحبيه او اللى بيكلمك عموما حاجة تختلف من انسان لانسان ومش شرط انك تكون مشاعرك مش صادقة لان فيه اسباب كتير اوى للموضوع دا منها :
اولا انك تكونى انسانة خجولة بطبعك ودا بيخلى المسألة صعبة وسخيفة فى بعض الاحيان .
ثانيا ان عيون اللى قدام تكون جريئة جدا ، فيه ناس فعلا بيبقى صعب تبصى لفترة طويلة فى عينيهم لانها بتكون جريئة اوى او وقحة اوى او دخلت جواكى لدرجة انك تحسى انك عريانة ووقتها بتحسى ان كبيرك تقومى تجرى من قدام الشخصية دى .
ثالثا ان مشاعرك تكون قوية اوى ناحية الشخصية دى لدرجة الارتباك اللى بيكون مصحوب بخجل وبتكون النتيجة برضه انك تبقى عايزة تقومى تجرى .
يمكن انا من الناس اللى لما بتكلم مع حد احب اوى ابص فى عينيه مش شرط اكون بحبه لكن اى شخص عادى لان العيون احيانا بتقول كلام تانى اللسان مش بيقوله فبحب اوى ادقق فى عين اللى قدامى وبصراحة بتضايق لما اكلم حد ويقعد يهرب بعينه يمين وشمال بس مع استمرار الحوار بحاول اخفف احساس التوتر فى نفس اللى قدامى بأنى مركزش اوى فى عينيه وادور وشى من وقت للتانى علشان اديله مساحة حرية انه يحس انه بدأ يبقى براحته ويتعود على النظر لعينى من وقت للتانى من غير قلق ولا ارتباك وصدقينى الحيلة دى بتفلح عادة معايا :))) ، انتى بقى ليه مش بتقدرى تستمرى فى نظر فى عيون اللى قدام؟؟

لانك خجولة او هما عندهم جراءة زيادة ؟؟ واللا ايه السبب بالظبط ؟ اثرتى فضولى :))
_------------------------------

موضوع ان حد يدى حد من اخواته طفل من اطفاله دا شفته مرتين مرة فى واحدة من جيراننا كانت اختها اديتها بنتها من وهى صغيرة تربيها والبنت طبعا كانت عارفة وعايزة اقولك ان البنت كانت متعلقة جدا بخالتها اكتر من امها وحتى لما كانت بتروح لمامتها زيارة كانت بتزهق وترجع لخالتها تانى ، وقصة تانية كانت لقريب ماما مراته برضه اختها اديتها ابنها لانها كانت جايبة تؤأم واديتها ابنها وهو مولود وعايزة اقولك ان الولد اتكتب بأسمهم وانه لغاية يومنا ميعرفش الحقيقة وبأمه اللى هى المفروض خالته توفت من فترة ومش قادرة اقولك حزن عليها اد ايه وخالته اللى هى امه الحقيقية لسة عايشة بس طبعا ميعرفش انها امه توهتش معلش بس الحاجات دى بتحصل وانا عاصرت كتير من الحالات دى حواليا .

------------------------------

بالنسبة لموضوع تقدير المشاعر والحب مش هفتى فيه لان انا بصراحة ممكن اكون قليلة الذوق لو ارتبطت بحد مش بحبه والنتيجة دايما بتكون فشل زريع للعلاقة فالاسلم لكل الاطراف ان يكون فيه حب او على اقل تقدير احترام ومعزة .

Anonymous said...

موضوع عدم القدره على النظر لعينين الناس او المحبين تحديدا ده غلط لانى اول اسهم الحب من العنين او بمعنى اخر اول شعاع حب ياريت تحاولى ىتقدرى
موضوع انى اب يدى ابنه لاخوه هى بتحصل فى الصعيد بشكل تانى بيكون العم متكفل بمصاريف ابن او بنتين من ابناء اخوه طبعا بس نادرا ما يكون مقيم معاه
الموضوع الاخير مابنيى على باطل فهو باطل واى حاجه قائمه على المصلحه او الشكل التقليدى حتقع سواء كانت حب او صداقه او اى مسمى تانى
تحياتى

Anonymous said...

صباح الخير ياجميله

تلات مواضيع مميزه في بعض

كنت لسه بتكلم ويا حبيبتي في موضوع العيون ده بقولها اني معنديش القدره علي اني ابص في عين اللي بحبه مش معناه طبعا اني مابحبهاش اوي لأ بس ماعرفش ايه السبب بس اهو الواحده حتحاول يامسهل
مالوش علاقه و الله بموضوع الحب ساعات العيون زي مابيقولوا بيكون ليها لغه و ممكن نفهم بعض من مجرد نظره عين و مش معني كده يعني ان الواحد مايبصش خالص بس التطويل بيكون ساعات غير مريح

بخصوص موضوع الحاجات البسيطه اللي ممكن تكون مؤثره شوفي ياجميله ساعات كتيهر نكون بنعمل حاجات احنا شايفين انها بسيطه بس بتكون مستفزه لبعض الناس مش معني ان الحاجات دي بتريحني انها حتريح الكل
كمان لازم الواحده تكون حسيسه و تكون عارفه اللي بيضايق حبيبها او حبيبتها و ماتعملهاش عشان ماتزعلهاش منها و لو ان المصالحهب رضه بتكون لذيذه اوي

تحياتي ليكي علي موضوعاتك الجميله المتميزه دايما

مدحت محمد said...

اه النظر للعيون ده
انتى بتتكسفى شكلك
فكرتينى لما كنت بحب
كنت اكتر حاجة بحبها
اصلى مكنتش اعرف اعمل غيرها والله
انى اقعد ابصلها كتير
لدرجة انها عرفت انى بحبها من عيونى
مش بجاحة انك تبصى
ممكن تكون النظرات اعجاب من غير ماتحسى
تلاقى نفسك انتى ممكن تحصلك
الله اعلم
ياللا تحياتى

على باب الله said...

أسلوبك في الحكي مرعب

و جميل بشكل وحش

أنا أسعدني الحظ أني جيت مدونتك لأول مرة

بس أكيد ها أكرر الزيارة

كتابة said...

وعن الأشياء الأخرى....

(1)
أنا أيضا يحدث لي ذات الإرباك و أحيانا كثيرة لا أبقى قريبة جدا ممن أحب
مثال: قد أكون موجودة بذات الغرفة لكن على مبعدة لإرتباكي العارم لكن مع الوقت أتخفف من ذلك وتبقى العادة وجودة ولو طفيفا.

(2)
أجد في ذلك صعوبةأن أتخلى عن ابن لي لأختي أو أخي وإن كنت عاصرت شيء من ذلك القبيل لأحد أقاربي ،بقى يحب من ربته ويتطبع بطبعها(جدته) أكثر من والدته
:)

(3)
لو دخلنا بيت بأساس غرفة ولم نرى أثاث أو رأينا غرفة كاملة بأثاثها دون إكسسوارات رائقة ومكملة ،سنحس بوجود خلل ما أحيانا نمسك به و أحيانا أخرى نشعر به دون قبض
هكذا الحب أو المشاعر ، إن لم تكن كاملة..شعرنا بخلل ما قد نراه ماثلا وقد نشعر فقط به

أخيرا أوافق أجندا
فعلا 3 فقرات عن لحب و الأشياء العالقة به ...مميزة جدا

تحياتي
BLACKCAIRO ROSE

Nani said...

السلام عليكم
انا على عكسك تمام
واذا اردت ان اتجاهل انسان
اظر الى كل شيء فيه باستثناء عينيه
باعتقادي ان الاشياء و التصرفات الصغيرة هي ما يقربنا او يبعدنا عما حولنا من شخوص

Coca said...

كثيرا ما تكون ملاحظه التفاصيل التي يجدها البعض ليست ذات اهميه هي اكبر اهميه من مواضيح كبيره بحالها

ــــــــــــــــــــــــ

الخجل اجمل ما يمكن

تحياتي

kasber said...

قرأت مره من لاينظر الي عينيك فأما كاذب أو خائف أن يفتضح أمره
...........................
في مصر غالبا ما تكون افعالنا مخالفه لما نراه وما ننتظر من المجتمع
باع بين ما نكون وما يريدنا المجتمع ان نكون
لذا تكون الحده انعكاس لكل هذا التشويش
...........................
هنيئا لكي علي أستيعاب المجهول
أعتقد إني علمت لما لا تحبين النظر في عيون محدثك مهما كان قربه

sara said...

دايما كلامك بحسه _رغم قوة اسلوبه _ انه طالع من القلب وبيوصل للقلب بمنتهي البساطه بدون اي تكلف

البوست دسم ومحتاج كومنت طويل شويه بس انا هحاول اختصر

_عدم قدرتك علي النظر في عين محدثك ..انا احيانا بعاني منها ..بصراحه مش مع الناس كلها ..يمكن لاحظت اني بعاني منها مع الناس اللي بحس ان شخصيتهم قويه او اقوي مني تحديدا_ مع العلم اني المفروض قوية الشخصيه ومسيطرة الي حد ما ومش عارفه دا عيب ولا ميزة الصراحه_ بس لاحظتها ان في ناس باجي قدامها واحس ان نظراتهم بتقتحمني وانا مابحبش الشعور دا ..مابحبش احس ان حد ممكن يقرا اللي في دماغي من مجرد بصه في عنيا بحس انه بيحاول يجردني من ملابسي وبتضايق من الشعور دا ..

_ اما بالنسبه للنقطه التانيه انا يمكن عيشاها حاليا مع امل اختي الصغيرة اللي هي بنت ابن عم امي ..وطبعا بما اني كنت وحيدة بابايا ومامتي ..وموضوع جوازي كان هايسبب ازمة دبلوماسيه عندنا في البيت وخصوصا مع ظروف سفر بابا المتكررة ..كان الحل المتاح واللي حصل بالصدفه البحته وبدون اي ترتيب ان امل تيجي تعيش معانا ونربيها احنا ..وفعلا امل معانا من وهي عندها تقريبا 6 شهور من وانا في تانيه كليه تقريبا ولحد النهاردة بقي عندها 6سنين

_ اما بقي النقطه التالته دي ..فأقدر اقولك بمنتهي الامانه انها النقطه اللي عانيت منها طول عمري ولسه بعاني لحد دلوقتي ..وهي نقطة التصرفات الصغيرة اللي الناس بتشوفها عاديه جدا بس فعلا بتعكس معاني اكبر من مجرد الموقف نفسه .. مش اي حد عنده القدرة علي قراءة المواقف الصغيرة او قراءة مابين السطور ..وللأسف انا من اللي ربنا ابتلاهم بالقدرة علي قراءة مابين السطور ..واللي من الصعب اني اناقش فيها اي حد لأن الناتج بيبقي غالبا ..انتي هواله وبتكبري المواضيع ..او انتي هسهس ومعقدة نفسيا

الكلام اخدني جدا وطولت عليكي في الكومنت معلش ..بس اعمل ايه بقي لبوستاتك اللي بتخلي الواحد يسرح معاه وبيحس دايما انه شايف نفسه فيها

تقبلي تحياتي

He and She said...

avoiding the eye contact is men 3alamat el khaggal. Howaa fe a7la men keda> tb 7atta hati 3enek fe 3eni

blackcairorose said...

معرفش يا سما ايه السبب بس انا فعلا مبقدرش اركز فى عين حد سواء الموضوع جد والعلاقة زمالة و الحديث عام او مع من ارتبط بهم عاطفيا وفى لحظات الحب، فى الحالتين لا استطيع النظر فى عين أحد سوى لفترة قصيرة جدا


حكاية ان الابن او الابن يفضل من غير ما يعرف اهله الحقيقيين دى صعبة شوية، يمكن بتفكير عقلانى نقول ان الاهل هم اللى بيربوا مش مجرد اللى بيخلفوا بس فيه حاجة جوايا ترجع تقول معرفة الام والاب الحقيقيين شىء لا غنى عنه

وخالص الود والتحية ليكى ولناردين

blackcairorose said...

رئيس جمهورية نفسى

متهيألى جواز الصالونات مش دايما بيبقى مصلحة

قدامى حالات حب انتهت بالطلاق، وجوازات صالونات مستمرة وباين عليها كويسة

الجواز فعلا مالوش مقياس، وكنت زمان دايما بقول ان الجواز عن حب اجمل حاجة بس والله من اللى بشوفه قدامى وصلت لقناعة انه لا مش بالضرورة انه أحسن

blackcairorose said...

الى المطربة أجندا

انا بحس ان البص فى العيون زى البص للشمس شىء مبستحملوش خصوصا لما تكون العيون واسعة وحلوة

العيون اللى لونها ازرق فاتح وهى نادرة جدا فى مصر بتخلى الدنيا تلف بيا من غير مبالغة، مرة وانا فى اعدادى كان فيه واحد مامته المانية ولون عينه فى زرقة السما وهى فاتحة، والله من غير مبالغة كنت بخاف ابص فى عينه

الموضوع لازمه علاج الظاهر!!

blackcairorose said...

دوحا

بصراحة آه بتكسف

لول

وشكرا على المرور والتعليق والتشريف

blackcairorose said...

على باب الله

جميل بشكل وحش
واسلوب مرعب

ممكن أنا برضه أقول إن تعبيراتك غير تقليدية بالمرة؟

وشرفت المدونة

blackcairorose said...

كتابة

أنا أيضا ينتابنى شعور الارتباك كثيرا فى بداية مرحلة الاعجاب

ومثل بعض الناس قد اتعمد تجاهل من أعجب بهم، لا أدرى لهذا التصرف سبب واضح ، ربما نوع من الدفاع عن الذات باسلوب هجومى آلياته التجاهل

هو موضوع كبير يستاهل الحديث عنه باستطراد

يمكن لاحقا

blackcairorose said...

نانى

إذا إردت تجاهل شخص تنظرى الى أى شىء الا عينيه؟

مفهوم وانا أيضا أفعل ذلك، تجنب تام للنظر فى العين إضافة لتجنبى العادى للنظر فى عيون الناس

ولكن ماقولك فيمن تتعمد النظر فى عيون الاشخاص الذين تكرهم او الذين هى على خلاف معهم؟؟

غريبة ونوع من التحدى القبيح فى نظرى، أليس كذلك؟

عرفت شخصية كهذه، تتعمد النظر فى عيون من تكرههم

وله فى خلقه شئون

blackcairorose said...

كوكا

التفاصيل هى البهارات

ولكن زيادة الامعان فى البهارات تفسد الطعام، اليس كذلك؟

على عكس ذلك فى الاعمال الفنية كلما تم الاهتمام بالتفاصيل كلما تم بهاء العمل الفنى

blackcairorose said...

لا أكذب ولا أخاف كاسبر، فقط شعر أننى سوف ألسع عينى إذا ركزت فى عين من أمامى

نعم أهتم بالتفاصيل بس ياليت تكون لدى الحكمة لمعرفة الفرق بين التفاصيل ذات الدلالة وتلك التى بلا دلالة

فانا أؤمن أنه ليست كل التفاصيل ذات دلالة

blackcairorose said...

ملحوظتك جديرة بالتفكير يانون

عمرى ما ربطت بين قوة الشخصية والنظر فى العين، بس وانتى بتحكى حسيت انه ممكن فعلا ان عيون الاشخاص اصحاب الشخصيات القوية تكون لاسعة اكتر من غيرها

التفاصيل زى ما بشوف مهمة، حاجات صغيرة بس احيانا الترجمة مننا بتكون مش مضبوطة وهديكى أمثلة

واحدة اعرفها كان متقدم لها عريس ومرة فى بداية مقابلاتهم فى مكان عام طلب ببقية المينمم تشارج جاتوه واخده معاه البيت

البنت معجبتهاش الحركة دى خالص وخصوصا ان الولد غنى قوى يعنى مش محتاج جاتوه بتلاتين ولا اربعين جنيه، والموضوع ده ساب عندها انطباع انه بخيل

المهم تمت الجوازة من كام سنه ودلوقتى لما بتتكلم عنه بتحلف بكرمه وان مبيبخلش عليها باى حاجة وده اللى احنا برضه حاسينه مش بس من كلامها

انا بقول لنفسى دلوقتى يعنى تصرفه القديم فى الرستوران كان معناه ايه؟ يمكن مثلا لانه غنى قوى كان عايز يديها هنت انه مش بيبعزق الفلوس؟ او يمكن مثلا عايز يشوف اذا كان رد فعلها انفعالى على موضوع اخد الجاتوه؟؟

ده اللى اقصده انو احيانا التفسير المبالغ فيه للتصرفات احيانا يطلع مش صح ولا انتى شايفه ايه؟

انا عندى مثال تانى بس مفيش داعى اطول عليكى اكتر من كده

وتحياتى يا جميل

blackcairorose said...

He&she

ولا خجل ولا حاجة حتى اهه ادينى ببحلقلك من غير كسوف

طارق هلال said...

العبقرية كايرو روز

فى رأيى أن موضوع النظر فى العيون له علاقة بالخطوة التالية
فما تنتظرين بعد أن تتلاقى العيون
هل ستكون محاولة لفهم ما تخبئين
هل سيكون صمتا وترك الحوار للغة لا تعرف إلا الصدق
هل سيقرأ ما بالعيون من لهفة وشوق
كنت أنظر للأرض أحيانا كى أترك لحبيبتى الفرصة للنظر فى عينى
كنت أنظر للبعيد بلا هدف كى أجعلها تتملى من مشاعرى
كان صعبا عليها دوما أن تلاقى عينانا
-----------------

انا أقرأ الناس من كلمات يختارونها للتعبير عن مشاعرهم
فهم يختارون كلمات عميقة حنونة
أو كلمات حادة ومقززة
أو كلمات تائهة وحزينة
بل وتشكيلات الحروف
ومخارج نطقها

لا أدرى أيها يصنع الأخر

طريقة فهم الكلام واختيار الألفاظ هى التى تصنع الأنسان

أم أن الانسان يختار الكلمات التى تعبر عن شخصيته

فما بالك بالتصرفات

يجلس بجوارى الأن مديرى فى العمل
كل الناس يعتبرونه عدوانيا
وأنا قرأته من أول أسبوع
أنه "طفل شقى" ويوما عن يوم يتأكد لى هذا
بفضل تلك التصرفات
الصغيرة وغيرها كثير
------------------------------
عندنا جار أخوه أعطاه ابن من أبناءه التوأم
وكل المحيطين يعرف هذه القصة
ولا أرى بها حرجا

إلا

أنه عندما أنجبوا ولدا عانى الأبن المتبنى قسوة كان يلاقيها ممن كانوا أقرب إليه من أبواه الحقيقين
تلك هى المشكلة الوحيدة