حوارات مصرية ـ الحوار السادس

ـ إنتى عارفة ان اسلوبك فى الكتابة حلو قوى، محدد وواضح
ـ شكرا، انت كمان اسلوبك حلو، مش باقول كده علشان اجاملك انت كمان بس دى الحقيقة
ـ أنا بحاول احط اللى حاسه على الورق من غير تفكير
ـ لا أنا بقى عكسك بقعد اراجع واشيل واحط علشان يطلع المعنى زى ما انا عايزاه من غير زياده ولا نقصان
ـ قوليلى انت بتبصى ازاى لموضوعنا ككل؟ يعنى الايجابيات والسلبيات لو فيه، اقولك، خلينى اجاوب انا الاول، المزايا طبعا انه هيخلى اهلى يبطلو زن فى الموضوع ده، وكمان هيخلينى على راحتى فى حياتى، يعنى يعمل نوع من الاستقرار الاجتماعى والنفسى، ومش شايف له عيوب طالما الامور كانت واضحه من البداية
ـ انا متفقة معاك فى المزايا، اما العيوب فاكبر عيب بالنسبة لى دلوقتى ان صاحبتى مش بالعاه، هى طبعا مش معارضاه قوى زى ما كانت من شهرين بسبب موضوع كده هاقولك عليه بعدين، لكنها لحد دلوقتى تقدر تقول مش مقتنعه بيه ميه ميه
ـ ايه السبب؟
ـ هى كانت قبل كده مش شايفه انه اسلوب صح لمواجهة المشاكل، وكمان هى غيوره حبتين مع انها عارفه كويس ان الموضوع كله اتفاق مش اكتر، زى ماقلتلك هى دلوقتى متقبلاه شويه ومتهيألى شوية بشوية هتتقبله اكتر
ـ وايه اللى خلاها تغير رأيها
ـ احكيلك من البداية احسن، وطبعا الصراحة لازم تكون موجودة واساسية دايما بينا، زى ما سبق وكتبتلك فى الايميل انا عايشه مع بابا وماما واخين ولاد ولينا اخت متجوزه وساكنه جنبنا، طبعا اهلى ليهم حوالى تلت سنين عمالين يزنوا جامد فى موضوع الجواز، وانا شغاله حجج مره العريس طويل مره قصير مره مش عارفة مامته بصتلى ازاى ومره اخته شاورتلى ازاى، يعنى خلصت كل الحجج، وسبحان الله ليه صحبات من ايام الجامعة هيموتوا يتجوزوا ومش لاقيين وانا بقى اللى سوقى ماشى فى العرسان حلو قوى هىء هىء
ـ بختك بقى يا ستى
ـ المهم طبعا اهلى حاسين انه فيه حاجة واغلب ظنهم انى ماشية مع واحد مش عايز يتجوزنى، او حتى زى ما ماما مرة لمحت انى يمكن بعرف واحد متجوز واخدنى بس تسليه، ومش بعيد برضه يكون مخهم راح انى مش بنت ومش عايزة اتجوز علشان مكشفش، لحد ما كنت فى يوم مع مها، دا اسم صاحبتى ـ ورجعت البيت متأخر لقيت اخويا الكبير وهو عصبى قوى مستنينى وكنتى فين ومع مين وكلمه منه وكلمه منى راح ضربنى تسووو على وشى ، انا اتسورت ومسكت فى خناقه ، طلعت اجرى على ماما زعقت له كده بنص لسان وقلبت الموضوع عليه انا ليه مش بتجوز وبرفض العرسان والموال ده، بابا مكنش موجود ساعتها
ـ يا خبر ابيض
ـ انا عنية ازرقت وقعدت يومين مبرحش الشغل، مها لما عرفت الموضوع ده كانت هتتجنن وصممت تيجى البيت تمسك فى خناقه اصلها حمئيه ومبطقش حد يضايقنى، انا بقى اللى ترجيتها تهدى علشان الامور متطينش زياده وانا اللى هبقى فى الاخر خسرانه، بس من يومها البيت كل يوم زى الحريقه والضغط زاد بقى كل ساعة، مها بتقولى اسيبلهم البيت واعيش بعيد من غير ما يعرفو، بس انا بصراحة مقدرش اعمل كده، مش شخصيتى، انا هادية ومسالمة بس انا عايزاهم يحلوا عنى، من يومها مها ابتدت تفكر انه فكرة جواز بشروطى وبالشكل اللى أنا عايزاه ممكن تبقى حل مش وحش فى حالتى
ـ طيب هى عامله أيه
ـ لا مها ظروفها تانية، باباها متوفى ومامتها كبيرة فى السن وملهاش غير أخ واحد عايش بره، شخصيتها قوية وكمان شغلها مديها استقلالية لانها بتسافر لوحدها كتير، دى حتى لو عايزه ممكن تعيش لوحدها، هى بس اللى عايزه تعيش مع مامتها علشان بتخاف عليها لان صحتها مش قد كده وكبيره فى السن وهى اللى بترعاها
ـ مامتها اللى بترعاها؟
ـ لا مها هى اللى بترعاها
ـ آه، وانتو بقالكو اد ايه مع بعض؟
ـ تلات سنين
ـ يا بختكو
ـ آه يابختنا هى حساسه ومخها كبير ودايما بشوف ان اراءها بتطلع صح، حتى لما قلتلها ان اخويا الصغير حنين وانه يمكن هو الوحيد اللى بستريح معاه فى البيت وانى بفكر اقله، حذرتنى جامد وقالتلى ان العيله مهما كانت متفهمة فيه حاجات مش ممكن تتقبلها، وانى لو قلتله ممكن الدنيا تتعك اكتر ومتهيالى برضه كلمها صح فى النقطة دى، وبالنسبه لك انت مفيش حد؟
ـ لا، علاقات عابره كده، كان فيه موضوع جد وراح لحاله، عارفة لما تكونى مش فى سلام مع نفسك صعب تبقى فى سلام مع شخص تانى
ـ عندك حق
ـ بابا مهندس وعايش معاه هو وماما واختى متجوزه، قضينا فترة طويلة فى الخليج ورجعنا لما دخلت الجامعة، ودلوقتى برضه نظام زن يومى، ساعات من غيظى اقول ارميلهم الحقيقة فى وشهم واتسلى بمنظر ذهولهم بس ارجع واقول حرام هم ذنبهم ايه، دى ماما مالهاش حاجة فى الدنيا غيرى انا واختى ودايما حطانا وحاطه راحتنا اول حاجة فى البيت، يبقى دا جزاتها؟ المشكلة انى معنديش حجة، الشقة موجوده والعربية وشغلى كويس وكله
ـ طيب همه مش شاكين فى حاجة؟
ـ واشمعنى يعنى؟ هو انا باين عليه ايه قوى كده؟
ـ لا والله مقصدش انا بتكلم بشكل عام يعنى، اصل فيه اهالى ممكن يعنى يخمنوا
ـ لا بس احيانا كده وفى جزء من الثانية بحس ان فيه حاجة صغيره جوه قلب ماما بتقولها الحقيقة، بشوف ده احيانا فى نظرة سريعة او كلمه متقلتش، يمكن دى تهيؤات او امنيات مش عارف، لكن فى الاخر الامور بتفضل زى ما هى


ـ قوللى انت جاتلك ردود كتيره؟
ـ جت شتايم كتيره، انتى عارفه بقى الانترنت والزبالة اللى ساعات بيلمها، فيه كام رد من بنات عربيات ومصريات عايشين فى بلاد عربية، بس لقيتهم مش حاجة عملية، من مصر ركزت فى الاخر على ردين بس انتى كنتى الانسب وكمان حسيت ان مستوانا الاجتماعى متقارب
ـ شوف هو لسه فيه حاجات كتيره لازم نناقشها يعنى هنقولهم اتعرفنا ازاى، ولو ان من كتر ما اهلى عايزين يجوزونى هيحبو يصدقوا اى حكاية، وكمان لو بابا عمل فيها ابو العروسه وطلب مهر وشقة وشبكه هنعمل ايه؟ انا مش عايزاك تتكلف حاجة لان الموضوع ده بينا بالشركه بس لازم نتفق انا وانت على اللى ممكن نقوله قبل ما اعلن لهم الخبر السعيد ان الحبيب المجهول قرر فى الاخر يتقدم هىء هىء
ـ طبعا لازم نتفق على الامور دى ونرتب لها كويس، أنا أنا عايز اسالك على حاجة بس خايف تفهمينى غلط
ـ لا شوط
ـ بجد مش هتفهمينى غلط؟
ـ يا عم شوط، فيه حد برضه يكسف من جوزة المستقبل..
ـ ايه رأيك فى موضوع الخلفة؟
ـ هممممم بص انا ومها اتكلمنا برضه فى الموضوع ده قبل ما اقابلك، من ناحية المبدأ انا طبعا نفسى موت فى بنت أو ولد وياريت تكون بنوته، بس ازاى يتم الموضوع ده وامتى دا محتاج ترتيب وتفكير، عارف القرارات الخاصة بينا احنا الاتنين ممكن نفكر فيها ونعملها يا طلعت صح يا طلعت غلط، بس لما يكون فيه كائن مولود يبقى ضرورى الخطوه تبقى محسوبة كويس لان ده انسان ملوش ذنب نجيبه فى الدنيا ومنوفروش ضمانات حياه مستقره وسعيده، ولا انت شايف ايه؟
ـ انتى بالضبط قلتى رأيى وانا كمان بحس ان نفسى اكتر فى بنت مش ولد، احنا طبعا محتاجين نتقابل كتير الفترة الجاية نتناقش فى كل حاجة
ـ اكيد بس ليه طلب، يضايقك لو مها حضرت معانا المقابلات، هى عملية فى تفكيرها يعنى هتساعدنا فى حاجات يمكن تطلع لنا
ـ طبعا تشرف، الاربع الجاى؟
ـ كويس بس خلينا ناكد بالتليفون قبليها بيوم، لو قفلت الخط ابقى مش عارفه اتكلم وانا اللى هطلبك بعدها
ـ خلاص اتفقنا الاربع مبدئيا وسلميلى على مها لحد ما اشوفها
ـ يوصل، سلام
ـ تشاو

.