Wednesday, October 10, 2007

حوارات مصرية ـ الحوار السادس


ـ إنتى عارفة ان اسلوبك فى الكتابة حلو قوى، محدد وواضح
ـ شكرا، انت كمان اسلوبك حلو، مش باقول كده علشان اجاملك انت كمان بس دى الحقيقة
ـ أنا بحاول احط اللى حاسه على الورق من غير تفكير
ـ لا أنا بقى عكسك بقعد اراجع واشيل واحط علشان يطلع المعنى زى ما انا عايزاه من غير زياده ولا نقصان
ـ قوليلى انت بتبصى ازاى لموضوعنا ككل؟ يعنى الايجابيات والسلبيات لو فيه، اقولك، خلينى اجاوب انا الاول، المزايا طبعا انه هيخلى اهلى يبطلو زن فى الموضوع ده، وكمان هيخلينى على راحتى فى حياتى، يعنى يعمل نوع من الاستقرار الاجتماعى والنفسى، ومش شايف له عيوب طالما الامور كانت واضحه من البداية
ـ انا متفقة معاك فى المزايا، اما العيوب فاكبر عيب بالنسبة لى دلوقتى ان صاحبتى مش بالعاه، هى طبعا مش معارضاه قوى زى ما كانت من شهرين بسبب موضوع كده هاقولك عليه بعدين، لكنها لحد دلوقتى تقدر تقول مش مقتنعه بيه ميه ميه
ـ ايه السبب؟
ـ هى كانت قبل كده مش شايفه انه اسلوب صح لمواجهة المشاكل، وكمان هى غيوره حبتين مع انها عارفه كويس ان الموضوع كله اتفاق مش اكتر، زى ماقلتلك هى دلوقتى متقبلاه شويه ومتهيألى شوية بشوية هتتقبله اكتر
ـ وايه اللى خلاها تغير رأيها
ـ احكيلك من البداية احسن، وطبعا الصراحة لازم تكون موجودة واساسية دايما بينا، زى ما سبق وكتبتلك فى الايميل انا عايشه مع بابا وماما واخين ولاد ولينا اخت متجوزه وساكنه جنبنا، طبعا اهلى ليهم حوالى تلت سنين عمالين يزنوا جامد فى موضوع الجواز، وانا شغاله حجج مره العريس طويل مره قصير مره مش عارفة مامته بصتلى ازاى ومره اخته شاورتلى ازاى، يعنى خلصت كل الحجج، وسبحان الله ليه صحبات من ايام الجامعة هيموتوا يتجوزوا ومش لاقيين وانا بقى اللى سوقى ماشى فى العرسان حلو قوى هىء هىء
ـ بختك بقى يا ستى
ـ المهم طبعا اهلى حاسين انه فيه حاجة واغلب ظنهم انى ماشية مع واحد مش عايز يتجوزنى، او حتى زى ما ماما مرة لمحت انى يمكن بعرف واحد متجوز واخدنى بس تسليه، ومش بعيد برضه يكون مخهم راح انى مش بنت ومش عايزة اتجوز علشان مكشفش، لحد ما كنت فى يوم مع مها، دا اسم صاحبتى ـ ورجعت البيت متأخر لقيت اخويا الكبير وهو عصبى قوى مستنينى وكنتى فين ومع مين وكلمه منه وكلمه منى راح ضربنى تسووو على وشى ، انا اتسورت ومسكت فى خناقه ، طلعت اجرى على ماما زعقت له كده بنص لسان وقلبت الموضوع عليه انا ليه مش بتجوز وبرفض العرسان والموال ده، بابا مكنش موجود ساعتها
ـ يا خبر ابيض
ـ انا عنية ازرقت وقعدت يومين مبرحش الشغل، مها لما عرفت الموضوع ده كانت هتتجنن وصممت تيجى البيت تمسك فى خناقه اصلها حمئيه ومبطقش حد يضايقنى، انا بقى اللى ترجيتها تهدى علشان الامور متطينش زياده وانا اللى هبقى فى الاخر خسرانه، بس من يومها البيت كل يوم زى الحريقه والضغط زاد بقى كل ساعة، مها بتقولى اسيبلهم البيت واعيش بعيد من غير ما يعرفو، بس انا بصراحة مقدرش اعمل كده، مش شخصيتى، انا هادية ومسالمة بس انا عايزاهم يحلوا عنى، من يومها مها ابتدت تفكر انه فكرة جواز بشروطى وبالشكل اللى أنا عايزاه ممكن تبقى حل مش وحش فى حالتى
ـ طيب هى عامله أيه
ـ لا مها ظروفها تانية، باباها متوفى ومامتها كبيرة فى السن وملهاش غير أخ واحد عايش بره، شخصيتها قوية وكمان شغلها مديها استقلالية لانها بتسافر لوحدها كتير، دى حتى لو عايزه ممكن تعيش لوحدها، هى بس اللى عايزه تعيش مع مامتها علشان بتخاف عليها لان صحتها مش قد كده وكبيره فى السن وهى اللى بترعاها
ـ مامتها اللى بترعاها؟
ـ لا مها هى اللى بترعاها
ـ آه، وانتو بقالكو اد ايه مع بعض؟
ـ تلات سنين
ـ يا بختكو
ـ آه يابختنا هى حساسه ومخها كبير ودايما بشوف ان اراءها بتطلع صح، حتى لما قلتلها ان اخويا الصغير حنين وانه يمكن هو الوحيد اللى بستريح معاه فى البيت وانى بفكر اقله، حذرتنى جامد وقالتلى ان العيله مهما كانت متفهمة فيه حاجات مش ممكن تتقبلها، وانى لو قلتله ممكن الدنيا تتعك اكتر ومتهيالى برضه كلمها صح فى النقطة دى، وبالنسبه لك انت مفيش حد؟
ـ لا، علاقات عابره كده، كان فيه موضوع جد وراح لحاله، عارفة لما تكونى مش فى سلام مع نفسك صعب تبقى فى سلام مع شخص تانى
ـ عندك حق
ـ بابا مهندس وعايش معاه هو وماما واختى متجوزه، قضينا فترة طويلة فى الخليج ورجعنا لما دخلت الجامعة، ودلوقتى برضه نظام زن يومى، ساعات من غيظى اقول ارميلهم الحقيقة فى وشهم واتسلى بمنظر ذهولهم بس ارجع واقول حرام هم ذنبهم ايه، دى ماما مالهاش حاجة فى الدنيا غيرى انا واختى ودايما حطانا وحاطه راحتنا اول حاجة فى البيت، يبقى دا جزاتها؟ المشكلة انى معنديش حجة، الشقة موجوده والعربية وشغلى كويس وكله
ـ طيب همه مش شاكين فى حاجة؟
ـ واشمعنى يعنى؟ هو انا باين عليه ايه قوى كده؟
ـ لا والله مقصدش انا بتكلم بشكل عام يعنى، اصل فيه اهالى ممكن يعنى يخمنوا
ـ لا بس احيانا كده وفى جزء من الثانية بحس ان فيه حاجة صغيره جوه قلب ماما بتقولها الحقيقة، بشوف ده احيانا فى نظرة سريعة او كلمه متقلتش، يمكن دى تهيؤات او امنيات مش عارف، لكن فى الاخر الامور بتفضل زى ما هى


ـ قوللى انت جاتلك ردود كتيره؟
ـ جت شتايم كتيره، انتى عارفه بقى الانترنت والزبالة اللى ساعات بيلمها، فيه كام رد من بنات عربيات ومصريات عايشين فى بلاد عربية، بس لقيتهم مش حاجة عملية، من مصر ركزت فى الاخر على ردين بس انتى كنتى الانسب وكمان حسيت ان مستوانا الاجتماعى متقارب
ـ شوف هو لسه فيه حاجات كتيره لازم نناقشها يعنى هنقولهم اتعرفنا ازاى، ولو ان من كتر ما اهلى عايزين يجوزونى هيحبو يصدقوا اى حكاية، وكمان لو بابا عمل فيها ابو العروسه وطلب مهر وشقة وشبكه هنعمل ايه؟ انا مش عايزاك تتكلف حاجة لان الموضوع ده بينا بالشركه بس لازم نتفق انا وانت على اللى ممكن نقوله قبل ما اعلن لهم الخبر السعيد ان الحبيب المجهول قرر فى الاخر يتقدم هىء هىء
ـ طبعا لازم نتفق على الامور دى ونرتب لها كويس، أنا أنا عايز اسالك على حاجة بس خايف تفهمينى غلط
ـ لا شوط
ـ بجد مش هتفهمينى غلط؟
ـ يا عم شوط، فيه حد برضه يكسف من جوزة المستقبل..
ـ ايه رأيك فى موضوع الخلفة؟
ـ هممممم بص انا ومها اتكلمنا برضه فى الموضوع ده قبل ما اقابلك، من ناحية المبدأ انا طبعا نفسى موت فى بنت أو ولد وياريت تكون بنوته، بس ازاى يتم الموضوع ده وامتى دا محتاج ترتيب وتفكير، عارف القرارات الخاصة بينا احنا الاتنين ممكن نفكر فيها ونعملها يا طلعت صح يا طلعت غلط، بس لما يكون فيه كائن مولود يبقى ضرورى الخطوه تبقى محسوبة كويس لان ده انسان ملوش ذنب نجيبه فى الدنيا ومنوفروش ضمانات حياه مستقره وسعيده، ولا انت شايف ايه؟
ـ انتى بالضبط قلتى رأيى وانا كمان بحس ان نفسى اكتر فى بنت مش ولد، احنا طبعا محتاجين نتقابل كتير الفترة الجاية نتناقش فى كل حاجة
ـ اكيد بس ليه طلب، يضايقك لو مها حضرت معانا المقابلات، هى عملية فى تفكيرها يعنى هتساعدنا فى حاجات يمكن تطلع لنا
ـ طبعا تشرف، الاربع الجاى؟
ـ كويس بس خلينا ناكد بالتليفون قبليها بيوم، لو قفلت الخط ابقى مش عارفه اتكلم وانا اللى هطلبك بعدها
ـ خلاص اتفقنا الاربع مبدئيا وسلميلى على مها لحد ما اشوفها
ـ يوصل، سلام
ـ تشاو
.

23 comments:

kasber said...

يا لقوة الحوار
وانسحاب كاتبه من دائرة النور بلا مسانده لاي من المتحاورين
هل حقا تحدث هذه الزيجات بالبلاد العربيه؟
ومدي نجاحها؟
وما خطورة ما تخفيه؟
كم تمتلاء حواراتك بما نمر حوله ولا نقف لنواجهه
أسجل لكي أعجابي علي قوة وصدق حوارك ولمسه لنقطه حمراء في انفسنا
نهرب ونهرب
ولكن الي أين ..

سمـــــــــا said...

لأ بجد بجد مش قادرة اصدق ان دا حوار انتى مألفاه ... انا من ساعة ما قريت اول كام سطر فيه وانا عمالة اقول مش معقول مش معقول لما ناردين جالها تخلف عقلى منى .. اولا اول مرة اشوفلك حاجة بالعامية غير الردود العادية ومش دايما بيكون بالعامية وانا بصراحة بحب اسلوبك وجرأتك جدا بس برضه مكنتش متيخلة انى اقرالك حوار زي دا متسألينيش ليه وانا مش هتطفل وأسالك اذا كنتى مثلية واللا لأ .

نرجع للحوار الرهييييييييييييب اللى لو مكنش حقيقى مية فى المية تبقى اللى كتبته عبقرية ومش هيكفينى انى ارفع القبعة دا انا هنحنيلك شخصيا قدام ابداعك وصياغة الحوار .

عايزة اقولك انك تقريبا حكيتى بمنتهى البراعة قصتى انا وناردين وكأنك بتحكى عننا بالتفصيل الممل حتى عن ظروف الاسرة كمان بالظبط زي ما حكيتى بس الفرق انى معنديش حد يضربنى بالقلم تسووووو اللى موتتنى من الضحك دى هههههه بس ظروف الزن واحدة .

الموضوع فى منتهى الجرأة لكن تبقى المشكلة قائمة حتى لو لقينا حد زينا يقبل بالشروط ازاى هقدر امثل التمثيلية دى قدام الناس وانا جوايا هبقى عارفة انى كدابة وان كل دا فيلم ؟
ثانيا موضوع الولاد انا شخصيا صعب ادخل فى علاقة جسدية مع راجل حتى لو جوزى وحتى ولو لهدف سامى زي الخلفة فالموضوع دا بالنسبة لى كارثة فى حد ذاته .
ثالثا انا وناردين عايزين نعيش مع بعض ونستقر سوا يبقى مصير الاخ دا ايه والوضع هيبقى ازاى قدام الناس ؟
رابعا افرض الاخ فجأة قرر انه غلطان وانه قرر انه ميبقاش مثلى وعايز نستقر مع بعض كزوج وزوجة طبيعين يبقى ايه الحل ساعتها ؟

سيبك من دا كله بصراحة تسوووو دى عجبتنى اوى

ناردين جنبى وبتدحرج التماسى ووضحت لى معلومة غايبة عنى حيث انى ساعات ببقى ام جهل وانه انك كتبتى خمس حوارات عامية قبل كده ودا السادس.

تحياتنا يا جميل

ناردين said...

كل سنة وانتي طيبة يا الوردة الطيبة وكل حبايبك بخير وسلامة
عيد فطر سعيد وياريت مندوسش ف الكحك والحاجات دي.. قلنا نبعد عن الدسم
بنتمنالك اجازة سعيدة
سما وناردين

ناردين said...
This comment has been removed by the author.
He and She said...

el zaher ana sakran el neharda. Oksem bellah ana mosh fahem enti betetkallemi 3ala aih. What are you talking about. You seem that you are talking to people who know what you talk about and it is only me the attrash fel zaffa

Heart Beat said...

He & She

it was something related to one of your latest posts so check you post about how Egypt changed now and take another look here again then i guess you will get what the post is about if not ba2a

maybe Cairo Rose can help on that by explaining it on her comment to you akid ya3ni.

He and She said...

akh...fatetni de

He and She said...

Now I know the topic but even after that I still find the details hard to interpret. Who is He to Her and who is Maha to Her. You guys are talking about things you all know and I feel I am still the atrash fel zaffa. I thought before that I am fetek. Please explain more. If you see that hard in public then send it to my personal e mail please

Anonymous said...

كل سنه و انتي طيبه ياجميل و عيد مبارك

Anonymous said...

سوري ياجميل
نسيت اعلق علي الموضوع

حوار شيق طبعا و ممكن يكون حل عند بعض الناس و مقبول لكن فيه ناس تانيه الموضوع منتهي بالنسبه ليهم
بس كحل ممكن ينفع لبعض البنات بس اهم حاجه يكون فيه اتفاق من الاول بس برضه ماتمضنيش النداله اللي ممكن تطلع في اي وقت

تحياتي علي الحوار المميز و كل سنه و انتي طيبه مره تانيه

kasber said...

كل سنه وانتي طيبه
عيد سعيد

Anonymous said...

كنت و مازلت بفكر في موضوع الانجاب علي الرغم من كوني مثليه و لكن فكره اني اتجوز راجل عشان الموضوع ده يتم فكره مش مطروحه خالص
لكن لما بفكر دلوقتي بلاقي اننا كنا و مازلنا عايشين في مجتمع شرقي و حتي لو سافرت انا و حبيبتي و عيشنا في مجتمع غربي ماهو طبيعي اننا حننزل اجازات حقول ايه لأهلي؟حقولها جبت البنت دي من مين؟و انتي عارفه عزيزتي ان الأهل مابيسكتوش يعني زن زن زن لحد ماتنطقي

صعب نظلم طفله برئيه معانا عشان نشبع غريزه الامومه لو عيشنا في المدينه الفاضله ممكن نبتدي نفكر في الموضوع ده بس بتهيئلي طول مااحنا عايشين وسط ناس مش معترفين بينا يبقي الطفله البريئه دي و هي لسه صغيره حتقدر تواجه الناس ازاي ؟
لازم قبل مانفكر في نفسنا نفكر في اللي حنجبها للمجتمع و ازاي حتقدر تعيش و مانكونش انانيين
اشكرك علي الطرح المميز و سعيده بتواجدي في مدونتك الراقيه

ناردين said...

اتمنى تكوني بخير
وحشتنا الورقة بعد ما بيعدي عليها قلمك

blackcairorose said...

كاسبر
طرحتى سؤالا هاما وهو لأين الهرب
وسؤالك يطرح بدوره الف سؤال
أيهما أسهل الهرب أم المواجهة؟
هل ثمن الهرب هو نفس ثمن المواجهة؟

الا يختلف ثمن كل منهما بالنسبة لنا وفق ظروفنا وقدراتنا ؟

اليس من الظلم تعميم نمط لمواجهة بعض المشاكل ذات الخصوصية بتجاهل هذه الظروف والقدرات؟

لا أريد أن ابرر الهروب ولا أن أمجد المواجهة ولكنى فقط القى الضوء على صعوبة الاختيار

وكل عام وانت بالف خير

blackcairorose said...

سما وناردين
كلامكم أكثر من رائع لا استحق ربعه

خصوصا وانه يأتى منكم وانتو معرفين باسلوبكم المميز جدا

أحاول رصد او تجميد لحظة ما فى الحوارات

يسعدنى أن هناك تشابه ما بين ما كتبته وبين علاقتكما، والشبه ان شاء الله دائما فى الجوانب الحلوة فقط

الحوارات التى كتبتها يا سما تجارب
شخصية أو تجارب لأشخاص لمستهم عن قرب ربما باستثناء حوار واحد كتبته فى السابق كله فقط من خيالى

ودمتما لى انتم الاثنين صديقتين للمدونة
الغيبة يا ناردين كانت بسبب العطلات والوقت المحدود قوى للنت فى الفترة اللى فاتت وشكرا جزيلا على السؤال

blackcairorose said...

He&she
I thought it was crystal clear that I had spotlighted a conversation between a lesbian girl and a gay guy, but it definitely makes me happier if it can also be interpreted in any other different way!

blackcairorose said...

هارت بيت
البيت بيتك، تستطيعى الاجابة على أية سؤال يوجه لى هنا لأنى أعلم مسبقا أن آرائنا تكاد دائما أن تكون متطابقة يا جميل

وان شاء الله تكونى قد أمضيتى عيد سعيد

blackcairorose said...

أجندا
كل عام وانتى فى حب فى حب!

أما موضوع النداله ده، فساعات بيكون مضمون ميه لميه انه مش هيحصل، فمفيش منه قلق لول

blackcairorose said...

ليلى

سعدت بمرورك وتعليقك وكلامك الحلو المشجع

الاطفال قصة كبيرة محاذيرها كما أوضحتى فى تعليقك صحيحة

ولكنى أتذكر هنا مقطع من فيلم سبق وتحدثت عنه فى المدونة أسمه راقصة فى الظلام حينما سألوا الشخصية الرئيسية فى الفيلم خلال الاحداث عن سبب انجابها لطفل رغم علمها المسبق أنه سيحمل نفس مرضها الوراثى، فاجابت والقهر والألم يعتصرها أنها كانت تتنمى وتحلم بأن تحمل طفل بين يديها وتضمه

والله يا ليلى لا استطيع أن أقول لك كم تأثرت بهذا المشهد ولم استطع تمالك نفسى وانفجرت فى البكاء فى السينما

واهلا بيكى قارئة دائمة يا رب

bio said...

طيب أنا هافترض أنه حوار من خيالك
مع أنه موجود بالفعل وحدث على أرض الواقع
تعالى نتخيل أسوء سيناريو ممكن يحصل لو الأتفاق ده تم لأنه موضوع مش بسيط
تخيلى مثلآ أن الشاب المثلى
أتضح أنه كثير العلاقات
وبدأ يستغل بيت الزوجيه لأستقبال
أصدقائه وخاصة لو أنه من النوع
اللى مش فارقه معاه
ده نتيجته أن الناس والجيران مع الوقت
هايعرفوا بتصرفاته وتبدأو تتعرضوا لمضايقات
على فكره فى شباب كده بيكون مظهره مختلف مع طبيعته
عشان كده لازم فترة خطوبه طويله
بتضحكى
طيب صدقينى أنا شفت سيناريوهات
سيئه وأبطالها ناس مفترض أنهم كلاس
مش بخوفك بس عاوزك تتخيلى كل السيناريوهات وطريقة حلها
لو لقيت فى نقاش هارجع مره تانيه أطرح حلول وأعمال العقل فى الأمور دى مهم من أجل حياه خاليه من المشاكل
باى

كتابة said...

العزيزة

BLACK CAIRO ROSE

فعلا ذهلت
الموضوع بجرأته و صدقة العاليين جعلاه أكثر من
رائع

بالنسبة لي سأخبرك التالي:

كنت على دين أصحاب ذات الفكرة،خاصة أنني لا أحب الأطفال بالتالي لم تكن فكرة الزواج أبدا مهمة
و سعت حبيبة لي بأن تنظم زواج من النوع الإتفاقي لي خاصة بعد زواجها
الغير مرتب
و إنتهى الموضوع

حاليا الوضع إختلف
خاصة أنني
BIXSEXUAL
التردد ذهب و مع طفلة أختي بدأت الفكرة تغزوني مجددا بزواج لايجعلني ملتزمة ،بأن أجد زوج غير مستقر في بلدي
حتى لا ألتزم به
لم أجد لكن الفكرة هذه هي الأكثر ميلا لها

و حبيبتي التي تزوجت..تركتها
بينما حبيبتي التي غفرت ..مازلت معها
وتشجعلني على فكرة الزواج
بشدّة طلبا للإستقرار الإجتماعي

blackcairorose said...

كل السيناريوهات ممكنة يا بيو مثل أى شىء آخر فى الحياة وليس فقط فى مثل هذه الحالة التى ذكرتها أنا فى موضوعى

أما بالنسبة أن هناك سيناريوهات سيئة من ناس يبدو عليهم كلاس، فاتفق معك مائة بالمائة، لم تعد المظاهر الخارجية فى مصر مؤشر حقيقى لنوع الناس أو لاسلوب حياتهم وتفكيرهم

وبدون قتامة استطيع أن اقول أن المؤشر الوحيد لشخصيات الناس الآن هو أن تكون قد احتككت بهم وتعاملت معهم فى ظروف سيئة وجيدة

واهلا بيك فى المدونة

blackcairorose said...

كتابة

انبهرت بما كتبتيه، فهى ومضات من حياتك ولكن كل كلمة يمكن أن تكون محور لقصة وليس فقط لمجرد حوار

لحظة فضفضة منك أقدرها

الأطفال كما قالت لى يوما صديقتى وطبيبتى اللبنانية هم إحدى المتع التى لايدركها الا من ذاقها

وبالتوفيق فى الاختيارات التى لا تبدو لى سهلة تماما