Monday, June 18, 2007

!لأ شربنا

بشوف ان الاغنيات اللى اسمها وطنية بتنقسم لتلات انواع
.
اغنيات مناسبات، كتير منها بيموت لحظة ولادتها تقريبا
.
اغنيات وطنية ممجوجة، أول ما سمعها بفتكر فيلم خلى بالك من زوزو لما محى اسماعيل قعد يقول وهو متشنج: نحن أعظم الأمم بل نحن أعظم الأمم جمعاء، لحد ما الطلبه شالوه على اكتافهم ورموه بره القاعة وهو لسه فى دنيا تانية عمال يكرر نحن أعظم الأمم
.
اغنيات تالته حلوة وبسيطة وبتحاول تخلق نوع من الانتماء والتضامن وروح التفاؤل بين المصريين
.
ومن النوع الاخير ده سمعت من يومين اغنية حتة العسلية شيرين واسمها مشربتش من نيلها، وشيرين بحبها وبحب صوتها واغنياتها اللطيفة، كمان بتعجبنى شياكتها وعلى عكس الكتير بشوف انها حلوة بشكل طبيعى وليس جمال الروبوت زى بعض المغنيات التانية
.
المهم بقى الحاجة الغريبة ان الاغنية لما سمعتها خلقت عندى نوع مختلف من الاحساس وهو الأسى الشديد المعجون باليأس، أكيد مش دى المشاعر اللى المؤلفين والمغنية تصوروا ان ممكن اى مستمع يحس بيها بس الظاهر ان جتتى ومشاعرى نحست تجاه الأغنيات بتاعة الوطن!
.
بس بتفضل بعض اغانى منير والحجار وكل أغانى الشيخ امام عن مصر هى المرجعية عندى فى الاغنيات الوطنية، وحاجة تكسف لما افتكر ان أول مرة سمعت عن الشيخ امام كان من اصحاب سودانيين ولبنانيين اتكلموا عنه بكل تقدير، والراجل غنى فى فترات كان شايفها أحلك فترات فى التاريخ الحديث، بس الظاهر ان ربنا كرمه ومات من سنيين
.
حتى زياد رحبانى ولطيفه اتوقعت منهم حاجة كبيرة ومختلفة وغير تقليدية عن مصر لكن للأسف النتيجة كانت مخيبة لآمالى، الأغنية مش وحشة بس مش قد زياد رحبانى المعروف باغنياته الوطنية اللى زى المشرط، هو اللى قال فى اغانيه: أنا مش كافر بس الجوع كافر والفقر كافر والذل كافر، وهو اللى استهزأ باللى غنوا وخطبوا عن بطولات الجنوب اللبنانى وقال: ولا الشهدا قلوا ولا الشهدا زادوا إذا واقف الجنوب واقف بأولاده، لكن الظاهر بما انه لبنانى ولطيفه تونسية خافوا يقدموا حاجه جامده عن مصر فيتهمهم البعض بالهجوم السلبى زى ما هى عادتنا الجميلة
.
وعلى سيرة الاغانى الوطنية خلونى أنهى بقى بنكته وهى انى شفت من يومين الاغنية الجديده لشعبان عبد الرحيم عن الحرب بين حماس وفتح والاخوة اللى بيتخانقوا على الميراث زى ما بيقول، بجد يخرب بيت البدله التايجر والقميص النبيتى اللى لابسهم وهييييه!
.

4 comments:

Heart Beat said...

Dear Blackcairorose

انا معاكي في تقسيم الاغاني الوطنية بالشكل ده و فعلا الاغاني الوطنية اللي بتتعمل لمناسبة معنية بتموت بإنتهاء المناسبة دي.

من الاغاني الزطنية اللي بعشها مصر التي في خاطري اعتقد ان ده اسم الاغنية برضه. مهما سمعتها ليها معني غالي اوي عندي.

و كمان من الاغاني الحلوة الكام اغنية بتوع ايام الانتخابات الرئاسية في مصر كان فيهم معاني حلوة " في الغربة و احنا بعيد نشتاق لمين غيرها نكبر و نعلى لفوق منها و من خيرها".

اشكرك على الموضوع الجميل ده

Anonymous said...

عزيزتي
blackcairorose
الأغاني الوطنيه دلوقتي بقت وقتيه و تصنيفك صح فيه اغاني مابقتش بتعيش لتاني يوم بس انا شايفه ان زمان كانت الأغاني الوطنيه فيها روح و حماس اكتر من دلوقتي
دلوقتي بقه الموضوع مجرد سبوبه للمؤلفين
طبعا شرين مبدعه و تجنن بس انا ليا تعليق يمكن يكون مش في صميم الموضوع الأساسي
لما بيجوا يصوروا كليب عن مصر تلاقي الكليب حاجه واو كأن مصر دي مفيهاش مقالب زباله و لا ناس بتعمل في الشوارع و لا اي حاجه و الدنيا بيس
انا معاكي دايما في الكليبات بنكون عايزين نظهر احسن ماعندنا بس بلاقي ان الكليبات دي مش بحس بيها بحس انهم بيتكلموا عن مكان تاني غير اللي انا عايشه فيه و بالتالي مش بقدر اتفاعل مع الاغنيه و كلماتها
طبعا زي ماعزيزتي لوست لووف قالت مصر التي في خاطري تجنن و من الأغاني اللي بحبها جدا برضه اغنيات شاديه اللي غنيتها لمصر بحبها و اكيد مانقدرش ننسي وديع الصافي لما غني عظيمه يامصر
بحييكي علي الموضوع المتميز و دايما متألقه ياجميله

sara said...

انا للأسف ماسمعتش الاغنيه..هادور عليها واسمعها

انا معاكي جدا في كلامك..في اغاني وطنيه بتعيش مهما طالت المده ..وفي
اغاني بتموت بموت المناسبه ..انا زي
lost love
بحب اغنية مصر التي في خاطري

بس طبعا في اغاني تانيه بدون ذكر اسماء..تحسسك بالنفاق الاجتماعي

وبعيدا عن الموضوع ..انا بردو بحب بساطة شيرين وجمالها وبحب لهجة التحدي في اغانيها العاطفيه

في اغنية ماسكا عودي بتاعت كاظم بردو انا بحبها اوي ..اسمعيها ممكن تعجبك

تحياتي يا جميل

blackcairorose said...

شكرا ياجماعه وهسمع الأغنية اللى قلتى عليها يانون