الويك اند اللى فات

الخميس اللى فات مشيت من الشغل بدرى، اخدت الكورنيش باتجاه المعادى وجيت عند مصر القديمة واخدت شمال على كوبرى المنيب وجيت بعد كارفور ووقفت عند باتيسيرى ليدام واشتريت تورته ـ طلعت بايته ـ وبعدين بكل حزم وقوة اخدت مخرج طريق القطامية السخنة الجديد
.
المقدمة دى علشان أقول انى قضيت الجمعة والسبت والأحد فى العين السخنة، تلات ايام حلوة بلبطة وميه وسى فوود، الجو كان معقول الصبح وبالليل بس الضهر كان حر شويتين تلاته
.
قعدت فى كام سهرة لطيفة واحده منهم ضمت عدد من صديقات واصدقاء ومعارف وكمان انضمت لينا واحدة من أخواتى، الكلام جاب كلام وشمال ويمين لقينا نفسنا بنتكلم فى موضوعات خاصة بالحب والعلاقات والمجتمع..الخ يعنى الموضوعات اللى واجعة قلب أغلب الناس، اراء وحكايات عادية اتقالت زى أخينا اللى شايف انه مش مفروض تحميل خيانة الرجل للمرأة جسديا بحجم اكبر مما تحتمله لأن الجنس عند الرجل لا يرتبط عادتا بالعاطفة، الى رأى تانى من واحدة أنه لا مانع من نزولها البحر بكامل أناقتها (بلوزة وبنطلون وفستان فوقهم وحجاب كمان دا غير الأندر طبعا) وجت سيرة المدونات فى النص قام حد سأل اذا كان فيه مدونات أو مدونين بين اللى قاعدين قمت رفعت ايدى على طريقة وى موا مدام بس اعتذرت عن اعلان اسمها
.

المهم يومين حلوين ان شاء الله يتكرروا كل ويك اند

.