خواطر صباحية

ساعات بنبقى مبسوطين من نفسنا
وانا عندى الشعور ده اليومين دول
السبب؟
ابتديت من فترة نظام غذائي منضبط، مش القصد منه إنقاص وزنى، لأنني والحمد لله من المحظوظين بجسم طبيعي مائل للنحافة مهما تناولت من طعام (غالبا السبب وراثى) ، ولكن الهدف من الدايت هو جعل طعامي صحي بشكل أكبر، لانى حسيت الشهور اللى فاتت انى "هبلت" قوى فى الأكل، شوكولا و جاتو وكل الاكل المليان كربوهيدرات وسعرات حرارية

عشان كده قررت تضبيط أكلى
وجباتى بقت بشكل أساسي خضروات وفاكهة وفراخ مسلوقة أو سمك على البخار دا فى الغدا، والفطار جبنة قريش وعيش أسمر، العشا يوك، يعنى مفيش عشا ولو فعلا الجوع قرصنى يبقى برتقال، ودا نظامى من سنين

لكن فى الويك اند ببحبحها شوية وآكل البتزا والمكرونات اللى بموت فيها

الجيم برضه بحاول انتظم فيه أكتر، يعنى مرتين أسبوعيا، لكن المشاغل ساعات بتمنعنى من الانتظام

بالمناسبة أنا لا أدخن ولا أطيق رائحة الدخان
ــــــــــــــــــــــــــــــــــــــــــــــــــــــــــــــــــــــــــــــ

.
فيه موقف حقيقى حصل وأعرف (أو على الأصح شفت) بعض أطرافه
الموقف غير عادى، ففكرت الأول أكتبه على شكل حوار من غير ما أقول أنه حقيقى
وبعدين لقيت أنه هيكون حوار غير واقعى بالمرة واللى بيقروا هيقولوا عليه ابتديت أخرف (يعنى أنا يمكن برضه ساعات بخرف، بس عادتا تخاريفى مبتوصلش للدرجة دى)

الموقف ببساطة أطرافه تلاته زوج وزوجة وصديقة للزوجة

الزوج بيشتكى أن الزوجه وصديقتها متلازمين طول الوقت ومبيفترقوش عن بعض، ويعنى أنا شخصيا ممكن أفهم صداقة قوية كده
الزوج ابتدا يتذمر ويقول لزوجته تخف شوية من صاحبتها، وده برضه مفهوم
الزوجة كان ردها ان الصديقة دى فى الغربة هى صاحبتها الوحيدة ومالهاش غيرها والوحيدة اللى بتفضفض معاها وده كمان مفهوم
الخناقات زادت جدا بسبب الموضوع ده

لب الموضوع والطريف بقى ان الزوجة عرضت على الزوج جديا أنه يتجوز صاحبتها كحل لهم هم الثلاثة وحتى لا تبتعد عن صديقتها لانهم همه الاتنين ميقدروش يستغنوا عن بعض

الزوج قلب الموضوع فى دماغه شوية وبعدين رفضه فى النهاية، وأنا بصراحة معرفش أيه السبب الحقيقى اللى خلاه يفكر فيه شويه أوخلاه بعدين يرفضه

الحكاية ميه فى الميه حقيقية وزى ما قلت فى الأول أنا شفت الزوج والزوجة قبل كده ولحد دلوقتى الخلافات لسه مستمرة، على الاقل لحد تلات اسابيع فاتت لما جمعتنى الظروف بيهم فى مناسبة ما

بجد مش من الحكايات النادرة واللى تستحق الكتابة عنها؟

مهما كان الخيال غريب، فى الحياة حاجات أغرب، وده أنا على اقتناع بيه الف فى الميه
ـــــــــــــــــــــــــــ
الرسومات المسيئة اتنشرت تانى رغم التظاهر والمقاطعة و"الا رسول الله"

مصرى مسلم اخد الجنسية الايطالية ويشغل منصب مرموق فى الصحافة الايطالية تحول للمسيحية والبابا بنفسه قام بتعميده الاسبوع اللى فات فى احتفال عام (رأيى الشخصى مبروك للمسيحية بيه، فده اختياره وهو حر، ولو إنى شخصيا بعد ما قريت كتير عنه وعن أراءه ، بشوفه أقرب لليهودية، لكن ما علينا، كل واحد حر فى اختياراته، بنفس المنطق اللى بتتباهى بيه وسائل الاعلام عندنا والمؤسسات الدينية لو تحول مسيحى للاسلام)

الفيلم الهولندى شاهده عشرات الالاف على الانترنت فى خلال ساعات قليلة جدا، بعد ما منعت الحكومة الهولندية عرضه وادانت المخرج، والمخرج قال لو اتمنع الفيلم من النت هيحطه على سى دى ويقف فى شوارع هولندا يوزعه بنفسه (وانا على يقين ان طوابير بالالاف هتستنى فى الشوارع للحصول على نسخة ولو كنت فى هولندا كنت أكيد برضه هعمل كده)
يعنى الحكومة الهولندية وقفت موقف ضد الفيلم اقوى من موقف الحكومة الدانمركية من الرسوم، والمخرج ادان حكومته وقال ان الدانمرك اشجع من هولندا

السؤال بقى

كل ده ميخلناش نعيد التفكير فى صحة وجدوى وموضوعية ومعقولية مواقفنا وردود افعالنا فيما يخص دينا فى الزمن اللى احنا فيه؟؟؟
.