Tuesday, January 29, 2008

حوارات مصرية ـ الحوار السابع



ـ يعنى ايه؟
ـ يعنى الموضوع ده مش عايزه فيه كلام تانى، الطلاق مش لعبه
ـ يا ماما انا قلتلك انتى وبابا واستنيت اكتر من سنه ان الحاله تتصلح وزى مانتو شايفين مفيش فايده وكل يوم بنتخانق اكتر، انا خلاص مش مستحمله وهاطلق يعنى هاطلق
ـ اسمعى بقى متفتكريش انك تطلقى وترجعى البيت تشتغلى وتدخلى وتخرجى زى ما انتى عايزه، لا، هتطلقى ترجعى تقعدى هنا من غير خروج ودخول لحد ما تتجوزى تانى
ـ ايه يعنى حبسه؟
ـ ايوه حبسة مش عايزين الناس تتكلم علينا وباباكى كمان ده رأيه
ـ هوه يفضل متجوزه يا تحبس
ـ آه هو كده، هتطلقى وتمشى على كيفك لأ، هتطلقى تبقى عارفة ومربطة انك هتتجوزى تانى، ساعتها معنديش مانع وهقنع باباكى كمان بموضوع الطلاق ده من غير ما يعرف حاجة عن الموضوع التانى
ـ طيب لو قلتلك يعنى يمكن يكون فيه حد
ـ كده؟ حد مين بقى يا ستى اللى عايزة تسيبى جوزك عشانه؟
ـ لا يا ماما انتى اكتر واحده عارفه المشاكل اللى بينى وبين اسماعيل واللى بقى لها أكتر من سنه، يعنى احنا اساسا مش ممكن نكمل مع بعض، الموضوع التانى ده مدير جديد عندنا فى الشغل مبقلوش غير خمس شهور بس
ـ ومديرك ده مش متجوز؟
ـ كان متجوز وعنده ولد عايش مع مراته، واتفقنا انه بعد طلاقى بكام شهر هييجى يتقدم ليكو
ـ بقى كده، من خمس شهور؟ لما نشوف، المهم يبقى كويس ومتجييش تقولى تانى انه طلع فيه مشاكل
ـ لا متخافيش مدحت حاجة تانية خالص واحنا متفاهمين على كل حاجة وعمرى ما اقتنعت بشخصية حد زيه، وكمان هو ماديا مرتاح قوى
ـ إذا كان كويس كده ربنا يسهل بس المهم تبقى ماليه ايدك منه، وميغيرش رأيه بعد ما تسيبى جوزك
ـ لا متقلقيش من الناحية دى خالص، ماليه ايدى ونص
ـ طيب خلينى اتكلم مع باباكى الاول فى موضوع الطلاق وبعدين نشوف
ـ طيب يا احلى ماما فى الدنيا
.
.
الحوار السادس
http://blackcairorose.blogspot.com/2007/10/blog-post_10.html
.

33 comments:

someone in life said...

هههه ضحكت كثيرا على الاقدار ان تضعين هذا البوست اليوم بالذات بعدما حصلت على الطلاق اليوم .. صدفه غريبة بس انا مش عندي مدحت و لا غيره و مش اتطلقت علشان اي انسان لكن لاختلاف الثقافات و العادات و التقاليد و النظرة الدونية للمرأة .. اليوم حرية .. اليوم عمل و دراسة ربما متأخرة لكن مع تفاؤل ان الغد أفضل و رغم قسوة العمل هي ارحم كثيرا من اللاتوافق .. هل تفهمينني .. تحياتي

سمـــــــــا said...

أخ هما دول الامهات الاكس اكس لارج اللى انا دايما بتكلم عليهم ، يعنى الست عادى بتقول لبنتها هتطلقى تبقى عارفة ومربـــــــــــطة انك هتتجوزى تانى يعنى قبل ما تسيبى الاولانى احجزى جوز تانى تقوليش جوز جزمة !

واول البنت ما اعترفت وقالت انه احتمال يكون فيه حد تانى راحت رقعاها جملة ودا مين اللى انتى عايزة تسيبى جوزك عشانه ؟؟ يعنى لبست البنت تهمة على الفاضى

المخلص ان المجتمع الشرقى كل اللى يهمه ان البنت يكون لها بيت وتكون فى عصمة راجل والحوار اللى انتى كتبتيه بيعكس من وجهة نظرى ان البنت لسة فى نظر المجتمع عار لازم حد يشيله يعنى لو مفيش راجل يبقى تتحبس فى البيت لغاية ما حد تانى يجى يشيل التهمة عن اهلها

وان الاهل دول نفسهم معندهمش مانع انهم يغمضوا عنيهم لو شافو ان بنتهم هتسيب جوزها وتخرب بيتها حتى لو كان اللى بتعملوا دا غلط وحتى لو كانت بتعمل كده علشان الحد الجديد اللى هى قابلته مش لمجرد مشاكل مع الاولانى لكن هيغمضوا عينيهم طالما فيه حد تانى هيشيل الليلة علشان كده الام اكدت فى حوارها على جملة المهم تبقى مالية ايدك منه وميغيرش رأيه بعد ما تسيبى جوزك ( قصدها احسن يغير رأيه فى البضاعة واللا حاجة ) بس كويس البضاعة شكلها طلعت استعمال طبيب

وللاسف برضه لو طلع التانى وحش او فيه مشاكل تتحبس او ترَبَـــــــط على جوز جديد المهم انها مينفعش تعيش حياتها وتتحمل مسئولية نفسها لغاية ما تقرر بنفسها هى عايزة ايه او مين .
حاجة محزنة بس لسة بتحصل فى بيوت كتير فى الوطن العربى كله مش مصر بس ، ساعات بلتمس العذر للاهل لان جواهم خوف على البنت ومتخيلين ان الراجل هو الحماية للست بس اتمنى ان فى يوم يقدرو يعرفوا ان هى حتى لو من غير اى حد تقدر توفر الحماية والامان لنفسها بنفسها.

عظمة على عظمة يا روز والله بجد مبدعة واسلوبك مميز وتلقائى وفى منتهى الواقعية

goodman said...

رغم شعورى بالاسى للطلاق
الا انة افضل من اضاعة العمر فى علاقة فاشلة

Anonymous said...

hey there:
tesada2y ana toul 3omry nefsy omy tetala2 mn aboya o heya kaman nefsaha tetala2 bas mesh yenfa3 3ashan el manzar el 3am o el manzar odam el nas o prestiege el famelia o fel 2a7'er 7'adna 2eh wala 7agah gabo bent mo3aqadah o karha el regala elly howa ana,o lesa 2a3deen ma3a ba3d mn 3'eer 2ay masha3er ba3d ama ana sebt masr o my sisietr get married so this is what we gain,and all of this bcoz of the way arabs think which is a wrong way of thinking
yalla hana3mel 2eh bas
el mohem ya gamiel kalamek is so realistic and i like it alot

Anonymous said...

سلام

الصراحه أمهات من الآخر و في زيهم كتير

كتير أمهات من هاللون المهم تزبطي زلمه بأي طريقه ممكنه من غير أي اعتبارات لا لدين و لا لأخلاق

أنا مع الطلاق في حالة استحالة الحياه و خصوصا اذا ما في أولاد بيكون الوضع أسهل

موضوع جميل و حوار قوي كالعاده

سلام يا قمر

جسور سرية said...

العزيزة بلاك روز
تحياتي في اول زيارة لركنك الهادئ و القيم كما اراه
اولا يعجبني جدا مناقشة مثل هذه الامور الاجتماعية بصراحة و بشكل شيق في ان واحد
هناك كثير من المسكوت عنه و السهل الممتنع في ثقافتنا نحتاج ان نزيح الغبار من عليه قليلا حتي يمكننا ان نحلم بغد افضل
اعجبني جدا حوارك السادس لانه شكل مرحلة حقيقية من مراحل حياتي.... و لفت نظري حوارك السابع انه يشير لتحولات نفسية عدة تمر بها نساؤنا في محاولاتهم للبقاء و الصمود في مواجهة الثقافية الذكورية التي تفترض ان وجود ذكر مسلم عاقل بالغ في حياة اي امرأة هو بداية و نهاية التاريخ!!!
مرة اخري لك التحية و انتي تحاولين الحفر في مثل هذه المواضيع الاجتماعية التي يسعي الكثير منا اما لتجاهلها او بقائها تابوهات من نوع ممنوع الاقتراب او التصوير

kasber said...

تخيلت ولا أدري لما
جميع حواراتك كنص مسرحي
يعرض متتابعا فاضحا عيوبنا وقلقنا وخوفنا
هل جمعتيه كتابا واحد
عرضا خاصا

Anonymous said...

لازالت الثقافات القديمة تعشش فى عقولنا

أولا تهنئتى على هذا الحوار والسيناريو المسترسل فى سلاسة الى النهاية لدرجة اننى اندمجت وتداخلت وتناقشت كأنه واقع

لكنه من دقته بدا واقعا .. وفكرا يحتاج لنظرة جديدة غير تلك النظرة العقيمة للزوجة المطلقة .. ولماذا ليس الزوج المطلق؟ لماذا دائما المرأة؟

وإن استحالت الحياة فلماذا اباح الله الطلاق؟

هى فرصة جديدة لحياة جديدة قد تكون اوفق وانجح واسعد كما فى حالات كثيرة ..

الموضوع طويل ولايكفيه مكان صغير

تهنئتى على الاسلوب المتقن

Heart Beat said...

عزيزتي

هو الحوار السابع ده السيناريو اللي حصل بعد الحوار السادس

يعني هي اتجوزت الولد اللي اتعرفت عليه من على النت عشان تغطي على موضوعها هي و مها و دلوقتي بتشتكي منه و عايزه تتجوز واحد تاني

او يكون العريس اللي بطلة الحوار السابع هنا بتتكلم عنه هو نفس الولد اللي فات و هو دلوقتي طلق البنت اللي في الحوار السادس بعد اما خلفوا ولد و الولد مع طليقته صاحبة مها

و لا الحوارين مالهمش علاقة ببعض خالص ... و يكون الربط ما بينهم هو ان في الحالتين في اتفاق مسبق على الجواز للخلاص من مشكلة و هي رفض المجتمع لحالة معينة ... اللي هي في الحوار الاول علاقة البنت بمها و في الحوار التاني ان المطلقة ما تعيش بحريتها بعد الطلاق و يا اما تتجوز بسرعة يا اما تتحبس في البيت لانها مطلقة

بس بالنسبة للحوار السابع ده فأكيد زي كل مرة بقرا حوار انتي كاتباه و كأني شايفة الشخصيات قاعدين بيتكلموا اودامي و المرة دي ممكن تشوفي علامات التعجب على وشي مش لانه حوار مابيحصلش و انه خيال الكاتب لا التعجب هنا لان الحوار اللي زي ده فعلا بيحصل و كأنه شيء عادي جدا من اللي بيحصل يوميا

العادات و التقاليد او الموروثات دي مش هاتتغير مهما حصل تقدم او رقي ... العادات و التقاليد هاتفضل مغروسة جوانا و ننقلها من جيل لجيل بنفس الصياغة حتى لو كنا عارفين انها غلط هاتلاقي العبارة الشهيرة " معلش يا جماعة دي عاداتنا و تقاليدنا و مش هانغيرها " بتتقال دايما

في ناس كتير جدا لازالت متمسكة بالعادات دي و طبعا اكثرها شيوعا ان السيدة المطلقة هي عار على نفسها و اهلها حتى لو كان سبب طلاقها انها ظبطت جوزها بيخونها مع واحدة تانية فطلبت الطلاق او انه تاجر مخدرات فقالت اطلق لاني مش هاكل من مال حرام

برضه المجتمع هايسيب سبب الطلاق و يتمسك بكلمة مطلقة و تكون عار عليها و على اهلها اللي مش عايزين يقفوا جنبها في محنتها فيجبروها انها تتجوز بسرعة او تفضل محبوسة في البيت عشان الناس و السنتها

يعني المجتمع و الاهل قاسيين في حكمهم عليها

في الحوار عندك الام همها الاول و الاخير ان البنت تتجوز بسرعة او تقعد في البيت بعد طلاقها ... مش مهم بقى ان البنت دي بقى لها كام شهر تعرف رجل تاني على جوزها و انها مرتبة معاه ان بعد طلاقها هايجي و يطلبها للجواز

او ان البنت كانت عارفه ان امها هاتقول لها الحوار ده كله فراحت تفاتحها في الموضوع و هي مرتبة كل حاجه عشان تخلص من نظرة الاهل و المجتمع ليها بعد الطلاق

سامحيني على الاطالة دي بس الحوار جميل جدا اشكرك عليه

blackcairorose said...

لا أدرى ماذا أقول يا سم ون ان لايف

لكن أسمعى

لى العديد من الشقيقات وشقيق واحد، بعضهم لديه أبناء وبنات كبار ومتزوجين

فى محيط هذه العائلة نصف حالات الزواج انتهت بالطلاق والاسباب مختلفة ومتنوعة، بعض هذه الانفصالات تمت منذ عشرين عاما وبعضها منذ عامين فقط

ولكن ما استطيع قوله أن الست الحالات لم يندم فيها أحد على قرار الانفصال، ولم تسر الحياة بعد الانفصال الا بشكل أفضل مما لو كانت قد سارت بدونه

فآملى خيرا وان شاء الله خير

وأبنك نعمة كبيرة كبيرة ستشعرى بها أكثر كلما مر الوقت

خالص الامنيات والدعوات بحياة أجمل، وصدقينى ستكون أجمل باذن الله

ولا تحرمينى من مرورك وتعليقك

blackcairorose said...

سما

الحوار بمضمونه وليس بمفرداته حدث فى الواقع

وستندهشين أن الأم سيدة مصرية تقليدية بكل المعنى وليس أم مودرن أو ليبرالية زى ما كلنا يمكن نعتقد

ولكن الافكار الموروثة زى ما قلتى عن ضل الراجل لسه للأسف معشعشة

وعلى فكرة بقى انا هنافس كاسبر وارسم لك صورة! انتى مش قلتى مره انك تشبهى الصورة فى البروفيل؟؟؟؟؟ طيب!

blackcairorose said...

أكيد يا جودمان

وأهلا بيك فى المدونة وانتظرنى عندك

شكرا للمرور والتعليق وشرفت

blackcairorose said...

شكرا يا سولا على كلامك الحلو

حالات كتيرة الازواج بيفضلوا مع بعض لاسباب ملهاش علاقة بالحب او الصحبة أو أى مشاعر حلوة

ربنا يكون دايما فى عونك، انتى برضه فى ظروف أحسن كتير من غيرك لأنك فى بلد رغم أى عيوب أو كلام بيتقال عنه لكنه فى النهاية بلد بتدى فرصة للى فيها بالعمل والنجاح والعائد المادى وبلد بتحترم انسانية مواطنيها بشكل نسبى أكتر من بلاد تانية كتير

وسلامى وتحياتى ودايما بالتوفيق يا عزيزتى

blackcairorose said...

شكرا ميزو على الكلام وطبعا عندك حق تماما

وبعتذر أنى ظننتك ولد معرفش ليه اسم ميزو ادانى الانطباع ده لانه فى مصر عادتا بيكون دلع لاسم معتز

ومازلت فى انتظار مدونتك يا عزيزتى

blackcairorose said...

جسور

أنا من قراءك منذ بدأت التدوين، ربما لم أعلق حتى الآن ولكن قرائتى لموضوعاتك واسلوبك المميز جدا مستمر

وأقول لك سر؟

أشعر كما لو كنت أعرفك من قبل!

وخالص الود

blackcairorose said...

ربما أجمعه ذات يوم يا كاسبر

من يدرى ماذا تنتظر منا الأيام؟

دمت لى صديقة وقارئة وكاتبة وشاعرة وفنانة

blackcairorose said...

شريف

عادات اجتماعية وافكار كثيرة تستحق النسف

وبشكل عام موضوع الطلاق الآن أصبح متقبلا كثيرا عن الماضى وهى بادرة ايجابية من جهة

ومن جهة أخرى فان التزايد غير المعقول فى نسب الطلاق مؤشر خطير وأصبح عادى أن نسمع حالات طلاق بعد شهر أو اشهر من الزواج

خالص الود

blackcairorose said...

شكرا عزيزتى هارت بيت

لقد ذكرت فقط الحوار السادس ووضعت له رابطا حتى أقول لمن بدأ حديثا يقرأ المدونة أن هناك سلسلة قديمة من الحوارات

ومع ذلك فقد أوحيت لى بخاطرة أن جميع الحوارات ممكن أن تكون مرتبطة ببعضها بشكل أو بآخر دون وعى منى!

اوافقك تماما فى ما ذكرتيه بشأن الطلاق ونظرة المجتمع له، بس أعتقد كما قلت لشريف أن هناك تسامحا بقدر أكبر نسبيا تجاه النظرة للمطلقات فى المجتمع أو ربما على الأصح فى بعض فئات المجتمع فى رأيى

يتبقى الكثير على المجتمع تغييره، والتغيرات الاجتماعية تأخذ وقتا كبيرا ولكن المهم أن يبدأ أحد وأن تكون هذه التغييرات مدعومة من أولى الأمر ومن وسائل الاعلام، أما عندنا للأسف فاحيانا أولى الأمر والاعلام تساعد فى تأصيل المفاهيم الخاطئة ولا تعمل على تغييرها

على فكرة

موضوعك فى مدونتك شائك شوية ، كل ما أقول هاكتب فيه الاقى ميت رأى متناقض فى رأسى فاغير رأيى فى الكتابه فيه!

وسلام يا قمر

سمـــــــــا said...

مش عارفة بقت العادة انى اعلق عندك اكتر من تعليق وادوشك :)

المهم انى كنت اقصد بان الست اكس لارج مش شرط تماما تكون متمدنة ولا مثقفة اطلاقا ، الام الاكس لارج دى فى نظرى هى الام اللى ممكن تدارى على بنتها علشان تحميها او انها تعرف انها تعرف واحد مثلا بس تدارى عليها علشان تتجوزه حركات الامهات اللى كلنا عارفينها يعنى .

انا متهيألى قلت قبل كده فعلا ان الصورة شبهى بس انا دايما عاملة ازمة للناس يعنى اى حد يشوفنى يقولى ( على فكرة انتى شبه كذا ) فانا حاليا بقيت شبه سمية الخشاب ورانيا يوسف وماما شايفة انى شبه حنان ترك وهند صبرى مع بعض :))) وواحد زميلى بيقولى انى شبه دارين حدشيدى وحد تانى بيقولى انى شبه يارا واخيرااااا منة شلبى :))) لو تعرفى ايه العلاقة بين كل دول قوليلى لانى بجد مش عارفة .


ايه دا انتى عايزة ترسمى الصورة اللى فى البروفايل واللا ايه ؟؟ دى مش انا يا فندم وانا لا اقبل يا اما ترسمينى انا يا اما هرفع عليكى قضية رسم كدا وكدا ، اذا كانت كاسبر اللى شافتنى لايف و معاها 500 صورة ليا عملت فيا كده امال انتى اللى هترسمى بالشبه هتعملى فيا ايه :))

لو كان سيادتك حاطة الايميل بتاعك كنت بعتلك صورتى شخصيا ترسميها لكن سعادتك سلطة رابعة بقى وممنوع الاقتراب او التصوير :))

blackcairorose said...

انتى سهلتيها عليه خالص يا سما

طب شوفى بقى الصورة اللى هرسمها هتبقى كده بعد كل اللى قلتيه

حاجب شمال علوى حنان ترك
عين شمال سمية الخشاب
حاجب يمين علوى دارين حدشيتى
عين يمين يارا
مناخير هند صبرى
فم رانيا يوسف
شعر منة شلبى

ايه رأيك؟ لول

طبعا الصورة مش بتاعتك اللى فى البروفيل بس انتى مرة قلتى فى رد على واحده كده عندك فى البلوج ان الصورة تشبهك عشان كده قلت ارسمها

اوعى تزعلى من هزارى لو شايفاه بايخ همسحه على طول يا فندم

بس على كل، كل الممثلات اللى قلتيهم حلوين وقمامير بجد والهى وطبعا بالتأكيد أنك انتى وناردين احلى من بعض قلبا قالبا

وخالص التحيات وقولى لناردين تشد حيلها وربنا يوفقها

blackcairorose said...

سما
نسيت ارد على موضوع الافلام

شقة مصر الجديدة ممل طبعا لدرجة كبيرة

بس بقى الفيلم اللى نكته بجد شفته غصب عنى اسمه الوان السما السابعة وفعلا مستحملتوش لحد نصه وقمت ابص من الشباك!

يعنى اى حاجة تانية كان هيبقى فيها فايده عنه

مفيش واحد لايق فى الدور وكلها حاجات مش واقعية بالمرة

ما علينــــــــــــــــــــا

ناردين said...

اكيد مقدرش يعدي يومين ورا بعض مكنش عديت هنا وقريت وحسيت
بس اما شفت الصورة مقدرتش اسكت
الصورة اللي رسمتيها لسما دي
ملهاااااش حل
تجنن
ومش هستنى رأي سما فيها
هي حلوة اوي اوي اوي
خصوصا مناخير هند صبري
مع اني طبعا مش فاكرة مناخيرها بس اهم حاجة المناخير لان سما بتركز فيها لو اترسمت
:)
بغششك اهو
لأ بجد بجد
انتي فعلا لمستك في الرسم مميزة
وانا اضم صوتي لصوت سما ان لولا السلطة الرابعة كان بقى معاكي مستند ونسخة رسمية مشابهة للأصل اللي ملوش حل
..
وبجد لو كنتي في القاهرة كنتي رسمتيها لايف .. كاسبر اخدت خطوط كتير لايف
بس انا بنبهك اهو .. سما صريحة صريحة صريحة .. وعينها ماشاء الله ناقدة جدا

فانتي يا صديقتنا العزيزة شكلك كده وقعتي نفسك في يد من لن يسكت .. انتي حرة بقى
:)
ميرسي على سؤالك الرقيق وصداقتك المميزة
وبجد بجد .. كل الحوارات المصرية واقعية جدا بدرجة مؤلم جدا ومش هغير الرأي دا ابدا ابدا
وفي انتظار الرسم

ناردين said...

نسيت اقولك .. انا بحب جدا وودي الان بكوارثه الشخصية وبحبه كمان لما بيمثل بيبقى ملهوش حل .. انتي قلتي كلمة صح عليه اوي .. عبقري ..
!!
ولسه من يومين كنت بكلم سما عليه وكنت ناسية اسمه تماما فبحييكي على الانقاذ دا

سمـــــــــا said...

انا معنديش غير رد واحد بعد اللى انتى عملتيه فى وشى دا غير طاااااااااااااخ
:)

انتى عارفة التركيبة اللى عملتيها دى فكرتنى بواحدة على البلوج كانت بتناقشنى فى مرة على ان البنات المثليات فى نظرها بنات ايوة بس زي القطة الصغننة اللى لها 6 رجلين او العصفورة الجميلة اللى بديل سمكة فيومها حسستنى انى دخلت ديزنى لاند انتى بقى رسمك حسسنى انى دخلت بيت الاشباح : )))

لأ طبعا يا قمر هزارك مش بايخ ولا حاجة وانا وناردين فعلا بنعزك جدا وبنحب كتاباتك حقيقى وحاليا بقينا نحب رسمك بس بحذرك انتى وكاسبر ابعدوا عن مناخيرى لو سمحتى ودا تحذيرى الاخير :)

انا افتكرت اخيرا انا كنت قلت على صورة البروفايل دى لمين، كان لواحدة داخلة باسم مى وبتقولى انا واثقة انك شبه الصورة اللى انتى حطاها فى البروفايل وبدأت توصفنى على اساسا انها بتوصف الصورة يعنى فقلت لها ايوة الصورة شبهى اوى بس اللى انا كنت متأكدة منه انها كانت واحدة تعرفنى شخصيا لانها كانت بتوصفنى انا اكتر من انها بتوصف الصورة بس على مين انا عملت بقى فيها عبيطة ومش فاهمة :)
ممكن احسد ذاكرتك يا فندم ؟؟ : ) ولو سمحتى متتلككيش بيا وتقولى انى حسدتك لو جالك زهايمر مفاجىء : )

خلاص يا ستى ارسمى الصورة اللى فى البروفايل ولا يهمك على الاقل انا شايفاها احلى منى شوية ، وعلى فكرة الصورة بتاعة كاسبر مش وحشة هى شبهى بس مش حساها انا وكاسبر الحقيقة كان ليها وجهة نظر قالتهالى وانا احترمتها اللى هى ايه :
انها وقت ما رسمتنى كانت بتنقل من صورة لصورة ومكنتش تعرف سما الانسانة بابعادها كويس فسالتها يعنى لو رسمتى نفس الصورة دلوقتى شكلها هيتغير قالت لى اكيد لان احساس الفنان بحد يعرفه كويس غير لما يرسم حد ميعرفوش اوى

فانشاء الله انا فى انتظار الطبعة التانية لنفس الصورة : ) وانشاء الله برضه هبقى اخليها تعرض الصورتين فى البلوج قبل وبعد ما تعرفنى زي الممثلات بس قبل وبعد عمليات النفخ والشد :)

ناردين قطتى داخلة تتريق عليا هنا وسايبة المذاكرة واللا انا بيتهيألى ؟ اكيد بيتهيألى والا فمفيش فسحة النهاردة :)

معلش يا روز اصل ناردين اكتر انسانة فى الدنيا بتعانى من صراحتى اللى احيانا بيكون قلتها افضل ليا انا شخصيا :) بس حبيبة قلبى صابرة صبر الابل علشان عارفة انى قلبى طيب وبموت فيها فبيعوض كل الحاجات الوحشة اللى فيا

صحيح عايزة افتن على حاجة انا مرة واحنا عند كاسبر فى الاتيليه قعدت ارسم لناردين صورة بالقلم الرصاص وتقمصت بقى دور الرسام العبقرى وطلعت صورة زي السكر وكتبت لها اهداء وهبقى ارسم كاسبر كمان ودا افضل عقاب ليها وانتى برضه ابعتيلى صورتك ارسمها عقابك مقدما قبل ما ترسمينى :)

خالص تحياتنا يا روز يا قمر وسورى بقى صدعناكى انا ودودو

باااااااااااى

blackcairorose said...

شكرا ناردين على الكلمات الحلوة وكفاية انك فى وسط لخمتك عديتى وعلقتى كمان

وبجد انا كمان بعتز بصداقتكم وتميزكم الشديد جدا

والصورة مش هنساها بس خلينى بس اركز شوية فيها علشان محطش نفسى تحت رحمة صراحة سما لول

وبالتوفيق فى امتحاناتك ان شاء الله

blackcairorose said...

سما
طاااااخ؟ فينا من كده؟ طيب

قطة بست رجلين وعصفورة بديل سمكه؟
الله حاجة كميلة خالص

كاسبر اكيد عندها حق ان المعرفة بتخلى الواحد يحط احساسه فى الرسم ومتبقاش مجرد ملامح وجه

اما بقى رسمك لكاسبر فده موضوع كبير جدا جدا جدا ومعرفش اعمل ايه بالضبط علشان تسمحولنا نشوف الرسمة دى لول

على سيرة قبل وبعد الشد افتكرت حكاية عائلية كده

واحدة من اخواتى كانت دايما لبسها على راحته حبتين والماكياج اوفر برضه شويتين، وكانت يمكن الوحيدة اللى ماما تديها تعليقات كده من وقت للتانى على طول الجيبات وضيق البنطلونات، المهم اختى دى اتجوزت وكانت حاطة فى الريسبشن صورة كبيرة ليها حلوة وهى بفستان سهرة كتف فيه وكتف مفيش وواخده بوز فنانينى خالص، معرفش ايه اللى جرى، وفى يوم اختى دى قررت تتحجب، وقد كان، ولما سألتها هتشيل الصورة ولا ايه قالت لى انها حابة الصورة ومش عايزة تشيلها، بس علشان متتحملش ذنوب هتحط جنبها صورة تانية ليها بالحجاب ونفس الحجم وتكتب على دى قبل التوبة والتانية بعد التوبة علشان اللى يتفرج ياخد برضه عظه واهو كله بثوابه

طبعا اختى كانت بتهزر ومعملتش كده ولا حاجة
بس افتكرت الموضوع ده على السيرة

مثليه said...

واقعية ميه بالميه
منتهى المهانة للأنثي من الفكر الواقغي المتخلف الذي نعيشه اليوم وكأن الأم التي قهرت و تحملت ما تحملت من طغيان أهلها و زوجها ورضيت بالأمر الواقع نست ما حدث لها بالأمس و فضلت أن تكرر مأساة حياتها في ابنتها ويرجع السبب في ذلك وللأسف في أحاديث الرجل العربي عن المرأة و نظرته لها كوعاء يفرغ فيه نشوته و ينتهي الأمر و تحمد ربها على كدة و تبوس ايديها وش و ضهر و نفضل دايما في مسلسل سي السيد اللي بيتطور بتطور الدنيا يعني بدل ما يلبس جلابية يلبس جينز و بدل ما تاكل لوحداها مافيش مانع انها تاكل معاه بس تحضر الأكل و تلم السفر و تغسل الأطباق و تنضف و مش مشكلته انها طلعان عنيها زيه و أكتر فالشغل لأن الست مكانها البيت واللي مش عاجبها أو تشتكي تبقى عاق و تبات والملايكة بتلعنها و لازم تروح لسعادته بنفسها والله يرحمك يا هدي يا شعراوي

سمـــــــــا said...

عجبنى اوى موضوع كتف فيه وكتف مفيش دا ههههههه فكرتنى مرة كنت متصورة بفستان كان كل الضهر مفتوح بس انا اللى كنت مصورة نفسى والفستان دا انا لغاية دلوقتى مخرجتش بيه فواحدة صاحبتى شافت الصورة على الموبيل فلقيتها اذبهلت وبتقولى انتى بتخرجى بالفستان دى قلت لها انا جبته لكن لسة مخرجتش بيه قالت لى احسن برضه وياريت متخرجيش اقعدى بيه فى البيت براحتك ولو فكرتى تخرجى بيه ابقى البسى عليه جاكت بدلة هههههههه


بصى فى موضوع اللبس دا انا يمكن ليا وجهة نظر اللى هى ان بنت ممكن تكون لابسة حمالات وميكروجيب بس جواها نضيف ومحترم اكتر من بنت لابسة بكوم وجيب طويلة بلابلابلا انا مش بشوف ان اللبس عنوان للاخلاق اللبس حرية شخصية بحتة يعنى لا بطوله ولا بضيقه


شوفى بقى حتة التناقض والشيزوفرينيا اللى جاية دى :

انا ساعات ممكن ابقى لابسة بادى ضيق وكات لكن العفاريت تركبنى لو شفت ناردين لابسة حاجة تبين اى حتة فى جسمها ومستحيل اقبل انها تلبس كات واللا تلبس قصير ممكن اقتلها فيها هههههههه

مرة قالت لى ما انتى بتلبسى كات وممكن قصير وضيق فقلت لها ردى المقنع انا من يوم ما عرفتك وانتى بتلبسى محتشم وانتى من يوم ما عرفتينى وانا بلبس كات ومينى جيب يبقى مينفعش دا يتغير دلوقتى واشوفك ماشية قالعة طبعا الكلام دا استهبال منى ومش حقيقى يعنى حتى لو كنت عرفتها بتلبس قصير كنت همسك زمارة رقابتها لغاية ما تغطى اى حاجة مدخلة هوا هههههههه
يعنى انا مع اى واحدة متهمنيش عادى تقلع تلبس براحتها لكن مع واحدة مرتبطة بيها مبستحملش

اممممم مش عارفة اللى انا فيه دا اسمه ايه ، تفتكرى هعيش يا دكتور ؟؟

blackcairorose said...

الله يرحم هدى شعراوى يا مثلية

دايما بقولها ومش بصدق ان اللى كنا بنفتخر بيه من ميت سنه وكان انجاز بنتراجع عنه بخطى ثابته

يأس واحباط بيملانى احيان كتيرة من الاوضاع وللاسف مبشفش خرم ابره

blackcairorose said...

سما

بنجـــــــــــــــــــــــو

ذوقنا متشابه جدا أو واحد فى الملابس المفضلة

حتة شيزوفرانيا؟؟ متهيالى كده برضه لول

سمـــــــــا said...

كده برضه يا روز بقى انا اكحلها وانتى تيجى تعميها ؟؟ هههههه

ياستى قولى انها غيرة وحب ابوس ايدك :)

Rania Lelah said...

اول مرور لمدونتك
و استوقفنى هذا البوست
نعم فالعادات و التقاليد تحتم على الانثى الردوخ لعلاقة فاشله افضل من ان تطلق و تبحث عن حياه جديدة
فسحقا لهذة العادات
تحياتى

blackcairorose said...

أهلا رانيا

شرفتى المدونة وشكرا على المرور والتعليق