فلاشات من الماضى البعيد

فيه مواقف قديمة عدت قدامى وانا لسه قبل ما اكمل عشر سنين، ممكن تبقى تافهة وممكن متبقاش، بس مبقدرش أشيلها من دماغى رغم السنين

ـ خناقة جامدة بين بابا وماما وانا كنت فى سن صغير جدا وهى يمكن الخناقة الوحيدة اللى احنا كأبناء شفناها، شكل ماما وشعرها منكوش ومنهارة وبتعيط مش ممكن أنساه

ـ العمارة اللى قدامنا كان فيها طلبة عرب، ومرة البواب وصاحب العمارة طلعوا بنتين من الشقة وهات يا ضرب فيهم والبنتين بيعيطوا ويصوتوا ويتحايلوا عليهم ميودهمش قسم البوليس لحد ما سابوهم والبنات طلعوا يجروا فى الشارع يهربوا

ـ راجل كبير جدا فى السن كان بيقف فى شارع البطل أحمد عبد العزيز بالليل (تقاطع شارع الثورة أيام ما كان الشارع هادى جدا وضلمة) وأول ما يلاقى واحدة جاية يبدأ فى الاستغناء عن أهم قطعة فى ملابسه، أول مرة شفت المنظر ده كنت مع واحدة من اخواتى وساعتها معرفش ليه حسيت برعب ومفهمتش هو بيعمل كده ليه، لقيت اختى بتقولى يللا نمشى بسرعة

ـ واحدة ست عجوزة كانت بتيجى لناس جيران ومعارف علشان تقرأ ليهم الفنجان، وعادتا لما كانت تقرب تخلص القراءة تبتدى تهذى بكلام مش مفهوم وتطلب ورق جرايد علشان تأكله (طبعا محتجش أقول حالة الرعب اللى كانت عندى أول مرة أشوفها بتعمل كده)

ـ كنت فى ميدان التحرير قدام المتحف مع أختى الكبيرة وفجأة من غير سبب واضح راجل شكله مجرم مسك واحدة وجوزها وقعد يضرب فيهم هم الاتنين، الناس قالوا ساعتها ان الجوز ومراته نشالين وكانوا بيحاولوا ينشلوا الراجل اللى أخد باله، بس منظر الضرب وخصوصا للست برضه مقدرش أنساه

ـ ليلة فرح أختى الكبيرة قبل ما تسيبنا وتروح بيتها قعدت تعيط جامد قوى (رغم انها متجوزة عن حب) وانا كان ارتباطى بيها جامد جدا أيامها وقعدت انا برضو اعيط لانها سايبانا، لحد دلوقتى على الرغم من مرور اكتر من خمسة وعشرين سنه انا واختى نفتكر اليوم ده وعياطنا

ـ بابا وهو ماسك انبوبة البوتاجاز وهى مولعة نار للسقف وهو بيحاول يطفيها لحد ما نجح فعلا يطفيها بعد ما حرقت شعر راسه وحواجبه

ـ شغالة قديمة عندنا كان اسمها زينب، كانت ذكية جدا ودمها خفيف جدا، كانت ليها طريقة مضحكة فى نطق الكلمات خصوص الصعبة يعنى مثلا تقول سندرا بدل سندريللا، زينب كانت تقعد تقول ان نفسها تطلع دكتوره ومتهيألى من ذكائها الحاد كان ممكن فى ظروف تانية تبقى دكتوره، سابتنا من زمان وشفتها آخر مرة يمكن من عشر سنين وطبعا من غير ما اقول ممكن تخمنوا مستقبلها بقى شكله أيه، بس دايما بفتكرها وعينيها الذكية وهى بتقول نفسى اطلع دكتوره

ـ اختى التانية وهى قاعده على السرير وهات يا عياط بتشنج وكانت صعبانة عليه جدا ومعرفش أعمل أيه، الدنيا صيف والجو موت وهى لابسة قميص نوم خفيف، والسبب كان ان الشاب اللى كانت مرتبطه بيه سابها (محدش حكالى بالتفصيل لأن الصغيرين مفروض ميعرفوش الكلام ده بس طبعا مكنش صعب انى برضه أفهم سبب عياطها)

أفضفض كمان؟

خليها لمرة تانية