Tuesday, September 25, 2007

حوارات مصرية ـ الحوار الرابع والخامس

الحوار الرابع
.
ـ الله أكبر عليكى، أنا مشفتش فى جمالك وأخلاقك
ـ متشكره حضرتك
ـ مش مرتبطه يا هبه ولا مقرى فاتحتك؟
ـ لا ربنا لسه مرضش
ـ بقى معقوله الجمال والدين ده ولسه؟ ولا انتى اللى مبتفكريش دلوقتى؟
ـ لا والله مش شرط، كله بأمر الله، وقت ما ربنا يريد محدش بيبقى عارف الخير فين
ـ ونعم بالله، عندك المدرسة وشغلك هنا فى الجمعية ورعاية اليتمى، ربنا يحميكى
ـ الواحد بيعمل الحاجات اللى بتقربه من ربنا على قد مايقدر، وربنا يتقبل
ـ إن شاء الله يا حبيبتى، طيب لو جالك مهندس متدين وامكانياته كويسه تقولى أيه؟
ـ والله حضرتك مش عارفة
ـ أنا هكلمك بصراحة، أبن أختى أسمه نادر وعنده اربعه وتلاتين سنه مهندس وامكانياته كويسه، ومش هكلمك عن التدين مبيخفش من حاجه فى دنيته زى ما بيخاف يغضب ربنا، ولما شفت وشك السمح والتزامك وعملك فى الخير قلت هى دى اللى بيدور عليها نادر، لو معندكيش مانع نشوف طريقة تتقابلوا انتى ومامتك وانا وهوه فى مكان عام أو هنا فى الجمعية أو لو عايزين نجيلكو البيت برضه مفيش مانع، اذا حصل قبول تتعرفوا على بعض أكتر بإذن الله، قلتى ايه؟
ـ والله مش عارفة، خلينى اتكلم مع ماما
ـ على فكره انا حكيت له عنك
..........
ـ الله احنا هنتكسف من أولها ولا أيه
...........
ـ قلت له زى القمر رغم انك مش هتشوف وشها الا بعد كتب الكتاب، قاللى ياخالتى لو قلتى غير كده مكنتش هقبل، وهو مستنى بس موافقتكم على المقابله
ـ ربنا يعمل اللى فيه الخير
ـ والله انا مستبشره خير، وقلبى اتفتحلك من يوم ماشفتك أول مره، وحاسه كده انكوا إن شاء الله لبعض
ـ إن شاء الله خير
ـ إن شاء الله ياعروستنا
ــــــــــــــــــــــــــــــــــــــــــــــ
الحوار الخامس
.
ـ دول لو ورتهم صورة حسنى مبارك وقلتلهم دا مين مش هيعرفوا
ـ يا راجل بلاش مبالغة
ـ والله زى ما بقولك كده، ده العصر الحجرى، أنا متهيألى انه من ربعميت ولا خمسميت سنه الناس دى حياتها متغيرتش كتير
ـ للدرجة دى؟ ليه معندهمش تليفزيون ولا راديو حتى
ـ فى النجع كله كان فيه تليفزيونين او تلاته ومنهم واحد نظام تخبط عليه بايدك علشان يشتغل، انا لما بحكى لحد بيفتكرنى بهزر
ـ يا خبر
ـ احكيلك، انا أول مارحت كنت سمعت كلام ولكن يعنى قلت اللى قبلى بيهول، لحد ما وصلت وشفت، اول ولا تانى يوم بعد وصولى للقسم سمعت صوت ضرب نار قلت للعساكر نتحرك، لقيتهم بيقولولى اهدا ده عادى، لو زاد الضرب قوى نقوم نشوف فيه ايه علشان المشاكل متكبرش زيادة وتسمع بره، غير كده العملية متستهلش لان اى رصاصة ممكن تخدنا واحنا حتى مش عارفين دى جايه منين
ـ وطلع أيه؟
ـ ولا اعرف، الضرب سكت بعد شوية، كمان كان فيه واحد بيشتغل مترجم فى القسم ، لما يكون فيه تحقيق مبنفهمش الكلام اللى الاهالى بيقولوه، ده صعيدى بجد مش صعيدى بتاع التليفزيون نظام بجولك ايه ولا وع يابوى
ـ هىء هىء
ـ مرة تانية رحنا نقبض على واحد، خبطنا على الباب فتح اخوه سألناه عليه قال مش موجود قلنا ندخل نفتش قال اتفضلوا، ندخل فى اوضه ونطلع من اوضه ندخل فى اوضه نطلع من اوضه كل واحده فيها عيال وستات ورجاله وفى الاخر اكتشفنا ان كل البيوت بتاعة نفس العيله منفده على بعضها ولقينا نفسنا طلعنا من باب خارجى يمكن تلتميت متر من الباب الاصلى اللى دخلنا منه، كان قفانا يقمر عيش وهمه بيبصلنا وساكتين ووشهم جامد بس طبعا بيضحكوا علينا
ـ ايه ده ولا كانى بشوف فيلم، طيب والمسيحيين والمسلمين اخبارهم ايه؟
ـ انا كان حظى حلو مكنش عندنا مشاكل، دول ليهم كبيرهم ودول ليهم كبيرهم وكله متسلح تمام، سلاحنا فى القسم كان لعب عيال جنبهم، وكل واحد عارف قيمة التانى فمكنش فيه مشاكل، وقت ما بتحصل خناقة ولا حاجة الكبار كانوا يتلموا ويهدوا الموضوع ويحلوه
ـ والنسوان
ـ نسوان ايه ياعم، دا انا لما كنت بروح قنا كنت بحس انى سافرت امريكا، لو كنت قعدت اكتر من سنه كان جرالى حاجة، انا دورت على وسايط عند طوب الارض علشان يودونى حاجة تبقى ربع ولا نص ساعه من قنا مش تلات ساعات، انت شايف اللون الاسود اللى قدامك ده
ـ آه
ـ محسوبك بقى شاف ايام اسود منه هناك

7 comments:

Heart Beat said...

عزيزتي

حلو الحوار الرابع ده يعني نموذج مصغر فعلا للي بيحصل في المواقف اللي زي دي و كل عريس دايما بيقول انه بيدور على المتدينة و اللي بتخاف ربنا و برضه العروسة بتدور على نفس الشيء الانسان المتدين ان الحلال اللي بيخاف ربنا

ربنا يتمم بخير يا ستي و يتفقوا لما يتقابلوا

==============================
الحوار الخامس جميل برضه انا بحب اسلوبك الحوار القصصي ده بيشدني اعرف الحوار هاينتهي على ايه بالظبط

انا بسمع عن الحالة المتدنية لبعض القرى البعيدة في الصعيد الجواني زي ما بيقولوا يعني و مؤخرا يعني الموضوع الشهير بتاع ان مافيش مياه في بعض الاماكن من كام سنة

الحوار لذيذ و بسيط كعادتك دايما

كلام من القلب said...

الى بلاك كايرو روز

اولا طبعا حوارك فى منتهى الجمال والسلاسة
فى الحوار الرابع موضوع جواز الصالونات ده بقى منتشر جدا وفعلا كل واحد بيدور على واحدة متدينة ومحجبة وكل بنت بدور على واحد متدين يخاف ربنا
وبقت ظاهرة ان البنات موافقة جدا على جواز الصالونات
وان شاء الله ربنا يتمم بخير ويعملهم الخير والصالح ليهم
اما بقى الحوار الخامس فطبعا انتي خليتي الواحد عايش الجو بجد وكنت حاسة ان الرصاصة خرمت ودني
وفعلا هناك تحسي انهم نعزلين عن العاليم بجد مش مننا يعني ليهم عادات وتقاليد عكسنا هيا صارمة جدا
بس انا بصراحة وكلمة فى سرك انا بعشق الرجالة الصعايدة اصلهم بجد رجالة بجد ويعتمد عليهم لكن الباقي .... يالا ماعلينا بقى احسن اضرب

اما بقى لزيارتك مدونتي فى ده حيبقى شرف ليا يافندم انتي تنوري فى اي وقت

Anonymous said...

مساء الفل عزيزتي بلاك كايرو روز

طبعا الديالوج ممتع و استوقفني فيه جزئيه انه مش حيشوف وشها قبل كتب الكتاب و بسلامته بيقول لخالته لو قلتي غير كده ماكنتش حرضي و هو اساسا فيها ايه لما يشوف وشها مش حيتجوز و لازم يعرفوا شكل بعض؟

شوفي ياروز ممكن جواز الصالونات ده ينكتبله النجاح و ممكن لأ بيتعمد علي الطرفين و لو اني اميل لوجود حب و لو حتي انجذاب قبل مااي اتنين يرتبطوا ماهما مش حيرتبطوا عمياني كده و لا انتي ايه رأيك؟


ضحكت علي الحوار التاني في جزئيه البيت اللي اوضه منفده علي بعضها لول

حوار لذيذ ياروز مرسي علي انك كتبتيهولنا بالاسلوب السلس ده

تحياتي ليكي

He and She said...

Gameel Gameel Gameel. Although I dont believe that a successful marriage can start by the help of a third party. I believe that you and me get to know each others gradually in a matter of few months then as the feeling of satisfaction and admiration grows between us we crown that mutual feeling by marriage. Marriage in like the battekha. One needs to know as much about it before she/he proceeds to buy it

Nani said...

السلام عليكم
الحوار الاول انا بتخيلو كتير كتير اوي بس يا خسارة بفضل تخيل
:)
الحوار التاني هايل بسيط لكن معبر
انتي لازم تشتغلي سيناريست

kasber said...

مره أخري
تأخذني حواراتك لفكرة غريبه
أشبه بهدهد سليمان
تدورين الاماكن من بعيد
بين القاهره والصعيد
ثم تختفي أجنحتك وتاجك
وتعودين بشرا
تتجمع لديك حوارات
بين النقل والنقد
وتتركيها
دون اي تزكيه لفكره
تتركيها للآخرين
كمن يقول
يا بشر
ها أنتم

Anonymous said...

حوارك جيد لغتك عاليه وللاسف معلوماتك ناقصه بجد قنا مش زى ما انتى رسمتيها فى الحوار الخامس ولا زى ما انتى يمكن شوفتيها فى المسلسلات واعتقد انى لو القيتى نظرك على البوست ده فى البلوج بتاعى ممكن تعرف صوره بجد من الصعيد عن الصعيد
http://barie2010.blogspot.com/2007/09/blog-post_20.html