Wednesday, September 12, 2007

حوارات مصرية ـ الحوار الثانى والثالث

الحوار الثانى
.
ـ دى كانت عيشه هنا
ـ أمال أيه اللى رجعك أيامها؟
ـ أختى بقى الله يسامحها قالت لأمى تقولى فى التليفون ان قلبها وجعها وحاسه إنها هتموت، وانا بصراحه أمى غالية عليه قوى فقلت انزل اشوفها لحسن يجرى حاجة، وكمان ايامها ابتدت امريكا الضرب فقلت بالمره أقضى يومين الضرب فى مصر لحد ما الدنيا تهدا
ـ ومرجعتش من ساعتها
ـ لا ماالدنيا بقى اتغيرت، بس مش هنسى السنين اللى عشتها هناك
ـ فلوس طبعا
ـ آه أنا كانت بتعدى عليه أيام بطلع الفين وتلتلاف جنيه فى يويمن تلاته، وكنا شغالين فى كل حاجه بالذات لما كنا بننقل التليفزيونات والفيديوهات وكل الاجهزه الكهربائية من الكويت للعراق، كمان كان فيه تجار بيدونى فلوس اطلعها بره العراق
ـ مكنش حد بيتمسك؟
ـ لا ماحنا كنا بنخبيهم فى التريللات فى حتت محدش يعرف مكانها غيرنا
ـ والمصريين كانوا كتير قوى هناك
ـ يوه بالملايين، كان فيه حته اسمها المربع مكنتش تلاقى فيها عراقى، وكانت برضه لمه زبالة المصريين، وكنا واخدين حقنا على الآخر أصل صدام كان مطلع أمر محدش يتعرض للمصريين، لو مصرى اتخانق مع عراقى البوليس كان يمشى المصرى ويحبس العراقى
ـ بس متجوزتش من هناك؟
ـ كنت هتجوز واحدة عراقية زى القمر، زميلى كان واخد اختها، كانت حلوه وأهلها غلابه جدا وراضيين بأى حاجة، بس بقى نزولى مصر واللى حصل بعدها معدتش أعرف أراضيها، قبل ما نزل مصر قالتلى لو مرجعتش هموت نفسى، لحد دلوقتى ساعات بفكر فيها بعد السنين دى كلها
ـ يا راجل تلاقيها اتجوزت وخلفت سبع تمن عيال دلوقتى
ـ لا دى كانت بتموت فيه، والله ساعات لحد دلوقتى بسرح فيها
ــــــــــــــــــــــــــــــــــــــــ
الحوار الثالث
.
ـ بصى دلوقتى احنا نسيب بعض، انتى على شهاب وأنا على سفنكس، نتقابل بكره الساعة سبعه فى العمده نفطر ونروح، اتفقنا؟
ـ هو عماد هيستنانا؟
ـ مش عارفة، كلمنى امبارح وقاللى ان التاكس خربان وهيروح يصلحه، لو اتصلح هيجيلنا يوصلنا، إذا مكنش ناخد ميكروباص ولا أى تاكس
ـ طيب سلام دلوقتى، لو فيه أى حاجة هرنلك متطفيش المحمول
ـ طيب
ـ بقوللك أيه خللى بالك دعاء بتقوللى من يومين عربية البوليس هدت جنبها عند مصطفى محمود وبتقول لولا الطرحة كانوا سحبوها معاهم فى البوكس
ـ ولاد ال*****ة همه مورهمش غيرنا؟ فيه زينا وأوسخ بيضرب لهم تعظيم سلام فى البلد دى، متشطرين علينا احنا بس علشان على قد حالنا وواخدينها كعابى، بلد ****ة بصحيح
ـ بصى الراجل اللى هناك بيبصلك، طول بعرض وعربية كبيرة، يللا هنيالك دى باينها ليله فرتكه
ـ هىء بس يا *****ة
.
.

17 comments:

Nani said...

السلام عليكم
رمضان كريم
ايه الحوارات الجميلة دي؟
بس الناس الي في الحوار التالت هيعملو ايه في رمضان؟

نارديــــــن said...

تحيا جمهورية البطاطا المقلية
..
وبمناسبة عرض فيلم الصعود الى الهاوية من كام يوم ... ففعلاً : هي دي الاهرامات .. هو دا النيل .. هي دي مصر يا عبلة
واكتر .. واكتر .. واكتر
......
كل سنة وانتي طيبة .. وكل رمضان وانتي بخير وف سعادة وحب

kasber said...

أعتقد انك تسيرين في الاماكن جسد يتحرك وروح تتخلل العابرين
تقرأ حروف الخفاء
من انتي؟؟
اهي حاورات منقوله بإمانه
ام هي خبطه فوق القلب
عما نحاول طوال الوقت العبور بجوارالحقائق المؤلمه كالنعام كأنه
علي كل
كل سنه وانتي طيبه رمضان كريم

Heart Beat said...

كل سنة و انتي طيبة

رمضان كريم يا فندم

الحوارات التلاتة فيهم بساطة حلوة جدا

تحسي فعلا ان الحوار ده حي كده اودامك

و ممكن يكون فعلا اتقال في الحقيقة

اجندا حمرا said...

عزيزتي بلاك كايرو روز

فعلا الدنيا دلوقتي غير زمان مقوله انا مؤمنه بيها و بتتأكدلي لما بقعد و اتكلم مع حد من الناس الكباره سواء في اسعار الحاجات او في سلوكيات الناس او حتي في احتفالتنا و مناسبتنا

حوار شيق و سلس كالعاده و زي ماالغاليه هارت بييت قالت كأنه لايف قدامنا
تحياتي علي ابداعك

كتابة said...

BLACK CAIRO ROSE...الجميلة

أتفق تماما مع ما تفضلت به العزيزة
KASBER
فأنت ذات إلتقاطة عالية
و حساسية مذهلة
تمكنك من تنصيص حواري يجعل تخيلاتنا تتجسد
فورا بأناس حقيقين، مطحونين،صاخبي البساطة
لم أجد أي نشاز مصطنع بأحاديثم/هن
لذا أحييك جدا

دمت بجمال:)

عصفور بلا أجنحة said...

جيت بس اقول
كل سنة وانتم بالف خير

blackcairorose said...

شرفتى يانانى والله أكرم

الناس اللى فى الحوار التالت يمكن ياخدوا اجازة مؤقتى زى ما كلنا بنعمل وناخد اجازات من حاجات بنعملها طول السنة

وقرى موضوعى الجاى

وهدخل عندك حالا

blackcairorose said...

دى مصر يا ناردين اكيد

وتعليقك فكرنى بشعار مش دى مصر الموجود فى بعض المدونات، وهو شعار عندى عليه شوية تحفظ بس هكتبه فى موضوع منفصل

كل سنا انتى وسما بالف خير

blackcairorose said...

وانتى طيبة يا كاسبر

شكرا على كلامك وخلينى اخلص الحوارات وهمه باقى منهم شوية وبعدين اقوللك هم تجربة ولا

وتسلمى دايما

blackcairorose said...

هارت بيت

كل سنه وانتى طيبة

وشكرا على الكلام والاطراء

blackcairorose said...

اجندا

ازيك وعامله ايه فى رمضان واخبار السجاير معاكى ايه؟

كل رمضان وانتى بالف خير

blackcairorose said...

شكرا كتابة على الاطراء والكلمات الحلوة

كل عام وانتى بصحة وسعادة

ورمضان فرصة للخمسة كيلو إياهم، شوفى بقى انا بفتكر كويس ازاى!!

blackcairorose said...

شكرا عصفور بلا اجنحة على المرور والتعليق

وكل عام وانتى ايضا بالف خير

وهازورك حالا

كتابة said...

BLACKCAIRO ROSE..

ههههههههههههههههههههههههههههههههههه

خمسه وخميسه لعين اللي مايصلي عالنبي

فعلا أنت فاكراهم و أنا عايشاهم أوي:)

تناقصوا بس مش أوي أصل زادو كمان إتنين و دلوقتي رجعوا 5:)

و الله المستعان:)

كتابة said...

على فكرة أنا قصدت بخمسه و خميسه لأي حد ممكن يحسدك

أصل الذاكرة منتبهه جدا عندك:)

وخده بال حضرتك:)

blackcairorose said...

بصى يا كتابه فيه ناس ملعونة بالذاكرة القوية

انا منهم!