Saturday, November 8, 2008

فيونكة الشلة


أربعة صديقات لا ينفصلن عن بعضهن، بينهن ود ومحبة وصداقة مراهقة صادقة وقوية حين كانت القلوب لا تزال على طبيعتها لم تلمسها بعد يد الزمن

سامية وهدى ونرمين وبلاك روز

بين سامية وهدى كان التقارب أوضح قليلا والألفة كانت أعمق بين نرمين وبلاك روز

سامية الأكبر سنا وصاحبة الشخصية القوية والناضجة بالنسبة لسنها، صاحبة الآراء السديدة والذكاء الواضح، كانت هي الملجأ عند تعرض أي من الثلاثة لمشكلة ما، تفكر فيها وتعطى النصيحة المخلصة، لذا قررنا يوما أن نمنحها لقب عقل الشلة

نرمين الأكثر نقاء وطيبة ورومانسية بل وسذاجة (نرمين هي الصديقة التي كانت من عادتها التأخير فى تدوينة خدش أو جرح أو كسر) قررنا فى يوم آخر أنها قلب الشلة

ثم فكرنا أن الشلة يجب أن يكون لها وجه، بمعنى آخر، اختيار الأجمل فينا لنمنحها لقب وجه الشلة، وهنا اختلفت الآراء، سامية رأت أن هدى هي الأجدر نظرا لأنها شقراء ذات عيون خضراء، بينما وجدت أنا أن مستويات الجمال متقاربة بشكل يجعل من الصعب اختيار واحدة كوجه للشلة، أما نرمين فلم يكن لها رأى محدد
حين رأت سامية اعتراض روز أن يذهب اللقب لهدى، عقبت ضاحكة أنها مجرد غيرة منى، وأضافت أن هدى وبلاك روز يذكراها بالمنافسة بين الشقراء صباح والسمراء سامية جمال فى فيلم الرجل الثانى!

اللقب فى النهاية راح لهدى

وتبقت بلاك روز بلا لقب، حاولن إيجاد لقب ما لها ولكن دون جدوى

كنا نأخذ هذا الموضوع على أنه مزاح بالطبع ولكنى كنت أيضا أراه يعكس عدم تميزي بصفة واضحة ومحددة، ربما كان بي شيئ من عقلانية سامية أو جمال هدى أو طيبة نرمين ولكن في النهاية لا توجد صفة واحدة يمكن بها تلخيصي أو القول أنها الأبرز في

وقتها كنت أرى أن افتقاد الصفة الواحدة المميزة عيبا، وأن هذا الافتقاد يعنى شخصية بلا طعم، ولو أنى فى مرحلة سنية لاحقة لم أعد أرى أن افتقاد الصفة الواحدة الكبيرة المميزة عيبا، بل ربما يكون ميزة، لا أدرى

المهم، فى ذلك الوقت نرمين أحست بحساسيتها الفطرية بضيقى من عدم وجود لقب لي، فوجدتها ذات يوم تقول أنها قررت منحى لقب فيونكة الشلة، وبررت بأن الفيونكة فى الشعر أو في البلوزة أو الفستان تزينها وهى ترى أنى زينة الشلة

لم أع تماما معنى هذا اللقب وقتها ولكنى قدرت لنرمين رقتها، وقد ضحكت كل من سامية وهدى حين علمتا باللقب واتفقن جميعا فى النهاية على أنى فيونكة الشلة

اكتملت الألقاب وأصبح للشلة عقل وقلب ووجه وفيونكه
ــــــــــ

بعد ثانوى ذهبت كل واحدة فى كلية مختلفة، وظلت الصداقة قوية حتى بعد تخرجنا من الجامعة، ثم كعادة كل الصداقات تتزاحم عليها المشاغل والخصوصيات ومشاريع الخطوبة والزواج والعمل والأصدقاء الجدد الخ ، ولكن الود بأقصى درجاته كان دائما موجودا ومجرد الالتقاء يلغى ما سبقه من شعور بالغيبة أو الابتعاد أو حتى بالبرود أحيانا

كيف سارت بنا الحياة بسخريتها؟

سامية أحبت حبا جارفا وهى لا تزال فى الجامعة، كنا فى السابق نقول أنه من الصعب أن تجد شابا يقنعها ويأسرها بشخصيته، فهي صاحبة الشخصية القوية والذكية، ولكنها وجدت من له شخصية أقوى وثقافة أكبر وذكاء حاد، وصمم الاثنان على الزواج قبل التخرج ورضخ الأهل لتستمر حياة زوجية صعبة فى العشر سنوات الأولى، شهدت فى البداية كفاح التأقلم وتدخلات الأهل والحالة المادية الصعبة والسكن مع الأهل لبعض الوقت ثم السكن بعد ذلك فى شقة صغيرة جدا، ولكن تدريجيا بدأت الأمور تتحسن بشكل ملحوظ ، الشقة أصبحت أكبر ثم أصبحت تاون هاوس فى كومباوند فى الشيخ زايد، والسيارة الواحدة العتيقة أصبحت سيارتين جديدتين وكنا جميعا نضرب بهما المثل فيمن كافح حتى تغيرت أوضاعه بعد أكثر من 14 عاما من الزواج وأثنين من الأطفال

ثم صحونا من النوم ذات يوم على خبر الطلاق

لم تصدق أيا منا أن سامية وزوجها سينفصلان بعد كل هذا الحب والكفاح المشترك، حين جلست مع الزوجين مرة في محاولة للإصلاح وجدت روايتين مختلفتين كالعادة، ملخصهما أن كل منهما يدعى أن شخصية الآخر اختلفت و أن اهتماماتهما في الحياة قد تباينت، فلم يبق من الحب شيء، ولا الرغبة فى العيش سويا ـ حتى مع غياب الحب كالملايين من الأزواج الآخرين ـ
تم فعلا الطلاق، كنا نضرب كفا بكف ونقول عاشا وكافحا معا أيام الفقر ثم لم يتحملا بعضا أيام الثراء

نرمين النقية كانت دائما تحلم حلمين أحدهما منطقي والآخر من وجهة نظري غير منطقي، ولكن منذ متى كانت أحلامنا منطقية؟
الحلم الأول أن تتزوج بعد قصة حب جارفة، وهو حلم مشروع طالما لا نفتعل حدوثه
والحلم الثاني أن تتزوج شابا ذا شخصية اجتماعية جدا، يعرف كيف يتعامل مع النساء ويجذبهن إليه
كنت أرى هذا الحلم الثاني لا ينسجم مع شخصيتها الهادئة والخجولة والساذجة، وكنت دائما أخشى عليها من إعجابها بهذه النوعية من الشباب، لأن هذه النوعية ببساطة لا تبحث عن مثيلات نرمين، وإنما تلائمهم فتيات أكثر اجتماعية وأكثر خبرة وانطلاقا، وكم مرة يبدى شاب هادىء ورزين إعجابه بها ولكنها تقول أنها لا تشعر بالانجذاب نحوه دون أن تضيف المزيد، لكنى طبعا كنت أعلم ماذا كانت تنتظر وتتمنى

وقعت نرمين فى حب شاب له بعض المواصفات التى كانت تحلم بها وتزوجا وأنجبا ومازالا معا، لا أدرى هل هي سعيدة أم لا فهي لا تشتكى، ولكن المؤشرات أمامي تجعلني أشك فى هذا فزوجها ببساطة لا يستحقها، فهي أطيب وأنقى منه كثيرا كما أن مستواها الاجتماعي أيضا أفضل منه بكثير
القول المأثور أن الزواج إما يأخذك لأعلى أو أن يجعلك فى نفس المستوى أو ينزل بك لأسفل،
وللأسف أرى أن الخيار الثالث هو طريق نرمين ولا أعنى هنا المستوى الاجتماعي فقط ولكن أتحدث عن أسلوب حياة وأفكار واهتمامات

ومع الأسف أيضا رغم أن نرمين كانت الأقرب لى بين الأربعة، إلا أنني الآن أحسها الأبعد، هي أكثر حرصا منى على الالتقاء والتواصل معى سواء فى مصر أو حين أكون فى الخارج، إلا أن لدى شعورا بأن بحارا من التباعد تفصلني عنها وأجد أنه تقريبا لا يوجد ما يجمعنا حاليا سوى الذكريات، أحزن عليها وأرى أنها نالت أقل بكثير مما تستحق ولكن أعود وأقول ومن في الحياة ينال ما يستحقه سواء بالسلب أو بالإيجاب؟

هدى الآن هي الأقرب لي
تزوجت وعاشت حياة متوازنة لا مفاجئات فيها، أحرص على لقائها وتحرص على لقائي
.
.
العقل غابت عنا وانشغلت بالحياة الجديدة بعد الطلاق واتجاهها لعمل بيزنس

والقلب فى عالمها المطحون

والوجه فى دوامة الحياة والزواج والأولاد

والفيونكة ـ بعد تفرق الشلة ـ انفكت

35 comments:

رئيس جمهوريه نفسى said...

مش معاكى انى الفيونكة بعد انفصال الشلة انفكت ولا حتبقى مجرد فيونكة فى الشعر وان كانت بتزينة زى ما قالو ليكى صديقاتك كنتى مجرد جامع ليهم ولكن تقريبا انتى كنتى فيونكة قى ذاتك حسب تفسيرهم للقب
بستمتع بجد بذكرياتك القديمة طبعا البوست محتاج تعليق على موقف سامية فى الطلاق ورغبة نرمين فى الزواج فراجع تانى للتعليق

الطائر الحزين said...

ويبقى هناك خيط رفيع يربط بين فيونكات

Unknown said...

نوستالجيا لتعزيه نفسك ام لرثاء الاخرين

El - Shandwely said...

انا شايف موضوعين مختلفين .. اولهم جربته بنفسى :(
بس يمكن بتفاصيل مختلفة .. تتحطى فى موقف وتكتشفى ان كل حد حواليكى ليه عنوان او ميزة بتخلى لشخصيته خصوصية معينة .. ورغم انك متكونيش متوقعه الكثير عن شخصيتك .. لكن بتبقى فى صدمة لما تبتدى محاولة التفكير فى انك تلاقى فى نفسك ميزة ..
ويبدأ مخك فى التفكير فى اعتبارات كتير .. كان مخك متجاهلها قبل كده ..ومحاولة انك تلاقى مبرر لعدم وجود عنوان صريح او مرضى لشخصيتك .. وارجاع ده باستماته بان معظم الصفات الصريحة عند الاخرين ..هى فى الاساس موروثة وملهمش دخل فيها .. وان المفروض لما حد يدور عن صفات حد تانى ميبصش للصفات اللى بتندرج تحت النوع ده
ومحاولات مستميته فى انك تثبتى لنفسك ان فى عندك الكثير ..والكثير اللى يستحث يستحق التقدير .. بس هما مش شايفين ده
ويستتبع ده حاجة من الاتنين
اما التجاهل واللامبالاة وخلق نوع من الايمان بان الواحد مش محتاج يثبت لحد تانى او يتميز عن حد تانى فى شخصيته ومعاملاته مع الناس
واما محاولة ان تخلى من نفسك استنساخ من مزايا الاخرين .. المزايا المكتسبة مش الموروثة :)
وفى الحالتين القضية خسرانه .. او هكذا ارى
حاسس انى بعدت شوية عن موضوعك الاصلى ..

Desert cat said...

تعجبت لحاية سامية لدرجة انى قولت ياريتها كانت فضلت فى الشقة الصغيرة
اما نرمين فشعرت باحساسها وواستشعرت السبب لعدم شكواها ربنا يكون لان مواصفات هذا الزوج كانت حلمها ولم تريد الشكوى وتتحمل ما يحدث من تصرفات او احداث حتى لا تلام
اما الفيكونة فاعتقد انها القلب والعقل والوجه ايضاً لذلك جمعت ما بين كل هذه الصفات بداخل الفيونكة
:)
محبتى يا جميله

انا حره said...

وانتى ياروز تفتكرى لو واحده منهم حبت تعمل بوست زى بتاعك دا هتكتب ايه عنك بعد الفتره دى كلها

Anonymous said...

BCR
===
Could you please reveal a bit ??
Miss tie .. even ties untie at some point of time ..:)))

وماذا عن الفيونكة وان كنت اعتبر انك احلى من الفينوكة .. الكلمة .. لاتريح قليلا

ممكن ؟ لأ .. مش قصدى على الفيونكة .. قصدى على بلاك روز ؟

Anonymous said...

أسلوبك حلو اوى يافيونكة
انا بحب الفيونكات جدا لانى بحب الشعر الحريمي موووووووووووت
الشعر كده عضو جميل و برىء مش زى مثلا ال** او ال*** حلوين بس مش بريئين

زمان الوصل said...

التعقيب الذى توقّعت أن أجده مطروحا فعلا -يمكن تعقيب شريف- هو طيب و الفيونكه كان حلمها فى الحياه إيه؟ ده مش سؤال دى خاطره مرّت على ذهن القارئ دون أن يتوقّع لها إجابه :-) زى كده أمّا تقرئى سيره ذاتيه و يكون لديك بعض التساؤلات لصاحبها بس تظل تساؤلاتك داخلك


بخصوص موضوع صفه مميّزه لكل شخص .. باحسّ إنّه استسهال و محاوله لتلخيص كائن معقّد -بالمعنى الإيجابى للكلمه طبعا- به الكثير من التفاصيل فى كلمه واحده .. مش دايما الاختصار بيكون جميل ولا الإسهاب بيكون مملّ ..

سمـــــــــا said...

هو قبل اى كلام هسألك سؤال واروح انام وبعدين اجى اكمل رغى معاكى

انتى اخبار قلبك وعلاقاتك ايه ؟؟ عمرك ما قلتى اذا كنتى اتجوزتى قبل كده واللا لأ ؟؟ ولو لأ فلأ ليه؟ ولو ايوة طيب هو/هى فين ؟؟


شفتى كل دا سؤال مش محضر ولا حاجة :)))

تصبحى على خير يا قمر

Anonymous said...

hi ya amar:
ana lesa gaya mn el sho3'l now o ta3bana moot o 3andy 7awadeeet keter awy hagy hean 2a2olha k el 3ada bas ana gaya amasy o 2a2ol l sama en so2alha fel goean o ana kan nefsy as2al el so2al dah mn zaman sara7a :)
yalla good nite ya atfaly ya 7elween

مثليه said...

عزيزتي روز
بصي بقى اولا انا ليا وجهه نظر فالجواز مجنونه شوبه الا وهي ان يعيش الطرفان متباعدين بعض الشيئ عشان يفضل الاشتياق موجود وابسط الاشياء ان كل واحد ينام في غرفه مستقله و من وقت للتاني يسافر كل منهم رحله والله الحاجات دي مجديه جدا خصوصا ان الحب في اوله بيكون مشتعل و تلاقي الاتنين مش على بعضهم ومحدش سايب التاني ولازقين لازقه ملهاش لازمه فبعد شويه بيحصل ملل من الطرفين وتبدأ الخلافات ويتبخر الحب ماهما طول الوقت وشهم في وش بعض وكل طرف واخد الاخر فور جرانتيد فبالتالي بيروح احاسيس جميله من اساسيات الحب و هي الشوق واللهفه و الاحلام تلاقي الشخص قبل الجواز خاصه الستات بتكلمه فالتليفون و تدلع عليه و فيه بنهم لهفه و لما تبقى هتقابله تقعد قدام المرايا والدولاب ساعتين تلاته وبالليل وهي عالمخده تقعد تفكر فيه وقلبها يترعش ويبقى هينط من مكانه لما التليفون يرن برنته مثلا وتتمنى تحلم بيه واي وقت فراغ تسرح في قعداتهم والاماكن اللي راحوها الخ طب الحاجات دي ازاي تستمر بعد ما الاتنين اتحبسوا في سجن واحد فالشام بيقولوا على دبله الجواز المحبس ودا فعلا المعنى الحقيقي للدبله:)
لكن تقولي لمين لو قلتي لحد الكلام ده يقوله قواك العقليه فوتت
اما بالنسبه لنرمين الصديقه اللي كانت قريبه و اختلافات الحياه ونمطها خلاكي مبقتيش تحسي بالصداقه القديمه فدا بيفكرني برضه بصاحبتي الانتيم وكنت كتبت بوست من فتره عالموضوع ده لأنه كان مضايقني
انا بعتبر ساميه انسانه ناجحه لأنها بتحاول تنجح على المستوى العملي يمكن عشان تنسى اللي مرت بيه و حطت قدامها هدف و ده شيئ جميل
اما انتي بقى فاذا الظروف كانت فرقتكم وحسيتي ان الفيونكه اتفكت فبدل الفيونكه انتي هنا وردتنا النضره ذات العطر الجذاب واتمنى ان ده يكون بيسعدك
(بيعجبني بين السطور اني بحس انك بتحبي روز وعندك ثقه في جمالك ياريت يكون عنك شويه صغننين ثقه فالناس اللي هنا بتحبك و بتجيلك دايما- اعتبري نفسك مسمعتيش حاجه ده من باب الغلاسه الطبعيه بتاعتي:))بس مزضزع ساميه جميل ده عجبني جدا وياريت التفاصيل للملامح بقى هههههههههههه
لكن قوليلي مفيش اي مغامرات عاطفيه ليكي ايام الجامعه ولا بعد الجامعه ولا كده ولا كده انا عارفه اني بحرجكككككك بس الفضول بقى الله يسامحه:)
طبعا هقولك ابدعتي كالعاده وياريت تحكي كتير اليومين دول انا لسه مكتئبه والله:( وياريت كمان متكونش اسئلتي بايخه اوي يعني
سلام يا اجمل روز

عين فى الجنة said...

الفيونكة هى الفراشة ولا يوجد ما هو اجمل من الفراشة الرقيقة الملونة
ولكنها طيبة جدا وساذجة بتدور على النور علشان بتحبه مهما كانت العواقب

Happy Hope said...

عزيزتى

كالمعتاد بوست رائع

أكيد داخل الشلة الواحدة بيكون فى أصدقاء قريبين أو شخصيات قريبة لشخصياتنا

لكن من لحظة تصنيفكم لبعض حسيت ان فى شرخ حصل للشلة
و ده بصراحة معجبنيش

لأن كل انسان مميز بناحية من النواحى و مش معنى ان واحد عنده عقل يبقى التانى معندوش

أنا شايفة ان ان أكبر ميزة هى انك بتجمعى كل الصفات

دوام الحال من المحال عزيزتى الظروف بتتغير و التجارب اللى بنمر بيها برضه بتغيرنا و الحياةو مشاغلها بتخطف الانسان حتى من نفسه

أنا معترضة على الفيونكة
ليه مفكرتوش ان ممكن تكونى انتى روح الشلة !!؟

Unknown said...

والفيونكة ـ بعد تفرق الشلة ـ انفكت
الجمله هاي حزنتني جدا؛ مش عارفه حسيت فيها وحده و حزن دفين:(

الصفه المميزه هاي بحسها مرات مضلله؛ مرات بتكون الصفه المميزه موجوده بس عاديه جدا لدرجة انها مش واضحه بالمره؛ او يمكن الاشياء العاديه صعب الواحد يلاحظها زي الشغلات غير العاديه

المهم؛ أنا بقرأ بقرأ بقرأ و بحكي ف حالي :هلأ بتحكيلنا شي عن حالها؛ كمان شوي بنعرف لنا شي؛ و بالآخر و لا شي!!!

انتي بهالقصه أثرتي تساؤلات في نفسي: يعني دايمن بتساءل ايش ممكن يصير كمان 5 أو 10 سنين؛ يا ترى نفس الناس رح أضل أعرفهم؛ و لا شو ممكن يتغير. مين ممكن يضل ع اتصال معي و مين ممكن يبطل؟

بس مش عارفه ؛ مع هيك عندي إحساس؛ إنو غموض العقرب شوي شوي عم ينحل؛ وكمان شوي حنعرفك أكتر:)

وين بوست الشتا صح؟ أنا رحت عند someone in life و لقيتك لسا متزكره الحمدلله؛ و لا بتستني الشتا يدخل مزبوط؟

سمـــــــــا said...

انا جيت تااااانى

تصدقى انا عندى رغى كتير اوى بس مش عارفة ارغى فى ايه واللا ايييييييه

أولا : بصى يا ستى طبعا ايام المدرسة والمراهقة بتتميز بمواضيع الجروبات دى وبيبقى فيه صداقة بس برضه بيكون فيه غيرة وحركات بنات اوعى تنكرى :))


ثانيا : انا مع الرأى اللى قال ان ميبقاش فيه تصنيفات ومسميات فى الشلة

لان اكيد كل واحدة فى الشلة بيكون لها طابع خاص جدا واكيد كل واحدة مميزة بحاجات حتى لو مفيهاش ميزة طاغية للناس لان انا مؤمنة ان كل انسان له طابع خاص زي بصمة الاصبع


انا شخصيا محبش اقارن بين اتنين حتى لو فيه بينهم اختلاف واضح وبرضه محبش حد يقارننى بحد ودايما أقول انا مش زي اى حد ولا فيه اى حد زي فهمتى بقى ( انا انا مش أى حد تانى ) جت منين ؟ :))


انتى فكرتينى بفيلم الرجل الثانى وخصوصا اللقطة اللى تقصديها لما صباح بتقول لصلاح ذو الفقار انت عايز تجيب التفاح الامريكانى اللى الكيلو منه ب 3 جنيه لدى ؟؟ فسامية قالت لها بس التفاح برة بيأكلوه للخيل ، فصباح قالت لها : دا لما يغمق ويعطب :))

بس بينى وبينك انا مبحبش البنات الشقرا ولا بحب البياض الزيادة فى الستات او الرجالة يعنى احب البنت القمحى او الخمرى


ثالثا : حالات صديقاتك طبعا بتحصل وانا مش مستغرباها لان الدنيا بتتقسم ما بين قسمة ونصيب وقدر وتلاهى الحياة والجواز والشغل والظروف والولاد بلا بلا

يعنى مش سهل حد يفضل على حاله، وبمناسبة الكلام دا فيه مثل بيقول : لا ( اللى فوق هيفضل فوق ولا اللى تحت هيفضل تحت ) مفيش حاجة بتبقى على حالها ابدا والا مكنش يبقى اسمها دنيا ... مش عارفة ايه العقل اللى نازل عليا اليومين دول انا فسدت خالص :))


...........................

نيجى بقى لتعليق الصبح طبعا انا شفته من وقتها بس ترددت انى انشره علشان حسيتك بتفضفضى فقلت هسيب الاختيار ليكى لو تحبى نذيع قول ذييع ، بس انا برضه هرد وارغى هو انا هرحمك :)))

بمناسبة اللقب فانا موافقة عليه جدا بس كده دول 3 القاب ولو ركزتى فى تسلسلهم هتحسى ان ناقصلى مشنة على راسى واطلع على سوق العبور :))

وبالمناسبة انا كنت اكتر واحدة فى اصحابى بتاخد القاب ويمكن لغاية دلوقتى يعنى ايام المدرسة كانو مسمينى بكيزة هانم واعتقد انى ذكرت الموضوع دا عندك قبل كده ودا لانى كنت بقرف ودايما مش عايزة اتوسخ ومش عايزة امسك حاجة وتحسى انى بتكلم بطراطيف صوابعى زي بكيزة هانم

ولما دخلت الجامعة اللقب اختلف تماما وبقى فيرجينيا جميلة الجميلات وبعدها اكتشفت ان الاسم دا انتشر فى منطقة سكنى والكوميدى ان واحد صديقى بلوجر من كام يوم بيكلمنى على المسنجر فأول ما دخل لقيته بيقولى ازيك يا فيرجينيا يا جميلة الجميلات قلت له نعم انت ايه عرفك الاسم دا ؟؟ بس كانت مصادفة كوميدية أوى قلت انا متراقبة واللا اييييه

وطبعا لو ليلى فوزى الله يرحمها بجمالها دا سمعت ان بيتقالى انا فيرجينيا كانت وقعت ماتت لوحدها :))

وكانت العزيزة كاسبر اطلقت عليا فى احد التعليقات سيدة الصمت الجميل .. بس مش عارفة مين دا اللى صامت ؟؟ تفتكرى كانت بتتمنى انى اسكت شوية فبتحرجنى باللقب ؟؟ ههههههههه

........................

نيجى بقى للموضوع التانى :

أعتقد انتى لازم تفكرى كويس اوى اوى لان الموضوع له مميزات وعيوب فى الناحيتين يعنى لا القرار سهل ولا تنفيذه سهل سواء كده او كده

انا برضه هدعيلك يا قطة ان ربنا يوفقك للى فيه الخير ان شاء الله

........................

على فكرة انتى ممكن تجاوبى اسئلتى بالحبر السرى برضه :))

soly88 said...

تركت لقبى العقل والقلب
يمران دون اعتراض منك
وعند لقب وجه الشله ابديت اعتراضك
ربما موضوعك يجعلنى اوقن انه اذا انتظرنا ما نحصل عليه من الآخرين قد لا نحصل على شيىء
وان رأى الآخر ليس بالضروره محايدا
فى انتظار مزيد من الذكريات

someone in life said...

العزيزة وردة التدوين

اولا سالتك في مدونتي امتي عيد ميلادك لانك قلتي بينا ايام قليلهو ان كان اكيد انا الاكبر سنا، لو فات كل سنه و انتي طيبه و لو لسه احنا عاوزين محتفل معاكي

حسيت بوحدة شديده في البوست دة
لو انت فيونكه تبقي اجمل فيونكة شوفتهاقصدي قرات لها بس سيبك من ده كله و بصي جوا بلاك كايرو روز نفسها هاتلاقي فيها كل الصفات الجميله من عقل و ذكاء واضح من سردك لحياتك و الا ما وصلتي لمركزك الحالي تذكري كلامك ان الصدف لم تلعب كثيرا في حياتك يعني كل شء مرتب و مدروس بالنسبه للقلب واضح انك طيبه و لا نسيتي ماما عطوفه و لا مساعدتك لصديقتك و اكيد ليكي مواقف كتير احنا مش عارفينها ده كفايه عطفك علي الكلب اللي لاقيتيه في الشارع غيرك بيشوف بني ادم بيموت و ما يتهز منه شعرة و الجمال واضح و الحمدلله روحا و شكلا يعني اللي قصدي اقوله ان بلاك كايرو فيها كل المميزات ساميه فقدت و بتحاول في طريق جديد و نرمين ساكته لسوء اختيارها ربما او لضعف الشخصية و هدي متعايشه مع وضعها اظنك الوحيدة اللي يمكن حققتي شيئا في حياتك و يوم ما تفكري تغيير حياتك اكيد هايكون للافضل
طولت عليكي و هوني علي نفسك انت روز مش فيونكه
تحياتي

kasber said...

كنت بالنسبه لاصدقائي اشبه بقس الاعتراف
فتدريجا تعلمت السمع ونسيت الكلام
واصبحت الكتابه والرسم تفريغ صامت
ولكن
بعد فتره اختلف الناس
فلا الاصدقاء هم الاصدقاء
يتبدل الجميع علي قس الاعتراف
يتغيرون
ولكن يبقي دائماً وراء جدار
ينصت
وينصت
ثم يتحدث في النهايه بأقل القليل اما يصيب او يتهم بالكفر
تحررت الفيونكه حين انفكت
صدقيني

Samraa said...

Dear BCR
i read your post over and over, felt real sad at some point and it made me rem sometimes when mom speaks about someone who were soooo diff in his youth....
LIFE
time changes everything around,and the biggest change is OURSELVES.....
i have seen ppl who shaddered completely after time passes ....
sad eh!
ولكن منذ متى كانت أحلامنا منطقية؟
so true....
maybe we should just stop ,,dreaming
loved da post.
Regards

blackcairorose said...

رئيس الجمهورية
يسعدنى انك تستمع بما اكتبه، وأحيانا بقول لنفسى انى بعيش فى الذكريات اكتر ما بعيش فى الواقع الراهن

الطائر الحزين
كان هناك فعلا خيط يربطنا، ولكن أشعر الآن أنه انقطع باستثناء علاقتى بهدى فمازال الخيط موصولا

شمعون
تعزية نفسى أم رثاء للآخرين؟
لا أدرى، ولكن لماذا سأعزى نفسى؟ حياتى ليست أفضل ولا أسوأ من الآخرين لأننا جميعا ندفع فى النهاية ثمن لخياراتنا، ولا أرثى أيضا الآخريات لأن كل منهن تمضى حياتها بالشكل الذى تمنته ربما باستثناء نرمين التى ـ من وجهة نظرى ـ تستحق العزاء، ولكن ما كتبته هو بالتأكيد سردية لصداقة أتت عليها عوامل الزمن

الشندويلى
معاك فى التحليل، لكن أحيانا التجاهل واللامبالاة والايمان بعدم الحاجة الى اثبات شىء للآخرين يكون نتيجة لاقتناع فعلى بعدم صحة المقارنة بين البشر، وأن كل فرد حقا يتمتع بخصوصية ما، هذه الخصوصية قد تكون مجرد صفة وقد تكون توليفة معينة لعدد من الصفات، اما محاولة اكتساب صفات مكتسبة لدى الآخرين، فلا أعتقد أنها تنجح طالما لم تتوفر فى تربة شخصياتنا البيئة اللازمة "لنمو" هذه الصفة

قطة
حياة سامية مليئة بالتفاصيل العديدة والتى جعلتنى الى حد ما اتفهم اسباب الطلاق رغم عدم كونها اسباب ضخمة ـ من وجهة نظر المجتمع المصري ـ ، وفى عائلتنا لدينا حالة الى حد ما شبيهة فى مجملها وهى حالة طلاق تمت ولكن شقيقة أخرى لى استغربت الطلاق وقالت أنها لو كانت مكان الزوجة لتحملت الحياة وركزت اهتمامها على ابنائها وتربيتهم، ولكن فى النهاية قدراتنا على التحمل من جهة وما نرى أننا نستحقه من جهة أخرى يجعل ردود افعالنا مختلفة جدا فى هذه المسائل
أطيب تحياتى كالعادة


أنا حرة
تصدقى انى برضه خطر فى بالى الموضوع ده وانا بكتب، دا انا حتى فكرت انى اعمل تكملة للبوست اكتب فيه رأى كل واحدة من التلاتة فى بلاك روز، وبعدين لقيت أن الموضوع شوية هيبقى مكلكع، لأنى لو كتبت الجوانب الايجابية اللى كل واحده شايفاها فيه هيبقى البوست مجرد تجميل لنفسى، ولو كتبت بس السلبيات هاطلع فى البوست بشعة، واذا حاولت الجمع بين الايجابيات او السلبيات اللى كل واحدة منهم شايفاها فى بلاك روز هدخل فى دوامة انى ضرورى اعلق وأرد على كل صفة واقول اذا كنت شايفاها صح ولا خطأ ولا سوء تقدير من الصديقة ليه، يعنى لقيت الموضوع هيتحول لمحاكمة منهم ليه ومنى ليهم

شريف
صعب جدا انى اكتب عن نفسى فى نفس السياق، زى ما مش ممكن تصور ناس قدامك بكاميرا وتكون فى نفس الوقت جوة الصورة معاهم
لو واحدة منهم عندها مدونة ـ وهمه مش متابعين للمدونات او النت على فكرة ـ لكن لو، كان ممكن همه يكتبوا عنى بشكل موضوعى اكتر ما اكتب انا عن نفسى، بس انى اسرد انا كنت ايه وبقيت ايه زى ما سردت عنهم هيبقى فعلا صعب، ممكن اخمن كل واحدة رأيها فيه ايه سواء فى اللى كنته او اللى بقيته، بس ده هيفضل تخمين من جهتى مش اكتر
وخالص الود كالعادة

مصرى
شكرا على كلماتك، وكل شىء جميل فى رأيى اذا قيل فى وقته ومناسبته وظروفه، ونفس الشىء الجميل اذا قيل فى غير ظروفه المناسبة سيصبح قبيحا
على فكرة
دخلت مدونتك وشهقت مما وجدته!! لك اراء استثنائية جدا، لا أدرى هل هى آراء قابلة للحوار أم أنك فقط تضع أفكارك على الورق ولا تهتم بما يقوله الآخرون؟؟

زمان الوصل
اعتقد ان الصفة الواحدة بشكل عام ليس عيبا، الا اذا اعمتنا عن الصفات الاخرى التى قد تكون اقل بروزا
الطريف انى الاحظ انه اذا قلنا صفة ايجابية واحدة نشعر اننا لم نعط الآخرين حقهم، ولكن اذا قلنا صفة سيئة واحدة باعتبارها الابرز عادتا نكتفى بها كما لو كانت تجب أية صفة أخرى!

بالنسبة لتعليق شريف، كنت اتمنى لو أن صديقة خامسة كتبت عننا نحن الأربعة!! سيكون عندئذ السرد أكثر موضوعية وتوازنا يا عزيزتى


سما
انت باين عليكى بنت حلال

تصدقى انى بعد ما كتبت التعليق عندك، قلت لنفسى انا هدخل تانى واشيله على طول قبل ما يتقرى، بس افتكرت انه مينفعش لان التعليق هينزل بعد الموافقة منك أولا، فقلت اهو ده بقى عيبه!

مكنش النيه انى اشيله علشان انتى متقرهوش، لا خالص، كنت عايزة اشيله لأنى حسيت انه تعليق خيبان خصوصا الجزء الاخير، لانه هبل رسمى لما حد يسألك انتى ظروفك ايه، تقومى تجاوبى وتقولى ده سؤال خطير!! ايه الخطورة فيه؟ فقلت لو حد قراه هيقول ايه العباطة دى

المهم
التصنيفات كانت موجودة بينا بس صدقينى كلها كانت بنية صافية ومكنش بينا حزازيات، يعنى العقل والقلب مفكرناش كتير لانه تقريبا كنا مجمعين على مين العقل وعلى مين القلب، فى موضوع الوش انا بس اعترضت على صعوبة الاختيار ولكن مش اعتراض على ان هدى تاخد اللقب فى حد ذاته

وعلى سيرة البيض والسمر، فكرتينى بواحدة من اخواتى دايما تقول انها مبتحبش الراجل الابيض، بس جوزها ابيض وجوزها الاول ابو الاولاد كان برضه ابيض، فبقولها طيب لو مكنتيش بتحبى البيض كنتى عملتى ايه، بس هى بتقول دى ظروف وانها مختارتش بالشكل لا الاول ولا التانى

كاسبر مسمياكى سيدة الصمت الجميل؟؟ انا متهيألى تفسيرك صح لول

وعلى فكرة بالنسبة لسؤالك، انا كنت متجوزة ودلوقتى فرى


سولا
قريتى ردى على تعليقك فى البوست اللى فات يا سولا لما قلتلك تكتبى يومياتك؟ بجد فكرى فى الموضوع ده


مثلية
متهيألى نظرتك للجواز أو الارتباط بشكل عام ممكن تنفع ناس وممكن متنفعش خالص مع ناس تانية يا عزيزتى، طبعا البعد بيولد الشوق انا فاهمه كده كويس، بس مش كل كوبل بيحب مساحة حرية كبيرة او يمكن نص مساحة حرية، انا مثلا هتضحكى لو قلتلك انى من النوع اللى لما بحب، بحب بجد، وببقى عايزة افضل اربعة وعشرين ساعة فى اليوم مع اللى بحبه، ومتفتكريش ان ده بس بيكون فى الفترة الاولى فى العلاقة ، لا، ده بيستمر معايا، معرفش طبيعتى كده، يعنى مجرد الغياب فى الصبح فى الشغل بيكون كفاية انى احس بالشوق للناس اللى بحبهم واحب ابقى جنبهم، واعتقد انى هتعب مع حد بيحب مساحة حرية كبيرة، والعكس صحيح فيه علاقات زوجية او ارتباط مبنية على مساحة حرية واستقلالية كبيرة ويمكن العلاقات دى تفشل لو اصحابها مع بعض طول او اغلب الوقت

بالنسبة لى طبعا كانت ليه قصص زى اى حد، بس معرفش ماليش نفس اتكلم عنها فى البلوج ، على الاقل لحد دلوقتى، بس قوليلى هو مين يعنى بيكتب عن قصصه فى البلوجات؟ فيه مدونات كتيرة اصحابها مش بيهوبوا ناحية الموضوعات الغرامية دى من اساسه!!!

ملامح الاشخاص؟ بتتكلمى بجد ولا بتهزرى؟
شوفى يا ستى سامية طويلة وعريضه خمرية وشعرها اسود وعندها ثقة كبيرة فى نفسها، بس مش غرور لأنى عارفة كويس الفرق بين الاتنين
هدى زى ما قلت شقراء وسبحان الله شكلها متغيرش على مدار عشرين سنه، الا مجرد لون الشعر اللى بتصبغه دايما دلوقتى لانه شوية ابتدا يبيض وهى محافظة على جسمها جدا رغم الجواز والاولاد، ودى من الحاجات اللى بتعجبنى فيها
اما نرمين فكانت متوسطة الطول ورفيعة ووشها طويل وشعرها اسود ناعم قوى، بس هى اكتر واحدة بان عليها السن فينا دلوقتى، زاد وزنها شوية وشعرها خف قوى عن الاول وهو كان اصلا خفيف شوية يمكن بسبب الحجاب، اما وشها فبان عليه الكبر اكتر

راجي
شكرا على الكلمات الرقيقة، اما ان الفراشة طيبة فده شرف مقدرش ادعيه
واطيب تحياتى دائما

هابى هوب
صدقينى التصنيفات زى ما قلت فى تعليقاتى مسبتش اثر وحش عندنا ولا نوع من الشرخ، يمكن لان العلاقة كانت قوية بينا ومفيهاش مجال لغيرة، بل على العكس مع العقل والقلب كان فيه اجماع
بالنسبة لروح الشلة ، فلقب حلو، بس معرفش ليه مفكرتش فيه، ولا حد تانى فكر فيه، هى مرة سامية المجرمة لما بقولها انى عايزة لقب، راحت قايلة لقب كده هزار *** الشلة ، بس ميصحش يتكتب فى التدوينة ولا التعليق لول

مياسى
بوست الشتا كل شوية اضيف عليه جملة، لأن كله التداعيات الصغيرة اللى بتجيلى لما بفتكر الشتا وبفتقده، فهييجى متقلقيش!
غموض العقرب؟ مفكرتش الربط بين الغموض وبين البرج قبل كده، همه بيقولوا ان العقرب عميق، ومتهيالى ده صح، ولو ان كل واحد شايف نفسه عميق وده برضه صح!!

سولى
مزيد من الذكريات ستأتى، أو بالاحرى ستظهر لأنها أحيانا تكون مخبأة حتى عنى، وفى حاجة لاسترجاع وتركيز منى لأعادتها على المسرح من جديد

Someone in life
آخر اكتوبر،بس متهيالى انا اكبر فى السن ومتسألنيش سنة كام عشان ربنا أمر بالستر!!
شكرا جدا على كلماتك الحلوة دايما واللى انا متأكده انها طالعة من قلبك على طول وصدقينى بتوصل برضه على قلبى على طول
وكل المودة والاعزاز

كاسبر
كتبت أنت أن الفيونكة تحررت حين انفكت
صدقينى أنا اعدت صياغة جملتى الاخيرة أكثر من مرة وانا اكتب فى درافت التدوينة، لأننى أولا أردت أن أعطى معنى التحرر فى الجملة، ثم لم أجد الصياغة التى تنقل المعنى الذى أردته دون أمكانية أن يساء فهمها، ومن هنا كانت اضافة جملة " بعد تفرق الشلة" ، ولكن يبدو أن قس الاعتراف لا يكتفى فقط بالاستماع ولكنه يدرك المعنى حتى ولو لم يقال

Samraa
You know what feaks sometimes? That time reflects on us but we only see it on the others.
One of my sisters, whenever she met someone she hasn’t seen for long time, used to say :
God she looked much older and I guess she says the same about me!

Thanks for your beautiful words

سمـــــــــا said...

تعليق خيبان ايه بس? بالعكس دا كان لطيف جدا وخصوصا انك كنتي بتتكلمي من قلبك من غير ما تفكري انتي بتقولي ايه وازاي فانا اعتبرت ان دي دردشة فمش من حق حد تاني يقراها .. ميرسي علي الاجابة وبالمناسبة عجبني استخدامك لكلمة فري بدل سنجل مثلا وأعتقد دي بقي قصة كبيرة بس مش هسألك عليها دلوقتي :)

qwert anime said...

يمكن لو مكانوش قالوا للفيونكه انها فيونكه كان حال الشله فضل زى ما هو

مثليه said...
This comment has been removed by the author.
سمـــــــــا said...

العزيزة مثلية : الفضول قتل القطة دا أولا :)) - تاني حاجة أعتقد لما حد بينشر تعليق علي بلوج دا مسموش وشوشة علشان يبقي يابختك ياسما فأعتقد الجملة دي ملهاش محل من الاعراب معايا أو مع روز - ثالثا : في تعليقاتي معاها قلنا ان الكلام مجرد فضفضة يعني مفيهوش سر لكن حرية نشره من عدمها متروكة ليا وليها صح ? رابعا : انتي ليه الفضول قاتلك ? انا شخصيا احب أعرف!!! - انا طبعا مقلبتهاش قضية رأي عام بس انا جملة الفضول قاتلني أعرف دي بتستفزني شوية وخصوصا لو الموضوع مش مجال للمناقشة. اتمني ان كلامي ميكونش زعلك وأكيد انا عارفة انك بتهرجي بس طالما اسم سما اتحط في موضوع فكان لازم ارد بقي .. إشربي العصير :))

Anonymous said...

ya roose ana geet bas hakteb nos comment now o el ba2ly latter 3ashan ta3bana mooot:
ana kan leya asma2 ketter awy bas aktar esm kont ba3taz beh el lebdah o kaman kont ba7eb awy el beg7ah.....
asl ana ma3rof 3any eny mesh ba7'af mn 7ad o mesh beyhemeny te2dary te2oly malesh kebeer ,o ba3deen lama da7'alt el college ba2et el set tenka hanem,yala hagelek tany akamel el comment ya feyonkah
salam mo2aqat ya amar

مثليه said...

العزيزه سما
انا فعلا كنت بهزر و انا بحب دايما انكش روز مش اكتر ولا انا قصدت اوجهلك كلام ولا كنت افكر ان الهزار هيضايقك ابدا وعموما يا ستي لو كلمه يابختك يا سما ضايقتك متزعليش يا ستي اديني سحبت التعليق كله

العزيزة روز

ياريت انتي كمان متكونيش اسأتي فهمي انتي عارفاني اني بحب دايما اهزر معاكي

emad.algendy said...

شعور بالدفء والشجن انتابني بعد قراءة تدوينتك
لماذا يعلو صوت منير بداخلي كلما قرات كلمة بعد اخرى
"في دايرة الرحلة دروب بينا تخلى"
اجمل مافي الفيونكة
انها وان تباعدت عن اصدقائها مازالت قادرة على التواصل معهن وحتى لو من اتجاه واحد
مازالت تحمل لهن الكثير
شكرا

أسما عواد said...

بوست جميل جدا يا روز
تعرفي الفيونكة الجميلة الي اتفكت دي رمز جميل جدا عجبني
بما يحمله منمعني لخيبة الامل او تفكك كل واحدة عن احلامها او شخصيتها
تحياتي وشكرا لزيارتك لمدونتي وان كانت قد جاءت متاخرة جدا

blackcairorose said...

مثلية

طالما سما قالت لك اشربى العصير، يبقى الحكاية كلها انها متقمصة شخصية محمود سعد مش اكتر!

هقول لك حاجة بؤمن بيها وبطبقها رغم انى مش عارفة اذا كان ده صح ولا غلط، وهو انه على النت مفيش مجال الواحد ياخد حاجة بشكل جاد جدا او زيادة عن اللزوم، لان النت نفسه وسيلة قاصرة للمعرفة بين الافراد وبالتالى لا يجب اننا نحمل الكلام اكتر من معناه واحيانا مفروض حتى منحملوش كل معناه!

وبتأكيدى على ان النت وسيلة قاصرة وغير مكتملة لمعرفة الناس لا يبقى الا انى آمل فى يوم اقابلك انت وسما وجها لوجه ان شاء الله وساعتها بقى نصفى حسابات لول

blackcairorose said...

نور

شكرا وفعلا أصبت اجمل ما فى الذكريات: الدفء والشجن

blackcairorose said...

أسما

شكرا على كلماتك الحلوة

الانفكاك يعنى اشياء كثيرة ويفسر بطرق كثيرة مختلفة ولكنها قد لا تتناقض مع بعض رغم ذلك

أنا من اسعدنى التعرف على مدونتك وانا الخاسرة أنى أتيتها متأخرة، ولكن ماذا نفعل كل مرة أقول يبدو أنه لا جديد فى المدونات تقع عينى بالصدفة على مدونات جديدة ـ بالنسبة لى ـ جميلة ومميزة ومختلفة كمدونتك

أطيب تحية

م/ الحسيني لزومي said...

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
ارسل ميلك اذا كنت ترغب في وضع البنر نرسل لك كود البنر

Enbee said...

من أجمل ما قرأت في قصص اجتماع شمل الأصدقاء وتتبع مساراتهم واختلاف مصائرهم حتى تشعب دروبهم في الحياة...
ربما لأن من رسم خطوط الحكايات هي الحياة نفسها؟؟؟

وشكري لصاحبة المدونة التي تضعك في قائمة متابعتها
لأني عرفت طريقك من خلالها

تهنئتي لك على أسلوبك الذي يتميز بالصدق والسلاسة في التعبير

تحياتي العطرة

Anonymous said...

انتي جميلة أوي اجمل ما في لغتك صدقها وبساطتها اللي بتوصل الفكرة ع القلب والعقل علي طول
كل سنة وانتي طيبة