غنا ورقص

متهيألى صوتى حلو

عارفة هتقولوا ان كل الناس دلوقتى صوتها حلو

طيب خلونى اكون اكتر دقة، واوضح ان زمان كنت بقول ان صوتى مش وحش وبعدين بقيت أقول انه مش بطال، لكن فى السنين الاخيرة لما سمعت اصوات المغنيين قلت لنفسى ان صوتى على كده يبقى مش بس مش بطال لكنه حلو

من اول الناس اللى قالتلى ان صوتى مش بطال كان مدير سابق ليه، ولأ، مكناش بنشتغل فى روتانا ولا حاجة، كنا فى شركة كبيرة ومحترمة ، بس احيانا كتيرة انا وهو كنا بنحضر اجتماعات فى اوتيلات او اماكن مختلفة بعد الظهر وعموما كان فيه بينا كيميا جامدة ـ كيميا وبس ـ ومرة واحنا راجعين بعربيته كان مشغل البوم عمرو دياب تملى معاك ـ وهو احلى البوم لعمرو دياب فى رأيى ـ وجت اغنية عارف ليه أنا قلبى اختارك اللى بحبها جدا فلقيت نفسى بغنيها، ولقيت المدير بيقول ايه ده مكنتش عارف ان صوتك حلو، فرديت عليه بما يلزم وقلت فنانة شاملة حضرتك

وكمان من اللى كانوا بيحبوا انى اغنيلهم واحدة من اخواتى، وكانت ايامها طالعة من موضوع عاطفى كده ومكملش، واول ما تركب العربية معايا تقولى حطى بهاء سلطان وغنيلنا معاه، فكنت بغنى اغنية حلوة اسمها يومين وعدوا يومين وراحوا، ولحد دلوقتى بحب اسمع واغنى الاغنية دى

اليومين دول الاغنية اللى بحب اغنيها هى لرامى صبرى اسمها كلمة، رغم ان رامى صبرى نفسه بينرفزنى وعامل فيها مطرب الشباب بس الاغنية لطيفة، الفيديو اللى مخرجه طارق العريان مفيهوش حد ادنى من التجديد كالعادة

وعلى سيرة الاغانى ميلودى بتجيب مغنية لبنانية اسمها قمر، شكلها حاجة كده بين سلاف فواخرجى وهيفاء وهبى لكنها احلى من الاتنين فى رأيى، الاغنية اسمها آل يعنى، قطقوطة وبسيطة والاغنية مش محتاجة صوت خالص كل اللى محتجاه شوية دلع، برضه بحب أغنيها وبحب الرقص على رتمها الشرقى والهادى عكس الناس اللى بتحب الرقص على ايقاعات سريعة، الرتم الهادى لهواة الرقص زى ما قالولنا فى ابتدائى هو لزوم التقسيم ـ سامعه حد بيقول يا سيدى لول

بحب برضه أغنى لفيروز ولو أنه اجرام ان حد يحاول يغنى لفيروز، بس مقدرش اسمع اغنية علمونى هنى علمونى من غير ما أدندنها، فى واحد زمان قوى كان بيحب انى اغنيلو اغنية شادى وكان بيقول انى بغنيها حلو قوى، بس بعد كده كان عندى اسباب تخلينى اشك فى قواه السمعية والذهنية عموما

وبالمناسبة برنامج دندنة اللى على ميلودى، جابوا أصالة وهى بتحاول تغنى رائعة وردة لعبة الايام، طبعا اصالة من أجمل وأقوى الاصوات دلوقتى لكنها كانت بتنهج ومش قادرة تغنى لعبة الايام اللى محتاجة صوت ونفس جبارين زى اللى عند وردة، قلت أمال بقية المغنيات يعملوا أيه

سمعت أغنيات لطيفة الجديدة على النت، أولا صعب تعمل حاجة مؤثرة بعد أغانى زياد رحبانى فى رأيى، والفرق كبير،
الموسيقى فى الاغانى الجديدة شرقية وحلوة ولكن معظم الكلمات فى رأيى مكررة ومستهلكة
أغنية الكام يوم اللى فاتوا مش بطالة لكن التوزيع كريه لأقصى الدرجة وكان من الافضل لها توزيع شرقى يبرز جمال الاغنية وكلاسيكيتها زى نوعية أغنية لما يجيبوا سيرتك