Monday, August 18, 2008

فى الشغل

تم ترقيتي منذ فترة لأصبح مسئولة عن عدد لا بأس به من العاملين، وقد نقل لي البعض وقتها أن زميلة لها تقريبا نفس خبرتي ترى عدم أحقيتي لشغل هذا المنصب وأنها هي الأحق به، تجاهلت ما سمعته آنذاك لان هذه الزميلة لم تواجهني بهذا الكلام رغم أنى على ثقة تامة أنها فعلا قالت ذلك لمعرفتي بشخصيتها، ومع ذلك ظلت العلاقة بيننا احترام وزمالة على الأقل من ناحيتي

خلال عطلتي انتقلت مسئولية ما أعمله إلى هذه الزميلة، وبعد عودتي كان عليها تقديم ما يشبه التقرير لما تم فى غيابي، وهو ما قامت به بالفعل، وفى نهاية جلستنا نظرت لي بوجه بشوش وودود وهمست بشكل أخوى بالتالى
بينى وبينك لاحظت فى غيابك ان العاملين لديهم الاعتياد على درجة من التسيب، وعدم تقدير تساهلك معهم، الأمر محتاج منك بعض الحزم يا زميلتي العزيزة فى التعامل مع البعض

الكلام ظاهره نصيحة أخوية، ولكن باطنه هو
ـ لا تظني أنك مديرة ناجحة فأنت لا تعرفين إدارة هذا العدد من العاملين
وهو ما قالته في أكثر من مناسبة سابقا عنى وفي غيابي طبعا

رددت عليها بهدوء
حقيقي؟ إذا لا بد من مواجهة هذا النوع من التسيب، هل ممكن تقولي لى أسماء العاملين الذين أحسست منهم بهذا التسيب حتى يتم عقابهم أو على الأقل مواجهتهم بما فعلوه؟

طبعا هى بلعت ريقها وقالت
لا، لا أقصد أسماء محددة وإنما يعنى اتجاه عام

فرددت
وماله، طيب ما هي المواقف التي أعطتك الإحساس بهذا الاتجاه؟ وأسماء الأشخاص الأطراف فيها حتى أضعهم فى اعتباري حتى بدون مواجهتهم فى هذه المرحلة؟

وطبعا كما توقعت هربت من الإجابة خوفا من إعطاء أسماء لأنها تعلم أنها لو أعطت ولو اسم سينقلب الباقون عليها، وأصلا ليس هدفها معالجة التسيب ـ إذا كان هناك ـ وإنما فقط تريد توجيه كلام مبطن

وفى حقيقة الأمر وجدت أنها أثناء غيابي قد منحت للعاملين الكثير من الموافقات على الانصراف المبكر وكل من لديه شبه عذر سمحت له بالتغيب الخ، إذا كيف أكون أنا المتساهلة؟ الأمر ببساطة أنها أرادت ترك الانطباع لدى العاملين بأنها ـ حين تكون فى موضع القيادة ـ هى البسيطة والمتساهلة فى مقابل ما أبديه أنا من حزم وجدية

جميل، لنرى كيف ستسير الأمور

.....

عودتي للعمل أيضا واجهتني مجددا بمشكلة متعلقة بإحدى الزميلات تحت رئاستي
هى مهذبة ونشيطة وتتفانى فى عملها ولكن المشكلة أن قدراتها محدودة جدا ولا تقوم بعمل أي شيء بكفاءة! دائما دائما هناك خطأ أو عدم إدراك لكيفية إنهاء العمل على الوجه الأحسن، بالإضافة إلى تكرار الخطأ نفسه بشكل يفوق الوصف

لا أدرى كيف أتصرف معها، جربت الشدة وجربت اللين وإعطاءها ثقة بنفسها وجربت التجاهل وتركها تتعلم بنفسها، لكن بجد بدون فائدة أو أى إحساس بالتقدم فى طريقة أداءها للعمل، المشكلة أنها لو كانت كسولة مثلا أو غير مهذبة كنت وجدت المبرر القوى لإبلاغ من هم أعلى منى واترك بيدهم قرار إبقاءها من عدمه، ولكنها فعلا تحاول بإخلاص و ولكن قدراتها محدودة

مشكلة

...........

لا أرتاح عادتا للأشخاص معسولي الكلام، لنا قريبة كانت ماما ـ وأفراد آخرين من العائلة ـ يقولن أن كلامها يسحر، وفى العمل لدينا زميل بنفس الصفة، كلام معسول ورائع وأشبه بالشعر ويقسم بالله أنه يقول ما في قلبه

الله أعلم بما فى القلوب ولكن بصراحة لا أحب ولا أثق بمعسولي الكلام
.

35 comments:

Miso soup said...

ليه متجربيش تعطي الزميلة المحدودة القدرات شغل تاني ميكونش فيه ابداع ... حاجة كده عايزة مكنة شغل و بس ..... مبروك علي الترقية و مهما عملتي للاسف مش هاتقدري ترضي الناس كلها ... المهم ترضي اللي احسن من الناس
تحياتي

someone in life said...

المديرة العزيزة

مبروك الترقية .. الزميله العزيزة الغيورة انت فهمتيها كويس بمعني هي عملت عكس اسلوبك يمكن تكسب نقاط عند الموظفين لكن مش مهم لان تقييم الاداء الوظيفي بيكون من اداءك و نتائجك في العمل

الزميله المهذبة المجتهدة ممكن محتاجه
coaching
منك للتعلم كيفيه انهاء العمل بجدارة هي تستطيع الاداء لكن النهايات غير المرجوة حاولي او انقليها قسم تاني يكون مساوي لقدراتها

ما احلي النفاق .. و لا ايه

تحياتي

مثلية تبحث عن ذاتها said...

روز الجميله

وحشتني حكاويكي

عن زميلتك الحقوده
فدول يا مكترهم فالعمل
لازم تلاقيهم ودول تتجهليهم تماما ولما يستظرفوا زي البنت دي تزنقيهم وده حلهم الوحيد
اما البنت اللي بترأسيهم محدوده القدره
فكان لدي زميله بنفس الاوصاف وهقولك على حاجه عن تجربه لو البنت دب قدرتها العقليه ونسبه ذكائها محدوده فلن تتغير مهما حاولتي لان دي مفيهاش موهبه الذكاء واعتقد ان البنت دي من النوع ده خصوصا انها بقع في نفس الاخطاء اكثر من مره مع ان عندها قدره تحمل يعني ممكن تشتغل وقت طويييييل جدا ومتخدش اجازات خالص او اجازاتها محدوده جدا وتلاقي عندها رصيد اجازات ماشاء الله لكن قدرتها الذهنيه كده الحل الوحيد معاها انك تحطيها في مكان مفيهوش مسؤليات كتير عشان تقللي من اخطائها لانها مش هتتعلم وجربي تحطي عليها سوبر فايزر من دفعتها او اجدد منها هتتجنن و هتحاول تنجح سيستماتيكالي لكن برضه بدون فهم لكن دي اقصى حاجه هتتوصللها ده طبعا من خبرتي الشخصيه مع النوعيه دي واللي كانت اكتر من 6 سنين ،المشكله بقى يا روز مش انها محدوده الذكاء يعني سبحان الله دي قدرات ومحدش مكان حد لكن ساعات الانسان ما بيتحملش وممكن تخرجي عن شعورك فتجرحيها فخدي بالك ان الناس دي بتبقى حساسه جدا ومفيش في ايديهم حاجه يعني مش باديها فتعاملي معاها من هذا المنطلق ومتحمليهاش مسؤليه حاجه انتي لو فكرتي ثواني هتلاقي نفسك بتقولي لنفسك لا ماينفعش تعمل المهمه دي ولو ادتيهالها من غير ما تفكري يبقى لا تلومي الا نفسك
بحييكي وبليز متتاخريش فالكتابه ياقمرايا

سلام

مثلية تبحث عن ذاتها said...

نسيت اقولك نصيحه مهمه لو اتزنقتي فالشغل ومفيش قدامك غيرها تقوليلها الخطوات بالتفصيل وتخليها تكتبها وتعمليلها تشك ليست عشان تريحي دماغك وحاجه مهمه اوي نسيت اقولها
ألف مبروووووووووك يا قمر

A.SAMIR said...

اعتقد انه ليس من المطلوب ان يكون جميع اعضاء فريق العمل على نفس الدرجة من الكفاءة في العمل
اكيد هناك كفء وهناك اكثر كفاءة وهناك اقل كفاءة وبالتالي لابد من التعامل مع الجميع
تحياتي

Rania said...

اول زيارة ووشى حلو

:)
مبروك الترقيه
و طبيعى هتلاقى نواع كتير من البشر فى عالمنا دة المهم هو الحرص

تحياتى

بنت القمر said...

الزميله الغير موهوبه من فضلك اعطيها فرصه اخري
الموهوب الكسول اسوأمن الغير موهوب المتفاني ممكن تنجح مع الوقت ممكن تغيري طبيعه عملها وتديها فرصه تعمل حاجه تقدر تنجح فيها.... معسولي الكلام!!اه منهم قد تكون طيبه مفرطه احيانا وقد يكون السم في العسل غالبا

Desert cat said...

اولا مبروك على الترقية وانتى حقيقى تستحقى كل خير
بالنسبة للزميلة الودودة جداااا اللى قامت باالوجب فى غيابك فالنوع ده يا عزيزتى للاسف لا يجيد سوى فن التوقيع وضرب الحابل بالنابل لينال ما يتمنى
بالنسبة لمعسولى الكلام اشعر دائما بالتقزز منهم حتى وان كنت لا اعرفهم فالانسان الودود لا يهتم دائما بحلو الكلام وان كل اهتمامته تكمن فى تصرفاته
محبتى واحترامى

Sola said...

rose ya rose:
ezayek ya bent,bosy ya gamiela awala2 keda mabrouk,belnesba l el 3 anwa3 mn el sha7'seyat elly enty etkalemty 3anhom o elly homa
1-el 3'ayoura o 7aqouda
2-ma7dodet el qoudrat
3-ma3soly el kalam
el 3 doul mawgodeen 7awalena toul el 2aet 7ata been 2as7abna o ana yama 2et2arast mn el 7aqodeen dol,3arfa ana kont hakoon maneger fel makan elly ana bashta3'al feh as i proved my self good,but i am the youngest one and i am the last one get hiered there,some of them get jelous and they missed it up 2 me bas yala el 7amdo lelah dah akeed 7'eer mn rabena sob7anoh o ta3ala o adeny jobless now o zay el fol wala feh 2a7san mn el fara3' o el malal :))
o deh 2a7san 7agah ma3aha enek ta3mely sho3'lek b dameer o bema yordy allah o en allah la yodee3 2agr mn 2a7san 3amala just ignore it ya benty o kabary el ge
belnesba l ma7dodet el qoudrat f deh a7san 7agah enek tedeha job mesh me7taga qoudrat zehneyah gamda ya3ny 7'aleha fel secrtary masalan,bas edeha forsa en dah mesh zanbaha
or feh some inistitutes betnamy el maharat el zehneya 7'aleha teroo7 wa7da menhom yemken tet3'ayar
ama l ma3soly el kalam doul ba2a f ana bat7'ene2 menhom aslan moot ba7esohom keda etmeen o momeleen o kaman mahamash wad7eenn 3adata2 they r foxy
bas keda
yalla salam ya gamiel
o ana fa3la2 shakly keda ha3bly 7ady bady o neshouf hategy 3ala meen,ow yemken aseeb el etneen o ashouf wa7da taltah fehea el 7agat elly 3agbany fel etneen,rabena kareem
salam ya gamiela

Arabic ID said...

ممكن زميلتك اللى عندها مشكلة دى تكون مشغولة بحاجة أو مش مركزة فى الشغل لسبب ما وممكن تكون بتنكسف تسألك أو تسأل حد علشان مثلا صورتها عندك ما تتغيرش أو علشان انتى مش فاضية لها مثلا وممكن تكون مش عايزة تسأل حد تانى علشان مش مستريحة معاهم ممكن تخللى حد تثقى فيه يراجع شغلها معاها ويمشى معاها واحدة واحدة لحد ما تركز أو تتكلمى معاها وتعرفى لو فيه حاجة شغلاها وتفهميها انها لما تعمل شغلها كويس مشاكلها هتقل وثقتها فى نفسها هتزيد وتقدر تحل مشاكلها

هو بصراحة أنا فى الشركة القديمة كنت شغال مع ديكتاتور خرافى
وده كان بيسبب انى ما فيش حاجة باعملها مضبوط
وكان بيطلب منى عشرين حاجة بس لأنه مش فاهم ازاى الحاجة دى بتتعمل كان بيحاسبنى عليها قبل ما أكون انجزت ربعها حتى
والشغل ده يعنى فى السيرفرز والانترنت وكده يعنى فكنت بأضطر أدور على الحلول الجاهزة وأخللى الحاجة تقوم كده وخلاص ولدرجة انى دلوقتى وأنا عندى خبرة لا بأس بها مش عارف عملتله شغله ده ازاى

القصد مش انك ممكن تكونى ديكتاتورة ولكن ما تضغطيش عليها الأن قبل أن تعرفى ماذا بها؟
-------
تحياتى لك دوما

Arabic ID said...

ورأيى انك لو نقلتيها ممكن تديلها رسالة سلبية مش وقتها دلوقتى
ممكن تحسسيها ان فيه حد تانى هياخد شغلها بس برضه ده ممكن يخليها تفقد الأمل والطموح أو تحس انك مش مقدرة تعبها

أنا واثق انك هتلاقى حل ... ان شاء الله
مش سيادتك المديرة دلوقتى؟؟

bastokka طهقانة said...

موقفك لا تحسدي عليه
المسئولية شئ صعب و لا يمكن ان ترضي جميع الاطراف
بالنسبة لمحدودة الامكانيات فدي علاجها تتعلم تاخد كورسات يمكن مخها ينور

معسولي الكلام مش كلهم صادقين في منهم:
في الوش مراية و في القفا سلاية

اوروفوار

Sherif said...

Welcome back to work ..

العبرة بالنتائج .. لابالتفاصيل

والنتيجة انك نلت ترقية فى عملك .. فألف مبروك ودعك من الآخرين

كما يقول برناردشو حينما قالوا له انهم يقولون .. فاجاب
ماذا يقولون ؟ دعهم يقولون

أما المرؤوسة الضعيفة الكفاءة فيمكنك ان تدربيها .. او تكلفيها بما هو فى نطاق قدرتها .. او تنقليها لمكان انسب .. دورنا كمديرين ان نكتشف كل القدرات والمواهب .. ونوظفها

انا مثلك لااحب المبالغة .. وان كنت احب المجاملة

مرة اخرى ألف مبروك

ارجو ان تكون اجازتك فى الشتاء عندنا فى مصر .. ونتشرف بك

Sola said...
This comment has been removed by the author.
سمـــــــــــا said...

واضح ان موضوع العمل ومشاكله دا بقوا موضة اليومين دول

انا برضه بيحصل لى دوشة كل فترة من احد الزملاء الافاضل

واخرهم كانت من كام يوم السكرتيرة تصورى :))

البنت دى بقى غريبة جدا

اولا هى اكبر منى بحوالى 6 سنين وتعليمها متوسط وجمالها متوسط وهى كلها على بعضها متوسطة طبعا اللى شافوها هيقولولى يا كداااااااااااااااابة دى قنبلة وعمارة قايلة للسقوط ( بينى وبينك اصلها طويييييييييييييلة وعريييييييييييييضة ووزنها تقييييييييل يعنى من الاخر انا دراع منها )

المهم ان البنت دى اول ما جت تشتغل معانا من حوالى سنة ونص كانت تقوليش ملاك هريانى كلام مدح ومشاعر فياضة ورسايل على الموبيل ولو معندهاش رصيد تكتب الرسالة فى ورقة وتحطهالى على مكتبى كنت اقول يا جرام البنت دى حساسة اوى وطيبة وكانت تجيب لى هدية فى عيد الام اقول احتمال علشان يتيمة فشافت فيا حنان الاب :))

وطبعا كعادتى اى سكرتيرة جديدة بتيجى بحب اشربها الشغل على اساس انى مقتنعة من زمان ان السكرتيرة هى سنتر المكان هى اللى فى ايديها كل المفاتيح وهى اللى بتربط الكل ببعضه

وبعد ما مر حوالى سنة ونص بدأت تتحول

يعنى تعمل مقالب وتوقع الدنيا فى بعض وطبعا فى كل المواقف هى لابسة وش الملاك نظام استغفر الله حاشا وماشا

وانا طبعا بدأت اركز معاها وخصوصا بعد لما واحدة من اصحابى شافتها وقالت لى البنت دى على فكرة مش بتحبك وواضح انها بتغير منك اوى قلت لها وعرفتى منين قالت لى من عينيها ومن نظرتها ليكى خدى بالك منها

فانا بدأت اركز معاها اكتر واحط عينى على تصرفاتها

فلاحظت انها بتحاول تبذل قصارى جهدها انها تبين هى اد ايه مجتهدة واد ايه قلبها على مصلحة الشركة وحاجات كتير اوى

كل دا وانا سايباها تلعب وانا بتفرج لانها كانت بعيد عنى بس انا كنت بدأت امسك طرف الحبل ومستنياها تجيلى برجليها

انا فى شغلى مسئولة عن مجموعة مهام واللى المفروض بعد الريبورت بتاعى تبدأ هى تظبط شغلها فلاحظت انها بدأت تحط مناخيرها فى شغلى وتسأل وتلف وتدور لغاية ما من كام يوم اخدت بالى انها بتخطط لشىء معين اللى هو انها بتقترح على مديرى انها فى الاوقات اللى ابقى مش موجودة فى الشغل فهى ممكن تكلم العملاء وتتابع المراسلات والاعمال الفنية بلابلا بلا واللى هى جزء من شغلى

وطبعا انا لاحظت بس برضه فضلت ساكتة ومستنية تجيلى ما هى هتروح فين هاتيجى هاتيجى

فلاقيت مديرى بيقولى واللى معرفتش هل كان بحسن نية واللا بيجس النبض ويشوف رد فعلى انى لو مش موجودة هل ممكن تبقى تدخل على النت تتابع مواضيعك ؟؟

الكلام دا كان فى مكتبى وهى كانت اجازة فقلت له طيب نروح مكتبك وانا فى ضميرى بقوله تعالى اهزقك فى مكتبك علشان متتهزقش فى مكتبى

فاول حاجة سألته ايه الموضوع بقى من الاول

قالى ابدا هى عرضت عليا انك لو مش موجودة او مشغولة هى ممكن تساعدك

قلت له اولا انا مشتكيتش واكيد انا مش محتاجة حد يساعدنى فى شغلى لانى على استعداد انى امسك شغل 5 شركات مش شركة واحدة

ثانيا هل هى على الكفاءة انها تدخل تتابع شغلى ؟؟ قالى : اكيد لأ

قلت له :اذن هى حد مستواه الفكرى والعملى مقتصر على مهام معينة هى مع الوقت اجادتها فى حدود قدراتها لكن مش مطالب منها انها تعمل اكتر من كده

ثالثا ودا الاهم طالما الامر متعلق بمهام شغلى ليه كلمتك انت ومعرضتش الامر علي صاحبة الامر اللى هى انا ؟

رابعا انت عارف انى مبحبش حد يلمس حاجتى او يحرك حتى ورقة من مكانها من غير اذنى يعنى انت عارف بعد 10 سنين شغل مع بعض انى مش هسمح ان حد يجى جنب حاجة تخصنى

واللا انت ايه رأيك ؟؟
طبعا هو كان فاتح بوقه مش فاهمة ليه : )))

قلت له المهم يا ريت كل واحد يعرف حدوده ويركز فى اللى يخصه وبس وقمت رجعت مكتبى وهو لسة راسم علامتين استفهام على وشه

هو مكنش قال لها حاجة لانه سافر بعد كلامى معاه

فهى بعدها جابت شركة النت علشان تزود السرعة وكل دا وانا برضه مستنياها تجيلى

وانا كنت كنسلت كل اللى هى عملته بالتليفون من غير ما هى تعرف مع شركة النت ومهندس الكمبيوتر اللى جه كلمنى وقالى ايه السكرتيرة السخيفة دى قلت لها صاحب الشركة كنسل الموضوع تقولى برضه اروح لها وهى هتتصرف معاه دى رخمة اوى قلت له معلش كبر دماغك وانا هتصرف

أكمل لك بعدين بقى علشان التعليق بقى طويل زيادة عن اللزوم وانا هقوم انام

سلام مؤقت يا قمر

سمـــــــــــا said...

واضح ان موضوع العمل ومشاكله دا بقوا موضة اليومين دول

انا برضه بيحصل لى دوشة كل فترة من احد الزملاء الافاضل

واخرهم كانت من كام يوم السكرتيرة تصورى :))

البنت دى بقى غريبة جدا

اولا هى اكبر منى بحوالى 6 سنين وتعليمها متوسط وجمالها متوسط وهى كلها على بعضها متوسطة طبعا اللى شافوها هيقولولى يا كداااااااااااااااابة دى قنبلة وعمارة قايلة للسقوط ( بينى وبينك اصلها طويييييييييييييلة وعريييييييييييييضة ووزنها تقييييييييل يعنى من الاخر انا دراع منها )

المهم ان البنت دى اول ما جت تشتغل معانا من حوالى سنة ونص كانت تقوليش ملاك هريانى كلام مدح ومشاعر فياضة ورسايل على الموبيل ولو معندهاش رصيد تكتب الرسالة فى ورقة وتحطهالى على مكتبى كنت اقول يا جرام البنت دى حساسة اوى وطيبة وكانت تجيب لى هدية فى عيد الام اقول احتمال علشان يتيمة فشافت فيا حنان الاب :))

وطبعا كعادتى اى سكرتيرة جديدة بتيجى بحب اشربها الشغل على اساس انى مقتنعة من زمان ان السكرتيرة هى سنتر المكان هى اللى فى ايديها كل المفاتيح وهى اللى بتربط الكل ببعضه

وبعد ما مر حوالى سنة ونص بدأت تتحول

يعنى تعمل مقالب وتوقع الدنيا فى بعض وطبعا فى كل المواقف هى لابسة وش الملاك نظام استغفر الله حاشا وماشا

وانا طبعا بدأت اركز معاها وخصوصا بعد لما واحدة من اصحابى شافتها وقالت لى البنت دى على فكرة مش بتحبك وواضح انها بتغير منك اوى قلت لها وعرفتى منين قالت لى من عينيها ومن نظرتها ليكى خدى بالك منها

فانا بدأت اركز معاها اكتر واحط عينى على تصرفاتها

فلاحظت انها بتحاول تبذل قصارى جهدها انها تبين هى اد ايه مجتهدة واد ايه قلبها على مصلحة الشركة وحاجات كتير اوى

كل دا وانا سايباها تلعب وانا بتفرج لانها كانت بعيد عنى بس انا كنت بدأت امسك طرف الحبل ومستنياها تجيلى برجليها

انا فى شغلى مسئولة عن مجموعة مهام واللى المفروض بعد الريبورت بتاعى تبدأ هى تظبط شغلها فلاحظت انها بدأت تحط مناخيرها فى شغلى وتسأل وتلف وتدور لغاية ما من كام يوم اخدت بالى انها بتخطط لشىء معين اللى هو انها بتقترح على مديرى انها فى الاوقات اللى ابقى مش موجودة فى الشغل فهى ممكن تكلم العملاء وتتابع المراسلات والاعمال الفنية بلابلا بلا واللى هى جزء من شغلى

وطبعا انا لاحظت بس برضه فضلت ساكتة ومستنية تجيلى ما هى هتروح فين هاتيجى هاتيجى

فلاقيت مديرى بيقولى واللى معرفتش هل كان بحسن نية واللا بيجس النبض ويشوف رد فعلى انى لو مش موجودة هل ممكن تبقى تدخل على النت تتابع مواضيعك ؟؟

الكلام دا كان فى مكتبى وهى كانت اجازة فقلت له طيب نروح مكتبك وانا فى ضميرى بقوله تعالى اهزقك فى مكتبك علشان متتهزقش فى مكتبى

فاول حاجة سألته ايه الموضوع بقى من الاول

قالى ابدا هى عرضت عليا انك لو مش موجودة او مشغولة هى ممكن تساعدك

قلت له اولا انا مشتكيتش واكيد انا مش محتاجة حد يساعدنى فى شغلى لانى على استعداد انى امسك شغل 5 شركات مش شركة واحدة

ثانيا هل هى على الكفاءة انها تدخل تتابع شغلى ؟؟ قالى : اكيد لأ

قلت له :اذن هى حد مستواه الفكرى والعملى مقتصر على مهام معينة هى مع الوقت اجادتها فى حدود قدراتها لكن مش مطالب منها انها تعمل اكتر من كده

ثالثا ودا الاهم طالما الامر متعلق بمهام شغلى ليه كلمتك انت ومعرضتش الامر علي صاحبة الامر اللى هى انا ؟

رابعا انت عارف انى مبحبش حد يلمس حاجتى او يحرك حتى ورقة من مكانها من غير اذنى يعنى انت عارف بعد 10 سنين شغل مع بعض انى مش هسمح ان حد يجى جنب حاجة تخصنى

واللا انت ايه رأيك ؟؟
طبعا هو كان فاتح بوقه مش فاهمة ليه : )))

قلت له المهم يا ريت كل واحد يعرف حدوده ويركز فى اللى يخصه وبس وقمت رجعت مكتبى وهو لسة راسم علامتين استفهام على وشه

هو مكنش قال لها حاجة لانه سافر بعد كلامى معاه

فهى بعدها جابت شركة النت علشان تزود السرعة وكل دا وانا برضه مستنياها تجيلى

وانا كنت كنسلت كل اللى هى عملته بالتليفون من غير ما هى تعرف مع شركة النت ومهندس الكمبيوتر اللى جه كلمنى وقالى ايه السكرتيرة السخيفة دى قلت لها صاحب الشركة كنسل الموضوع تقولى برضه اروح لها وهى هتتصرف معاه دى رخمة اوى قلت له معلش كبر دماغك وانا هتصرف

أكمل لك بعدين بقى علشان التعليق بقى طويل زيادة عن اللزوم وانا هقوم انام

سلام مؤقت يا قمر

مثلية فقط said...

عزيزتي

تهاني ليكي على الترقية ... لازم تتوقعي وجود ناس تضايق من أنك أفضل منهن و أكيد توقعي يقولو كلام سخيف و يتصرفو معك بطريقة أسخف ... لانو مستواهم و إحساسهن بالنقص هو يلي بيوصلهم لهيك أشيا

لمهم بالنهاية بدك طولي بالك

غير هيك ممكن تلاقي ناس قليلة جدا بتحاول تساعد حالها و تساعدك
شو ما كان مستواهم و قدراتهم محدودة يلي بيحكهم بالشغل بيكون ضميرهم و أخلاقهم

بتمنى ليكي التوفيق و النجاح الدايم بشغلك و حياتك

حازم سويلم said...

الصديقة العزيزة, روز

نخش فى الموضوع على طول
زميلتك فى الشغل بتلعب لعبة استعمارية قديمة اسمها (فرق..تسد) اعتقد انك تعرفيها جيدا, هى ترى انها احق منك بالوظيفة لذا فهى تسعى جاهدة لتسميم الجو بينك وبين الموظفين عن طريق الكلام , بالاضافة الى انها فى غيابك اظهرت قدرا كبيرا من التسامح معهم كما قلتى ولسان حالها يقول لهم شوفتوا .. انا والا هى .. والنوعية دى احذرى منها جيدا لأنها قادرة على التسلل من اى جهة كالحية
حدث معى من احد زملائى فى العمل نفس الشئ مؤخرا وتسبب فى تركى لعملى الجديد قبل اقل من ثلاثة شهور
ـ ـ ـ
اما زميلتك ذات القدرات المحدودة, فهى كذلك هناك انواع من الناس لا تمتلك القدرة على التطوير من نفسها ابدأ, ويحب هؤلاء ان يلقوا باللوم على الظروف دوما, وكما قلت انت ان قدراتها محدودة
ـ ـ ـ
اما اصحاب الكلام المعسول, فانا مثلك أتوجس منهم خيفة, ولكن امنحيه فرصة, لعلك مخطئة بشأنه
ـ ـ ـ
تحياتى يا جميل

حازم سويلم said...

انا أسف نسيت اباركلك عالترقية
مبروك يا باشـــا, الف مبروك وعقبال كل مرة

جسور سرية said...

العزيزة بلاك روز
اسفة لانشغالي في الفترة السابقة فاسمحي لي ان اهديك باقة من التهاني
اولا حمد الله علي السلامة و انشاء الله الاجازة كانت اكثر من طيبة
ثانيا مبروك الترقية و انشاء الله دائما في تقدم
ثالثا لن ازيد سوي فعلا الله اعلم بما في القلوب وربنا يدي كل زول علي قدر نيته مع الناس !!!

blackcairorose said...

ميزو سوب

أهلا وسهلا وشكرا على التهنئة

على رأيك مستحيل ارضاء كل الناس

على فكرة انا شربت اكتر من مرة ميزو سوب وانا فى الاجازة، اوعى تكون شرقت وقتها ولا حاجة؟ لول

blackcairorose said...

Someone in life

مرسى يا عزيزتى على التهنئة بس هى فى الحقيقة مش ترقيه قوى وانما منصب اشرافى اضافى بس للاسف مالوش مردود مادى يعنى اهم حاجه في الترقية مش موجودة!!

مقدرش اقول على الزميل ده انه بيقول نفاق لأنه مش محتاج حاجة مباشرة منى، ولكنه فعلا بيقعد يقول انه بيتعلم منى وبيحس ان انا اخته اللى مامته لم تنجبها لول وحاجات كده الله اعلم بضميره

يللا آدينا بنسمع

blackcairorose said...

مثلية تبحث

هى ياعزيزتى شغلها اصلا لا يتطلب قدرة عقلية كبيرة ومع ذلك اخطائها فيه مستمرة

وهى فى الحقيقة احيانا كتيرة بتصعب عليه لانها بتعمل اللى تقدر عليه بس دايما يطلع فيه غلط، ولو كانت مجرد الشهور الاولى فى العمل كنت ممكن اقول عشان جديدة ولسه بتتعلم بس هى مش جديدة ومفيش اى مؤشرات تقول ان الاداء بيتحسن، بجد مش عارفة، خلينى برضه بهدوء كده معاها لما نشوف اخرتها ايه لول

مرسى على التهنئة بس زى ما قلت لسم ون ان لايف هى وظيفة اشرافية اضافية يعنى مفيش فلوس زيادة ولا حاجة يا خسارة

اطيب تحية يا عزيزتى

blackcairorose said...

أ سمير

معاك بس المشكلة لو كان الحد الادنى من الكفاءة المطلوبة غير موجود؟؟

هممممم؟

blackcairorose said...

رانيا

اهلا بيكى وشرفتى

ووشك اكيد حلو

وخالص الود واتمنى مرورك مرة اخرى

blackcairorose said...

بنت القمر

معرفش بس طبيعتى الحذرة بتخلينى اقول ان الكلام المعسول وطيبة القلب مش بيتجمعوا!!

يمكن تلاقى رأيى ده سوداوى او متشائم بس ده فعلا اقتناعى

انا مش بقول عن الكلام الظريف المجامل العادى، ولكن كلام زياده فى العسل ويتقال دايما واحيانا من غير مناسبة مع التأكيد والحلفان انه كلام من القلب

معرفش بس الاسلوب ده بيقلقنى

وعلى فكرة قريبتنا اللى كان كلامها مفعوله زى السحر دى كانت تقتل القتيل وتمشى فى جنازته

blackcairorose said...

قطة الصحراء

عليكى نور

لو الواحد بيتصرف كويس مع الناس مش هيحتاج يقعد يحلى ويسكر فى كلامه زياده

طبيعتى مبقولشى كلام لطيف زيادة، انما بقول الكلام المجامل العادى وقت اللزوم وممكن اكثر شوية من اللزوم لو فعلا حسيت ان الشخص اللى قدامى يعنى لى شىء وهو فعلا شخصية غير عادية، اما غير كده فمبقولشى الكلام ده وبالتالى برضه مبتوقعش الكلام ده من حد

بس اهى نوعيات الواحد بيشوفها ويخلى باله منها ويحطها تحت الميكروسكوب

على فكرة انا مقصدتش كلام معاكسة او غزل من الشخص ده انما كلام زيادة فى اطار الزمالة والشغل واداء الشغل الى اخره

blackcairorose said...

سولا

بس ما بين انك كنتى هتبقى مديرة وبين ترك الشغل مسافة كبيرة قوى

ما تحكى يا سولا

تمنياتى ان شاء الله بشغل افضل

blackcairorose said...

أرابيك ايد

كلامك اكيد مضبوط

وموضوع العشرين طلب فى نفس الوقت دى، مديرين كتير بيعملوها، بس هى مفروض متكونش فى بدايه التحاق الشخص بالعمل لان الفترات الاولى بيكون الشخص لسه بيتعرف على طبيعة واجواء العمل ومن غير المنطقى اننا نحط جبال شغل من اول يوم او حتى اول شهر، مش بس من غير المنطقى دى اكيد ممكن تدى رد فعل عكسى فى ارتباك الشخص وعدم اداءه الشغل بشكل صيحيح وفقدان ثقته

ولكن بعد فترة ممكن فعلا طبيعة الشغل تحتم اننا نقوم بعشرين موضوع فى نفس الوقت، وهنا بتظهر القدرة على التنظيم ووضع اولويات الى آخره

blackcairorose said...

طهقانة

سعدت بمرورك وتعليق

وعلى فكرة انا دايما بعدى على مدونتك ومعجبة جدا بخفة دمك وخصوصا فى تدوينة الشغالة اياها

وخالص الود

blackcairorose said...

شريف

شكرا وان شاء الله فى الشتا تبقى الاجواء أنسب

وكمان القاهرة بتبقى أجمل والجو بارد

خالص الود كالعادة

blackcairorose said...

سما

مكملتيش الحكاية

نوعية السكرتيرة اياها معروفة بس كويس طريقة تناولك للموضوع والحزم اللى كنتى بيه مع المدير علشان الامور تتحط فى مكانها الصحيح من الاول

الحقيقة الاجواء المضطربة فى الشغل دى موضوع سخيف قوى بالنسبة لى خصوصا لانى مبحبش القلق وبقدر اشتغل افضل فى ظل الهدوء واقصد الهدوء النفسى وليس هدوء الشغل ، يعنى ممكن يبقى فيه ضغط فى الشغل ولكن طالما العلاقات كويسه بين الناس ضغط الشغل مقدور عليه، لكن اللى ممكن يتعبنى فعلا هو ضغط المشاكل بين الناس والعلاقات اللى فيها مشاكل

وفى فترة سابقة زمان كان فيه شغل عبارة عن نار الله الموقدة بس الحمد لله مستمرتش فيه لانى كان مستحيل افضل فى حالة الضغط العصبى اياها وكل الناس متخانقة ومضايقة من بعضها وكل واحد وواحدة بيفكر ازاى يعمل مقلب فى التانيين، والله جول الشغل ده ينفع يتكتب فى بوست لوحده لانه كان ولا حكاوى القهاوى

يللا مستنيين بقية موضوعك يا قمر

blackcairorose said...

مثلية فقط

شكرا على التهنئة

وبالنسبة للزميلةـ فكما تقولى يكون هناك دائما اشخاص مثلها رغم انى لم اسع لأخذ حقها أو حاربت للوصل لمنصب ما كانت هى تتمناه، ولكن الاختيار جاء مممن هم أعلى مننا ، ولكنها تأخذ الامور بشكل شخصى وتبنى عليها ردود افعالها، وهى تعلم جيدا أنه لا دخل لى فى هذا الاختيار والا كانت واجهتنى ، ولكن ماذا تستطيع ان تفعل إزاء غيرتها وكما نقول فى مصر أكلها فى نفسها؟؟

blackcairorose said...

حازم

فعلا، لا تتخيل حجم التسهيلات غير المبررة التى كانت تعطيها للناس

بل قيل لى انها كانت تقول

خليكوا براحتكوا واستمتعوا الايام اللى انا ـ تقصد هى ـ المسئولة قبل ما تتغير الظروف

تقصد قبل ما ارجع انا من اجازتى

برضه اللطيف انها لا تواجهنى ابدا، انما امامى يبدو التعامل بروفشينال وتحترمنى بصفتى رئيستها ولو لم أكن على يقين مما كانت تفعله او تقوله فى غيابى ربما كان من الصعب على تخيلها تقول هذا

ان شاء الله تكون امورك فى عملك الحالى افضل

وخالص الود

blackcairorose said...

جسور

كان الله فى عونك يا عزيزتى

دائما أمر من عندك وسعدت جدا باخبارك الحلوة وبالتوفيق دايما وابدا