Wednesday, June 4, 2008

أيام سد الحنك

كنا انا واختى الصغيرة نقف مع ماما فى المطبخ زى كل الاطفال، نحب نشوفها وهى بتطبخ ونساعدها لو طلبت منا حاجة أو نقولها احنا عايزين نعمل معاها حاجة

كانت بتخلينا مثلا نقطف معاها الملوخية وتنبهنا منقطفش الفروع الصغيرة مع الورق علشان لو اتطبخت بيبقى طعهما وحش، أو تحطلنا القوطة الطرية فى المصفى وتقولنا نعصرها واحنا آخر سعادة بالمهمة دى واللغوصة اللى فيها، أو تقولى افضل اقلب البصل فى الزبدة لحد ما يتشوح من غير ما اوقف علشان ميتحرقش، وده كان قبل زمن الكيتشين ماشين والأكياس المجمدة الجاهزة وخلافه

وقفتنا فى المطبخ كانت مبتخلاش من النقنقة، مرة ندوق ده أو ده أو هى تقولنا نشوف الملح كفاية ولا لأ، بس اكتر حاجة كنا بنحبها ونستناها هى لما ماما تدينا الكاسروله وفيها بقايا سد الحنك وتقولنا ناكلها، بصراحة لحد دلوقتى وبعد العمر ده معرفش سد الحنك ده أيه بالضبط وبيتعمل ازاى، اللى افتكره انه كان زى البشامل لكن اتقل ومسكر، متهيألى كده ماما كانت بتحشى بيه صينية الكنافة أو القطايف

وماما زيها زى غالبية ستات زمان كان المطبخ عندها اساسى وبتقضى فيه ساعات، كانت بتصعب عليا خصوصا لو لاقينا فجأة ناس من بلد بابا طابين علينا وقت غدا او عشا، وبابا طبعا بأصوله الريفية لا يمكن يخليهم يخرجوا من غير ما يتغدوا او يتعشوا، الاقى ماما جريت على المطبخ وطلعت اللحمة او الفراخ من الفريزر وحاطتها تحت الميه السخنة وخلال ساعة كله يكون جاهز، ومرة من المرات المرقة المولعة وقعت على ايدها وهى بتصبها ولقينا جلد ايديها احمر ونفخ، والله ماما ما بطلتش طبيخ وكانت يا حبيبتى كل شوية ترفع كفها للشباك فى المطبخ علشان الهواء البارد يخفف شوية من سخونة الجلد وترجع تانى بالحركة السريعة تكمل الطبخ علشان ضيوف البلد

كبرنا أنا واختى الصغيرة وقل اهتمامنا بالمطبخ، مبقناش نقف مع ماما ولا نسألها حتى اذا كانت عايزة مساعدة، اهتماماتنا اتغيرت، ولحد دلوقتى يمكن انا واختى اقل اتنين بيعرفوا يطبخوا فى العيلة، اختى اتجوزت ومستقرة وعندها ولد وبنت بس برضه الطبخ عندها حاجة كده على الماشى، وانا الدنيا شالتنى وحاطتنى فمكنش المطبخ عندى اساسى قوى

لما افتكر دلوقتى اننا مكناش بنساعد ماما كتير بجد بندم واضايق، دى حتى كانت بتتحايل علينا لما نحط الاطباق الموسخة فى الحوض بالليل اننا على الاقل نفتح عليها الحنفية شوية علشان بقايا الأكل متلزقش و تتعبها لما تقوم هى وتغسلها تانى يوم الصبح
حاجات كده صغيرة مكناش بنفتكر نعملها رغم انها كانت هتريحها

:الكلام ده افتكرناه انا واختى من يومين واحنا على التليفون الانترنت لما سألتنى
فاكرة لما ماما كانت بتدينا الكاسروله فيها سد الحنك ومعلقتين بلاستيك بيض صغيرين وتقولنا يللا خلصوا ده؟
.
.

34 comments:

Anonymous said...

تلات معالق دقيق كبيرة
معلقة زبدة كبيرة

معلقة سكر كبيرة تدوبيها فى نصف كوب ماء
خلاص؟

تحمرى الدقيق فى الزبدة لحد مايبقى لونه بنى فاتح

تبتدى تصبى الماء بالسكر ببطء للدقيق المحمر وانت بتقلبى

العجينة هاتنفش وتبقى سد الحنك و
بالهنا والشفا .. سهلة ؟

ساعات الموضوعات دى بتبقى مهمة لأن مافيش فى السوبر ماركت كيس سد الحنك

تحياتى لاختياراتك

Samraa said...

iam thinking of my mom now,she is like ur mom n somehow we never help at all!
Probably i shud. :).
If there is anything am greatfull for ,is having my mother with me.
We argue,even stop talking for a day or so ,but she is my no1.
Sweet post.
R_J

sara said...

ياااااااه رجعتيني لذكريات المطبخ مع امي..كانت ساعات بتخليني اساعدها بردو وكنت باموت في اللغوصه انا كمان:)

تقريبا هما الستات كلهم كانو استنساخ في الوقت دا .. وواضح طبعا ان دي الست المصريه الاصيله الايله للانقراض ..دا اذا ماكنتش انقرضت اساسا

لما كبرت شويه وعشت في دور البنت الوحيده المتدلعه ماكنتش بدخل المطبخ تقريبا..وتقريبا بردو متجوزة وانا اخري احمر بطاطس او اعمل رز وكان بيطلع معجن احيانا كمان.. بس حاليا بيقولوا اني بقيت طباخه بريمو ..ماهو المضطر يركب الصعب بقي وغصب عنك هاتتعلمي لما تلاقي نفسك لوحدك ومسؤله عن بيت والفلوس خلصت منك قبل نص الشهر علي الدليفري ..
ياللا ماعلينا خرجت انا عن الموضوع معلش انتي عرفاني رغايه شويه

علي فكرة انا في فترة انقطاعي ماانقطعتش عن مدونتك خالص..كنت بدخل في السريع اقرا واخرج ومش بلحق اكتب لك كومنت ..يمكن اكتر بوست كان عاجبني اوي بتاع اشياء لا اذكرها في السي في ..لانك تقريبا كنتي بتتكلمي عني ..ماعدا نقطة رنات الموبايل دي الصراحه :D


بالنسبه لسد الحنك ..هو زي ماشريف
قال تقريبا ..بس بتحطي عليه لبن كمان ..مش دقيق وميه وسكر بس ..وساعات ممكن يتحط شوية قرفه صغيرين اوي اوي عشان يدوا طعم وريحه ..

ابقي اقعدي اخترعي وقت فراغك واسترجعي الذكريات ..بس حاسبي تولعي في الدنيا الله يكرمك ..لانها حصلت معايا كتير :))

تحياتي علي البوست الجميل دا

مثليه said...

ايه البوست الجميل ده
فكرتيني بذكريات وانا صغيرة مع ماما فالمطبخ كنت دايما احب افتي من عندي و اعمل اللي بطلبه وعليه حاجات زياده من عندي لغايه ما طلعت زي رتاتوي ههههههه (رتاتوي ده فيلم طلع فيه فار عنده حاسه التذوق والابداع فالطهي) شفتي الغرورههههه
بس اللي فاكراه اوي اني كنت بحب ماماتعمللي البيض المقلي عيون واقف جنبها عالبوتاجاز وانا بشب على طراطيف صوابعي عشان اقدر اشوف الطاسه واتأكد ان البيض متفأش فكانت تحب تغلس عليه وفجأه تقوم فأشه بيضه اقعد اعيط واقولها مش هاكل ياريتني فعلا عجبني البوست واثر فيا
على فكرة انا معرفش انتي فين يا ترى في فرنسا ولا فين لو في فرنسا انا جايه فرنسا بعد اسبوعين ياريت اتعرف عليكي هيكون لي الشرف وهتكون فرصه جميله ولو متحبيش اكيد مش هتضايق و هاقدر واحترم ده
عموما انا ايميلي
methleya.fakhoura@gmail.com

soly88 said...

العزيزه روز
بوست دافىء ومميز اعاد لنا الزمن الجميل ووصفة شريف هايله طيب فين المفتقه وحشتنى جدا

الطائر الحزين said...

ماء ودقيق وسكر

وانت عليك المقادير والصنعه

فقدنا كثير من الدفء

Desert cat said...

كانك بتحكى عنى يا روزة بس الفرق انى لسه لحد النهارده باكل وبس مجربتش اقف لوحدى فى المطبخ او اعمل اكل ... والله لسه من قريب كانت بن تعندى فى السيبر بتقلى انتى مش بتغسلى قولت لها لاء .. بس ليه قالت لى اصل ضوافرك طويله ودى مش ضوافر واحده بتغسل شراب حتى .. قولت لها ربنا يخلى لى مامتى متولية كل المهام من اكل وشرب ... لاقيتها هتدخل معايا ف حوار لما تتجوزى هتعملى ايه وانتى مبتعرفيش تطبخى ... قولت لها بس قفلت على الكلام وهى فهمت انى مش عايزه اتمادى فى الحوار ....
تحياتى يا جميله

Heart Beat said...

Dear Blackcairorose

تعرفي ان سد الحنك كان جي على بالي الاسبوع اللي فات و كنت عايزه اعرف بيتعمل ازاي عشان اعمله

و الحمدلله وصلني الوصف التفصيلي لعمل سد الحنك بس لسه مكسلة يعني

انا كنت بساعد ماما في المطبخ تقريبا بنفس الصورة اللي كنتي عليها و انتي صغيرة

بس احب كاسرولة عندي هي كاسرولة الباشميل بعد اما ماما تحط الباشميل على المكرونة ... اخد انا الكاسرولة و استمتع بطعم الباشميل

عقلي كان بيخزن كل حاجه بشوفها ماما بتطبخها

و كان اول طبخة اعملها هي الملوخية ... عجبت ماما جدا و تفاجئت بأني بعرف اطبخ

لاني ماكنتش بصرح بحاجه زي دي او حتى ابين اني براقبها و هي بتطبخ خالص

حاليا انا بحب اطبخ جدا و ليا اكلاتي ووصفاتي الخاصة

كل اما اطبخ صنف جديد اخد منه لزمايلي في الشغل و بكون سعيدة جدا اما اسمع منهم ان طعمه عجبهم و بيطلبوه مني في مناسبات مختلفة

لكن لضيق الوقت مش بتطبخ غير في الويك اند بس

و لانك ذكرتيني بسد الحنك ... هاعمله النهارده لانه وحشني جدا بس من ايد جدتي هي احسن واحدة في العائلة عندنا تعمل سد الحنك

تحياتي

Unknown said...

اموت انا فى دفء الذكريات وجمال الاحاسيس

بوست جميل

أم فريده said...

تصورى انك مش بس رجعتينى لذكريات الطفولة واحنا بنتحايل على ماما اننا نساعدها فى المطبح لا لكن كمان فكرتينا اننا لازم نساعدها ونستمر فى المساعدة حتى واحنا كبار بالذات لانها اولى بالمساعدة وهى كبيرة واحنا كبار اكتر من زمان لانها زمان كانت قادرة انها تعمل كل شئ ومش محتاجة مننا اى مساعدة لكن هى دلوقتى بتحتاج اى مساعدة ولو بسيطة
وبجد الموضوع جميل جدااااااااا

سبهللة said...

ما احلى زكريات الطفولة

بنت القمر said...

ههههههههههههه
والنبي انتي مرفهه
لا انا طفولتي مكنش فيها كده خااالص
كانت مخططه بني في كحلي افتكر اني كنت بحمر بطاطس وبغسل مواعين بس
:(
اكتر من كده كنت زي صبي الميكانيكي
هاتي بصله من البلكونه هاتي صلصه من التلاجه
ودي المعالق والاطباق علي السفره حولي الحلل وحطيهم علي فوطه لحسن المفرش يتلسع
كده يعني
شغل عساكر مراسله ولاني معنديش اخوات بنات
فكانت حاجه تقرف بجد انا ايه اللي فكرني بكل ده ربنا يسامحك
وش مقموص

blackcairorose said...

شريف

دى وصفة سهلة
دى وصفة هايلة

لول

شكرا على المعلومة وانت الظاهر معلوماتك فى المطبخ افضل منى يا عزيزى

blackcairorose said...

أنونيموس

قمت بحذف تعليقك لأننى بصراحة لا أستخدم هذا نوع من المفردات مع الاخرين

ولا أحب أن يتعامل معى أحد بهذه المفردات

ولا أحب حتى قرائتها

وبالتأكيد لا أحب أن يقرأ هذه المفردات الاعزاء الذين يقرأون مدونتى

أما رأيك فى حد ذاته والذى يفيد بأنك ترى التدوينة/المدونة مملة ولا قيمة لها وتبعث على السأم فهو رأى أحترمه

لو أحببت اعادة كتابة تعليقك أو حتى رأى أشد قسوة منه ولكن بالفاظ مهذبة متعارف عليها فأهلا بك وبالطبع لن أحذف التعليق، أما نوعية الالفاظ إياها فأرجو أن تتفهم عذرى بأنى سأقوم بحذفها لو كتبتها مرة أخرى

وشكرا

blackcairorose said...

Samraa

I did not know that you have started a new blog. Shouldn't you invite us to the inaguration? lol

Now that my mother passed away more than 2 years ago, I feel guilty everyday that I haven't been more helpful, more patient and less harsh. Every single mistake I have done towards mom, no matter how trifle it was, got tremendously blown in my eyes now.

It is a lesson we usually learn when it is too late.

Best wishes my dear and waite for me in your blog soon.

blackcairorose said...

نون

بصى هكلمك بصراحة

فعلا نوعية الامهات دى انقرضت، بس من ناحية تانية فيه حاجات بقول ان ماما مثلا كان لازم تبقى اقوى من كده فيها، مثلا انها كانت بتدى الاولوية المطلقة لراحة بابا وراحتنا احنا على حسابها هى

احنا عيلة كبيرة العدد وكل واحد ليه رأى وعايز حاجة، وتيجى هى فى الاخر خالص فى سلسلة الاولويات والاهتمامات، متحبش حتى تقول رأيها لحد ما كلنا نقول ونعمل اللى عايزينه

طبعا والحمد لله مكناش ابناء عاقين ولا انانيين لكن برضه كان ممكن نبسطها ونريحها اكتر لو كان عندنا شوية دم اكتر من كده

المهم

فى موضوع الطبخ طبعا المضطر بيركب الصعب هتقوليلى!

تسلمى يا قمر وبيسعدنى مرورك وتعليقك دايما

blackcairorose said...

مثلية تبحث عن ذاتها

أنا يا عزيزتى أقيم فى بلد عربى ولست فى فرنسا مع الأسف رغم انى عشت ودرست فيها سابقا فترة لا بأس بها من حياتى

فيؤسفنى أننى لن اسعد بالتعرف عليك فى فرنسا

هل هذه أول زياراتك لها؟

استمتعى بزيارتك لأنها أجمل مدينة زرتها وهو رأى قد تكون له بعض المصداقية نظرا لأن ظروف عملى فى السابق جعلتنى أزور عدد لا بأس به من العواصم والمدن فى العالم

وكما قلت لسما فى تعليق سابق، هى مدينة أشعر أنها خلقت للعشاق بالدرجة الاولى، كل مكان فيها يجعلك تتمنين لو كنت مع نصفك الآخر، فهى أجمل من أن يراها ويسير فيها شخص بمفرده

ولا تنسى أن تحكى لنا فى مدونتك بعد ما ترجعين بالسلامة

وخالص الود

blackcairorose said...

أهلا سولى

ومبروك مدونتك يا عزيزتى

انتظرينى فيها لأقدم التهانى!

blackcairorose said...

الطائر الحزين

أهلا بك وحمد لله على السلامة

لا تقول افتقدنا الدفء وأنت لسه راجع من أسوان

لول

blackcairorose said...

قطة

لو البنت فتحت معاكى موضوع الجواز كنتى مفروض تحوليها على طول على بوستك بتاع ليالى الأنس

كان هيبقى أحسن رد على كلامها

سلام يا قمر

blackcairorose said...

هارت بيت

لاااااااااااااا

بقى طالما أكلك حلو وليكى وصفات يبقى ضرورى ندوق

و لحد ما نتقابل فى مصر

راضيين بصور على مدونتك للاطباق المخصوص اللى بتعمليها

اهى تصبيرة لحد ما نشوف الحقيقة

blackcairorose said...

واحد مش فاهم

اهلا بك فى المدونة وشكرا على التعليق

نعم الذكريات جميلة

وفقط من يومين أنتبهت أننى لا أكتب فى المدونة الا عن الذكريات

يبدو أننا لا نشعر بجمال الوقت الا بعد أن يمضى

blackcairorose said...

دعوة للحب

شكرا على المرور والتعليق والكلام الجميل

نعم ساعديها ولا تفكرى مرتين قبل عرض المساعدة

أو على الاقل ساعديها بطريقة سهلة عن طريق ترتيب أشيائك وغرفتك

ربنا يخلىلك والدتك

blackcairorose said...

سبهللة على الآخر

حلو أسمك يا سبهللة!!!

اهلا بيكى فى المدونة وشكرا على المرور والتعليق

وزى ما دايما بقول انه حتى الحوادث العالية لما بتفوت بنسترجعها بجمال وخصوصية لمجرد انها اصبحت ذكريات

وخالص التحية

blackcairorose said...

بنت القمر

والله ضحكت وانا بقرا تعليقك فكرتينى بمرات اخويا وهى بتهزر وتقول ان اول ما بنتها تكبر شوية اول حاجة هتعلمهلها هو انها توقفها على كرسى فى المطبخ وتخليها تغسل الاطباق، علشان هى مبتحبش غسيل الاطباق

بقى انتى وحيدة على اولاد؟

شوفى
من حالتين قدامى بحس ان البيت اللى فيه اولاد كتير وبنت واحدة بيبقوا جامدين شويتيتن على البنت

مقدرش اعمم بس دول مجرد حالتين قدامى، كل واحد من الاخوة الولاد عايز يعمل راجل على البنوتة

بس الحالتين دول كانت بنت وخمس اولاد، فيا عينى البنت مكنتش عارفه تشم نفسها

عكس البيت اللى فيه بنات كتيره زى حالتنا كده، اخويا مكنش يا عينى عارف ياخد حقه وسطينا، دا غير انه طيب جدا وعمره ما كان بيغلس معانا ـ يا بخت مراته بيه كلنا بنقول كده ـ لول

وتسلمى دايما يا عزيزتى

روابط said...

صباح الخير يا روز

يعنى داخل عالصبح أشوف ايه جديدك , الاقى الموضوع سد الحنك

نهارك أبيض

تحياتى

kasber said...

أحنّ إلى خبز أمي

و قهوة أمي

و لمسة أمي
و تكبر في الطفولة
يوما على صدر يوم

محمود درويش

blackcairorose said...

حازم

سد الحنك فاتح للشهية

لول

blackcairorose said...

كاسبر

نعم

والله أحن

Samraa said...

dear
BlackCairoRose.
Umm didnt invite,coz u dnt need invitation yeah?:)
Am sorry about ur lost,a mother's place leave an empty whole inside,i feel u.
Ive lost my father 5yrs ago,n i felt dat ive lost part of my soul.
My mom is my life coordinator,n my guide.yet idnt give her wat she deserve.
It took me yrs to realise my selfishness,yet i think growing old teaches us alot.n am changn 4 da good.
So uwrite in a splendid way!
U write in english?
I think u shud.
N nawarti my blog.
Regards.

عين فى الجنة said...

ايه ده انتى كنتى عايشة معايا فى نفس البيت وامك هى امى؟

blackcairorose said...

Thanks Samraa and my best wishes.

blackcairorose said...

راجى

أمهات الزمن الماضى وتفانيهم المتناهى انقرض كما انقرضت اشياء أخرى كثيرة ومن بينها رجال الزمن الماضى ايضا

الا ترى ذلك؟

Unknown said...

أنا صراحه ما بعرف شو سد الحنك

بس بسبب ظرف انو امي بعيده عني ما بشوفها غير بالسنه مره بقدر اتفهم ندمك ع انو ما كنتي تساعدي الوالده

فعلا الواحد منا مرات بيكون بيتعامل مع امه كأنها شي مسلم في البيت حتى لما يجيب شغله حلوه ما بيتذكرها بشي

بس انا صراحه بحس هاد ذنب الامهات في المقام الأول بيتفانو كتير و بينسو حالهم

ذكرياتك جميله كالعاده يا روزا