Monday, June 9, 2008

تخاطيف كلام

قلت سابقا أنى بدأت في تغيير عاداتي الغذائية وتناول طعام أكثر صحية، المشكلة الآن نتيجة لهذا التغيير فقدت حوالي 4 كيلو جرام فى اقل من ثلاثة أشهر فى حين أنى لست بحاجة لفقد أي وزن لأني والحمد لله أمتاز بنحافة طبيعية

كلما أقول هذه المشكلة لأي شخص أجد رد الفعل الطبيعي: يا بختك، وبتشتكى من الخسسان بسرعة؟
بس هى فعلا مشكلة، لذا قررت التوقف عن الغذاء الصحي والعودة إلى الرمرمة المعتادة وخصوصا البيتزا والمكرونة
الموضوع الظاهر محتاج مجهود وبحث كيف يكون الغذاء صحي دون التسبب فى فقدان الوزن
ـــــــــــــــــــــ
.
الأسبوع الماضي كانت لدى دعوة للعشاء فى منزل أحد المعارف
كان هناك حوالى 30 فرد بين رجال ونساء من جنسيات مختلفة وبدأت السهرة تقريبا الساعة الثامنة وأنا تركتهم حوالى الساعة 11
خلال السهرة لاحظت مرتين أن هناك شخصا ينظر لى ويتابعني بنظراته التي لا تحتاج لعقلية جبارة لفهم مغزاها الواضح والذى يقول
أنا هنا
أنا مهتم
أنا أريدك أن تعرفي أنى مهتم

كالعادة قمت بتجاهل النظرات رغم أن الرجل يبدو لطيفا ووسيما إلى حد ما
قرب نهاية السهرة وقفت أتحدث مع معرفة جديدة وظريفة سبق أن تقابلنا، وقالت لى أنها تود تعريفى بزوجها، ونادته من بعيد، فوجدته صاحب النظرات والذي بدا عليه الإحراج وهو يسلم على بطريقة رسمية، لدرجة أنه كان يقول لى حضرتك بدلا من أنت، طبعا لم يكن يتوقع أن من لاحقها بنظراته المكشوفة تكون نفسها معرفة زوجته
المعرفة قالت له: هاهى فلانه التى سبق وحدثتك عنها، ثم وجهت دعوتها لى أن أقضى يوما معهم فى الويك إن وزوجها صامت طبعا ولا يتحدث ولا حتى ينظر باتجاهي
قلت لها أكيد إن شاء الله
ــــــــــــــــــــــ
.
أجمل عنوان قرأته وأضحكني في مجلة أخبار الحوادث لحديث صحفي مع الراقصة دينا بخصوص رقصها في إحدى حفلات البروم لمدرسة مصرية واللغط الذي أثاره هذا الموضوع

عنوان الحديث
!دينا تقول: رقصي كان مقررا في منهج الفرفشة
ــــــــــــــــــــــــ
.
اتصلت بى زوجة أخي من القاهرة وقالت أن لها قريبا من بعيد هو وزوجته سيزوران البلد الذى أقيم فيه، وأبلغتني أنها أعطتهم رقم تليفوني، فسألتها عن مكان إقامتهما لأنى سأقوم بالاتصال، وإذا كان يهمها فعلا أمرهما سأقوم بدعوتهما للعشاء، فقالت لى أنها لا تريد أن تثقل على ولكن هذا الشخص فعلا يهمها

قمت بالاتصال بهما فى الفندق واتفقنا أن أمر عليهما للخروج سويا
أول انطباع حين رأيت الزوجين هو انطباع أحسسته في مرات معدودة سابقة مع أزواج آخرين، وهو عدم وجود انسجام أو توافق مظهري بينهما
الرجل (درس وعاش فى الولايات المتحدة فترة لا باس بها من الزمن) له ملامح مصرية وسيمة ويرتدى ملابس كاجوال أنيقة والقميص مفتوح زرارين من الأعلى، كذلك نصف كلماته باللغة الانجليزية بلهجة أمريكية واضحة، الزوجة ترتدي عباءة سوداء كاملة ولكن وجهها مكشوف

ربما تكون شخصياتهما متكاملة ومنسجمة، لا أعلم، ولكن مظهرهما فيه تناقض كبير في رأيي

أحيانا حين اخرج مع أصدقاء مقربين أتساءل عن نوعية الملابس التي سنرتديها ـ إذا لم يكن المشوار نفسه يستدعى نوع معين من الملابس ـ لأني أحب أن يكون هناك نوع من الانسجام المظهري بيننا، فلا أنا أرتدي رسمي ومن معي بالجينز أو العكس، ولكن لا أتخيل أن أكون مع نصفى الثاني وملابسنا تعطى انطباعات باتجاهات مختلفة
ــــــــــــــــــــــ
.
كتبت بوست عن رأي فى موضوع الطائفية فى مصر يتضمن تساؤلات لا أجد لها إجابات ثم ملاحظات لدى فى نفس الموضوع ولكنها مفتوحة للنقاش لأني لست على يقين بصحة هذه الملاحظات
ثم بصراحة تراجعت عن نشره لأني أحسست أنه قد يكون استفزازيا و بلا جدوى فى النهاية

سأفكر ثانية لأقرر نشره من عدمه
ـــــــــــــــــــــــ
.
هناك فرق بين المجاملة اللطيفة والمجاملة الزائدة غير اللطيفة
أعتقد أن الفرق بينهما أن الأولى حين تبالغ فى التعبير عن شيء، يعنى مثلا حين تجد شيئا عاديا فتقول أنه جميل، أو تراه جميلا فتقول عنه أنه جميل جدا، ولكن النوع الثاني من المجاملة هو حين تجد شيئا قبيحا ولكن تقول عنه أنه جميل جدا
أتقبل النوع الأول وأكره أكره النوع الثاني لأنه ليس مجاملة ولكن كذب صريح ومبالغ فيه

أعرف شخصا مجاملاته دائما من النوع الثاني، دخلنا منزل أحد المعارف وسألني قبل دخوله عن رأيي في أثاث وديكور المنزل فقلت له بصراحة أنه لا يعجبني فهو ببساطة ليس ذوقي والمسألة فى النهاية اختلاف أذواق
وبمجرد دخوله المنزل ظل يثنى على كل شيء ويصفه بالرائع، ويشكر مجهود ربة البيت فى اختيار الألوان والأثاث الخ، وأول شيء قاله بعد خروجنا من المنزل
ـ عندك حق البيت بشع

نفس هذا الشخص بعد عدة أيام رأى سيارتي الجديدة فقال
ـ أحسن اختيار، عربيتك حلوة قوى وشيك

قلت فى نفسى
!ـ طبعا انت هتقوللى
.
.

16 comments:

الطائر الحزين said...

جميل كل الملاحظات


لكن هناك شىء يربط بين هذه الملاحظات لم اتوصل اليه


اننا بشر

لكن احييك على تخاطيفك التى تتعدى مجرد الكلام


بارك الله فيك

بنت القمر said...

صديقتي بلاك كايرو
==========
اهلا بك في نادي النحيفات عارفه انا الاحساس ده.. الناس تحقد عليكي وانتي تحقدي عليهم من صاحبات الارتفاعات والاستدارات
سنوات طويله حاولت كسر حاجز الخمسينات كيلو وبصعوبه وبعد جهد جهيد بقيت واحد وستين السنه اللي فاتت رغم اني عندي بنتين
طبعا مش ها اقولك علي كميه الحقد اللي بلاقيها من الاخريات لكن السر الاعظم اني احيانا ربما احقد علي صاحبات الاستدارات والارتفاعات والدورانات طبعا جميع الطرق باءت بالفشل الذريع مع الرمرمه البيتزا واللب والكسرات انسي
حاله مبئوس منها
:(
طبعا احمد الله في الاخر وليه حكمه ان كل واحد يكون ليه شكل جسد لازم يقبله
في الاخر مهما حاول يتمرد عليه
وما يحسدش جد لانه هو نفس قد يكون موضع حسد!!
==========
التخطيفه التانيه
ما تتفاجئيش بحاجه من اتنين ربما بعد الصدمه تلاقي الحاح منهم لمزيد من التواصل
او قطيعه مفاجئه ربما الراجل يرمي بلاه عليكي ويقول لمراته انك كنتي بتبصبيله
:(
قطيعه رجاله عاوزة الحرق
============
الملابس تعكس رساله ما الي الاخرين اردنا ام لم نريد
النموذج ده انا عارفاه وربما تفسيره ليس سوي شيئ من اتنين
الراجل ده ملبس مراته كده وعنده ازدواجيه
او ربما سايبها تلبس كده ومش بينبها عشان يبان احسن منها
والاتنين انيل من بعض
او تفسير تالت
انها مرتاحه كده ومش حاسه انها محتاجه تبذل مجهود عشان تجاري شياكه جوزها من فرط ثقتها في روحها
بس هتاخد علي دماغها
متقلقيش
:)
=======
الفتنهالطائفيه
انشريه يعني هي جت عليكي!!قولي الي في نفسك
=============
التخطيفه الخامسه والاخيرة
اخييييييييي
اإخي إخي إخي بكرهم موت طحن جدا البشر دي سلامي وتحياتي

Sherif said...

BCR

المفروض أن الطعام الصحى لايقلل من الوزن .. بالمناسبة وزنك كام بالنسبة للطول؟

====================

روز .. مجرد سؤال .. ماذا يمنع رجل متزوج أو سيدة متزوجة من الاعجاب بامرأة جميلة أو أنيقة أو جذابة ؟

أنت نفسك قلتى انه لطيف ووسيم .. ومالذى يمنع التعامل المباشر خصوصا وانه ليس فى الأمر ما يحرج بدلا من التجاهل الذى كثيرا ما لاافهمه؟

=====================

يذكرنى هذا ايضا بمسرحية علشان خاطر عيونك عندما نادى المنتصر بالله على رواد الكباريه .. بعد دخول فؤاد أحمد ناظر المدرسة

كله يفتح كراسة الويسكى

======================

مرة أخرى .. التصادم الحضارى مع الهجمة البدوية التى ابتلانا الله بها

======================

أنا معك .. المجاملة والتجمل هما شيئان مطلوبان لأن مشاعرنا تحتاج لأن يكون لحياتنا طعم .. دون مبالغة

وانفك الدقيق يشم بسهولة الفرق بين الاثنين

اجندا حمرا said...

العزيزه بلاك كايرو روز

بخصوص النظام الغذائي الصحي ماهو ياجميله الرمرمه هي اللي بتزود الوزن و الأكل الصحي بيتحكم فيه بصي كلي زي مانتي عايزه بس في حدود يعني ماشي بيتزا و حلويات بس ماتزوديش منها
بخصوص الموقف التاني
موقف لا يحسد عليه زوج تلك السيده
بحاول اتوقع وشه و هو جايب الوان اما عرف انك طلعي تعرفي مراته
:)

بخصوص موضوع دينا شوفي ياروز انا قريت ليها حوار دار بينها و بين صحفي في جريده الدستور و عجبتني ردودها بتقولك لو الرقص عيب و حرام ماتلغوه ؟حاجه تانيه بتقولك البروموهات بيتعمل فيها حاجات اكتر من كده اشمعني يعني الدنيا قامت عليها هي و بس ثم انها بترقص في افراح كتيره بيحضرها شباب يعني المسؤلين مش خايفين علي الشباب دول؟و برضه قالت حاجه عجبتني بتقول يعني الشباب مش محتاج انه يشوفها 5 دقايق عشان ينحرف قدامه النت ماليانه

اعتقد ان الموضوع اخد اكتر من اللازم و ده طبيعي ممكن نقول عشان يلهوا الشعب في اي حاجه في ظل الظروف الاقتصاديه السيئه اللي بيمر بيها


بخصوص اللبس في الموقف بتاع زوجه اخيكي
انا بتفق معاكي فيه ان لازم يكون فيه انسجام بينا و بين اللي حنخرج معاهم عشان المظهر العام مابيكونش مريح للعين لو فيه تناقض واضح بين اللي خارجين سوا

بخصوص البوست اللي قلت كتبتيه بس مانشرتيهوش عن موضوع الطائفيه اسمحيلي اقولك انشريه صدقيني حتي لو كان اللي بنكتبه ساعات ممكن مايكونش له جدوي عند الكثير من الناس بس اكيد فيه ناس حتفكر فيه و ممكن تغير وجهه نظرها بسببه
اتمني تعيدي النظر في نشره و اشوفه قريب علي مدونتك

بخصوص الموقف الأخير شوفي مفروض يكون عندنا شويه دبلوماسيه يعني حتي لو الحاجه اللي قدامنا مش عاجبانا مانمدحش اوي لكن نقول كلمه رقيقه عشان بس مانكسفش اللي قدامنا لكن لو فعلا حلوه ايه اللي يمنع اننا نقول انها حلوه
بس بخصوص عربيتك الجديده انا واثقه من ذوقك و اكيد هي حلوه
;)
مبروك و يجعل قدمها حلو عليكي
معلش طولت بس موضوعك حلو و شيق
تحياتي ليكي ياجميله

None said...

ساعات بحس انك لو قعدتي تتكلمي سنه في مواضيع متفرقه ..اللي قدامك مش هايزهق ابدا ..اسلوبك بجد بسيط وبيدخل القلب بسرعه

مبروك العربيه الجديده

دعوة للحب said...

ياستى يا بختك انا يقالى خمس سنين بحاول اوصل للوزن المثالى لكن بلا جدوى بسم الله اللهم لا حسد لا تقولى انى بحقد ولا حاجة هههههههههههههه
عارفة انى عجبنى موقف الزوجة اوى صدقينى دى عاقلة جدا هى حاولت بكل زوق انها تعرفك انه زوجها وتوقفة وتفهمه انها واخدة بالها من غير مشاكل
وبالنسبة لدينا انا مرة شوفت ليها لقاء مع حسين فهمى فى البرنامج الاخير اللى عملةكان بيقولها انتى مش عارفة ان الرقص حرام قالتلة اه. يعنى عارفة يعنى هى فاهمةكل حاجة مش غايبة عن الوعى
وبالنسبة لملابس الزوجان لازم يكون فى توافق لان من المفروض ان الزوجة منبع الاناقة والشياكة هى اللى تختار الملابس دى فاكيد لازم يكون فى تناسق بالذات لانهم رايحين مكان واحد ولكل مكان نوع معين من الملابس .
لازم يكون فى مجاملة بالذات لو حد اخد رايى فى شئ هو بالفعل اشتراة صعب اوى لو مش عاجبنى انى اقولة انة وحش بس مش بزود فى المجاملةيعنى بقول حلو وخلاص بس لو اخد رايي لكن لو مش حد سأل مش بقول من اصلة.
لكن لو حاجة لسة هتشتريها اة هنا بقول رايي بصراحة لان ممكن الرجوع فيهاولو مش ممكن لية اكرهها فيها بعد ما اشترتها خلاص
وتحياتى لتخطيف كلامك الجميل

مياسي said...

أحلى تخاطيف و كالعاده الأسلوب روعه

الوزن:
أنا دايمن كنت اعتبر من الناس النحاف نوعا ما حتى زياده و كمان لأني طويله شوي كان الموضوع ملفت لكن من وقت ما اجيت أشتغل في عمان من اربع شهور زاد وزني تقريبا 9 كيلو و الحبل على الجرار يعني الله يستر لقدام

جوز المعرفه هاد غير شكل؛ لو مرتو مش موجوده شو كان عمل؟؟

الحياه مليانه ناس متجوزين و متناقضين سواء ف اللبس او التصرفات بس مش معناها ابدا انهم مش متعايشين مع بعض

احكي اللي ف بالك عن الطائفيه أنا حابه كتير اعرف شو عندك عن الموضوع و أسمع رأيك

بالنسبه لدينا: هي متصالحه مع حالها و عارفه شو بتعمل

أما موضوع المجامله فكرتني زمان كنت أعرف بنت لما تشوف شي حلو ما تمدحو أبدا و كانت تحكي أنو عيب أنو نمدح أساسا!! مش شي غريب ؟؟ هاد الموقف معاكس للذي ذكرتيه

someone in life said...

بلاك كايرو رزو

اولا مبروك سيارتك الجديده الله يعطيكي خيرها و يبعد شرها عنك
تنوع جميل في سرد احداث
هنيئا بالاكل الصحي المتوازن المفيد راجعي طبيب اغذيه و اكيد هايفيدك

نظرات الرجال الثاقبة المتلاحقه احيانا تحرج خاصة لما بتكون مركزة .. لا عليك عموما الاعجاب لا يضر في حدود المسموح و ان كان يبدو لي انه مكشوف لزوجته و اكيد هي عارفه طبعه

تناسق الملابس و اوقاتها بتدل على ذوق رفيع و انا اعشق هذا و تعلمته من امي رحمها الله لكن الذوق العام الأن سمك لبن تمر هندي

حفلات البروم و ما ادراكي .. دينا تعتبر محترمه بالقاس بما تفعله الطالبات لي عمل خاص كخبيرة تجميل جاءت لي فتاة عمرها 17 سنه لعمل مكياج لها انا بصراحه فزعت من الفستان اللي لابساة البنت يعني تقريبا في طول البيبي دول سألتها مين اشترى الفستان الجميل ده قالت لي ماما يعني لو هي لابسة كده تفتكري هاتعمل ايه في الحفلة اال فيها دي جي و تامر حسني؟ و غيرها كتير

اخيرا بين المجاملة و النفاق شعرة
تحياتي

blackcairorose said...

الطائر الحزين

هل حقا هناك رابط بين الملاحظات؟؟
لا أدرى
ربما الرابط أنها جميعا ملاحظاتى أنا!

blackcairorose said...

بنت القمر

ساعات يتعلقى بحاجات والله مش بتخطر لى اساسا على بالى

ممكن يدعى انى انا اللى كنت ببصله؟؟
تفتكرى
والله ممكن ما كل شىء دلوقتى جايز
ــــــــــــــــ
اهلا فعلا فى نادى النحيفات بس الحمد لله كده عندى افضل بكتير من زيادة الوزن
ـــــــــــــــــ
حلوة بس هتاخد على دماغها دى
لول

طيب بقى كده هتخلينى اكتب بوست عن حالات الخيانة الزوجية اللى سمعتها او شفتها، وبجد برضه فيها حاجات ليها العجب
ـــــــــــــــــ
الفتنة الطائفية
على رأيك هى جت عليه
ما الكل بيتكلم

طيب خلينى اظبطها كده شوية
ـــــــــــــــــــــــ
النفاق والمجاملة

أخى فعلا
بس الغريب انها مش نفاق ، يعنى مفيش مصلحة من وراها ممكن تبررها على قد ماهى طبيعة فى الشخصية

منورة دايما

blackcairorose said...

شريف

165 سم
56 كيلو

نقول تانى

ميه خمسه وستين سنتى من غير كعب
وسته وخمسين كيلو بالملابس

لول

اكلى كان كالتالى
فطار
اتنين توست اسمر وجبنه قريش

الساعة 12 الظهر طبق سلاطة صغير

الغذاء
فراخ مسلوقة او سمك على البخار وخضروات سوتيه

العصر تفاحة

ودمتم

يعنى كان ريجيم برضه بس التوفيق بين انه ميكونش رجيم ويكون صحى هى اللى محتاجة تركيز وبحث
ــــــــــــــــــ

كلمة اطراء من رجل متزوج ليست مشكلة

كأن يعجب بجمال اناقة ثقافة قوة شخصية اتزان حسن تصرف الخ الخ

كلها كلمات مقبولة فى رأيى دون ان تكون مبالغ فيها لأن فى وجهة نظرى المتواضعة هامش ما يمكن أن يقوله الرجل المتزوج او المرأة المتزوجة للآخرين دون علم الزوجة او الزوج يجب الا يكون كبيرا

اما الملاحقة بالنظرات والتركيز فى العين هى ليست فى براءة كلمات الاعجاب وانما فى قاموسى هى دعوة لشىء آخر أيا كان طبيعة هذا الشىء الآخر، وهذا هو المرفوض من رجل متزوج ومن ثم التجاهل هو افضل الردود

وما يجعل بشكل عام حتى كلمات الاطراء لها محاذيرها ان اغلب الرجال ان لم يكن كلهم فى مصر والدول العربية لهم تفسيرات خاطئة خاصة بالمرأة وتصرفاتها

فمثلا من ترتدى قصير يعتبرونها سهلة
ومن تعيش بمفردها يرونها جاهزة
ومن كانت متزوجة من أوروبى سيرون انه لا رادع لها
و
و
و
وبالتالى يبدأون فى التصرف على اساس تفسيرات هم وضعوها سواء بدأوا بالتصرف مباشرة او بشكل تمهيدى من خلال كلمة اعجاب تبدو فى الظاهر عادية

للأسف انا اقول ما اشاهده، وهو مايجعل العلاقات صعبة عكس فى حالة وجود طرف غربى مثلا الامور تكون ابسط

يعنى ممكن اقبل دعوة غذاء من رجل غربى لمجرد اراه شخصية جديدة بالاستماع لها والحديث معها، ولكن سأفكر مليون مرة قبل الموافقة على غذاء مع رجل شرقى او مصرى والذى سيكون هدفه فى الغالب الاغلب شيئا آخر يعتقد ان دعوة الغذاء مجرد تمهيد لها

وهكذا

blackcairorose said...

اجندا

مرسى يا عزيزتى على التعليق الطويل والكلام اللى بتفق معاكى فيه اكيد

موضوع الطائفية هوضبه شوية واحط التساؤلات والملاحظات وهنشره وفى انتظار تعليقك كمان

هوه هدفى مش زيادة الوزن لكن هدفى انى منزلش فى الوزن اكتر من كده الظاهر الميتابوليزم ـ ودى طبعا غير المدبوليزم ـ عالى عندى لول

زى ما مياسى قالت بتفق معاها ان دينا متصالحة مع نفسها، ولعلمك انا بحب فكرة انها بتعمل اللى هى عايزاه ومش شاغلة نفسها كتير باللى حواليها بيقولوا ايه

وسلام يا قمر

blackcairorose said...

نون

شكرا على الكلام الجميل يا عزيزتى

هى جديدة بس سكند هاند شوية مش كتير

لانى كان نفسى اشترى فور باى فور بس معنديش استعداد ادفع تمن عربية جديدة لانه مالوش لزمة المبلغ الكبير ده فى المرحلة دى

فقلت حل وسط عربية مستعملة سنتين

و قد كان

blackcairorose said...

دعوة للحب

برضه مخطرش فى بالى ان الزوجة تكون لاحظت وقاصدة تعرفنا

طبعا احتمال ممكن مقولش لأ

بس برضه فى زوجات كتير جدا بيبقوا مخدوعين فى ازواجهم وفاكره انه ملاك وخام وما خفى كان اعظم

وحتى فى موضوعات تانية مش بس الخيانة الزوجية

يعنى ساعات بتلاقى زوجة فاكره جوزها كفء جدا فى شغله وانه مش واخد حقه، لكنه فى الحقيقة مهمل وغير ملتزم

او فاكرة انه جد وشايف شغله وفى الحقيقة زملائه او مرؤؤسيه شايفينه ابن ستين فى سبعين ومطلع عنيهم

غريبة جدا ان الناس بتبقى مش عارفين جوانب حقيقية من شخصيات ازواجهم احيانا

والملاحظة دى مش قليلة على فكرة
ـــــــــ

اما بالنسبة لدينا وحوار حسين فهمى

بصراحة مبحبش نوعية الاسئلة دى زى انتى عارفة ان الرقص حرام؟؟

طيب ايه هدفه من السؤال؟؟

بيقولها مثلا معلومة مجهولة؟
ولا عايزها تبطل رقص؟
ولا اهو بيتكلم وخلاص؟؟

طيب يعنى هو عارف ان استضافة راقصة فى البرنامج وحديثه معاها عن افلامها واعمالها حرام ولا حلال؟؟

يعنى موضوع الحرام والحلال فى موضوعات واضحة ومش محتاجة كلام مسألة ملهاش معنى والغرض منها مش ممكن يكون ايجابى فى رأيى لان بحر الحلال والحرام واسع ولو هو نفسه حسين فهمى او اى مذيع تانى بدأ فيه مش هيخلص هو نفسه منه

ولا ايه رايك يا عزيزتى؟

blackcairorose said...

مياسى

بتهزرى

تسعة كيلو فى اربع شهور؟؟؟

لا خلى بالك دا كتير قوى فى فترة قصيرة جدا، ابتدى حالا فى تظبيط الامور

طبعا بعرف المنسف والمشويات الاردنية الحلوة وحلويات زالاطيمو المشهورة

بس خلى بالك

على فكرة اكلت مشويات حلوة قوى مرة فى رستوران فى الطريق من جرش لعمان، مفتكرش اسم الرستوران بس كنا قاعدين فى مكان مفتوح على اعلى تل والمنظر كمان كان جميل

ـــــــــــــ

صح كلامك على ان دينا متصالحة مع حالها وبتفق تماما معاكى فيه

وتسلمى دايما

blackcairorose said...

Someone in life

لما بزور مصر ونزل محلات وسط البلد فى القاهرة من باب الفرجة واشوف البياعات فيها دلوقتى لابسين ايه مش بصدق قد ايه مفيش اهتمام باللبس

طيب كان زمان يقولك البياعة تبقى متوضبة شوية بس علشان تدى انطباع للزباين لكن الظاهر دلوقتى مش محتاجين يدوا انطباع حلو لانهم عارفين ان اغلبية الزبونات اساس مش مهتمين باللبس همه كمان

وعلى السيرة

فيه محل ملابس حريمى فى شارع قصر النيل قدام ممر بهلر تقريبا، هوه كبير ودورين بس مفتكرش اسمه

دخلته فى السنة اللى فاتت وانا فى مصر، واحدة من البنات فيه اللى بيبعوا راحت فاكه الحجاب قدام الناس اللى موجوده وعدلت شعرها ورجعت لبسته تانى ولا كأنها فيه مشكله

كنت عايزة اقولها طب ولازمته ايه اساسا؟