Tuesday, November 6, 2007

رقص وعشوائيات وتعليقات


http://www.youtube.com/watch?v=uCKCcq727gc
.
.
الفيديو مثير للدهشة والفرجة، شفته أول مرة فى مدونة هووهى بعنوان مصر اتغيرت خالص، وحاولت اشوفه فى يوتيوب بس الرقابة على جهاز الكومبيوتر عندى بتمنع بعض مواقع أو بعض أجزاء منها، فمجاتليش فرصة أقرا التعليقات فى اليوتيوب، بس عندى شوية تعليقات كده
.
ـ كنت بفتكر بسذاجتى ان دينا هى اكتر رقاصة بتلبس عريان اتارينى ظلمتها، أما الواد الصغير ده فأكيد مشروع مستقبلى لسعد الصغير، والمطرب كمان عاطفى خالص
.
ـ بسال نفسى ليه محصلش تحرش للرقاصة زى ما بنسمع انه حصل لمغنيات تانيين كانوا لابسين مقفل اكتر من كده؟ او يمكن يكون حصل واحنا منعرفش
.
ـ فى رأيى الحاجات دى مش جديدة على مجتمعنا، يعنى مش ظاهره جديدة ولا حاجة يمكن بس بقينا دلوقتى بنشوفها ونسمعها لان وسائل الاعلام والانترنت موجوده ومتوفرة، يمكن بس الجديد ان افراح او مناسبات زى دى كانت بتم فى احياء شعبية دلوقتى بتحصل فى عشوائيات
.
ـ الجديد بقى فى رأيى أن كتير من الرجالة أو حتى الستات اللى بتحضر وبتتبسط فى الحفلات دى ممكن ان يكون ليهم وش تانى بيتمسك بقشور الدين أو بمظاهره، يعنى نفس الراجل اللى بقه مفتوح خمسة متر من الفرحه والانتعاش وهو بيتفرج على الرقاصه اللى تقريبا ملط، يمكن هو نفسه اللى شايف ان مراته أو بنته لازم تتحجب وبيحرص أنه يصلى فى الجامع الخ، مبقولش كل الملتزمين كده عشان محدش يفهمنى غلط انما بقول أن فيهم كده، فى حين انه زمان بحس ان شخصيات الناس كان فيها تناقض أقل وحياتهم بشكل عام كانت اكتر انسجام فى جوانبها المختلفة سواء كانوا متدينيين أو نص متدينيين او ملهمش فى موضوع الدين ، حتى الرقاصة نفسها محدش عارف بتدخل حتتها وبيتها وهى لابسه ازاى ومظهرها شكله أيه
.
ـ ساعات بقول لنفسى اننا كشعب محناش بالتزمت اللى بنبان عليه من بره، اللى يشوف الفلاحين والفلاحات وازاى بيتكلموا فى مواضيع خاصة جدا وجريئة جدا ببساطة ووضوح ميصدقش، وطبعا الاغانى الفلكلورية المصرية فيه كتير منها صريح ومكشوف ودى من الحاجات اللى بجد استغربتلها لما سمعت اغنية او اغنيتين من اللى بيغنوها الستات فى الافراح فى الارياف
.
ـ الرقص البلدى ده بجد حاجة كده مش مفهومة، لا هوه رياضة ولا هوه هواية ، نحبه ونتفرج عليه وننبسط ونعمله وباب الاوضة مقفول ولكن نقول مبنحبوش وميصحش وياي حاجة وحشه وبلدى قوى، وسألت نفسى هوه فيه حاجة تانية فى حياتنا ليها نفس مواصفات الرقص البلدى يعنى نحبها ونعملها والباب مقفول وندعى العكس قدام الناس، لكن موصلتش لاجابة، او بأدق ملقتش حاجة مواقفنا منها متناقضة زى موقفنا من موضوع الرقص
.
ـ الرقاصة فى الفيديو عماله تشد فى الجيب، معرفش عايزة تغطى ايه بالضبط، بس بصراحة ظريفه وبترقص ببساطة كده وتلقائية، واقول حاجة كمان يمكن اللى يقرا يستغربها؟ أنا مبشفهاش مبتذلة رغم لبسها المكشوف بس حركاتها مفيهاش حاجة اوفر، دا رأيى واللى عايز يتريق يتريق! كمان وهى بتختم فى الآخر فنانة خالص، وكمان وكمان جديدة حركة الرجلين دى مع الولد أول مرة أشوفها، ولا يمكن قديمة بس أنا اللى مش على دراية
.
ـ الجو العام كده عامل زى الافلام مع الجرسون اللى بيقدم المشاريب وعمال يرقص وآخر فرحة، لو شفتها فى فيلم كنت هاقول كليشيه
.
!!معرفش، بس حبيت الكليب والرقص والجو العام، يللا ادبحونى

.
.

19 comments:

Anonymous said...

.

Loving Anabel said...

الحقيقه أهم من الرقاصة و الواد اللي الصغير بصراحة فالكليب دولاب العروسين ههههههه
يعني هما ملقوش مكان تاني يتصوره فيه؟؟؟ مسخرة والله

sara said...

علي فكرة انا كمان حبيت الجو الشعبي العام ..شكلنا هندبح جمعاء

كان ليا سابقه قبل كدا واتعزمت علي فرح زي دا بالظبط ..وروحته رغم اعتراض زوجي اللي مخلناش قعدنا اكتر من ربع ساعه واللي كان واقف ساند علي العربيه طول الربع ساعه دي لأن كان فيها حجات مهمه وخاف تتسرق

والله كنت مستمتعه جدا وانا بتفرج علي الناس ..الحاجه الحلوة بقي ..اني لقيت ظباط كتير في الفرح دا ..قاعدين علي تربيزة واحده مع الناس اللي بتشرب مخدرات وبيرة وبيشربوا معاهم ..وكانو جايين كمان عشان يأمنوا الفرح!!

هو يمكن انا ضايقني الولد الصغير بعض حركات الرقص ..حسيت ان براءته اتقتلت

عجبني الكزمنت اللي بيقول اننا كشعب فعلا مش متزمتين زي مابيبان علينا ..بدليل الاغاني اللي بيغنوها في الارياف

تحياتي ياجميله ..ومعلش لو كنت طولت

Anonymous said...

بصي ياجميله في الدنيا دي ياما حنشوف زي ماقلتي ممكن اللي مفرفش اوي في الحفله دي يكون متزمت اوي في بيته وي الدين مش مظاهر و مش تزمت و فعلا ليه مش بيحصل تحرش بالرقاصه ممكن عشان دول ناس متحضره وواخدين علي المناظر دي فعادي بالنسبه ليهم تمام زي الاجانب ممكن تلاقي عندهم ناس ماشيه بهوت شورت و عادي لا حد بيعلق تعليق سخيف و لا اي حاجه طبيعي جدا لكني تيجي بقه عندنا في الشارع لما البت تلبس حاجه محزقه شويه مابتسلمش من التعليقات

موضوع ظريف و طرحك ليه بأسلوب جميل اضفي عليه تميز
تحياتي ليكي ياقمرايه

He and She said...

حركة الرجلين دى مع الولد أول مرة أشوفها،
I laughed a lot on this sentense. It is a solid proof that you have no previous expereince whatsoever.

سمـــــــــا said...

ازيك يا قمر

حيث انك من عشاق نجاة زي فاللينك دا فيه اغانى كتير اوى لنجاة بس بصراحة دورت لك على الغنوة اللى قلتى عليها دى بس موقعتش فى ايدى بس انا لقيت عشان يا اسمرانى محبة لكن دى معروفة طبعا فاكيد مش اللى انتى تقصديها . انتى واثقة انها نجاة ؟ اصلى مش متخيلة نجاة وهى بتقول عطشان يا حنينة !!! دى كانت بتغنيها لمين دى ؟؟ :)))

المهم هحاول ادورك عليها بس واضح انها فعلا نادرة جدا واكيد دودو برضه هتدور هى تخصص مهام صعبة .

هلف لفة وهبقى اركب اشوف الموضوع

سلام مؤقت يا عسل

سمـــــــــا said...

نسيت احط اللينك معلش مسطولة :)


http://www.sama3y.net/forum/showpost.php?p=96182&postcount=169


واللينك دا كمان

http://www.sama3y.net/forum/showpost.php?p=96184&postcount=170

سمـــــــــا said...

اخيرا فكيت من الشغل وعرفت اشوف الرعاشة اللى فى الفيديو بس متصدمتش اوى اصل انا كان عندى فيديو برضه لرقاصة نسخة تانية من البنت دى ونفس اللبس وحتى نفس لون الاندر وير بس التانية ما شاء الله كانت عاملة عرض استربتيز بالاندر وير بتاعها لكن دى على ادها بتعمل اللى عليها وبس ست محترمة صحيح

انا شخصيا بعشق الرقص البلدى بس اللى شفته دا مش رقص دى واحدة بترفص عارفة الجملة اللى بتقولك دا حافظ مش فاهم تحسى ان دى بترقص كده حافظة كام حركة ملهومش علاقة بأى حاجة وعمالة تديها يمين وشمال وهوبا هوبا هوبا :)

انا لاحظت برضه ان المعازيم مش مركزين معاها اوى يعنى تحسى كل واحد فى وادى شوية بيرقصوا مع نفسهم وشوية بيتمشوا مع نفسهم برضه وناس كده عمالة تبص فوق تقريبا بيعاكسوا بنات الجيران واللا ايه بس الاكيد ان ريحة البانجو بدأت اشمها طالعالى من الفيديو : )

بمناسبة التحرش اللى بيحصل فاكيد بيحصل تحرش طبعا بس الرقاصة اللى من العينة دى بيبقى معاها عادى جدا ان حد يجى يرمى نقطة ويمسك اللى ربنا يقدره عليه لكن فى واحدة زي الممثلات واللا المغنيات الشهيرات بتوعنا هو مش من حقه يمسك واللا يتخرب بيت اهله لازم يدفع الاول طبعا : ))

الولد الصغير اظرف حاجة فى الكليب بصراحة يعنى لما اتفرجت عليه ابتسمت لانه شقى وعلى سجيته لكن الاخت الرعاشة وانا بتفرج عليها بقى فيه حاجب طالع وحاجب نازل بس مش عارفة يا ترى ايه السبب ؟

نسيت الحقيقة ابدى خالص اعجابى لجونتى العروسة : )))

تحياتى الدائمة لقلمك الجرىء المميز

روابط said...

انا موافقك طبعا ان اغلب شعبنا المصرى الجميل عايش بوشين والمثال اللى ضربتيه صحيح , نفس طقم الحشاشين اللى فى الفرح واللى نفسهم يروحوا البيت بالرقاصة , هما هما اللى بيمنعوا اخواتهم البنات من فتح باب الشقة من غير الطرحة , للأسف الشديد الأزدواجية دى ناجمة عن عوامل كتير جدا ومتداخلة بشكل يصعب فصله , أبرزها التدين المظهرى - اذا جاز التعبير - كما لا تنسى الفكر الأنثوى المضاد من جانب الرجال حيث المرأة ليست الا سلعة أو للفرجة وثالثة الأثافى أو ابرز عيوبنا كمصريين هو أننا لا نعترف بعيوبنا مطلقا , وعلى فكرة مدونتك عجبتنى جدا , وعلى فكرة كمان الفيديو ده انا شفته من زمان والرقاصة مش جامده قوى ..ههههههه

Anonymous said...

you need one time to see a sex movie so you learn what people do and you dont comment like this again

blackcairorose said...

تصدقى يا انابيل مخدتش بالى من موضوع الدولاب ده الا لما قريت تعليقك!

المهم شرفتى المدونة وفى انتظار مرورك مرة تانية

وخالص الود

blackcairorose said...

نون
برائته مش اتقلت وبس دى ادفنت كمان من زمان، بس من كتر ما بنشوف اطفال كده الواحد جتته نحست مع الاسف

blackcairorose said...

اجندا

مش بس اللى لابسة ضيق مبتسلمش من التعليقات

على رأى واحدة كنت اعرفها من فترة قالتلى انها كانت بتفكر تتحجب وجربت مرة كده ونزلت الشارع بالحجاب بتحلفلى انها اتعاكست اكتر ما كانت بتتعاكس فى العادى

طبعا هى مجرد مصادفة انها اتعاكست فى اليوم ده اكتر، لكن ده يديكى فكرة وانتى اكيد برضه عارفة

blackcairorose said...

No previous experience in what exactly He&she? Dancing with a little boy in the street? No, defintely I do not! lol

blackcairorose said...

سما

حلوة حتة ان الرقاصة حافظة دى، عندك حق بس برضه عاجبانى طريقتها

وكمان حتة يمسك اللى ربنا يقدره عليه

والله ضحكتينى

لا دا احنا لازم لنا قعده! هاجيلك واكمل بقية الكلام عندكو فى المدونة استنونى

blackcairorose said...

شكرا حازم على المرور والتعليق وانتظرنى فى مدونتك المميزة جدا

وخالص الود

blackcairorose said...

Anonymous

People do whatever they do in XXX movies, but in an Egyptian street the slightest gestures sometimes raise brows, don't they?

Anonymous said...

سلام

الدنيا تغيرت طبعا وكل الناس صارت تحب التعليق على اعمال غيرهم
والعقول ما بداخلها غير الاشيا المقرفة
الكل يريد اظهار الوحش للتاني عشان هو يطلع بصورة احلى

يعبدون النفاق

تحياتي

Anonymous said...

انا موظف فى مؤسسة اعمل فيها منذ 5 سنوات لم يزيد راتب الا مرة واحدة ـ اما الاخوة الزملاء الذين يعملون معنا وهم على غير الكفالة فراتبهم يذيد سنويا وبدون طلب زيادة وين العدل يا من تدافع عن نظام الكفالة