رقص وعشوائيات وتعليقات

http://www.youtube.com/watch?v=uCKCcq727gc
.

.
الفيديو مثير للدهشة والفرجة، شفته أول مرة فى مدونة هووهى بعنوان مصر اتغيرت خالص، وحاولت اشوفه فى يوتيوب بس الرقابة على جهاز الكومبيوتر عندى بتمنع بعض مواقع أو بعض أجزاء منها، فمجاتليش فرصة أقرا التعليقات فى اليوتيوب، بس عندى شوية تعليقات كده
.
ـ كنت بفتكر بسذاجتى ان دينا هى اكتر رقاصة بتلبس عريان اتارينى ظلمتها، أما الواد الصغير ده فأكيد مشروع مستقبلى لسعد الصغير، والمطرب كمان عاطفى خالص
.
ـ بسال نفسى ليه محصلش تحرش للرقاصة زى ما بنسمع انه حصل لمغنيات تانيين كانوا لابسين مقفل اكتر من كده؟ او يمكن يكون حصل واحنا منعرفش
.
ـ فى رأيى الحاجات دى مش جديدة على مجتمعنا، يعنى مش ظاهره جديدة ولا حاجة يمكن بس بقينا دلوقتى بنشوفها ونسمعها لان وسائل الاعلام والانترنت موجوده ومتوفرة، يمكن بس الجديد ان افراح او مناسبات زى دى كانت بتم فى احياء شعبية دلوقتى بتحصل فى عشوائيات
.
ـ الجديد بقى فى رأيى أن كتير من الرجالة أو حتى الستات اللى بتحضر وبتتبسط فى الحفلات دى ممكن ان يكون ليهم وش تانى بيتمسك بقشور الدين أو بمظاهره، يعنى نفس الراجل اللى بقه مفتوح خمسة متر من الفرحه والانتعاش وهو بيتفرج على الرقاصه اللى تقريبا ملط، يمكن هو نفسه اللى شايف ان مراته أو بنته لازم تتحجب وبيحرص أنه يصلى فى الجامع الخ، مبقولش كل الملتزمين كده عشان محدش يفهمنى غلط انما بقول أن فيهم كده، فى حين انه زمان بحس ان شخصيات الناس كان فيها تناقض أقل وحياتهم بشكل عام كانت اكتر انسجام فى جوانبها المختلفة سواء كانوا متدينيين أو نص متدينيين او ملهمش فى موضوع الدين ، حتى الرقاصة نفسها محدش عارف بتدخل حتتها وبيتها وهى لابسه ازاى ومظهرها شكله أيه
.
ـ ساعات بقول لنفسى اننا كشعب محناش بالتزمت اللى بنبان عليه من بره، اللى يشوف الفلاحين والفلاحات وازاى بيتكلموا فى مواضيع خاصة جدا وجريئة جدا ببساطة ووضوح ميصدقش، وطبعا الاغانى الفلكلورية المصرية فيه كتير منها صريح ومكشوف ودى من الحاجات اللى بجد استغربتلها لما سمعت اغنية او اغنيتين من اللى بيغنوها الستات فى الافراح فى الارياف
.
ـ الرقص البلدى ده بجد حاجة كده مش مفهومة، لا هوه رياضة ولا هوه هواية ، نحبه ونتفرج عليه وننبسط ونعمله وباب الاوضة مقفول ولكن نقول مبنحبوش وميصحش وياي حاجة وحشه وبلدى قوى، وسألت نفسى هوه فيه حاجة تانية فى حياتنا ليها نفس مواصفات الرقص البلدى يعنى نحبها ونعملها والباب مقفول وندعى العكس قدام الناس، لكن موصلتش لاجابة، او بأدق ملقتش حاجة مواقفنا منها متناقضة زى موقفنا من موضوع الرقص
.
ـ الرقاصة فى الفيديو عماله تشد فى الجيب، معرفش عايزة تغطى ايه بالضبط، بس بصراحة ظريفه وبترقص ببساطة كده وتلقائية، واقول حاجة كمان يمكن اللى يقرا يستغربها؟ أنا مبشفهاش مبتذلة رغم لبسها المكشوف بس حركاتها مفيهاش حاجة اوفر، دا رأيى واللى عايز يتريق يتريق! كمان وهى بتختم فى الآخر فنانة خالص، وكمان وكمان جديدة حركة الرجلين دى مع الولد أول مرة أشوفها، ولا يمكن قديمة بس أنا اللى مش على دراية

.
ـ الجو العام كده عامل زى الافلام مع الجرسون اللى بيقدم المشاريب وعمال يرقص وآخر فرحة، لو شفتها فى فيلم كنت هاقول كليشيه
.
!!معرفش، بس حبيت الكليب والرقص والجو العام، يللا ادبحونى
.
.