Wednesday, February 4, 2009

رغي

فاكرين كاف؟
لسه معايا اكتر من ممتازة، وانا برضه معاها كويسه فى المقابل، بس دايما أغنية ايهاب توفيق قلبي مش مرتاحله بترن بصوت واطي فى راسي كل ما اشوفها
ــــــــ

كنت بكلم أختي فى التليفون وبقولها اني عايزه آخد شقة فى القاهرة فسألتني لو فيه منطقة مفضلة عندي، فقلت أى مكان المهم يكون نظيف وهادي وفيه خضرة، أختي ردت على طول:
ـ أقرب مكان عندك بالمواصفات دى في أوروبا
ــــــــــ

فى نفس المكالمة اختي كانت بتحكيلي عن واحده نعرفها لسه متجوزه جديد خالص، البنت دى علشان لسه مش واخده على البيت الجديد وهى من النوع الدلوع اللي بيخاف، فلما بتقوم تعمل بي بي فى عز الليل بتصحي جوزها من النوم يقوم معاها علشان خايفة ويستناها على باب الحمام لحد ما تخلص
أنا وأختي طبعا كنا مستغربين من الجوز المهاود ده، وأختي علقت
ـ تخيلي مثلا أنا لو صحيت جوزي بالليل وقلت له يستناني على باب الحمام لحد ما خلص علشان خايفه أروح لوحدي، متهيألي أقل حاجة ممكن يعملها أنه يشلني ويحطني أنا شخصيا فى التواليت ويشد عليه السيفون
ــــــــ

أيه حكاية العرسان الرجالة في مصر اللي بيعملوا ماكياج ليلة فرحهم؟
أول مرة شفتها من أكتر من سنة فى صور الفرح وسألت: هو العريس عامل ماكياج؟ قالولي آه لأن الكوافير بتاعه قاله ان عينيه مرهقة وهيبان وحش فى الصور فحطله كونسيلر وبودرة وقاله أنه مش هيبان انه عامل ماكياج، وطبعا في الصور كانوا باينين، وقلت ساعتها غريبة

وبعدين لسه شايفه صور فرح تاني فى مصر اليومين اللي فاتوا وبرضه العريس شكله باين انه حاطط بودرة
هو ده ايه؟ تقليعه؟ ولا دي صدفه بحته واستثناء؟
ـــــــــ

على سيرة الرجالة والماكياج
أول مرة في حياتي شفت فيها راجل عربي مكحل عينه كان واحد مرتدي الزي الاسلامي ودقنه طويلة ومش مهذبة ، يعني العلامات بتاعة الاصوليين، واستغربت جدا، وبعد ما سألت حد قالي أن تكحيل العين سنة نبوية، بس يمكن تستغربوا لما أقول أن الراجل كان أصلا وسيم جدا (أعتقد أصله جزائري وله قصة صغيرة معايا ولكن خليني احكيها في وقت تاني) وتكحيل العين اداله شكل غريب شوية بس مش وحش
دلوقتي هنا فى الخليج برضه تكحيل العين للرجالة بشوفه أحيانا وبرضه بيديني نفس الانطباع أنه حلو لما الراجل بيبقى شكله أصلا حلو!

عارفة..رأي يمكن البعض يستغربله
ــــــــــ

كنت بتكلم مع صديقة ومدونة عزيزة وجت سيرة البنات اللي بتقعد تكتب فى بلوجاتها على حجم المعجبين بيهم وازاي انهم ـ البنات ـ مش سألين فى الشباب ده الخ، بصراحة ساعتها خفت ليكون ده انطباع اللي بيقروا مدونتي لأني يمكن كتبت مرة أو مرتين عن معجبين وقلت لحسن الناس تفتكر اني عايزة أصور نفسي على أني زي ما بيقولوا بالفرنساوي
Femme fatale
واللي هي الرجالة بيترموا تحت رجليها وهي مش سألة، وطبعا دي مش أنا بالتأكيد، على العكس فيه مرتين كان شعوري تجاه ناس اقوى ومختلف عن شعورهم تجاهي، أنا مش فى موود دلوقتي احكي عن المرتين دول بالتفصيل بس فى مرة منهم كنت حاسة باعجاب تجاه شخص ومتهيألي ـ أو متأكده ـ انه فهم شعوري بس كان واضح أنه مش بيبادلني نفس الشعور
وهنا بالمناسبة بستغرب قوي من اللي بيقولوا ساعات انهم بيحبوا بس الطرف التاني مش داري بحبهم، متهيألى وقت لما بنحب أو حتى لو فيه بوادر حب أقل حاجة ممكن تعكس مشاعرنا حتى لو بنحاول نخبيها، ومش شرط الانعكاس ده يكون بالتصريح او بكلام كبير، لأ، أقل لفتة الشخص اللي قدامي لو زكي ممكن يفهم معناها أيه.
يعني دي بس حاجة صغيرة بس حبيت أوضحها
.
.

27 comments:

someone in life said...

عزيزتي جميعنا يعلم انك شخصيه متزنه و نقدرك جدا لا اخفي عليكي ان بعض المدونيين هنا يعرف بعضه البعض شخصيا من خلال المدونات او الالتقاء في تجمعات و عندما يأت ذكر بلاك كايرو روز من يعرف مدونتك يثني عليكي و علي شخصيتك و من لم يعجبه ما تكتبيه انسحب من التعليقات و خلاص

بالنسبه للزوج المهاود الرجاله اليومين دول بقوا حنينين زيادة عن اللزوم يعني المدام مش بتطبخ مش مهم يا حبيبتي ناكل من برة المدام عند الكوافير و يفوت بياخدها عارفه كل زمايلي في الشغل و اقصد المتزوجين حديثا بيصعبوا عليا لان كل يوم بياكل عند ماما او حماته و بعدين اسعار الكوافيرات غاليه فطبعا المرتب مش كفايه و لو جابوا اولاد تبقي خلاص خربت و الا ماما تربي الدنيا اتغيرت

اول واحد شفته حاطط مكياج بجد كان علي الحجار في الثمانينات و الله فكرة الرجاله تحط ماكياج دي افكر في الموضوع لو يرضوا واحد ست تعملهم ماكياج ههههه علي الاقل الخامات المستخدمه ااقل من الستات

القاهرة اصبحت مزدحمه للغايه لما لا تتجهين الي المدن الجديدة او الكومباوند اضنها مناسبه اكثر
المهم تشرفي مصر و الدنيا تتحل

يا حظها هذه المدونه انها صديقه لكي
اسعد الله ايامك
تحياتي

زمان الوصل said...

راجل يحط ماكياج .. يعععععع
والله ده لو هيطلع قرد فى الصور من غير ماكياج أرحم من إنّه يبقى طالع حاطط بودره كونسيلر !! ده رأيى الشخصى يعنى مع احترامى لمؤيّدى هذا الاتجاه

Fatma said...

صباح الخير

- بالنسبة لكاف ..صدقي قلبك عمره ما هيكدب عليكي
- شقة في القاهرة ..خضرةوهدوء ..مممم التجمع الخامس او القطامية او الشيخ زايد يعني على الحدود بس جوا القاهرة دا مستحيل ..
- انا عجبني الجوز دا على فكرة...مش شايفة انها حاجة ضد رجولته لما يحس ان مراته خايفةمنحاجة حتى لوتافهه ويحاول يجي على نفسه وياخدها على قد عقلها ويطمنها ..عجبني بجد !

- انا كمان شوفت عرسان بكونسيلر ...ما اظنش انها ظاهرة بس هي حاجة ابتدت تنتشر شوية في الافراح ومش عاجباني ..بحب الوش الرجالي المرهق الخشن فكرة انه يداري الارهاق بكونسيلر مش مستساغة بالنسبة لي

- اتفق معاكي في موضوع الكحل ..ما بيضايقنيش لو لايق على وش الراجل وما بشوفش انه بينتقص من رجولته خالص

- ماجاليش الانطباع دا خالص وانا بقرأ مواضيعك ..بيبان على فكرةمن الاسلوب مين اللي كدا ومين اللي لأ ..بيبان اوي

مستنية حكايتك عن المرتين دول بالتفصيل ..
:)

رئيس جمهوريه نفسى said...

موضوع المكياج لرجال هو انتقل من المطربين الشباب الجدد للرجال رغم انى مقابلتش واحد حاطط مكياج فى الحياة بس اعتقد انى حستهجن الامر وغير مقبول
موضوع الكحل منتشر بكثرة فى الصعيد واعرف عندنا ناس كتير بتتكحل خاصة يوم الجمعة من منطلق انها سنه عن الرسول بالاضافه لعداة تكحيل الاطفال لتوسعة العينين
بخصوص الشقة انا برشح ليكى مدينة الريحاب ان امكن لانى فى زيارة مع بعض الاصدقاء هناك متخططه صح وهاديه
موضوع الزوج المهادو لو الزوج هاود مراته ونفذ طلباتها مش بيعجب البعض ولو مهاودش مش بيعجب البعض احترنا معاكم نعمل ايه بس تقدرى تقولى انى الخلع غير مفاهيم كتير عند الرجال فى الوقت الحالى بعد ما بقى سيف مسلط على روسهم
موضوع انطباع قراء المدونه انا عن نفسي كقارى لمدونتك حتى لو معلقتش مش بنظر ليكى اللى بنظرة كلها احترام لثقافتك واسلوبك وشخصك

مثليه said...

كاف دي خليها من بعيد لبعيد عشان الناس دي مخها بيبقى تعبان ومتعرفيش بيفكرا في ايه وفعلا ايهاب توفيق عنده حق
ــــــــ

شقه بالمواصفات اللي بتقولي عليىها شوفي بقى يا ستى انا عندي اكسبيريانس في الموضوع ده لو عايزة حاجه هاديه و حدائق قدامك الرحاب هيلز وممكن تلاقي فالرحاب القديم بس تشتري من ناس و ده بيبقى عن طريق سماسره فاتحين جوا الرحاب بس مانصحكيش بده عشان بيغلوا السعر الشركه بتكون احسن و فيه تسهيلات لغايه 10 سنين تقسيط
و ممكن برضه لو لسه قدامك وقت ممكن تاخدي في مدينتي لأنها هتكون برضه احلى من الرحاب علشان تلافوا فيها الاخطاء بتاعه الرحاب بس هيلز كمان اعتقد معموله بشكل جيد و نفس تسهيلات السداد
وممكن في القاهره الجديده في كذا مشروع حلو المهم لو عايزة انفسمنت للمستقبل خدي النواحي دي انا بفهم شويه فالموضوع ده
ــــــــــ
موضوع البيبي بقى الست الفافي اللي بتصحي جوزها دي والله لو انا منه كنت ظبطها بعالقه سخنه واتوبها اما لو بحبها اوي فهمنع عنها الميه ساعتين قبل النوم:)) بنات عايزة اللي يواريهم
ــــــــ
موضوع مكياج الرجاله ده شوفته في صور كتير و احيانا بشوفه ناتورال و احيانا مبتزل على حاسب الكوافير لكن رأيي الشخصي مش عيب انه يصلح شكله لو الموضوع هيفرق بس فنفس الوقت مش بطريقه اوفر اما موضوع الكحل انا برضه بشوف بما اني انا كمان في بلد عربي و شكلنا هنطلع مع بعض في نفس البلد :)))) الشكل ده بس معرفش ليه بحس انه مخيف يمكن عشان قصه كانت في الطفوله معلقه في ذاكرتي عن راجل مكحل عينيه هبقى اقولها في وقت تاني.

ــــــــــ
انما ايه موضوع كنت بتكلم مع مدونه ده انتي فكيتي الحصار و مقولتيليش ماشي ياعم الله يسامحك عموما انا مش هعلق على الموضوع ده و هطنش

Anonymous said...

هاها لا بس حلوة حكاية انها بتقوم تعمل بي بي بالليل دي

سمـــــــــا said...

على فكرة بقى انتى شريرة لانى اضطريت اروح اقرى بوست كاف تانى لانى مكنتش فاكرة الاحداث اوى

بس بعد تفحيصى وتمحيصى توصلت لحاجة بتحصل فى الواقع وبتحصل معايا شخصيا

يعنى انا شكلى تحسى انه تِنك بس انا مش تِنكة انا اللى شكلى كده :))

فممكن لما اروح فى مكان فى ناس ولسة بنتعرف على بعض ممكن تلاقينى ساكتة مش بتكلم اوى او بتكلم بس تحسى ان الكلام طالع بارد ومن تحت الضرس ، هو مش بيكون برود ولا تناكة دا انا بكون محرجة شوية او مش بالعة الناس او الحوار اللى داير فالناس بيفهمونى غلط وياخدو فكرة عنى انى مغرورة

وبناء عليه ممكن حد فيهم يبدأ يتعامل معايا ببرود او غلاسة على اساس انى مغرورة بس لما بيعرفونى اكتر بيعرفوا ان الصورة الاولى اللى اخدوها مختلفة تماما عن حقيقتى

فدلوقتى علشان نحكم صح على كاف واخواتها فانتى لازم تعرفى هى كده مع كل الناس واللا انتى بس ؟؟ فلو انتى بس يبقى زي ما بقولك ممكن يكون خرج منك انطباع اثارها من غير ما تحسى فهى شالته فى قلبها وحاولت ترده بطريقة تانية لما جه الوقت المناسب

هذا رأى والله اعلللللللللم

...................................


لا بالنسبة للشقق فى مصر ففيه كل اللى انتى ممكن تتخيليه وتحلمى بيه بس المشكلة مش فى المكان المشكلة فى التمويييييييييييل


...................................


انا شخصيا بحب الدلع جدا واحب اللى معايا يدلعنى ويهتم بكل تفاصيلى ، فلو زيها بخاف ادخل الحمام لوحدى وخصوصا لو فى بيت مش متعودة عليه هيحصل ايه لما يقوم يوصلنى ويستنانى اخلص

بس هو هيبقى فيه مشكلة انى اصلا مش هعرف اعمل بى بى وحد واقفلى على الباب زى الدادابان كده

فهقوله روح هاتلى اشرب عقبال ما اخلص بى بى وتعالى شد السيفون :))

..................................


هو موضوع المكياج انتشر دلوقتى فعلا زمان كان ماسكات تفتيح دلوقتى بقى كونسيلر وباودر وفتلة واحيانا روج

لغاية دلوقتى محدش من اصحابى الولاد عمل العاملة المهببة دى والا كنت تاويته ورا الكوشة

..............................


انا قلت لك ان فى مسائل الاعجاب والحب مش كفاية عندى الاحساس لانى مؤمنة ان ممكن احساسى يخدعنى لو انا معجبة او بحب الشخص دا

بمعنى انى بحب شخص فعاملنى كويس او بشكل مميز هفرح وازأطط واقول هيييه هيييه بيحبنى بيحبنى واصحى الاقى نفسى متغطية بالهوا لما الاقيه بيحب حد تانى

فيه ناس زي ما قلتى بتلمح واللى قدامها يفهم او زي ما بيقولو من القلب للقلب رسول يعنى لما احب حد او حد يحبنى المفروض افهم او احس

دا ممكن يحصل ايوة بس ممكن جدا ميحصلش والاسوأ انه يحصل لَبس واتخيل اللى انا عايزة اتخيله اللى هو اصلا مش واقع

فهمتى وجهة نظرى واللا نووو ؟؟؟

FOrty said...

حكايه الكحل و المكياج دى مش مبلوعه شويه مش عارف ليه و بعدين مانا كمان فى بلد عربى وملحظتش الموضوع ده يمكن علشان بص على الستات بس و مش مركز مع الرجاله
و بعدين يا جماعه ايه المانع ان الراجل يدلع مراته و يحتويها زى الطفل الصغير ماهى برضه حتردها له اكيد بطريقه تانيه العلاقه لازم تكون تبادليه مش من جانب يعنى مثلا هو يقف لها على باب الحمام و هى تبقى تحميه و تديله السندوتشات قبل ما يروح الشغل :))

قلب امراه said...

عزيزتي بلاك كايرو روز
مش عارفه لسه موضوع كاف هو ايه لما اشوفه الاول بس المهم هو لما بترتاحي لحد واحساسك بيكون مرتاحله خلاص يكون غالبا كويس اما اذا مكنتيش مرتاحه وفغالبا بيطلع احساسك بمحله
بالنسبه للمكياج والكحل للرجاله انا ابدا ما بستوعب شكل راجل وهو حاطط ماكياج مهما كان السبب هو يبقى راجل ازاي والكحل في العين ابدا ما بيكون حلو الا للستات علشان جمال وجاذبية الستات بالعيون
اما العرسان الجداد معتقدش ان اي راجل عريس جديد والا قديم يرضى مراته تصحيه من النوم علشان يحرسها بالحمام
الا اذا كان اصلا شخصيه لسه ما سمعناش عنها بس لو كده برضه هو بيكون اجبن منها وعاوزين حد يحرسهم يبقوا ينادوا على الجيران لما يفكروا يدخلوا الحمام
ده بوست مهضوم وحلو
ربنا يسعدك
ودمتي

Yasmine said...

انا متابعة مدونتك من زمان اوى على فكرة..من ستعة ما علقتى عندى اول مرة..و بتفق معاكى فى كتير من كلامك و بتعجبنى دماغك جدا

بالنسبة للموضوع فانا هبتدى بالرجالة اللى بيحطوا ميك اب..و يا ريتها جت على المكياج ده في رجالة بيمشوا ببنطلونات عليها ضيقة و باديهات بترتر فضى..الحمد لله انى خلصت كلية و بشتغل و لحد دلوقتى ما عملوش بدل بترتر لسه :)

المكان الهادى ده مش موجود غير فى القرى اللى حوالين القاهرة و مع انى هعزل فى خلال سنتين تلاتة لواحدة من الاماكن دى الا انى مرتبطة جدا بزحمة و دوشة العاصمة..تقريبا من كتر ما اتعودت على الدوشة بقيت بستغرب الهدوء

عاجبنى اوى الزوج الهادى ده..عارف انه لما يعملها الحاجة الصغيرة دى هتفرق معاها هى كتير و هتقدر ده اكتر مما هو يتخيل..قد ايه فى حاجات صغيرة ممكن توصل علاقة بين اتنين للسما او تنزلها تحت الارض..بس مين يفهم؟!

soly88 said...

بيعجبنى الكوبليه اللى بيقول فيه
شكله عامل عمله حكاياته مش كامله
بس انت مش سهل يضحك عليكى
----
ايه رأيك فى المقطم
-----
من حق العروسه تدلع
يا أما يجيب ال.... بتاعة البيبى ويحطها فى اودة النوم
-----
اللى منتشر قوى بين الرجاله موضوع صبغ الشعر
موضوع الكحل ده يشعرنى ان الراجل ده عايق
وجايز البعض بيعمل كده تشبها بالممثلين العواجيز اللى بيطلعوا طلبة جامعه
----
البنات عموما بتحب تبقى مرغوبه
فلو ده مبيحصلش فى الحقيقه لامانع ان يتم تخيله
والرجاله برده كده
----
واخيرا اشكرك جدا على اقتراحك بعمل مدونه مخصوص لليوميات اللى لقيتها
وفعلا عملت مدونه اسمها
(يوميات رجل يعتقد انه مات )
بس لسه بوضب الأجندات بالتسلسل لن كان فيها ورق سايب كتير

الرابطة وبناء الأمة said...

السلام عليكم ورحمة الله وبركاته
نتقدم بدعوي لك أخي ( أختي ) المدون بمناقشة
محاكمة عادلة
مبارك بين التأييد والرفض
ملف يناقش ويحلل ويضع الحلول
رائيك يهمنا جدا
مع خالص تحياتنا الكتيبة السياسية

أسما عواد said...

نفس الموضوع لفت انتباهي الماكياج اللي بيتعمل للعريس وبقيت مستغربة جدا
تعرفي في الوقت اللي البنات بيتجهوا فيه لترك الميك اب الرجالة بتتعلق بيه
محش عارف الزمن اللي جاي فيه ايه؟

Empress appy said...

هرد حته حته
وعلى فاكره انا بتابعك بس فيه حاجات مبعرفش اعلق فيها دي حقيقه يعنى لازم اعترف بيها
اولا المكان اللى انتى عاوزه فى القاهره هتلاقى القاهره الجديه فيها المواصفات دي ابقى اعملى زياره ليها هتعجبك لانى فهمتك شويه نونو من شخصيتك
موضوع الراجل اللى بيروح مع مراته بجد مبسوطه ان فيه ناس كده بس يا ريت يستمروا بجد على ده
لان ده ود حلو اوي وممكن تكون خايفه من المكان مش دلع انا كنت كبيره وبخاف اروح التواليت ساعات لوحدي وانادي على ماما تقف ليه وبخاف من الضلمه دلوقتى بضايق من النور
موضوع الحكل هو برضه سنه ده اللى اعرفه وفيه ناس بتليق عليهم وفيه ناس من عند ربنا عنيه كده
وفيه ناس بتبقى حلوه وناس وحشه
موضوع المعجبيبن يمكن الواحده بتحكي موقف سلبى او ايجايى ده بيتوقف على درجه استيعاب اللى بيقرا
عموما فى النهايه مواضيعك بحبها فعلا مش مجامله

Desert cat said...

انا شايفه ان موضوع العريس يحط مكياج دى اقتباسا من النجم العظيم هانى سلامة اللى مش شوفت ليه ولا دور من غير مكياج
بالنسبة للزوج اللى بيقف قدام التواليت لحد ما زوجته تخلص فده ربنا يخليه ليها اصلى اعتقد انه بيعاملها على اساس انها بنته مش زوجته
البنات اللى بيحكو ان الرجالة بيرموا تحت رجليهم فغالبا بيكون عندهم نقطة نقص بيحاولوا يعوضوها بالكلام وخلاص
واعتقد اللى انتى حكيتيه من خلال متابعتى لكل تدويناتك كان عبارة عن مواقف شخصية مش خيال خصب
:))
تحياتى ليكى

Unknown said...

أكتر شي عجبني رد أختك؛ جد حسيته مفحم:)

بالنسبه للعريس "الطقع هاد" مش عارفه بصراحه شو بدي أعلق؛ بس أظن انو انطباعي الأول انو "مالها هاي"؟ العروس مش العريس طبعا

وعن الميك اب انا بعرف الشباب بتزبط حواجبها مثلا؛ اما اول مره اشوف فيها شب حاطط ميك اب كان في الجامعه بعدين حكولنا انو هاد حاطط "كريم أساس" لأنو من عبدة الشياطين فلازم يكون هيك!!!

أما عن الشعور فمش عارفه؛ مرات بيوصل وبنطنش ومرات ما بنكونش فاهمين الشعور صح

بصراحه مجتمعنا ما بيعلمكيش تفصلي الإعجاب عن الحب عن الصداقه؛ فبحس مسألة التمييز شوي "ملتبسه"

وأما عنك فحستغربي لو حكيت لك إنو "جزئيا" أنا بحس إنك هيك فعلا!!! ما بعرف بس هاد شعور أولي بيجيني مرّات وبتمنى ما تزعلي مني؛ أنا بحكيش عن كونك بتقصدي تعملي هيك؛ أنا بحكي عن خلاصة الموقف بنظري بس مش أكتر؛ بس كا فيش ابدا خلاف على انو عندك حيادية بعتبرها ممتازه مع سعة أفق رائعة

تحياتي

Unknown said...

روزا

بالنسبه لآخر نقطه
أنا بفهم الموضوع هيك لأنك بتحكي معظم الوقت عن أشخاص كان في من طرفهم إعجاب فيكي بس ما عمري صادفت بوست بيحكي عن العكس

بتمنى تكوني فهمتي علي:)

Migo Mishmish said...

روز
موضوع البى بى دا شيئ غريب اوى ..انا لو مشمش صحتنى بالليل وانا عندى مدرسه الصبح وقالتلى استنانى على باب الحمام عشان بخاف ..طبعا هاروح معاها .واول ماتطلع اعملها عفريت واخضها واخلي شعرها يشيب من الرعب ..
اما موضوع الماكياج بتاع الرجاله دا مش هاقول غير اللى اختشو ماتو
ميجووووووو

emad.algendy said...

اول تعليق لنور في مدونة روز كان عن "كاف"
كان تعليقا فظا بعض الشيء

لكن اعجبني الاسلوب والصياغة وضاقني ان تكون عن "كاف"


الان اصبحت املك صديق نسخة طبق الاصل من "كاف"لكنه للاسف "نون"
قدرت الان كل هذا الغضب
ربما اكتب عنه تدوينة انا الاخر

************
اختي في يوم فرحها انهت كوافيرها في تمام 8 مساء
لكن عريسها لم ينهي كوافيره قبل العاشرة والنصف
يعني حتى اختي هي اللي استنته ساعتين ونص لحد ما يخلص كوافيره
طبعا وصلنا القاعة الواحدة صباحا
المعازيم كانوا ناموا وفي ناس روحوا
اكيد والدي قام بالواجب طول الطريق مع جوز اختي
طول الطريق كلاااااااااام جمييييييييل عن الرجووووووووووولة
طبعا والدي قاله ان كل اللي عمله يوم فرحه انه جاب شعره بمشط على "جنب" وراح فرحه....

***************

اتقبل رؤية خليجي مكحل لكني لا اقبهل من مصري او شامي؟؟؟لماذا لا اعلم
معك انها تزيد الرجل وسامة احيانا
******************

تحياتي

Anonymous said...

ليس هناك شئ غريب فى هذه الدنيا

المهم هو كيف ننظر اليه .. من الممكن ان يكون الماكياج جميل .. اذكر شخصيا فى صورة زفافنا عند جارو بقصر النيل .. وقد كانت أبيض واسود انه قال لى

كن طبيعيا فقط وانظر الى زوجتك فى حنان .. لو دقنك طويلة هاحلقها لك .. لو الجاكيت مش مكوى هاكويهولك

لكن كانت هذه الصورة الباقية وليست الحقيقة .. الآن .. ولما لا؟

انت صح يا روز .. اقل لفتة .. تحكى شيئا .. لكن الناس تحب ان تسمعها .. حتى تتأكد .. مع انهم متأكدين

مثلية فقط said...

مرحبا روز

رغي هيدي كلمة مصرية ؟


ما بعرف شو قصة كاف بس في كل الحالات اذا بعدك عم تطرحي اسألة معناه انك مو مرتاحة من ناحيتا

تخيلي ان يكون نصف الأزواج العرب من هذا النوع ... ؟؟؟

ماكياج و اكسسوارات و عناية بالبشرة ... عادي

بتمنى تلاقي مكان ترتاحي فيه


تحياتي
دمت بخير

Anonymous said...

روز
اسف على المداخلة فى غير مكانها
ب نصيحة لوجه الله الكريم
لو لسه بيت العائلة لم يباع
هناك عروض افضل من البيع من الممكن من خلالها اعادة لم الشمل فى نفس المكان والاحتفاظ بالذكريات المحيطة بالمكان وايضا الربح الجيد
وهى المشاركة مع شركة او مقاول بنسبة من المبنى نفسه او عدد ادواره بعد تمام بنائه
كنسبة النصف من عدد الوحدات وهذا النظام معمول به فى القاهرة وهو اربح وافضل من البيع بالنسبة لملاك الارض
ومن السهولة الحصول على العديد من العروض وايضا املاء شروطكم على المقاولين من حصص فى الكراج او الادوار المفضلة بالنسبة لكم وخلافه

منذر

رابطة هويتي اسلامية said...

الحجاب حقيقة ثابتة أم مجال للتفكير

من باب تناول جميع الأراء وفتح باب النقاش كان لابد أن نتبني في رابطتنا هذا النقاش الذي سوف يجعل من النقاش مرجع للجميع للوصول إلي الحقيقة التي يعرفها البعض وتخفي علي البعض ويحاول البعض تجنبها.
ومن هنا تبنت الرابطة أن تكون هي حجة علي من يدور بينهم النقاش علي صفحاتها.
نفجر الجديد دائما حوارنا اليوم
الحجاب حقيقة ثابتة أم مجال للتفكير
وفيها ننقاش بعض المدونات التي أعلنتها صراحة رفضها للحجاب وحوارنا اليوم موجه إلي مدونة " مذكرات ثائرة ".
ندعوكم للمشاركة في هذا الحوار المفيد
تقبلوا دعوتنا ننتظركم لنستفاد منكم
رابطة هويتي إسلامية

الرابطة وبناء الأمة said...

السلام عليكم ورحمة الله وبركاته
دعوة
أخي يا من رفضت سياسة مبارك عليك أن تكمل معنا الطريق حتي لا تكون دعواك دعوة إفتراء دون إثبات
دعوي مرفوعة ضد مبارك بنص ".........................."
أول جلسة
نتمني منك أخي المدون الحضور للجلسة
مع تحياتنا لك بالتوفيق
الكتيبة السياسية

مثليه said...

العزيزة روز

كل عيد حب و انت بألف خير وسعاده

Anonymous said...

تعجبني جدا طريقة حكييك(سردك) للاشياء التي تحدث معك .. وتفكيرك بصوت عالي

كوني بكل الخير

blackcairorose said...

واحدة فى الحياة
كلماتك دائما لطيفة وبجد بحسها مش مطلية زي كلام كتير بنسمعه الأيام دي، وشكرا على الثقة فى أني شخصية متزنة، وياريت تكون حقيقة

زمان الوصل
معاكي المكياج صعب، بس الغريبة اني اللي شمفتهم متكحلين متضايقتش من منظرهم، معرفش ايه التناقض ده!

فنون
الجوز طبعا ظريف جدا عشان كده كنت انا واختي مستغربين
ومرسي اني مسبتش عندك الانطباع اللي كنت خايفه اني ممكن اسيبه!

السيد الرئيس
شكرا على الاطراء، وبالنسبة لمكياج الرجالة من الفنانين فهو من زمان وبيقولوا انه ضروري للكاميرا
بص المهاود اكيد هيعجب وينسجم نوع معين من الستات والمناكف برضه له معجبينه والنص نص له اللي زيه، المشكلة كلها لما الواحدة او الواحد بيقع مع الشخص اللي مش النوعية اللي تعرف تتكامل معاه....متهيألي

مثلية تبحث
أنا نسيت كل اللي انتي كتبتيه ومستنية حكاية الراجل اللي مكحل عينه دي، معرفش ليه حاسه انها قصة مسلية!! صح؟
شكرا على التهنئة وكل عيد حب واحنا فى أحسن حالات الحب سواء مع نفسنا او مع الآخرين
استنيني جايالك حالا!

بسطاويسي
شرفت واهلا بيك فى المدونة

سما
بموضوعية انا متهيألي ان الاحتمال الوحيد ان كاف دي محبتنيش هو زي ما انتي قولتي برضه اني اكون مش النوع الفريندلي قوي مع الناس فى الاول، فده اداها دافع تبقى غلسه، ولو أنه مش تصرف صح، لان الواحد مش مفروض ياخد الناس بالاحضان من اول ما يعرفهم او يبقى بسيط زيادة، يعني كل حاجة بالتعارف والوقت بياخد مجراه الصحيح، معاكي حق
لا هي كانت سخيفة معايا انا بس مش مع كل الناس

حلوة حكاية شد السيفون دي مش المهم مش علايكي زي ما اختي متخيلة ان جوزها ممكن يعمل فيها

موضوع اللبس فى فهم المشاعر ده ممكن بس بالنسبة لي بشوفه صعب، خصوصا لان الراسيل اللي ممكن نبعتها للآخرين بتدرج فى مدلولها، يعني نظرة غير كلمة غير تصرف غير وغير وغير، مش ممكن بقى يبقى فيه سوؤ فهم بعد كده، ده الا لو معندوش فهم اصلا، وده يبقى موضوع تاني!!!

اوفورتي
أكيد طبعا، تديله السندويتشات وزمزمية الميه وتعدله الشورت وتسرح له شعره، ولو حد من زملائه ضايقه تكلم مرات الزميل ده وتحاول تحل المشكلة لول

ريم
بالنسبة للزوج
زي ما واحدة فى الحياة قالت فى الزمن ده بنسمع علاقات زوجية بها مظاهر لم تكن موجودة من قبل او على الاقل لم نسمع بها من قبل، واعتقد الحالة المذكورة هي من ضمن الحالات اللي مكناش هنسمع بيها من عشرين او تلاتين سنة فاتوا
أطيب تحياتي ودائما تشرفي

أنا حرة
حلوة الباديهات بترتر دي، انا مبلبسهاش عشان احيانا بشوفها اوفر بس لو الرجالة بيلبسوها دلوقتي ابقى محتاجة اعادة نظر فى قراري لول

سولي
المقطم كنت بحبها جدا زمان وانا صغيرة يعني من اكتر من عشرين سنه، كانت هادية ولينا اصحاب ساكنين فيها كان اقرب بيت ليهم على اليمين او الشمال على بعد خمسين متر مثلا، وفاكرة كانت فيه كنيسة قدامهم عليها تمثال العذراء، بس رحتها من كام سنة ولقيت التغير مهول

أسما عواد
الحاجات دي كلها دورات، اللي بيعمل حاجة بيسبها وحد تاني بيبتدي يعملها ويرجع الاول بعد كده يعملها تاني، زي الموضة بالضبط

آبي
مرسي عل كلامك، وانا برضه فعلا احيانا كتيره بقرا مدونات وتابعها بانتظام من غير معلق، ساعات مبلاقيش حاجة اقولها، وساعات تانية ببقى مش موافقة على مضمون التدوينة ولكن مفيش حيل ولا دماغ اني ارتب افكاري واعلق اقول انا بعارض ليه، وساعات مجرد كسل، وساعات بجد التدوينة بتبقى حلوة وواضحة ومش محتاجة تعليق لا مجرد قرائتها متعة فى حد ذاتها
وشكرا على المرور يا عزيزتي

قطة الصحراء
تصدقي مخدتش بالي ان هاني سلامة بيحط مكياج!! رغم اني بشوفه وسيم جدا فى رأيي، وعلى فكرة تدليع الزوجة زى تدليع البنت برضه مش وحش ولا رأيك ايه؟

مياسي
حبيبة قلبي شكرا انك قلتيها بصراحة وطبعا مفيش اي زعل، لأني زي ما قلت انا كنت خايفه انه يتاخد عني هذا الانطباع الخاطىء، كلنا بنحب ونتحب وكتير مننا بنحب من غير ما نتحب او العكس، بس فعلا لو كتبنا عن جانب واحد يمكن الآخرين يفتكروه الجانب الوحيد فى حياتنا

ميجو مشمش
اهلا بيك للمرة الاولى وشرفت وانا دايما من متابعين مدونتك وخفة الدم الواضحة جدا جدا عندك وعند المدام

نور
خلتني ارجع لتعليقك السابق وابدا لم يكن فظا، وفي انتظار مدونتك عن نون

شريف
تعليقك جرني لموضوع لسه بقول اني هكتب عنه، وفعلا عملت الدرافت عنه من كام يوم بس عايزه لما افضى اراجعه وموضوعه نتكلم ولا منتكلمش، وقد ايه الكلام بيكون مهم او مش مهم، لما انزله هيهمني اكيد اعرف رأيك

مثلية فقط
نعم رغي بمعني حكي، وهي عامية مصرية
شكرا لمرورك وتعليقك
وانا كالعادة من قراءك الدائمين حتى لو بدوت غير مرئية!

منذر
نعم يا عزيزي أعرف وحاولنا الاتفاق مع إحدى الشركات من قبل وتوصلنا لشبه اتفاق ولكن ما تم حتى الان الاخلاء وترخيص الهدم الذي سيتم قريبا جدا، ولكن حتى لو بنينا مبنى جديد لن تكون له علاقة بالبيت السابق الا فى الموقع فقط، اما المبنى القديم فهو ما كان يحمل فيه رائحة الذكريات
شكرا

أبنوسة
شكرا على كلماتك واعذريني لتغيبي عن مدونتك فقد وصلت أمس مساءا فقط من سفر قصير
ومودتي