رغي

فاكرين كاف؟
لسه معايا اكتر من ممتازة، وانا برضه معاها كويسه فى المقابل، بس دايما أغنية ايهاب توفيق قلبي مش مرتاحله بترن بصوت واطي فى راسي كل ما اشوفها
ــــــــ

كنت بكلم أختي فى التليفون وبقولها اني عايزه آخد شقة فى القاهرة فسألتني لو فيه منطقة مفضلة عندي، فقلت أى مكان المهم يكون نظيف وهادي وفيه خضرة، أختي ردت على طول:
ـ أقرب مكان عندك بالمواصفات دى في أوروبا
ــــــــــ

فى نفس المكالمة اختي كانت بتحكيلي عن واحده نعرفها لسه متجوزه جديد خالص، البنت دى علشان لسه مش واخده على البيت الجديد وهى من النوع الدلوع اللي بيخاف، فلما بتقوم تعمل بي بي فى عز الليل بتصحي جوزها من النوم يقوم معاها علشان خايفة ويستناها على باب الحمام لحد ما تخلص
أنا وأختي طبعا كنا مستغربين من الجوز المهاود ده، وأختي علقت
ـ تخيلي مثلا أنا لو صحيت جوزي بالليل وقلت له يستناني على باب الحمام لحد ما خلص علشان خايفه أروح لوحدي، متهيألي أقل حاجة ممكن يعملها أنه يشلني ويحطني أنا شخصيا فى التواليت ويشد عليه السيفون
ــــــــ

أيه حكاية العرسان الرجالة في مصر اللي بيعملوا ماكياج ليلة فرحهم؟
أول مرة شفتها من أكتر من سنة فى صور الفرح وسألت: هو العريس عامل ماكياج؟ قالولي آه لأن الكوافير بتاعه قاله ان عينيه مرهقة وهيبان وحش فى الصور فحطله كونسيلر وبودرة وقاله أنه مش هيبان انه عامل ماكياج، وطبعا في الصور كانوا باينين، وقلت ساعتها غريبة

وبعدين لسه شايفه صور فرح تاني فى مصر اليومين اللي فاتوا وبرضه العريس شكله باين انه حاطط بودرة
هو ده ايه؟ تقليعه؟ ولا دي صدفه بحته واستثناء؟
ـــــــــ

على سيرة الرجالة والماكياج
أول مرة في حياتي شفت فيها راجل عربي مكحل عينه كان واحد مرتدي الزي الاسلامي ودقنه طويلة ومش مهذبة ، يعني العلامات بتاعة الاصوليين، واستغربت جدا، وبعد ما سألت حد قالي أن تكحيل العين سنة نبوية، بس يمكن تستغربوا لما أقول أن الراجل كان أصلا وسيم جدا (أعتقد أصله جزائري وله قصة صغيرة معايا ولكن خليني احكيها في وقت تاني) وتكحيل العين اداله شكل غريب شوية بس مش وحش
دلوقتي هنا فى الخليج برضه تكحيل العين للرجالة بشوفه أحيانا وبرضه بيديني نفس الانطباع أنه حلو لما الراجل بيبقى شكله أصلا حلو!

عارفة..رأي يمكن البعض يستغربله
ــــــــــ

كنت بتكلم مع صديقة ومدونة عزيزة وجت سيرة البنات اللي بتقعد تكتب فى بلوجاتها على حجم المعجبين بيهم وازاي انهم ـ البنات ـ مش سألين فى الشباب ده الخ، بصراحة ساعتها خفت ليكون ده انطباع اللي بيقروا مدونتي لأني يمكن كتبت مرة أو مرتين عن معجبين وقلت لحسن الناس تفتكر اني عايزة أصور نفسي على أني زي ما بيقولوا بالفرنساوي
Femme fatale
واللي هي الرجالة بيترموا تحت رجليها وهي مش سألة، وطبعا دي مش أنا بالتأكيد، على العكس فيه مرتين كان شعوري تجاه ناس اقوى ومختلف عن شعورهم تجاهي، أنا مش فى موود دلوقتي احكي عن المرتين دول بالتفصيل بس فى مرة منهم كنت حاسة باعجاب تجاه شخص ومتهيألي ـ أو متأكده ـ انه فهم شعوري بس كان واضح أنه مش بيبادلني نفس الشعور
وهنا بالمناسبة بستغرب قوي من اللي بيقولوا ساعات انهم بيحبوا بس الطرف التاني مش داري بحبهم، متهيألى وقت لما بنحب أو حتى لو فيه بوادر حب أقل حاجة ممكن تعكس مشاعرنا حتى لو بنحاول نخبيها، ومش شرط الانعكاس ده يكون بالتصريح او بكلام كبير، لأ، أقل لفتة الشخص اللي قدامي لو زكي ممكن يفهم معناها أيه.
يعني دي بس حاجة صغيرة بس حبيت أوضحها
.

.