Wednesday, October 29, 2008

زعلانه

حصلت حاجة من شوية مضايقانى قوى

من سنة كده قابلت واحدة مصرية مرتين تلاته فى مناسبات مختلفة، انطباعي عنها كان عادى بس فيها حاجة لاسعة شوية، مقدرش أحدد أيه، بس فيه حاجة مش مضبوطة أو متوازنة قوى فى طريقتها فى الكلام والتصرفات، حركات صغيرة كده

فيه اتنين تانيين أعرفهم شافوها برضه قالوا نفس الانطباع، كانوا بيقعدوا يتريقوا بعد ما تمشى وواحدة منهم كانت بتقلدها، انا والله مكنتش بتريق ولا باقلد، لأنى مبحبش أساسا نظام السخرية، ببساطة لان كل واحدة وواحد ممكن يبقى فيهم حاجة الناس التانية تتريق عليها او تسخر منها، لكن بصراحة برضه كنت بضحك لأن واحدة من الاتنين دول دمها خفيف وكانت بتقعد تقول تعليقات مضحكة جدا

الموضوع ده فات عليه سنه، والست دى رجعت مصر نهائى، ومعتقدش ان الظروف هتجمعنا تانى

المهم من شوية كنت بتكلم مع واحد الظاهر انه يعرف الست دى عائليا فحكالى عنها انها مرت من فترة طويلة بحادث مأساوى بشع يمس أقرب الناس ليها وكانت هى السبب فيه ولكن بدون قصد، نظرا لغرابة وبشاعة الحادث مهقدرش ادخل فيه ولا اكتب عنه لانه يمكن فيه ناس ممكن يفتكروه ويعرفوا الشخصية

بس أنا من ساعت ما سمعت القصة دى بجد وانا حاسة بتأنيب ضمير قوى، انا مكنتش سخيفة ولا حاجة مع الست، ولا كنت ظريفة برضه، كنت عادية، ولكن لما بفكر فى حالتها بقول لنفسى يا خرابى وانا كنت بقول فيها حاجة غريبة وبضحك على تريقة البنات، والله لو حصل لى نص الحادث اللى حصل لها كان زمانى فى مستشفى الامراض العقلية
كان نفسى لو كنت اظرف والطف معاها لما اتقابلنا، لو كنت مجاملة أكتر، ومتعاطفة أكتر حتى من غير معرف ظروفها

يعنى الواحد يقعد ينتقد فى المظهر وفى الطريقة من غير ما يقدر ظروف الناس ويمكن تكون فيه اسباب ورا مظهرهم او طريقتهم اللى مش عاجبانا

بجد مضايقة قوى من نفسى، بقول لو حصل وقابلتها فى يوم ـ لو ـ لازم اتعامل معاها بشكل تانى
أنا متأكده انها مش زعلانة منى فى حاجة لأنى معملتش حاجة تزعلها، بس انا اللى زعلانة من نفسى

50 comments:

Anonymous said...

جميل حسك المرهف وهذا ليس غريبا على طباعك

انت حساسة جدا وبتاخدى بالك من كل حاجة .. كلنا بنمر كتير بمواقف زى دى

لكنى ضد جلد الذات بأى شكل .. وافكر اعمل ايه بشكل عملى

لماذا لاتبحثى عنها وتطمئنى عليها ولو هاتفيا

فى هذا مشاركة .. وربما اعتذار عملى لما لايجعلنا ننام احيانا .. ضميرنا

هونى على نفسك

Unknown said...

فعلا شيء مؤسف
ولو كنت محلك كنت أكلت حالي ندم أنا كمان؛ وهي واحده من عاداتي السيئه اللي حابه أتخلص منها و مش عارفه كيف!!

على كل هذا أكبر دليل على أنك إنسانه حساسه ومشاعرك رقيقه؛ وبالنسبه للست الله يعينها و يصبرها؛ ما هو اللي بيوقع بين ايدي الناس مشكله كبيره و ما حدش بيرحم و لا بيعذر

ما تزعليش حالك كتير؛انتي ما كنتي بتعرفي و كمان ما اتريقتيش عليها؛ بس حكيتي رأيك فيها بس:)

someone in life said...

بلاك كايرو روز

موقف مؤثر فعلا ساعات المظاهر بتعمي عيونا عن الجوهر ممكنتكون انسانه طيبه جدا و ممكن تكون وحيدة جدا بداخلها و التجربه القاسية بتترك اثر شديد في النفس بتكون النتيجة اثار او حركات او علامات نفسية او جسديه
اتذكر امرأة عجوز في نهايه شارعنا كانت تحدف الرجال بالطوب من البلكونه في بعض الاحيان ثم تبكي بكاءا مرا الاطفال و المارة كانوا يتضاحكون عليها و يثيروها اكثر كانت أمي تشفق عليها و تقول كانت من اجمل و اشيك النساء في الحي لولا صدمه نفسيه بعد موت زوجها و اكتشاف خياناته لها و بقاؤها وحيدة في المنزل خاصة انه حرمها من الانجاب حتي لايفسد جسدها منتهي الانانية
انت لم تذنبي في حق هذه المرأة ولعلك يوما تقابليها و تحسني لها و ان لم تفعلي رددي في سرك دعاء بالرحمه لها من البشر
كتيرون من ينظرون للمظهر دون الجوهر

تحياتي

انا حره said...

معلش ياستى حصل خير انتى مكونتيش تعرفى

بس هوا مش عذر لان المفروض منسخرش من حد اصلا مهما كان لان ربنا اوصانا بكدا

بس مين بيطبق بقى

هونى على نفسك واستغفرى ربنا وخلاص

مثليه said...

من حقك تضايقي من الموضوع وضميرك يأنبك عشان انتي رقيقه و عندك احساس عالي فيه ناس بقى لو قولتيلهم كده يعملولك فيلم و قصه انك حساسه والموضوع مش مستاهل والكلام ده
كأن الانسانيه والاحساس انتهو منهم
متزعليش يا قمر و مين عارف يمكن تجمعك الظروف تاني و ترجعي تحسني الوضع و ضميرك يرتاح الدنيا صغيره جدا متتصوريش قد ايه

روابط said...

روز
رغم ان البكاء على اللبن المسكوب لا يعيده.. ولكنه يجعلنا أكثر حرصا فى المرات القادمة, وأعتقد انك لمستى هذا بنفسك.. تحياتى للحس المرهف والضمير الواعى

Unknown said...

ايه النشاط المفاجيء في الكتابه ده تتحسدي

زمان الوصل said...

معاكى حق ..
على فكره الإحساس ده مؤلم جدّا
:(

أمّا بيحصل معايا موقف مماثل مش بالاقى غير إنّى أدعى ربنا بإخلاص يصلح أحوال من أشعر أنّى أذنبت فى حقوقهم

مش دروشه ولا حاجه بس باحس إن لو ده إتعمل بإخلاص هاكون عملت اللىّ أقدر عليه حيال هذا الموقف .. ده غير الخبره الحياتيه اللىّ باحاول أخلّيها تكون مفيده فى تجارب لاحقه إن حدثت

karakib said...

ما نقدرش نلوم نفسنا علي اللي فات
بس اللي جاي اكيد هيكون احسن

shalimar said...

عن جد شي بيخلي الواحد يوقف مع نفسو شوي ويفكر ...انو مو لازم يتريئ على حدا وما يستسخف اي شي بيشوفو ..
احساسك هيدا طبيعي لانك انسانة عندك شفافية وطيبة .. وتأكدي انو احساسك بالذنب رح يخف مع الوقت ويختفي تماما وبتبقى ذكراه .. وأدينا بنتعلم .. وصدقيني ربنا بيسمح بالتجارب للانسان بس هو بيبعت معها الصبر والعزاء .. وأكيد هالسيدة الغريبة التصرفات..ربنا مصبرها

تحياتي

Anonymous said...

بصراحة ليكي حق تزعلي من نفسك
بس عموما كويس انك بتعرفي تعاتبي نفسك
خلى ده يبقى درس ليكي ماتركزيش على المظاهر بعد كده.

emad.algendy said...

جميل احساسك
جميعنا يمر بمواقف مشابهة
لكن انى للبشر ان يعلموا
اتمنى ان يكون خوفك في نطاق العتاب فقط
لا ان يصل لهم او حزن عليها او على ما فعلت
اعتقد ان حسن النية والتدوينة تدل على صدق في التانيب
اتمنى ان تتجاوزيه
تحياتي

Samraa said...

Dear BCR
all i can say is 2 things:
1st shake off the feeling of guilt
2nd its from the human nature to take impressions,untill we get closer to that person....
and know them for real.
be well.

سمـــــــــا said...

على فكرة انا اول تعليق فى البوست دا :(

بس علشان النت فى مصر يجننننننننن بعد لما كتبت التعليق النت فصل ومن ساعتها خربان بس الحمد لله ربنا كرمنى وجِه


بصى يا قمر

فيه مقولة بتقول

Tommorow May be so late

او فيما معناه لا يفيد البكاء على اللبن المسكوب

يعنى كلنا بنقع فى حالات زي دى اننا نسخر حتى ولو داخليا من موقف او حد بيعمل حاجة غريبة علينا وبعدين نكتشف ان فيه بعد تانى ورا التصرفات دى فنحس بالندم والخجل من نفسنا

بس الندم او الخجل من نفسنا مش هيبقى له لازمة لان اللى حصل حصل


هقولك حاجة غريبة فيا

انا لما اكون فى جروب او اتعرف على حد واحس ان فيه حاجة مش طبيعية او وراه سر او حزن او فيه حاجة فى حياته وصلته لحالة معينة عجيبة

الشخصية دى هتلاقينى انا اللى بقرب لها وبحاول نبقى اصدقاء واعرف ايه المشكلة وببقى مبسوطة اوى لو انا بقيت مصدر سعادة او أمل للشخصية دى او حتى قدرت اساعد الشخصية دى فى قرار معين او اكون حتى مجرد سند لو احتاجتنى

حتى فى الاطفال يعنى لو طفل حلو وامور اكيد هيلفت نظرى لكن لو طفل مش حلو او معاق هتلاقيه لفت نظرى واهتميت بيه اكتر من الطبيعى

فيمكن لو كنت مكانك كان هيبقى تصرفى عكسك ، يعنى لو مناسبة وشفت ان فيه حد تصرفاته هسهس كده اكيد هحاول اقرب منها واتعرف عليها واعرف ايه مشكلتها

بس انتى شخصية حذرة زيادة عن اللزوم فى علاقاتك وفى حياتك عموما ودا مع اعتزازى واحترامى الشديد ليكى انا بعتبره عيب

مش كل حاجة بتتحسب بالعقل يا روزة :)

____________________________

على فكرة موضوع حسن عابدين فطسنى من الضحك وكانت اول ضحكة اضحكها طول اليوم لان مودى زي ما انتى شايفة :))
بس بجد تخيلت المنظر فوقعت على روحى من الضحك لدرجة ان واحد زميلى دخل عليا المكتب بيقولى فيه ايه قلت له وانت مالك اقفل الباب :))

طبعا شكلى كان مريب لانى حتى مش ماسكة تليفون فاكيد الراجل مستغرب بتضحك على ايه المجنونة دى :)

بجد انتى سكر

يالا بقى متزعليش نفسك يا قمر بس زي ما قلت لك سيبى نفسك على سجيتها شوية وادى راحة لمخك ومتفكريش فى كل حاجة كتير لدرجة انك ممكن تبوظى او تفقدى حاجات ممكن تكون حلوة

سلام يا قمرة

Anonymous said...

rose ya 2amar:
ma3lesh ana ba2aly kam youm keda mesh geet el blog hena o 7ata mesh 3ala2t 3ala el post elly fat ma3a eny kan f baly 2a3ala2 walahy o ba3d keda geet el naharda la2eet 7adretec menazela post geded kolo za3al,eskooooty !!! mesh ana sebt ca o ro7t ny,o tel3et so dirty and crowded with a lot of ppl ands expensive and i am realy afraid that i took the wrong desecion about leaving ca
about ur post ba2a
dont be that tought with urself,i judge myself too all the time but i do that to fix what i renue so to u what u should do is to call her wherever she is and try to befriend with her and take care of her as she is ur sister or something,but to blame urself only without taking any steps
rose gotta go now 2 go out for the haloween with my friends so will come again
salam ya amar
walahy i like u so much u are such an angel and a sensitive girl

soly88 said...

العزيزه بلاك روز
(لاتسألوا الناس ولكن اسألوا الظروف)
تلك كانت مقدمه لاحدى روايات احسان عبد القدوس اعتقد انها تنطبق على تلك الانسانه

جسور سرية said...

العزيزة بلاك روز
واضح جدا انك انسانة رقيقة و حساسة و ده شئ جميل و نادر في هذه الايام
احيكي علي مشاعرك اللطيفة في الاهتمام بالاخرين و مشاعرهم
اقدر تماما شعورك الان بس للاسف مش في ايدك حاجة تعمليها للست دي تحديدا بس ممكن تتفادي انك تعملي كده في المستقبل مع ناس تانين

blackcairorose said...

شريف

شكرا على كلامك، وفكرة حلوة انى اتصل بيها ولو انها اكيد هتكون مستغربة جدا من اتصالى

blackcairorose said...

مياسى

شكرا عزيزتى، والله يعينها ويقويها هذا ما اقوله دائما حين اتذكرها

blackcairorose said...

Someone in life

تعليقك يصلح لتدوينة لوحدها

وفعلا غريبة قصة جارتكم هذه ولكنى اتخيل الصورة جدا

وبالنسبة لموضوع الجيران الذين لهم سمات او حياة غريبة

نحن ايضا كان لنا جار فى الشارع عجوز ويقيم بمفرده كما كان مصابا بالشلل فى إحدى رجليه، لم يكن تزوره سوى شقيقة له من وقت لآخر، ولكن اخواتى الكبار وماما كانوا يحكون عنه انه كان وسيما جدا فى صغره وانه ليس بالكبر الذى يبدو عليه، وكان غنى جدا وله خطيبة فى منتهى الجمال، وكان مشهور فى الشارع بالسهرات التى كان يقيمها فى منزله (فى فترة نهاية الستينات واوائل السبعينات ) وانه فى خلال عامين تغير حاله بشكل مريب دون ان يعرف احد السبب، فجأة توقفت الحفلات ولم تعد خطيبته تزوره ويبدو انه اصبح اقل غنى واصيب لاحقا بالشلل، ولا احد عرف ابدا السبب او حقيقة الامر وبمرور الوقت لم يعد حتى يخرج من منزله

فعلا ناس تحيا بشكل وماضيها كان مختلف تماما

blackcairorose said...

انا حرة

شكرا ، وفعلا انا لا احب السخرية ابدا، ولكن كل ما كنت افعله هو الضحك على طريقة إحدى البنات فى التقليد دون ان اشارك قولا او فعلا فى التقليد او السخرية، ولكن هذا لا يمنع انى اشعر بالخطأ من مجرد الضحك

وأطيب تحية

blackcairorose said...

مثلية

الناس اللى بتعمل قصة وفيلم فعلا عندك حق

كنت فى اول شغل فيه واحدة كانت بتتريق عليه ومسميانى "ماما عطوفة" لما تلاقينى بقول لا حرام على حد معين او صعبان عليه حد معين فى موقف ما

تصدقى الانسانة دى ـ اللى كانت معايا فى الشغل ـ لما بفتكرها دلوقتى بقول انها مكنتش وحشة بس كان عندها نقص شنيع فى الاحساس بالتعاطف مع الاخرين

معرفش ليه كتير او اغلب الناس اللى صادفتهم وكان عندهم شخصية قوية جدا لم تكن من صفاتهم التعاطف مع الاخرين

ملحوظة منتبهتش ليها الا وانا بكتب التعليق ده دلوقتى

blackcairorose said...

حازم

بجد هكون اكثر حرصا

blackcairorose said...

شمعون

لو وقتى ملكى اكتر متهيألى هكتب كل يوم بوست

بس عادتا الصباح الباكر جدا هو وقت كتابة التدوينات او التعليقات، وللاسف احيانا تمر عدة ايام من غير مقدر اعدى على البلوج او على البلوجات التانية اللى معتادة اقراها

تحياتى

blackcairorose said...

زمان الوصل

ان الخبرة تكون مفيدة مستقبلا هو أمر هام جدا وبحاول أنى فعلا استفيد منها لاحقا، مجرد محاولة!

blackcairorose said...

كراكيب

ان شاء الله احسن

اطيب تحية

blackcairorose said...

شاليمار

اهلا ومرحبا بك فى المدونة

واحدة من مخاوفى دائما ان يتم اختبارى فى الحياة بتجربة لا اتحملها، واحيانا ارى مواقف او مآسى تحدث لهذا أو ذاك واقول لنفسى انى لا اتخيل ان يحدث هذا الموقف لى وأخاف حتى من مجرد الفكرة

اقول لنفسى تجربة صعبة نتحملها أمر وارد، ولكن هناك تجارب تحطم اصحابها تماما وهى ما ارتعب حتى من التفكير فيها

blackcairorose said...

مصرى

صعب تحييد المظهر تماما لأنه أول ما نصطدم به، ولا اعتقد انه من الخطأ ان نحكم على مظهر ما بالايجاب او السلب، ولكن لا يجب ان يجعلنا هذا المظهر نتوقع تلقائيا ما بداخل او باطن الشخص

يعنى نحكم على مظهر شخص ما بانه جيد او سىء دون ان نقول ان المظهر الجيد يعنى بالتالى جوهر جيد او ان المظهر السىء يعكس جوهر سىء

المشكلة مع السيدة ان الظروف جعلتنى انظر فقط لخارجها دون ان تسمح لى بمزيد من التعمق، ولو كنت احتفظت برايى بشأن غرابة بعض التصرفات الصغيرة منها ربما ما كنت انبت نفسى، ولكن مشاركتى ـ بالضحك ـ فى سخرية علنية هو ما ضايقنى بالدرجة الاولى

اطيب تحياتى

blackcairorose said...

نور

شكرا على كلماتك اللطيفة

هو ضيق وتأنيب للذات ليس أكثر

ان شاء الله اتجاوزه، ولوحدث واتصلت بالسيدة او جمعتنا ظروف ما ، وتعاملت معها بالشكل الذى اتمناه عندئذ سيزول من نفسى بقايا التأنيب

تحياتى دائما

blackcairorose said...

Samraa

Thanks for your comforting words.

After reading your comment I tried hard to recall any other previous feelings of guilt, I could not.

It is interesting to try to call back past experiences in order to see when did we feel guilty before!

Sometimes I say I shouldn't have said this or that, but feeling guilty towards somebody, I really can't remember...

I will keep trying to remember. If I find ssomething I will post it.

blackcairorose said...

سما

موضوع انك بتقربى من الشخصيات اللى بتكون شوية غير طبيعية، موضوع مثير للاهتمام

احنا مشتركين فيه مع اختلاف انى بنجذب تجاه معرفة الشخصية من غير ما انى بالضرورة اتعرف عليها او أخد خطوة فعلية فى اتجاه التعرف

مثال ـ وواحدة من اخواتى الكبار برضه بتشاركنى فيه ـ اننا بنعجب بالشخصيات غير التقليدية، يمكن مش فى حالة واحدة زى اللى أنا كتبت عنها لانها كانت حركاتها غريبة وغير متزنة كانطباع اولى، ولكن اقصدالشخصيات غير المألوفة، وهاقولك امثلة

لو واحد او واحدة عرفت مثلا انهم يهود

او لو واحدة صايعة جدا

او واحدة او واحد شكلهم غريب، زى مرة كنت بره واتعرفت معرفة عادية على واحد اوروبى حالق شعره زيرو وعنده كذا وشم على ايده، وبعدين حد اعرفه من مصر كان بيزور وقابلنا الشخص الاوروبى ده بالصدفة وسلمنا على بعض بمودة، فكان المصرى مستغرب جدا وقال لى ايه النوعيات الغريبة دى وحتى ساعتها اتريق وقال ان الاوروبى ده بيفكره بالبودى جارد اللى بيظهروا فى برنامج

jerry Springer's show

اللى بيطلعوا يحجزوا بين الستات والرجالة لما بيتخانقوا ويمسكوا فى بعض!

وبالنسبة للطفل اللى مش حلو، دى لفتة حلوة منك بس مانتبهتش ابدا اذا كنت انا كمان بعملها ولا لأ


شخصية حذرة ؟

آه فعلا انا عموما حذرة، بس يمكن مش بنفس درجة حذرى على الانترنت ، وده راجع لتجربة سابقة مش ظريفة مع احد الاشخاص فى اول ما بدأ النت، بس ده موضوع طويل يمكن اتكلم عنه بعدين

انتى مقلتليش الاغنية اللى كنتى حطاها عندك قبل مارايا كارى كانت لمين؟

blackcairorose said...

سولا

نقلة كبيرة من كالى لنيويورك
يعنى سبتى الشمس والوسع لمدينة زحمة جدا وغالية، بس اهى تجربة ومين عارف يمكن تحبيها بعدين، هى كل حاجة فى اولها متعبة

كل تمنياتى بالتوفيق

blackcairorose said...

جسور

اين انتى يا عزيزتى؟ اصبحت تغيبى بالاشهر، ان شاء الله تكون امورك كلها بخير

وشكرا على الكلمات اللذيذة

خالص التحية

blackcairorose said...

سولى

ذكرتنى باحدى المقاطع الشعرية لمحمد عفيفى مطر والتى سبق ووضعتها فى المدونة عن مصطلح الظروف، وهو يتناوله من منظور مغاير لمن يستخدم الظروف حجة وتبرير

أراك يا مصطلح الظروف
محنطا تُنقل من جبانة السلب الى مقبرة الإيجاب
فمرة تبرر الهزيمة
والرعب والجريمة
ومرة تجعل من شعائر الموت شعائر القيامة
وتجعل الرحمة طائرا يفرخ فى أسنة السيوف

إيمان قنديل said...

إنت إنسانة جميلة ورقيقة المشاعر وذات ضمير حي، للأسف ياعزيزتي إننا نقسو على بعضنا البعض ، هذا درس لك وللأخرين أنه علينا كبشر أن نرحم يعضنا البعض

Desert cat said...

فى ناس حركاتها وطريقتها بتكون مستفزة بالطبع
وفى ناس بتمثل وتعيش دور مش بتاعها
وفى ناس بيصدر منها تصرفات الله اعلم الدافع وراها بيكون ايه
فى كل الحالات يبقى معاملة الشخص المتلقى كما هى
طبعا ده اللى حضرتك عمليته
مش اتغيرتى ولا اخدتى موقف ولا اتريقتى
انا مش شايفه داعى تحملى نفسك ذنب او انك تزعلى من نفسك فى سبيل حاجه زى كدا
والله يقويها على اللى هى فيه
مودتى

سمـــــــــا said...

انا زيك بيلفت نظرى الشخصيات الغير مألوفة بس كعقل وشخصية لان انا اول حاجة تبهرنى فى الشخص هو عقله وافكاره وروحه وجوهره طبعا ، هل هو حد حقيقى يعنى براه زي اللى جواه واللا حد مزيف القشرة بتبرق وجوه صدأ

حتى المظهر مش بتفرق معايا لانى بعتبرها حرية شخصية بحتة يعنى يحلق شعره يحط وشم دى كلها ميول كل واحد بيعبر عن اللى جواه فهو اكيد حر اذا لم يضُر

وحتى فى الديانة ميفرقش معايا ديانة اللى بكلمه يعنى يهودى مسيحى مُسلم كله سيان عندى وغالبا مش بسأل اللى قدامى عند ديانته الا اذا لو جت الصدفة وعرفت او اللى قدامى اتكلم لانها برضه فى الاخر علاقة روحانية بينه وبين ربنا


اللى هنختلف فيه بقى هو حتة التعرف على واحدة صايعة

انتى تقصدى بالصياعة :
الكلمة اللى بنقولها على حد بيفهم وصعب يتضحك عليه وعنده خبرة ؟
واللا
الكلمة اللى بنقولها على ( البيتشز ) ؟

لو تقصدى الكلمة الاولى فانا معاكى جدا احب اعرف ناس صاعت فى الحياة وفهمتها كويس لانى هستفاد من خبرتهم

لكن لو تقصدى ان بنت صايعة بمعنى ليها علاقات فى بيتش فلااااا يا ماما لااااا مليش فيهم خااااااالص

انتى عارفة انا ممكن اعرف ولد صايع يعنى حتى يعرف او ينام كل يوم مع بنت

لكن مستحيييييييل اعرف او اخرج مع بنت صايعة او فيه شبهة من بعيد او من قريب على اخلاقها لان فى الاخر اللى هيشوفنى معاها هيقول اننا زي بعض " المرأ على دين خليله " وأكيد انا محبش اجيب لنفسى سُمعة لمجرد انى عندى فضول

وانا فعلا مريت بتجربة كده هبقى احكيلك عليها بعدين

..............................

انا كمان حذرة جدا فى علاقاتى ودايما اقول انى سيليكتف فى الناس اللى بدخلهم حياتى يعنى ايوة انا ممكن اكلم ناس كتير بس فيه فرق بين انى اكلم ناس كتير ورغى وضحك وخروج وبين انى اعتبر الشخصية دى صديقة افضفض لها واسمعها ساعتها الوضع كله بيختلف

وأكيد كلنا اتعرفنا واتعرضنا لمواقف مقرفة من ناس سواء على النت او الواقع بس دا مش معناه اننا نقفل كل الابواب على نفسنا علشان نحمى روحنا لكن الصح اننا لما نتقرص نتعلم اننا منتقرصش تانى او على الاقل لو اتقرصنا نعرف نردها قرصتين

امممممممممم يمكن نكون مختلفين بس انا بطبعى بحب الحياة وبحب اتعرف على الناس حتى لو اتعرضت لتجارب سخيفة

.......................

الغنوة هتلاقى ردها عندى اخطفى ايدك لحد بلوجى هتلاقى تحليل تفصيلى عن اللى بيغنيها :))

احساس لسه حى said...

عزيزتى

الموضوع ده بيحصل كتير نشوف ناس مهزوزه شويه بس مش عارفين خلفية طبعهم ده ايه والهزه دى ايه

بس اظن الانسان وهو صغير شئ ولما بيكبر بيفهم وبياخد باله وبيفهم

وده درس اكيد لما تقبلى حد مهزوز شويه فى تصرفاته

هتعرفى ان اكيد فى خلفيه للى هو فيه

وربنا يريح الجميع من همومها

تحياتى

سلام

Unknown said...

انا اول مرة اجى هنا وسعيدة بالتعرف على شخصية جميلة زيك عندها احساس وضمير تحياتى

Anonymous said...

hi ya rose;
ana geet tany,
fa3lan new york bard geda2 bas tasawary ana mesh babrad mesh 3arfa ezay yemken 3ashan bamshy kteer aw 2a3'alb el wa2t elly ana feh fel hsare3 bakoon bamshy o el beet el heater maft7a feh 27/7 ya3ny ana bakteb el comment dah now b short o tshirt cut
bas 3arfa ana 7abeet new york,nezelt manhatan ana mara ma3a so7aby o mara l wa7dy,3alam tany 7'ales o za7ma o nas,ya3ny ana lama kont ma3a so7aby rawa7t el sa3a 4:30 am o el nas kanet 3ady fel share3,o da7a'lt youmeha lesbian bar,3alam 3'areeb o gaw 2a3'rab kolo sokr o beye3tames fel awel o el 2a7'er 3ala el dirty dancing,i felt so lonely that day any time i look around i find 2 girls kissing each others and even my friends all the time kissing each others and as i am shy person i left them but they came 2 me :(
the next day o went 2 manhattan in the morning i took the ferry 2 go there i liked it alot specialy that i was in the open area there ,anyway in manhattan i find alot of egyptians in the street,i was taking to my cousin on the phone then when i am done i asked the guy 2 gimme one soda he told me kebera wala so3'ayara,:)
bas bgad el manzar elly mesh ha2dar ansah,wa7ed bardo mn elly 3andohom 3arabeyet soda fel share3 geh wa2t el sala am mesaly fel share3,7aset b el araf mn nafsy msh tab3ey 3ashan mn sa3et ama geet new york mesh basaly o howa beysaly fel share3,o mesh bas keda da ana kaman youm ama ro7t el bar dah so7aby asked me what i wanna drink i said diet pepsi,so they began to make fun of me so i went to the bar tender and i asked her what she has she gave me a big list so i told her let me have number 2 as i dont know the name and i dont drink alchol,so tele3 wiskey o ta3mo zebalah aslan :)
but untill now i like new york its dirty like egypt,but its the big apple that is crowded with ppl,bt everybody telling me if u made it in ny u'll make it any place around the world and as i am kinda like 2 challenge my self so i decided to make it here inshaa allah,altought every step i made forword i am back word 2 steps,and the most thing bothering me all the time that i cant be commited for someone in egypt,i should be single,to be in love it means that u r waisting ur time and i admit that i dont have time 2 waiste in this big city
sorry ya rosy bar3'y keteer asl ana 3arfa enek ensana mosaqafah o 3ala etela3 o betfham fe zaman el nas feh ba2et sat7eyah
wag3alek ana rasek sa7
salamoz

اقصوصه said...

دايما لازم الانسان يحاول يحتوي اللي حواليه

محد يعرف ظروف غيره اكيد

انتي ما غلطتي بشي

بس حاولي تستفيدين من التجربه هاي

حسيت باحساسك

الله يعينها

عين فى الجنة said...

الندم مطهر للنفس

blackcairorose said...

كباريه

شكرا للكلمات الرقيقة

واطيب تحية

blackcairorose said...

قطة

شكرا يا عزيزتى على كلماتك وتهوينك من حمل احساسى بالذنب

أطيب تحية كالعادة وخالص الود

blackcairorose said...

سما

موضوع الصياعة هيخلينى اكتب تدوينة عن اللى اقصده يا قمر، بس مش هى التدوينة اللى هنزلها حالا

عديت طبعا عندك من كام يوم وهسمع الاغانى واحدة واحدة،

وهعدى حالا دلوقتى واقرا تانى واركز فى القصة اللى
كتبتيها

انا قريتها امبارح بس التركيز مكنش قوى

سلام مؤقت

blackcairorose said...

احساس لسه حى

ربنا يريح الجميع من همومها

فعلا دعاء فى محله، ربنا يهديها ويثبتها على ظروفها

تحياتى

blackcairorose said...

ايوية

خالص الشكر على المرور والتعليق وشرفتى المدونة

blackcairorose said...

سولا

كلامك كالعادة مسلى جدا، بس ليه متكتبيش الحاجات دى على انها بوستات فى مدونتك؟؟

يومياتك مثلا يوم بيوم او كل يومين تلاته وخصوصا بعد انتقالك للتفاحة الكبيرة وبداية حياتك فيها؟

صدقينى هتبقى فكرة حلوة، وخصوصا انك بتكتبى تفصيلات يومية وحاجات وتفاصيل صغيرة بتخلينا نحس اننا شايفين مسلسل

بالتوفيق دايما وطبعا عارفة اللى انت بتحكى عنه من الزحام الفظيع لانى زى ما قلتلك كنت هناك لمدة اسبوع فى الصيف من ضمن تلات ولايات زرتهم، وكان حظى حلو انى نزلت فى فندق جنب تايم سكوير يعنى زى ميدان العتبة كده مع الفارق الحضارى اللى عمره 300 سنة!!

blackcairorose said...

اقصوصة

أهلا بيكى ويسعدنى مرورك وتعليقك

وتقبلى ترحابى وانتظرينى فى مدونتك

اشكرك

blackcairorose said...

راجى

نعم

على حساب الألم

!