Tuesday, October 7, 2008

الكلب له أحكام


ذكرت في التدوينة السابقة الكلب الذي يؤنسني، وقد طلبت منى سما صاحبة الليل وسماه مشاهدة صورة الكلب، ثم هددتني فى تعليق لاحق لها بمخاصمتي، ونظرا لأني لا أتحمل مجرد فكرة التهديد بالخصام من الأصدقاء الذين أعتز بهم ـ فما بالكم بالخصام الفعلي ـ فقد قررت فورا نشر صورة الكلب، ليس هذا فقط، بل وكتابة قصة حياته كاملة بكل لحظات الألم والسعادة فيها

كان يا ما كان

الكلب كما هو واضح فى الصورة كلب بلدي، وقد شاهدته لأول مرة صدفة مع طفلة وأمها فى الشارع الذى أسكن فيه، وحين نظرت للكلب وجدته يهز ذيله رغم عدم وجود سابق معرفة، مما جعل الأم تقترب ناحيتي وتعرفني بنفسها ـ ايرلندية ـ وقد أخذوا الكلب من الشارع بعد ولادته مباشرة وظل معهم لمدة عام ونصف، وسألتني السيدة إذا كنت أريد الاحتفاظ بالكلب لأنهم سينهون إقامتهم فى البلد الخليجي الذى نقيم فيه خلال أسابيع وسيعودون لايرلندا ولا تسمح ظروفهم هناك باقتناء كلب
أوضحت السيدة أن هذا الموضوع يسبب لهم ألما نظرا لتعلقهم به، ويريدون أن يضمنوا أن يبقى الكلب مع شخص يحبه، وقد قاموا بالفعل بعمل إعلانات فى العيادة البيطرية وكذلك فى محال السوبر ماركت للبحث عمن يتبناه ـ وليس من أجل بيعه ـ ولكن لم يتصل بهم أحد حتى تاريخه

اعتذرت للسيدة اللطيفة وقلت لها أن ظروفي لا تجعلني في المنزل بشكل دائم ومن ثم لا يمكن أن أتحمل مسئولية الكلب

نسيت الموضوع لفترة ثم سافرت فى عطلة الصيف وبعد عودتي لاحظت أن هناك كلب ضال فى الشارع يشبه جدا كلب العائلة الايرلندية وحين سألت حارس بناية مجاورة أخبرني أنه فعلا نفس الكلب وأنهم لم يجدوا حلا سوى تركه فى الشارع، وتقوم من حين لآخر صديقة لهم بالمرور على الحارس واعطائه طعام للكلب

بصراحة فكرت عندئذ فى أخذ الكلب لأنه ذكرني بالقول الشائع عزيز قوم ذل، فبعد المنزل المكيف والطعام اليومي أصبح ضالا فى الشوارع الحارقة، خاصة و أن المجتمعات العربية بشكل عام والخليجية بشكل خاص لا تنظر للكلاب بشكل ايجابي، كما تنعدم سبل الرعاية أو وجود المؤسسات التي ترعى الكلاب مثل المؤسسة الدولية المشهورة
SPCA
والتى لها فروع فى كل الدول المتقدمة، بجد الكلب صعب عليه، خاصة وأنى عاشقة للكلاب، وتخيلت مصيره حين تذكرت أن حتى الفأر ميكى ماوس لم يسلم من دعاوى القتل

ولكن المشكلة أن هناك أيام لا أتواجد فيها بالمنزل، فقمت بسؤال جارتي وهى فتاه انجليزية تعمل مدرسة أن نقوم معا بالمشاركة فى رعاية الكلب الذى سيظل عندي وتستضيفه هي فى بيتها حين أتغيب أنا عن منزلي، وفعلا لنا تقريبا شهرين بهذا الترتيب

الكلب ازداد وزنه وحالته أفضل، ولكن هناك مشكلة واحدة هي أسمه، فنحن لا نعلم ماذا كانت العائلة الايرلندية تطلق عليه، وقد اقترحت أنا اسم لاكى أي محظوظ لأنه وجد من يرعاه، فى حين أن جارتي تفضل اسم سيزار أي قيصر، ولم نصل لحل فى موضوع الاسم، والنتيجة أنها تناديه سيزار حين يقيم لديها، وأنا أناديه لاكى حين يكون عندي، ولكننا اتفقنا أخيرا على ضرورة اختيار اسم واحد لأن هذه المعاملة ممكن أن تؤدى إلى إصابته بمرض تعدد الشخصيات،
Multi personalities disorder
طبعا دى كانت مزحة منى ونحن نتحدث

وتوته توته فرغت الحدوتة

35 comments:

مثلية تبحث عن ذاتها said...

قصه جميلة حسستني ان الدنيا لسه بخير بجد انا بضايق اوي ان الناس بتعامل الكلاب علي انها مخلوقات منبوذه كنت من فتره في مصر بتغدي في اندريا المريوطيه ولقيت كلا ب صغننة لسة مولودة وأولاد جايين يلعبوا معاهم وفرحانين افاجأ بشخص في اواخر الأربعينات جاي يزعق لولد من الولاد ويقوله تعالي هنا يا ولد نجست نفسك رحت زغرتله (بصيتله بقرف واضح) فراح قالي صح؟ رحت رده بنفس القرف قلتله لأ طبعا ايه اللي انت بتقوله لطفل ده و كنت متغاظة جدا وشكلي باين اني هاين علي اضربه
انا بحب الكلاب بكل انواعها واكيد اسمه لاكي عشان معاك واتشهر علي صفحات البلوجات وكان ممكن يكون مصيره الشارع بحييكي علي موقفك النبيل

سمـــــــــــا said...

ع فكرة انا المفروض أكون أول كومينت لاني من الساعة ٨ ونص الصبح بحاول اعمل كومينت والنت قليل الادب مش راضي يبعت :(( امسحي بقي تعليقك يا مثلية عيب كده ايه الناس دي !! طيب انا شوية وهرجع أكمل رغي.انا كنت عايزة أحجز أول تعليق بس مفيش أمل :(

ريما said...

مرحبا
انا يمكن اول مره بعلق على مدونتك بس انا من فتره الي بتابع شو الاشي الي بتكتبيها انتي وعدد من المدونين وتشدني عدد منها وقد كونت صداقات حقيقيه من خلال تبادلنا التعليقات .
بالنسبه لموضوع الكلب الخاص بك انا احب الكلاب لكني اخاف منها
اعجبت باحساسك العالي تجاه معاناة الكلب في زمن ضاعت فيه حقوق الانسان فما بالك بالحيوان

Sherif said...

هو الحقيقة ما اضحكنى قليلا كلمتك عزيز قوم ذل

فقد فهمت انه من الشارع أصلا .. فهو ليس عزيز قوم الا اذا اعتبرتى ان رعايته الايرلندية جعلته كذلك

المؤكدانك حنونة بصفة عامة .. وهذه هى الصفة المهمة فى القصة كلها .. وانك حريصة على اصدقائك واعتقد انهم يبادلونك نفس الشعور وأنا أولهم طبعا

لاكى هو لاكى فعلا لانك كنت فى طريقه واهتممت به .. مش عارف لو سافرتى ماذا سيحدث

ارجو ان تكونى قد قضيتى عيدا سعيدا وكل سنة وانت طيبة

زمان الوصل said...

سمّيه لاكى سيزر :) آل يعنى فيه سيزر ممكن يبقى مش لاكى !!

وجهة نظري said...

طيب متسألي صاحبة الناس الأيرلنديين إلي بتجيب أكل للبواب يمكن تعرف صحابها كانوا مسميين الكلب إيه؟

مشفتيش الحمارين إلي عندي، لما زهقوا من إسبوع كلوا الكنبه لما كنت نايم هههههه، وبياكلوا 2 كيلوا لحمه في اليوم، دا لما يكونوا مش جعانين

لما جبتهم كانت فكره حلوه .... دلوقتي كابوس

بس بموت فيهم، ولا يمكن أعيش من غيرهم ... دا لو مكالوش رجل أو إيد علي أخر الشهر هههههه

A.SAMIR said...

ربنا يجعله في ميزان حسناتك
بجد والله دة ثواب عظيم
كويس انه وقع في ايدك وانتي بتحبي الكلاب
محظوظ الكلب دة على فكرة
فعلا لاكي اسم على مسمى
تحياتي واحتراماتي

راجى said...

انا كمان مع زمان الوصل ، الاسم المناسب لاكىسيزر
القيصر المحظوظ

بنت القمر said...

مش بحس الحيوانات مكانها البيوت
الطبيعه احسن
لكن لو عني طاقه لاستضافه كائن حي وهو مش ممكن افضل احواض السمك
متعه
وهدوء

blackcairorose said...

مثلية

مرسى على كلامك الحلو

الافكار دى جزء من ثقافتنا ككل

زمان واحنا اطفال لما كنا نمشى فى شوارع المهندسين الهادية كانت فيه كلاب ضالة كتير وكانت الفكرة اللى عندنا ان الكلاب دى هتعضنا من غير سبب، فكنا لو نلاقى طوبة نرميها عليها

او لما تلاقى قطة تقومى تجرى وراها لمجرد تخويفها

او لما تلاقى وردة نقطفها علشان نشمها لان ريحتها حلوة

او الولاد اللى عندهم بندقية رش كانوا يصطادوا العصافير

او لما تلاقى شجرة فل أو ياسمين تخدى وردها علشان تعمليه عقد

او تخططى بالطباشير على الارض علشان تلعبى أولى، معرفش لسه الاطفال دلوقتى بيلعبوا أولى ولا لأ؟

كلها ممارسات خاطئة فى رأيى وجزء من ثقافة شائعة فى وقتها ويمكن لحد دلوقتى، محدش اساسا شايف انها خطأ لاننا متعلمناش انها خطأ ويمكن حتى اهالينا برضه مش شايفين انها خطأ

حاجات كتيره عايزه غربلة بدءا من سلوكيات الاطفال لحد تصرفات اكبر شخص

blackcairorose said...

سما

وانا مستنية

blackcairorose said...

ريما

شكرا لمرورك وتعليقك

ويسعدنى أن نتواصل دائما

وتقبلى منى أطيب تحية

blackcairorose said...

شريف

قد لا يكون ابن نسب ولكنه ابن عز اى استمتع منذ مولده بحياة مرفهة كما كان واضحا

شكرا على السؤال، والعيد مر بخير وسلام الحمد لله

blackcairorose said...

زمان الوصل

فكرة

أو اسم يجمع بين الاتنين زى لاكيزار!!

blackcairorose said...

وجهة نظرى

كلابك أية نوع؟

أنا فى الماضى كان عندى أكثر من كلب

واحدة كانت روتفايلر

واحدة خليط روتفايلر ودوبرمان لكنها للغرابة مكنتش شرسة وانما كانت شقية جدا

اما كلبى المفضل كان نوع نادر معرفش سمعت عنه ولا لأ كان

Bouvier de Flandres

وهو بلجيكى ويشبه الكنيش بس على كبير جدا وشعره طويل أسود

الكلاب الدلع للى بحبهم هم البوموروميوم، بحسهم زى الاطفال، كانوا عند ناس اصحابى واول ما يشوفونى يقغدوا يتنططوا حواليه من الفرحة

على سيرة الاكل

اعرف ناس كان كلبهم بياكل كل يوم فرخة مشوية والله هم احيانا مكنوش بياكلو فراخ او لحوم فى البيت

شرفت

blackcairorose said...

شكرا أ سمير

على كلماتك الرقيقة وكل عام وانت بالف خير

blackcairorose said...

راجى

كل عام وانت بخير والظاهر انك كنت معتكف فى رمضان

فى انتظار نشاطاتك وتدويناتك

اطيب تحية

blackcairorose said...

بنت القمر

عندك حق ، هو بشكل عام الحيوانات مجالها الطبيعة، طالما الطبيعة توفر لها الاكل والشرب والحركة الحرة

بس الحيوانات الاليفة برضه بتاخد على جو البيت وتحميها البيوت من الحرارة وتوفر لها الطعام اكثر من امكانية
وجوده فى الشارع خاصة فى المدن

حوض الاسماك؟
انتى اخترتى أسهل حاجة لول

None said...

والله ياروزا .. انا كان عندي قطه زمان وانا صغيرة وللأسف ماتت..ومن ساعتها تقريبا جتلي عقده وبطلت اربي اي حاجه في البيت لاني بتعلق بيها جدا وبفضل فترة طويله اوي متأثرة لو جرالها اي حاجه او حتي تعبت
كنت بفكر اكرر التجربه تاني مع البنات واجيب لهم قطه صغنتته..بس اولا العقده القديمه وجعتني الصراحه..ثانيا عقدوني من موضوع التطعيمات والامراض اللي ممكن تنقلها وخاصة يعني انهم بنات
الحاجه الوحيده اللي متبنياها حاليا..نباتات ظل وصبار

بعيدا بقي عن كل دا ..عاجباني اوي الموكيت اللي نايم عليها الكلب واحساس النعومه والاسترخاء اللي هو فيه

تحياتي يا قمر

سمـــــــــــا said...

أخيرا النت أفرج عنى وجيت

تخيلى انى امبارح حتى الكومينت من خلال الموبيل مرديش يتبعت بعد لما كتبت قصة حياتى الاقى الشبكة وقعت والسايت اتقفل بجد كنت هرمى الموبيل من الشباك

اولا : عجبنى اوى اسم البوست لانك شيلتى القاف وحطيتى كاف ففرقتى المعنى ودا
ذكاء بيشدنى فلازم يبقى اول حاجة احيكى عليها

ثانيا : إزاى تشرديلى وتقولى انى هددتك الناس هيقولو عليا ايه دلوقتى ؟؟ بلطجى
قصير وانك كتبتى البوست تحت تهديد السلاح واللا ايه ؟؟ : )))

ثالثا : انتى عارفة بقى انى بسببك اتحطيت فى موقف كوميدى مووووووووت
فاكرة اليوم اللى انا علقت فيه على البوست وانتى كنتى علقتى عندى وقلتى
على صورة البنت ام ورقة شجر ؟
يومها بالليل واحدة ضافتنى وعادى كنا بنتعرف هى مصرية بس عايشة فى
مكان ما بس مش دولة عربية وقالت لى انها تابعت البلوج بتاعى من يومين،

المهم انها فجأة فى وسط الكلام لقيتها بتقولى هى الصورة اللى بورقة شجر دى
انتى ؟؟ قلت لها نعم ؟ انتى شفتيها فين ؟ انا اصلا مغيرة الصورة دى من 10
ايام تقريبا وانتى قلتى انك متابعة البلوج من يومين بس ؟ قالت لى ممكن اكون
شفتها فى تعليق قديم ليكى ، قلت لها اوك ما علينا

شوية وراحت قالت لى الكلب بتاعى معرفش ايه فانا طبعا اتعدلت وركزت قلت
لها انتى عندك كلب ؟ قالت لى ايوة وراحت حطالى صورته لقيته بنى
فطبعا انا بعد لما كنت بكلمها بنص عين وعايزة انام رحت معدولة ومركزة
معاها ، المهم يمين شمال قلت لها تورينى صورتها هى 44 سنة وعايشة فى
البلد دى بقالها سنين ومامتها وباباها متوفين وبعديها فتحت الكام تورينى
اوضتها فلقيت عندها تليفون لاسلكى اسود وكرسى هزاز ... قلت لها امال فين
الكنبة الزرقا ؟؟ قالت لى انا عندى كنبة نبيتى مش زرقا

قلت لها انتى لحقتى بعتيها ؟؟ فهى طبعا عمالة تضحك وتقولى انتى دمك خفيف
جداااا وهى مش فاهمة انى بتكلم جد وعايشة الوهم مع نفسى : )))

بس بعد مكلمتين احساسى قالى انها مش انتى بس هى برضه ظريفة اوى لكن
مش انتى طبعا

بصراحة الموقف بيضحكنى لما بفتكره لانه صدفة غريبة يعنى انا وانتى نكتب
تعليقات هى تيجى بالليل عندها كل اللى اتكلمنا فيه

الكوميدى بقى انها لما وريتنى الصورة بتاعتها هى والبوبى انا قعدت اعاكس فى
البوبى ونسيت انها فى الصورة اساسا وبعدين اكتشفت انى قليلة الذوق فقلت لها
والله انتى مش باين عليكى سن ملامحك طفولية اوى .. قالت لى انتى لسة فاكرة
انى فى الصورة ؟؟

عاجبك كده يا فندم ؟؟ اديكى جبتيلى الكلام من الناس .. انا المفروض اسميكى
الشبح مش روز هيبقى لايق على شخصيتك اكتر ( بطلعلك لسانى )


نرجع بقى لسيزر انتى اول ما علقتى عندى وقلتى انه بلدى كنت واثقة انه هيطلع
كلب من الشارع صعب عليكى واتعاطفتى معاه وقررتى تربيه عندك والحمد لله
طلعت لسة بفهم شوية

بس بجد دا موقف نبيل اوى منك وبيعكس انتى قد ايه عندك قلب وحنينة ، انا بجد
بحييكى على اللى انتى عملتيه

يعنى انا لو مكانك ولقيت كلب بيبص لى ويهز ديله اكيد مش هقدر اقاوم وهاخده
معايا انا قلبى رهيف اوى فى الحاجات دى ، بس احتمال أءجر له شقة لوحده لان
ماما مش هتدخله البيت او هتطردنى انا وهو : ))

انا بقى من رأى انى اجيبلك سابرينا كمان ينوبك ثواب فيا بدل ما هى مشوهانى فى
الرايحة والجاية واهى كلبة بلاك جاك بنت أصول تربية ناردين يعنى الدلع كله
لدرجة انى عايزة اسربها بأى طريقة وكل لما اشوفها ابص لها واقولها حظك ان
مش انا اللى ربيتك كنت همشيكى على ايديكى ورجليكى لفوق يا مايصة انتى وهى
تبص لى شوية وبعدين .. هاو هاو هاو .. كلبة فعلا : ))

__________________________________

بجد يا روز ميرسى انك حطيتى الصورة وميرسى على لفتتك الرقيقة وبحيكى على موقفك الجميل دا

سلام يا قمر وبوسة وطوق هدية لسيزر مع انى مشفتش وشه ولا ديله وهو بيتهز :(

مياسي said...

روزا

ولايمكن احب الحيوانات ابدا
عشان هيك انا مستغربه كيف بتربيهم بس على كل

الرحمه حلوه برضو؛ وذكرتيني لما كنت في الخليج و انتي بتحكي عن الست الايرلنديه عشان الاجانب فعلا بيهتمو انو يكون عندهم كلب

مش عارف ليه بس اتهيأ لي انك في الامارات؛ يمكن عشان الايرلنديين و لو انو مش مقياس

ع فكره و انا بقرأ تعليق سما مت من الضحك؛ بجد تحفه

صح بدي اذكرك بشغله
بتتذكري لما علقتي مره عند شريف عن الصوره المتخيله لكل مدون؛ أخبار البوست ده ايه؟

تحياتي لأحلى روزا والله

Desert cat said...

اكلب اصلا شكله جميل ونضيف
ممكن استلفه يومين
:)
انا كان عندى قط زمان كنت مسمياه رينو
ممكن تستعيرو الاسم
لان دلوقتى عندى لوجى
قطتى حبيبتى

blackcairorose said...

نون

سعيدة جدا بمرورك وانك فى وسط زحمتك بتعدى وتعلقى كمان

ان شاء الله تكون امورك كلها بخير والملايكة الصغار زى الفل دايما

طبعا بعرف شعور فقد او مرض الحيوانات الاليفة لانها بعد فترة بتبقى كأنها فرد من العيلة، وبالنسبة للقطط والبنات انا سمعت الموضوع ده كذا مرة، بس الافضل تسألى فيه الدكتور لان الناس ساعات بتبالغ كتير فى الموضوع ده واعرف كذا حالة ستات كان عندهم قطط من صغرهم، ودلوقتى ما شاء الله متجوزين
ومخلفين كمان


والله مبالغش لما اقول انى دايما بسعد وانبسط لما اشوفك معدية من هنا

واصدق تحية

blackcairorose said...

مياسى

قوليلى عدم حبك للحيوانات الاليفة منبعه ايه اساسا؟ الخوف

اذا كان الخوف منهم، كنت اعرف واحد بيخاف جدا من الكلاب بس عنده رغبه انه يتغلب على الخوف ده

وفعلا اتغلب عليه على خطوات

الاولى انه اقتنع ان الخوف اساسا من داخله هو ومش من امكانية عضه من قبل الحيوان

يعنى لما اقول انا خايفه الكلب ده يعضنى، لكن صاحب الكلب يؤكد لى ان الكلب مبيعضش، تبقى المشكلة مش فى امكانية العض من عدمه وانما المشكلة فيه انا وان عندى شعور وهمى وغير حقيقى ولكنه مسيطر عليه

المرحلة التانية انه ابتدا يقرب من الكلب شوية شوية، على مدار ايام واسابيع وضرورى يكون الكلب من النوع الهادى لحد ما حاجز الخوف ابتدا يتكسر شوية شوية ووصل الى انه ممكن يقعد جنبه على بعد متر مثلا، ثم ممكن يلمسه او يطبطب عليه ودلوقتى الشخص ده عنده كلب فى البيت ومعندوش اى مشكلة

ـــــــــ

اه طبعا فاكرة لما علقت عند شريف بس بصراحة خفت يكون التخيل

offensive

للبعض او محدش ياخده احيانا بروح الفكاهة اللى مقصوده بيه

يعنى

blackcairorose said...

قطة

علشان كده مسمية المدونة قطة الصحراء

انا مكنتش عارفه ان عندك قطة، وفاكرة قطة الصحراء مجرد اسم لقطة برية قوية

وهى طبعا الاوصاف اللى تنطبق على شخصيتك القوية يا عزيزتى


هو نضيف لاننا سواء انا او كريستين بنحميه علىالاقل مرة فى الاسبوع ولوطلع بره كتير بنرش عليه مياه بالخرطوم فى جنينة البناية، وبصراحة ببقى نفسى انزل معاه تحت الميه لول

blackcairorose said...

سما

غريبة جدا موضوع الشات ده الاغرب انى غيرت من يومين لون الكنبة بتاعتى خليته نبيتى! صدفة غريبة مش كده؟

بعدين تعالى هنا انتى ازاى تجرؤى انك تفكرى ولو لفانية ـ اللى زى ما انتى عارفه انها جزء من الثانية ـ ان واحدة عندها 44 سنة تبقى انا؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

اهو ده الكلام اللى يزعل بجد بقى

يا بنتى انا اصغر بكتير من كده
كتير كتير كتير كتير كتير كنير كتير

شوفتى كتبت 7 كتير والحدق والنص حدق يفهم

وغالبا طالما بتقوللك على الشات انها 44 تبقى فى الحقيقة مش اقل من 49 وده طبقا للتعريفات الساخرة او القاموس الساخر بتاع النت والشاتنج
لما يقولو ان كلمة

huggable

هى الكلمة المهذبة بدل ما يقول تخين

وان

sociable

مقصود بيها

whore

وبقية التعريفات المضحكة دى

ــــــــ

هو فعلا مش باين وشه ولا عينيه كويس بس دى الصورة اللى عرفت اخدهاله

هو متربى كويس ومريح جدا ودى اكتر حاجة عجبانى فيه

ومن اكتر حاجه مريحانى فيه انه مبيحتجش انزله كل يوم زى ما انتى عارفه، الظاهر العيلة كانت بتفتح له الباب فينزل هو فى الشارع لوحده ويرجع بعد خمس دقايق وكله تمام، ولانه بلدى فمفيش خوف انه يتسرق

ودى ميزة برضه



سلام يا قمراية وسلامى لناردين

احساس لسه حى said...

عزيزتى

الكلب جميل واكيد زى ما قولتى بعد ما اتعود على الراحة والتكليف ينزل كده صعب اوى عليه

وطبعا محدش عبرهم ولا فكر ياخد الكلب لانه بلدى ومنه كتير ضالة

طبعا المجتمعات العربية معندهاش رعاية للبنى ادميين اللى فيها عاوزه تعمل رعاية للكلاب صعب اوى

واظن ان الانسان اولى بكل رعاية قبل اى كائن اخر وبستغرب اوى ان فى ناس بتموت فى مجاعات وناس بتتبرع لكلب

بذمتك ايهما اولى بالرعاية لو الناس اللى على الارض كلها اخدت حقها ومش فى شئ الا انها تاكل وتلاقى قوتها

هكون اول المطالبين برعاية الكائنات كلها

على العموم هو مكنتش هيموت فى الشارع لانه مخلوق لكل يتحمل الشارع واللى فيه

وربنا يقويكى عليه بقه
تحياتى
سلام

Desert cat said...

انا مش بعرف اعيش من غيرهم
قطتى شيرازى فارسى
لكن اللى فهمتية من اسم المدونة هو كان المقصود بالفعل
مش عندى ذرة شك واحدة فى ذكائك
محبتى يا احلى روزة

Sola said...

roooooooose:
ezayek ya gamiel,how is el 3eed 3andek....
el kalb cute awy bgad,kan 3andena f masr kalb german chepered el kalb dah ba2a kan meganeny kan yeseeb kol 7agah o yegy yenam gamby fel serer,o howa aslan kan atwal meny lama beyo2af 3ala ketfy el mohem kont aseblo el serer o anzel anam 3al ard,kan yegy bardo yenam gamby 3al ard,ganeny aslan el mohem eno youm ama mamy gabeto kanet gaybah 3ashan my sister bas 3ala ra2y mamy el kalb beye7'tar sa7bo o howa 2e7'tarny wana taba3a2 ba7es en deh mas2oleyah kebera belzat en ana mesh kont bab2a fel beet 3ala tol fel share3 aw nayma f 2olt l mamy temasheh o fa3lan mamy masheto bas l3'ayet now sa3ban 3alaya
el kelab ba2a elly bamoot feha bgad heya el shewawa inshaa allah 3amla 7esaby lama amhsy mn 3and 7'alo o 2a3esh lea7dy agebly wa7ed menhom they are so cute,tasawary kont ma3a wa7ed sa7by mn kam youm o gat seret el gays o el lesbians o eza kan marad nafsy wala el nas betetweled keda o howa taba3a2 mesh ye3raf en ana keda aslan f ana ba2olo enaha 7agah nafseya o howa bey2oly en el nas betetweled keda f 2am 2ayely en wa7ed sa7bo 3ando kalb shewaha o 2al 2eh el kalb dah gay o beynot 3ala kalb ragel zayo,hehe
can u belive that
yalla salam ya gamiel o mestaneya el post el geded

سمـــــــــــا said...

ايه دا هو انتي غيرتي لون الكنبة ? طيب فرصة سعيدة أوي يا فندم وعلي فكرة انا هبطل تشات عشان ناوية احافظ علي البرج اللي فاضل في مخي : )) هي فعلا حاجة غريبة ومريبة وعجيبة بس هقول ايه الصدف تعمل أكتر من كده. بس انا من تاني مرة كلمتنا اتأكدت انها مش انتي تماما وصارحتها اني كنت بفكرها واحدة تانية فقالت لي للاسف مش هي فكان نفسي اقول اشكر ربنا انك مش هي :)) بس هي مصرة اني اروح ازورها ف البلد اللي فيها فقلت لها أول ما افكر اتجمد هزورك فهي احتمال تيجي مصر زيارة فأبقي تعالي اعرفكم ع بعض واسيبكم واهرب :)) علي موضوع السن انتي لخبطتيي فيه لما قلتي انك خريجة بداية التسعينات وانا خريجة 2001 بس انا فاشلة سقطت سنة يعني المفروض 2000 فقلت يبقي الفرق بيننا 10 سنين ولبستك تهمة :)). علي فكرة انا في التشات دايما بقول معلوماتي الحقيقية عمري ما كدبت علي حد فانا برضه بعتبر ان اللي قدامي بيقول الحقيقة علشان لو اللي بكلمه اكتشفت انه كداب بيكون خلاص خسرني مهما كانت مبرراته وبيني وبينك انا مدخلتش شات رووم عشان اتعرف ع حد من 9 سنين تقريبا بس مؤخرا بعد ما فتحت البلوج ممكن كل فترة اقبل اضافة حد نتكلم شوية بس مقدرش اقول اني اعتبرت حد منهم صديق انتي عارفة انا بتبع نظرية المصفي مع اي حد يدخل حياتي :). يالا سلام يا قمر

blackcairorose said...

احساس لسه حى

أكيد بتفق معاك ان الانسان له اولوية عن بقية المخلوقات

ولكن بنظرة مدققة لن تجد أى مجتمع يحترم حقوق الانسان الا وانه يحترم ايضا حقوق الحيوان

ولن نجد ابدا مجتمع يحترم الانسان ولا يحترم الحيوان، لانه فى النهاية الاحترام منظومة متكاملة
تحترم الاغلبية كما تحترم الاقليات بكل انواعها وتحترم الرأى المخالف والغريب كما تحترم الرأى الشائع والمتفق عليه من الجميع الخ الخ

تحياتى

blackcairorose said...

خالص الود يا قطة يا صاحبة اجمد خربشة

blackcairorose said...

سولا

حكاياتك مضحكة

اولا ازاى يجيلك قلب تمشى الكلب اللى ارتبط بيكى؟؟ من غير مبالغة انا بحس بالذات الكلاب الصغيرة البابيز يعنى انهم زى الاطفال وبالذات نظرات عنيهم

ولما يكون البابى لونه بيج ياسلام بقى يجنن بجد

بالنسبة للكلب المثلى زى ما قال صاحبك، متهيألى ممكن

والحقيقة فيه بعض الحيوانت لها ميول مثلية، والموضوع ده احيانا العلماء المناصرين للمثلية والمؤيدين ليها بيعتبروه حجة فى التأكيد على ان الشعور المثلي لدى البعض هو شعور غريزى وغير مكتسب، لانه اذا كان البعض يرى ان المثلية فى الانسان هى نتيجة مرض او خطأ فى التربية او او، هذه الاسباب تنتفى مع الحيوانات والتى تتصرف فى الجنس باسلوب طبيعى وغريزى لا توجد للمؤثرات الخارجية كالتقاليد والدين الخ فيه

ومن ثم فهؤلاء العلماء يرون انه بالتالى الشعور بالمثلية هو ايضا لدى البعض سواء كانوا بنى آدميين أو أية كائنات اخرى هو طبيعة يولدون بها، وليست بالضرورة نتيجة للتربية

اطيب تحية يا سولا

blackcairorose said...

سما

طيب كويس انى اشتغلتك فى موضوع لون الكنبة لانه لسه ازرق بس قلت ادوخك شوية انتقاما من الكام سنة اللى اضفتيهملى لول

Barracuda said...

رعاية كلب في دولة خليجية مسألة مش سهلة.. وحظك حلو انك لقيتي حد يساعدك في الموضوع .. ولا كنتي هتعملي إيه لما تنزلي اجازتك؟.. خلي عندك رقم للدكتور البيطري تحت إيدك لأن الكلاب بتعيا.. وربنا يكتب لك الثواب على رعاية المسكين ده بدل ما كان يلف في نار جهنم إللي معظم شهور السنة شغالة الله ينور

تحياتي العطرة