Monday, October 27, 2008

أدينا بندردش

لسه فى افلامنا متخلصوش من مدلول السيجارة اللى فى فم البطل وبيعتبروها مثال لرجولة البطل الشاب اللى بينفخ والسيجارة مدلدلة من بقه
بجد بشوفه منظر سخيف قوى مش بس لأنى بكره السجاير وريحتها، لكن مدلولها حتى كرمز "للبرمجة" راحت عليه
عكس الافلام الامريكية بالذات لما بتجيب دلوقتى منظر سيجارة فى فيلم حديث بتحطها فى سياق غالبا منفر، يعنى اللى يفتكر فيلم
The beautiful mind
منظر طلبة الجامعة ـ فى أوائل القرن الماضى ـ وهمه مسموح ليهم التدخين فى الفصل المغلق مع بقية الطلبة والدخان مالى الغرفة المغلقة، المنظر مقبض، على طول قلت لنفسى ساعتها ياه كام واحد مات من التدخين السلبى ايامها؟
ـــــــــــ
ملاحظة ان كلمة جواز عرفى حاليا بقت هى اللفظ المحترم لكلمة علاقة جنسية
يعنى اى اتنين ميقدروش يقولوا ان فيه بينهم علاقة يقوموا قايلين جواز عرفى

زى دينا مثلا ورجل الاعمال المشهور فى الكليب
وزى جمعة الشوان والممثلة الراحلة
وزى المطرب اللى ظبطته زوجته الاولى فى شقة فى الزمالك مع واحدة فقال بعد كده انهم كانوا متجوزين عرفى

وهى عملية سهله قوى، هو مين يقدر ينفى انه كان فيه جواز عرفى من سنه ولا اتنين ولا عشرة؟
ــــــــــ
عمرى ما حبيت الهزار التقيل
مقصدش الهزار باليد لانه هزار رجالى، لكن بقصد بالهزار التقيل ان حد مثلا يخبى مفاتيح شخص تانى ويقعد صاحب المفاتيح يدور عليها ويقلق وبعدين يطلع الاول ويقوله هييييه ضحكت عليك
مبحبش اى هزار بيسبب قلق او خوف حتى لو بعده قلنا انه مجرد هزار
علشان كده كنت بسمع واحد بيحكى وفطسان على روحه من الضحك انه قال لزميله فى الشغل ان زميلهم التالت اتوفى فى حادثة، والتانى اتأثر وتضايق وبعدين الاول بعد ساعة قاله انه كان بيهزر

اللى بيحكى كان عمال يضحك على الموقف، انا بصراحة فى سرى قلت انا مشفتش رخامة ولا انعدام ذوق وعدم تقدير للاستظراف من عدمه زى نوع الهزار السمج ده
ـــــــــــــ
بوست بنت القمر عن الحواجب اللبنانى فكرنى بحاجة
خرجت مع مصرية ولبنانية للشوبنج فى دبى، والاتنين شيك بالمناسبة
لاحظت ان الفرق الجوهرى بين الاتنين ان المصرية دايما عامله حسابها متخترشى ومتشتريش حاجة ملفتة، بتدور على حاجة شيك بس مش ملفتة، فى حين ان اللبنانية يمكن تعجبها حاجة بس ضرورى تكون ملفتة
بجد الملحوظه دى كانت واضحة جدا عند الاتنين، وفكرتنى بماما كانت اول عيب تقوله على حاجة ممكن نشتريها:
لا دى شكلها ملفته قوى

اتربينا على ان الحاجة الملفتة غلط
ـــــــــــــ
مش عايزة اتكلم فى الدين علشان ليه مفهومى الخاص جدا فيه
ولكن مش قادرة امنع نفسى اقول ان الانتقادات المستمرة من الشيخ القرضاوى للشيعة لمصلحة مين؟ ولو كانت ايران سياسيا اكثر قربا لدول الخليج كان هيقول نفس الانتقادات؟ أشك
ــــــــــ
بحب روبى وبحب اغانيها وشكلها ورقصها مهما يقولو عنها، وكل ما حد يقول مطربات العرى ومش مطربات العرى ببقى عايزة اقول اللى مش عاجبه ميتفرجش، لكن ميفرضش رأيه علينا بدعوى حماية الذوق العام، وهو مين أساسا له الحق انه يحدد الصالح وغير الصالح للذوق العام؟
اغنيتها الجديدة ظريفة ومشغلاها طول الوقت بس الفيديو يعنى، مفيهوش جديد
ـــــــــــ
واحدة غلبانه مرات واحد حرفى متجوز عليها وهى عايشة مع اولادها
زوجة رجل اعمال ملياردير وجوزها عمال يتجوز ويطلق ويحب ويسيب والمجتمع كله عارف قصصه وهى متقبلة وعايشة
زوجة رئيس أكبر دولة كانت حكاياته بيتناقلها العالم، وقصته مع المتدربة فى البيت الابيض تفاصيلها الخاصة جدا على كل لسان، والحياة تستمر

الامثلة مختلفة فى مظهرها وفى دوافع الزوجة للقبول بواحدة تانية أو كتير يشاركوها فى جوزها سواء بجواز او علاقات، ولكنها مشتركة فى الجوهر ان الست عكس الراجل ممكن تتعايش مع الوضع ده، وبقول أن التفسيرات الساخرة عندى بتشير لحاجة من اتنين

إما الست شايفه ان الراجل حاجة مهمة قوى فى حياتها ومستعدة عشان وجوده تتنازل عن واحد من اهم حقوقها وبأى تمن حتى لو شاركتها فيه واحدة تانية
أو
الراجل حاجة مش مهمة قوى بالنسبة للست وعندها الاولاد والوضع الاجتماعى واى مظاهر تانية أهم لدرجة ان مشاركة اخريات ليها فى جوزها مش بالاهمية القصوى عندها

معرفش انى تفسير أسوأ من التانى؟

21 comments:

someone in life said...

العزيزة بلاك كايرو روز

عفوا انت فهمتي تعليقي علي البوست الثاني خطأ

انا مش قلت انك كتبتي البوست علشان حد معين لا اطلاقا
انا قلت فيه اتنين من زوار المدونه انا اعرفهم جيدا و انتظرت تعليقهم علي هذا البوست واحد منهم علق كما توقعت و التاني عمل حاجة تانية فاقت التوقع

عموما طبعا لك كل الحرية في كتاباتك و لأراء زوارك و الا ما كان التدوين
أردت التوضيح فقط و اعتذر عن التعليق السابق او مضايقه احدي المعلقات لديك و ان كنا نقرأ التعليقات لانك تركتيها مفتوحه فلا تستطيع العين تخطي سطور دون أخري

تحياتي

Desert cat said...

احنا فى افلامنا نتفنن فى عرض السيئ والتفاخر به ايضا العبارات الوقحة يرددها المراهقون فى الشوارع
المصريات بالرغم من انهم تربوا على الشياكة وعدم لفت الانتباه فى اللبس الا ان مبرر كل متحرش انها لابسه لبس مثير ولو ربنا كرمه وسافر بره مصر ممكن يشوف الاثارة اللى بجد قدامه بس مش يقدر يبص مش يمد ايده لانه عارف ان فى قانون لو تعداه نهايته هتكون مؤلمه
الشيخ القرضاوى لازم يجامل العروسة هو يعنى ياخد الجنسية كدا مش المفروض يبين الود والامتنان ولا دجل ولا شعوذه كله باسم الدين
اخر حاجه واسفه انى طولت عليكى
اعتقد ان من ترضخ لنزوات رجل ان كانت تملك الوضع الاجتماعى وحالتها الاقتصادية جيدة بوجودة او عدم وجودة فلن تستمر معه اذا ظهرت لها نزواته فاصعب احساس على المرأة هو ان تشاركها اخرى زوجها فكيف اذا كانوا اخرياااااااااات
:)
محبتى يا قمراية

An Egyptian said...

بالنسبة لموضوع السيجارة لسه زى ماهو بيعتبر علامة الرجوله و ده ان دل على شيىء فيدل على اننا ليس كغيرنا من امم
بنحتاج وقت اطول عشان نغير افكارنا حتى لو بدونا اننا غيرناها خلاص

المجتمع بيوفر اى حاجة هنا مادامت فى غطاء شرعي فبديهي ان الجواز العرفي يبقى منتشر و مقبول حتى برضو لو بدا انه غير مقبول

و بالنسبة للهزار التقيل فده سبب اعتقادنا اننا شعب دمه خفيف بجد انا اعتقد اننا اكتر شعب دمه تقيل فى العالم اتقل من الانجليز كمان

المصرية مقموعة و متبهدلة بجد فى موضوع الحرية و الحقوق الاناث هما اكتر فئة مضطهدة فى الشعب المصري

راجى said...

الهزار التقيل والبايخ فعلا غير انسانى بالمرة

مثلية تبحث عن ذاتها said...

العزيزة روز
هبدأ الاول في الرد على بعض النقاط على ردك اللي فات
شوفتي الحته الجد دي (:
الروج يا ستي مش هقدر احكي عنه عشان بتعب هههههههههه

انا كمان اعرف واحده مقربه ليا عملت العمليه بتاعت المناخير و بقت تحفه دلوقتي لو عايزة تفاصيل حاجه قوليلي اسألك بس بيتهيألي اشوفها الأول و أوقلك رأيي لول
على فكره انا علقت على التايجر عشان انا كمان بحب شكله اوي و ليا و واحد قريبتي بموت فيها بتحبه و مفضل بالنسبالها اوعي تكوني قريبتي هههههههههه

اخدت بالي انك بتحافظي على نظافه سنانك ( من التسوس ) *****

اما عن احوالي الشخصيه فتقدري تقولي بحاول ابقى احسن لما بتمتعيني ببوستاتك الرائعه اللي بستناها و انا مكتأبه عشان انسى (دراما)
-----------------------------------
السجاير شكلها حلو على الستات احلى من الرجاله معرفش دي وجهة نظري الشخصيه و لا ايه

اما بقى عن الجزء التاني من الدردشه طبعا هيقلب نميمه عشان مستحيل تقولي الوشوشه دي و معرفش منك
مين رجل الاعمال المشهور و مين الممثله الراحله و مين المطرب اللي مراته ظبتته؟؟؟؟

اما موضوع الاهبل التافه اللي بيعمل مقالب سخيفه زي اللي حكيتي عنه فانا بصراحه مش قادره ارد عليه عشان الحاجات دي بتحرقلي دمي وانا دمي نوعه نادر و مش موجود فالسوق

اما اللبنانيه والمصريه فانت موتيني من الضحك لأن فعلا الموضوع واقعي جدا واكيد باين فلبس حبيبه قلبي هيفاء
موضوع الدين خلينا نعديه
اما عن روبي فأنا بعشق صوتها واغانيها ومش مهم عندي اي حاجه تانيه هي بس لو تعملي مفجأة و تغير شكل الكليبات بتاعتها وتعمل حاجه كده واو بصراحه انا بقول روبي لسه محدش اكتشفها فعلا
موضوع تعدد الزوجات برضه مليش نفس ارد عليه
ياريت رجاء خاص مني خاصا اليومين دول متتأخريش فالبوستات وافتكري انك بتعمليلي خروج من الحاله اللي انا فيها وهبقى ممنوالك بشكل خاص
ومش هشحت اكتر من كده هههههههههه

قلم جاف said...

-ليس دفاعاً عن القرضاوي: اتفقنا في مصر على أن الدعوة لدين في أوساط الدين الآخر مرفوضة.. فكيف نقبل في المقابل الدعوة لمذهب في أوساط معتنقي مذهب آخر؟ أم أنه كلما نخطو خطوة للأمام نعود عشراً للخلف؟

ثم ألا يبدو ارتباط الدين بالمذهب بالنموذج السياسي مخيفاً؟ أم أنه يجب أن تأتي الطوبة في المعطوبة ونقول "أي" كي نشعر بخطورة الفكرة نفسها؟

-بمناسبة العرفي: أشك وبقوة ولي أسانيدي أن "تامر حبيب" كان ينتوي جعل علاقة "أحمد السقا" بـ"منة شلبي" في فيلم "في العشق والهوى" علاقة غير شرعية في الأساس وليست زواجاً عرفياً.. وتراجع إرضاءً للجمهور المحافظ (وليس لجهاز الرقابة على المصنفات الفنية الذي لا يجد مشكلة في تناول "النزوات" منذ فترة طويلة).. وتبريراً لطلب "بشرى" -زوجة "السقا" في الفيلم للطلاق.. موصلاً إلينا أن المرأة -كما يرى "حبيب"- تستطيع أن تتسامح في دخول زوجها في علاقة غير شرعية مع امرأة أخرى على أن يتزوج بتلك الأخرى!

قلم جاف said...

-روبي: ألبوم روبي السابق أفضل بكثير من الأغنية السيئة التافهة التي عادت بها .. حتى وإن سلمنا بأن "مشيت ورا إحساسي" -اسم ألبوم روبي السابق- أظهر نقاط الضعف في صوت روبي- وما أكثرها- فليس بهذا الشكل "المؤذي" لها ولنا في "يالرموش"..

لا يفترض أن تبقى "روبي" مع "شريف صبري" إلى الأبد.. لكن "شريف" كان يملك بوصلة فنية وضعتها على أول الطريق.. ويكفي أن روبي ذات الصوت الضعيف لها أكثر من

mega hit

من ضمنهم "ليه بيداري كدة" قبل بضع سنوات..

soly88 said...

العزيزه بلاك روز
مستنى بوست الصدفه
الهزار بالطريقه اللى قلتيها اسمه وقاحه
واعتقد ان العلاقه الجنسيه اكثر احتراما من الزواج العرفى
واى ست لا تقبل بعلاقات زوجها ولكنها بتكبر دماغها حتى ولو ده على حساب اعصابها
ام روبى فبحب اتفرج عليها جدا
القرضاوى اجده داعيه ليس بوزن الشيخ الغزالى او حتى الشعراوى ولا اعرف سر الدعايه التى تحيط به

blackcairorose said...

Someone in life

أبدا يا عزيزتى لا داعى للاعتذار

وسوء الفهم وراد بيننا جميعا

وتقبلى دائما مودتى واعجابى باحاسيسك المرهفة وكلماتك الصادقة

blackcairorose said...

قطة

بس يا عزيزتى فيه اكبر من هيلارى كلينتون؟ اهى غنية وتوب فى التعليم والمركز والشهرة والبرستيج وقوة الشخصية ومع ذلك رضيت وسكتت ووافقت واستمرت رغم ان كل الدلائل برضه بتقول ان بيل كلينتون ماشى فى علاقاته وآخرها من كام شهر لما كانت هيلارى لسه مرشحة من الحزب للرئاسة وطلعت اشاعات واخبار عن علاقة جديدة

يمكن هيلارى شافت ان مصلحتها فى انها تفضل متجوزة اكبر من مصلحتها من الانفصال بغض النظر عن ايلام الخيانة لها من عدمه

اجندا حمرا +Heart Beat said...

مدلولات كتيره في افلامنا ياروز زي لما واحد يكون متضايق يقوم مولعه سيجاره و لا واحد عايز ينسي حبيبته يقوم شاربله كاسين

بخصوص الجواز العرفي لسه سامعه انهم عايزين يعملوا قوانين للحفاظ علي حقوق المرأه المتزوجه بورقه عرفي و ده في حد ذاته و في رأيي الشخصي اعتراف بزياده حالات الجواز العرفي و مش بعيد يجي اليوم اللي يتلغي فيه الجواز الرسمي و يحل مكانه الجواز العرفي

الهزار السخيف ده بيضايقني اوي و كتير زمايلي بيعملوه في واحد زميلنا دايما ياعيني ينسي موبايله يحطه في اي حته و يفضل يدور عليه و لما بيجيلي بقوله ده مع فلان اصلي مابعرفش اكدب
:)

اللبنانيات عايشين حياتهم و مش بيلتفتوا اوي لكلام الناس المهم انهم يستمتعوا بحياتهم و خلاص لكن احنا كمصريين ساعات بنخاف من كلام الناس

في رأيي ان اللي بيعمله القرضاوي محاوله منه انه يكون في بؤره الأحداث ليس الا لكن لو تعارضت مصالحه الشخصيه مع اللي بيقوله صدقيني حيرجع في كلامه و ده حال كتير من علماءنا للاسف

فيه ست تقبل انها تتجوز واحد متجوز لمجرد انها مايتقالش عليها عانس و فيه واحده ماتقدرش علي كده
في رأيي هي بترجع للست و تركيبتها النفسيه

بوست مميز و غني
تحياتي ليكي ياجميل

مياسي said...

روزا

أنا حبلشلك وحده وحده:)
مفهموم الشب اللي بيدخن ما اختفاش لسا من أرض الواقع عشان يختفي من السينما؛ وبصراحه أنا لحد هلأ مش قادره أحدد من اللي بيكرس التاني؛يعني هي الفكره صح بالأساس و لا الإعلام بيخليها صح من كتر ما بيفرضها علينا
بس بقدر أحكيلك أنو من واقع إني لسا بزور جامعات و بشوف طلاب؛كتير شباب عندهم هاد الاعتقاد موجود؛ انو بس يدخن فهو "جذاب" خصوصا للبنات يعني!!
في حد هون علق غ فكرة الكاسين؛ وأنا كمان حابه أضيف أنو هاي الفكره بتقهرني؛يعني أنو الواحد بيكون طول عمره محترم وبيعرف ربنا؛ وفجأه عند أول مشكله هوب يروح "نابطلوه كاسين" زي :انو طول عمرو في خماره؛أو فكرة أنو الزلمه ما بيقاومش أي وحده وعندو دايمن استعداد ينام معها؛ شوية أفكار نمطيه بتجلط الصراحه!!!
ــــــــــــ

الزواج العرفي؛ مجرد محاولة لتجميل الخطأ مش أكتر؛ ولو المجتمع بيقبل الخطأ هاد زي ما هو؛ ما رح تشوفي لا زواج عرفي و لا يحزنون؛ كل شي حيكون هيك عالمكشوف

ـــــــــــــ

وأنا كمان بكره المزح البايخ؛ عمري ما عملت مقلب في حدا و لا بحب ينعمل في مقلب؛لأني من النوع اللي بيتدايق؛ والإشي اللي بيدايقني بحبش أعملو في غيري أبدا؛ هو طبع أهبل بعرف؛ بس أنا هيك!

ـــــــــــــ
ذكرتيني بوالدتي؛مره كنا بنتفرج على عرض أزياء لبناني؛فهي صارت تعلق على اللبس و الاكسسوارات وهيك؛ صارت تحكي؛ لاحظي كيف كل شي لبناني كبير؛ الحلق مثلا؛ الورده اللي على الفستان؛ هم بيحبو كل شي يكون مبين و بارز جدا؛ اللبنانيين إجمالا عندهم حب للحياه؛ واللي زاروا لبنان حكو لي انها زي اوروبا ما حدش اله خص بالتاني وكل واحد حر؛ انا ما زرت مصر أكيد؛ وما عمريش انتبهت لنقطة انو الشي مش لازم يكون ملفت هاي؛ بس انو اجمالا؛ الذوق المصري بيميل للتحفظ في أشياء كتيره؛ ابتداء باللبس و انتهاء بالحديث العادي؛يعني انا دايمن كنت استغرب من الاولاد المصريين لما الواحد منهم ينادي ابوه او امه: "حضرتك"!!!
بس هو نوع من التربايه فعلا و لا شو؟؟

بتعملي شوبينج في دبي؟ نقطه عليكي؛انتي عايشه في الامارات زي ما اتوقعت!

ــــــــــــــــــــ

موضوع القرضاوي مش عارفه؛بس يعني لازم تربطيه بقطر و قناة الجزيره و أظن كل شي بصير مفهوم هيك؛ و بحب أحكيله:الوضع مش ناقص!!

ــــــــــــــــــــ

عن روبي؛حلوه طريقتك هاي؛ زي كأنك بتحكيلنا:اتفلقو و ما حدش يعلق:)

أنا بشوف روبي ظريفه؛بس الكليب هادا مش عارفه؛ يعني غيرنا المخرج وما اتغير معها شي؛ لسا المفاتن اياها هي اللي لازم تبين في الكليب؛ يلا منيح اللي خلصت من شريف صبري؛ هاي البنت محتاجه مدير أعمال زي "جي جي لامارا" بتاع نانسي عجرم؛هيك رأيي

ملحوظه تانيه: مش عارفه كل ما اسمع الاغنيه بفتكر المثليات ليه!
ـــــــــــــــــــ

موضوع الستات: والله يا عزيزتي في هيك و في هيك؛ يعني في اللي هامها الزلمه بالأساس؛ وفي اللي بيهمها الوضع؛ وانا بلاحظ ان نسبة الوضع أكتر؛ وبما أنو المجتمع بيقبلهاش لحالها؛ والوضع خربان خربان؛ والصراحه مش موجوده و السعاده كمان شي خيالي؛ فليش ما تكسب الوضع و تحمدالله عاللي هي فيه؛ نسوان كتير مش لاقيه ضفر راجل؛ وهي أحسن من غيرها!!!

تحياتي ليكي: وبحب أحكيلك انو الشتا ابتدى رسمي هون؛ وانا دخلت في مرحلة اكتئاب مخففه بسبب ذلك:)

sham3on said...

وعلي كل لون يا باتستا

blackcairorose said...

An Egyptian

خفة الدم الانجليزى مشهورة على مستوى أوروبا والغرب عموما وكلمة

British humour

هى مقابل كده للى احنا بنقوله عن خفة الدم المصرية

لكن يمكن اللخبطة بتحصل هو اننا بنخلط البرود الانجليزى بثقل الظل، يعنى يمكن البريطانى تكون مواقفه وردود افعاله باردة وهادئة دون انفعال أو ضجيج زينا فى مصر، ولكن ده مش معناه ان دمه تقيل ابدا
والدليل المسلسلات الكوميدية البريطانية وهى مشهورة جدا على مستوى العالم

معاك حق بنحتاج وقت اطول بكتييييييييييييييير علشان نغير مواقفنا

شرفت المدونة واطيب تحية

blackcairorose said...

راجى

فعلا واللى كنت بستغربله ان اللى بيحكى مش حاسس ابدا بكده لكن عمال يضحك وهو بيحكة قد ايه الموقف كان مضحك

المهم لما سألته عن رد فعل زميله لما عرف انه بيضحك عليه قالى انه قعل يشتمه بهزار ويضحك برضه!!

فالظاهر ان الطيور على اشكالها تقع حتى فى الهزار

لو حصل معايا متهيألى هبين بطريقة جد جدا انى مبحبش الهزار ده وانه مفيش معنا تسبب لى الم لمدة دقايق وبعدين تقول انك بتهزر

blackcairorose said...

مثلية

انا برضه زى ما قلتلك صديقة عملت العملية ومناخيرها كانت وحشة قوى فى الاول

الظريف بقى انها مقالتش انها عملت عملية وكنت انا مسافرة ورجعت مصر وقابلتها ولمدة يمكن ربع ساعة بنتكلم ومركزتش قوى انها عملت عملية لاننا كنا وسط مجموعة وهى مكنتش قاعدة قريب منى، وبعدين اخدت بالى اول ما بصت هى جنبها، لان البروفيل الجانبى بين منظر المناخير والتعديل فيها جدا، لكن من النظر لوجهها من الامام مكنش سهل انى الاحظه

الناس قامت وبقينا انا وهى، مبقتش عارفة اعلق ولا اقول ايه، كنت عايزة اقولها ان العملية فعلا حلوة وان شكلها حلو، بس كنت محرجة وقلت مش هفتح السيرة الا لو هى قالت حاجة، بس هى مقالتش وانا معلقتش لحد ما خلصت القاعدة

بالنسبة للسجاير فهى بالنسبة لى يك يك يك مبطقش ريحتها خالص وبتخلينى كح كح كح !!!

دينا وحسام ابو الفتوح
سعاد حسنى وجمعة الشوان
حكيم ومراته الاولى ام اولاده والتانية

ان شاء الله تبقى بخير دايما، وشكرا على الكلام الظريف كالعادة

blackcairorose said...

قلم جاف

رغم انى مشفتش العشق والهوى ولكن افهم المقصود، وبقول مثلا فيلم زى الحب الضائع لو اتعمل دلوقتى هيبقى برضه واقعى اكتر ان البطل يتجوز الصديقة عرفيا عن انه يبقى فيه مجرد علاقة

بس اللى بنرفزنى زى ما قلت فى التدوينة ان الجواز العرفى بقى غطاء حتى ولو لم يكن هناك جواز، وانه فى بعض الحالات كلمة جواز عرفى بيكون معناها مش جواز ولا اى حاجة ولكن مجرد ان فيه علاقة جنسية ولكن الاسهل والابسط انه يتقال عنها جواز حتى ولو مكنتش جواز

وتفسيرى الخاص ان علاقة عبد الحليم وسعاد حسنى كانت كده وده اللى يفسر الاختلاف الكبير حواليها ، فسعاد حسنى كانت بتقول انها جواز عرفى ومفهوم المقصود بيها ايه، لكن اهل عبد الحليم واصحابه بيقولوا انه مكنش فيه جواز من غير طبعا ما ينفوا انه كان فيه شىء أخر

يعنى الكلمة نفسها بقت لعبة كل واحد وقت بيلاقى مصلحته ان يلعب بيها هيلعب بيها حتى لو مكنتش حقيقة لانه فى النهاية الجواز العرفى غير العلاقة الجنسية، على الاقل من ناحية النية

روبى

شريف صبرى من اكتر المخرجين تميزا ـ نسبيا طبعا ـ كفاية انه كان بيغير النمط المعروف جدا عند كل مخرجين الكليب فى مصر فى انه كان بيعمل كليبات مش متصورة فى مناطق طبيعية وبيلجأ لخلفيات تعتمد فقط على التصميم والالوان زى مخرجين الكليب الغربيين اللى مستواهم مميز

زى فى ليه بيدارى كده، محدش بيخرج بخلفية الوان واضاءة دلوقتى كلهم بيستسهلوا بتصوير منظر طبيعى سواء بيت او جنينة او بحر او خضرة او غرفة او او او وطبعا ده نقص من المخرجين فى التخيل او القدرة على الخلق، حتى الاسماء المميزة شوية زى احمد المهدى او محمد جمعة مبيعملوش حاجة فيها ابداع ابدا فى رأيى

طولت معلش بس واحد من احلامى زمان انى اكون مخرجة !!!

blackcairorose said...

سولى

العلاقة ام الجواز العرفى وايهما اكثر احتراما بالنسبة لى سؤال صعب، وكل شخص يختار ما يناسبه ولكن على الاقل فلنسمى الاشياء باسمائها، وهو ما اراه جديرا بالاحترام

بوست الصدف محتاج فقط شحذ قوى للذاكرة، لانه نظرا لانى كما قلت الصدفة لم تلعب دورا مؤثرا فالذكرى منها بالتالى تصبح ضعيفة

ربما اكتب ايضا عن صدف مؤثرة فى حياة آخرين أعرفهم

blackcairorose said...

اجنده حمرا وهارت بيت

اطيب تحية ولى فترة مزرتكوش فى المدونة اعذرونى بس جايه حاللللا

blackcairorose said...

مياسى

انا لحد ما بابا اتوفى من كام سنة كنت بقوله حضرتك مش انت، وده شىء عادى على الاقل فى عيلتنا، يعنى حتى اخواتى اللى اكبر منى بكتير وولادهم متجوزين برضه كانوا بيقولوا لبابا حضرتك

لكن الجيل التانى فى العيلة مختلف، يعنى اولاد اخواتى مش بيقولو لامهاتهم او ابائهم حضرتك ولكن بيقولوا انت

الامور مختلفة دلوقتى عن قبل فى طريقة معاملة الابناء للاهل

اعرف راجل ابنه الكبير وهو طالب فى الجامعة بيتكلم معاه زى ما بيكون بيكلم صاحبه

واعرف كمان اب بيخرج هو وابنه بيروحوا يصاحبوا بنات ، والله الكلام ده جد ومش هزار والام موجودة وطبعا مش عارفة ان الزوج والابن متفقين عليها

بصى انا هكتب موضوع بالذات عن الشتاء وهاهديهولك!!

He and She said...

The lebanese women know pretty well how to invest their femininity,They are socialized like that, period.
That is based upon real experience