Sunday, May 25, 2008

ألغاز صغيرة

ألغاز صغيرة ليست ذات أهمية ولكن لأنها الغاز فقد ظلت عالقة بالبال

اللغز الأول
.
حقيبة ورقية خاصة بى تضم:
بلوفر أخضر فى أبيض جديد بالتيكت غالى الثمن
حذاء رياضي قديم
ثلاثة كتب
عدد من شرائط الموسيقى
بلوزة مستعملة

مرت الحقيبة بين أيدي ثلاثة أشخاص هم صديقتي المقربة هدى وزميلي نديم وزميلتي الجميلة ذات العيون الخضراء سميرة، وحين عادت حقيبتي إلى بعد سفري لمدة شهر اكتشفت عدم وجود البلوفر
سألت هدى بصراحة لأنها الأقرب فقالت أنها لا تعلم ولم تفتح أساسا الحقيبة لترى ما بداخلها لأنها كانت على جدول الطيران وأرادت تركها لسميرة فلم تجدها، وقد أعطتها لنديم ليسلمها لاحقا لسميرة، سألت نديم ـ دون ذكر ضياع البلوفر ـ فقال أنه أخذ الحقيبة من هدى وظلت معه ليومين وأعطاها لسميرة فورا بعد وصولها، سميرة قالت أنها أخذت الحقيبة من نديم وبقيت عندها حتى أعطتها لهدى مرة أخرى لتظل معها حتى عدت أنا من سفري واسترددتها

لا أكاد أصدق أن واحدا من الثلاثة سرق البلوفر
هدى مستبعدة تماما، نديم ماذا سيفعل به؟ يعطيه لخطيبته مثلا؟؟ افتراض مضحك، سميرة الجميلة ذات الدم الخفيف؟؟ ولما؟ ينقصها مال أو ملابس؟؟ طبعا لأ
ـــــــــــــــ
.
اللغز الثانى

نفس الصديقة هدى
جمال كان معجب بها ولكنها أوضحت له بكل ذوق أنها غير مهتمة
حسين أعجب بها وعرف كيف يصل لقلبها، واتفقا على عدم إعلام أى شخص حتى التأكد من الخطوة التالية، وكنت أنا الاستثناء الوحيد لصداقتي بهدى، ثم بدأ حسين مع الوقت يدعى أنه اكتشف عدم ملائمتهما لبعض وقرر إنهاء العلاقة رغم الم هدى الشديد

لم يكن بينى وبين جمال استلطاف كبير رغم خفة دمه، فى حين كنت اقدر حسين وأرى فيه صديقا ذا شخصية مميزة ولكن إنهاءه لموضوعه مع هدى بهذا الشكل جعلني في حالة استياء منه

فى حديث بينى وبين جمال ورد اسم هدى فقال لى:
ـ حالتها عاملة ايه بعد ما حسين قلبها بالمنظر ده؟
ـ قلبها؟ بتتكلم على ايه؟
ـ متعرفيش انهم كانوا ماشيين مع بعض وبعدين حسين سابها؟
ـ لا معرفش ومين قال لك الكلام ده؟
ـ هو حسين نفسه حكالى وقالى انه كان أساسا بيتسلى

لم اصدق ما اسمعه وذهبت فورا لحسين ولمته على كلامه عن هدى بهذا الشكل فلم يرد وأخذني من يدي في لحظتها لجمال وقال له أمامي

ـ انا جبت سيرة هدى معاك فى اى موضوع؟
ـ آه وقلتلى انك كنت بتتسلى وسبتها
ـ انت كداب الكلام ده محصلش
ـ لا انت اللى كداب والكلام ده حصل

الموقف غريب فالاثنان أمامى يكذّبان بعضهما بثقة مائة بالمائة وأنا لا اعلم من الصادق ومن الكاذب
.
ـــــــــــــــــ
.
اللغز الثالث

مديحة تعرفت عليها فى إحدى المناسبات، ظللنا نتحدث لأكثر من ساعة، مصرية تربت فى كندا وأنهت دراستها هناك ثم تزوجت مصري مهاجر أيضا، ثم تولى زوجها إدارة فرع شركة كندية كبيرة فى القاهرة فعادت لمصر، عندها ولد وبنت

أحسسنا بكيمياء بيننا، ثم تقابلنا بعدها بيومين وكنا نتحدث فإذا بها تذكر فى طيات الحديث أنني قمت بعمل دراسات عليا من الخارج، فسألتها كيف عرفت بهذه المعلومة، فأجابت أنني أخبرتها بذلك فى لقاءنا السابق
أقسم أنني لم أذكر أبدا موضوع دراستي بالخارج فى لقائنا السابق، ولا يوجد بيننا معارف مشتركة يمكن أن تكون قد علمت منهم، حتى لو علمت من آخرين ما يدعوها للادعاء أننى قلت لها؟؟ لا أعرف، ولكن فى النهاية وضعت احتمال جزء جزء من الصفر أن أكون قلته فقط لكى يستريح عقلي

هذا الموقف لا يعد شيئا مقارنة بما حدث بعد ذلك

اتفقت أنا ومديحة أن نتقابل يوم الخميس وسأتصل بها مساءا لتحديد المكان والوقت، ولكنى نسيت تماما الموضوع وكنت في زيارة لشقيقتي فى مصر الجديدة مساء الخميس وفى طريق عودتي للمهندسين تذكرت فاتصلت وكلى حرج واعتذرت عن عدم اتصالي ولكنها دعتني لزيارتها فى المنزل وقالت أن زوجها مسافر وأن أولادها ناموا بالفعل، حاولت الاعتذار لتأخر الوقت وازدحام الطريق من مصر الجديدة ولكنها أصرت وأعطتني العنوان، وقبل وصولي بدقائق اتصلت بها مرة أخرى وقلت لها أنى تقريبا أمام العمارة

شقة واسعة وجميلة على النيل، مفروشة بعناية ستايل أمريكي، وجدت مديحة ترتدى جينز وتى شيرت وجلست أنا على كنبة حمراء وأمامي النوافذ الزجاجية الواسعة التي تسمح برؤية أضواء النيل، وسألتني ماذا أشرب فأجبت عصير

جلست وحدي انتظر عودتها بالعصير فى الشقة المظلمة الهادئة جدا ثم بدأت ألاحظ في الزجاج أمامي أن هناك انعكاس لخيالين فى الزجاج، مما يعنى أن خلفي بمسافة ما شخصين وليس فقط مديحة رغم عدم صدور أي صوت يدل على وجود شخصين

سألتها حين عادت:
ـ فيه خيال حد فى القزاز ده مين؟
ابتسمت مديحة وصمتت لثوان ثم قالت:
ـ ده عفريت

لم ادر هل تمزح أم تتحدث بجد فسألتها:
ـ لا بجد مين؟
ـ ده جوزى
ـ هو جوزك هنا؟ انتى مش قلتى مسافر؟ انا آسفة أكيد عملتلكو إزعاج فى الوقت المتأخر ده
ـ لا أبدا لو فيه إزعاج كنت قلتلك

شربت العصير وبعدها بخمس دقائق استأذنت ونزلت رغم أننا كان من المفروض نسهر
الموقف غريب
ـ لماذا تدعى ان زوجها مسافر وهو موجود؟
ـ لماذا يتحرك زوجها خلفي مع تعمد عدم صدور أى صوت منه، ولا أقول طبعا لماذا لا يأتي ويسلم
ـ إذا لم يكن هذا الشخص زوجها مثلا فقد كان لديها الوقت الكافي لتجعله يخرج قبل وصولي
ـ لو عاد زوجها من السفر أو لو أن هذا شخص آخر لماذا تصر أنى أزورها رغم أنى نسيت الموعد أساسا وحاولت الاعتذار عن الزيارة والوقت متأخر؟
ـ في ردها على لم تبرر مسألة وجود زوجها ولكنها حولت الحديث إلى أنى لم أسبب لهما إزعاج، أي أنها تعمدت عدم توضيح الموقف

لو لم تكن مديحة وزوجها من عائلة معروفة ومنصب زوجها هام، لتخيلت نية سيئة، ولكن المظهر الخارجي لها ولمستواها يتناقض مع أية أفكار أخرى محتملة

اتصلت بى مديحة بعدها بأسبوع وسألتني لماذا اختفيت، ثم اعتذرت عما حدث يوم الخميس، لم افهم عن أي شيء تعتذر بالضبط ولكنى لم أرد فتح الموضوع مرة ثانية، فادعيت أن هناك مشاغل وأننا سنلتقي قريبا مرة أخرى

لم أتصل بعد ذلك ولم تتصل هي
.

36 comments:

Ahmed Shokeir said...

من وقت لآخر وفي رحلة الحياة تمر بنا أمور تغيب فيها الحقيقة ويكون سرها مع الآخرين .. وتطول الحياة أو تقصر وتظل الحقيقة غائبة وحل ألغازها مع الآخرين

ولكن احيانا تكون راحتنا في عدم معرفة حلها

Post of the day :)

بنت القمر said...

من راقب الناس مات هما
اللغز الاول
لازم يكون حد فيهم حرامي
يا اما انتي مش مركزة انك حطيتي البلوفر اصلا
واذا كنتي متأكده
يبقا حد فيهم حرامي وبلاش الله يكرمك مش ممكن ومستحيل
نصيحه حرصي من التلاته
:شخصيه سيكوباتيه بارنوييه متشككه
***********
اللغز التاني
واحد فيهم كداب
طبعا وشكله كده حسين
وبعدين هو لسه الناس بتقول ماشيين مع بعض!!
؟؟ايه النيله دي
وانتي كده ولعتيها حريقه
:))
الله ينور
*********
بالنسبه لمديحه واضح انك مخدوعه فيها وواضح انها كانت بتجمع معلومات عنك
ووصلت لحكايه الدراسه دي
ممكن يكون حد معجب بيكي وهي بتوريكي لحد أوحد بيدور علي عروسه أو
هي سيئه السلوك
ولما قفشتيها ولاحظتي الخيال والحكايه هاتتكشف
قطعت العلاقه عشان متجبش لنفسها بلوة
واعتقد ان الشخص الموجود كان عشانك انتي مش عشانها
وده يبرر عدم ظهورة
وربما كان في نيه سيئه تجاهك مدبرة
حتي لو كنتي مجوزة
خلي بالك منها
الكدب دايما... وراه شيئ غير طيب
اوصيك بالحرص
فكرتيني ببنت مدونه اسمها مروة الزارع كانت عامله بوست شبه كده عن مقابلتها لصديقه قديمه خدرتها في شقتها وكانت علي شفا مصيبه
المهم خلي بالك في كل الاحوال
تحياتي

مثليه said...

موقف البلوزة وارد احيانا يصدر اشياء لا تتوقعيها من اشخاص يستحسل الشك فيهم و من يدري
انا لن اتهم احد ولكني اعتقد انك شكك الاكثر يميل نحو سميره ذات العيون الخضراء
الموقف الثاني ايضا ربما يحدث فحسين صديق لك وربما احث بالخجل الشديد لظهوره بمظهر الندل امامك وهذا يحدث او ربما ينتقم جمال لكرامته وهذا وارد ايضا وكونك الوحيده التي تعلم بالموضوع فهذا شيئ ربما ليس صحيح وان تكون حكت هدى لشخص اخر ولكنها قالت لك انك الوحيده حتى لا تتكلمي فالموضوع مع هذا الشخص ربما حكت لك احداث و هناك احداث خفيه روتها لنلك الشخصية المجهوله ولا تتعجبي من موقف جمال او حسين اب ان كان الكاذب من فهذا ايضا وارد
اما الغريب هو موضوع مديحه ولا أريد ان يذهب خيالي لبعيد ولكن لابد وان الموضوع له ابعاد انتي الوحيده القادرة على فك شفرتها وان لم يعد يعنيكي الموضوع و يؤثر فيكي لما كتبتي عنه اعتقد عموما عليكي فك اللغز بالتقرب لمديحه مره اخرى ان كان لديك الفضول

تحياتي

سمـــــــــا said...
This comment has been removed by the author.
سمـــــــــا said...

روز

أولا وحشانى اوى ووحشنى التعليق عندك وموضوعاتك اللى بتثير قرون استشعارى دايما دى :)

تصدقى ان انتى كلامك فى حد ذاته ساعات بحسه لغز بس بينى وبينك انا خبيثة
و ببقى فاهماه :)

نرجع بقى لالغازك القوية دى

اللغز الاول

بصى بالنسبة للبلوفر هو طبعا اتسرق واللى سرقه

اما يكون واحد من التلاتة واما يكون حد رابع لانك بتقولى انك كنتى حاطة الحاجات دى فى شنطة ورقية يعنى مفتوحة وعرضة ان اى حد من اصحابك يكون ساب الشنطة ولو لمدة دقيقة فى اى حتة واعتقد ان كلهم مضيفين يعنى ممكن يكونو سابو الشنطة فى مكتب او فى اى حتة لحظات واكيد ان السرقة مش محتاجة اكتر من ثوانى علشان تتم .

ثانى حاجة انتى ليه مستبعدة هدى ؟ علشان صاحبتك ؟ مش شرط انها علشان صاحبتك انها تكون امينة ولا شرط لانها صاحبتك هيكون المفروض انك عارفة كل اللى جواها وطبعا انا مش بقول انها هى بس احنا بنفرض كل الاحتمالات مع بعض وهديكى مثل حصل معايا انا شخصيا :

كان معايا بنت صاحبتى من ايام ثانوي وكنا جروب اصحاب وهى كانت صاحبتى جدا لغاية ما خلصنا جامعة واتجوزت وقعدنا فترة متقابلناش وبعدها اتقابلنا فى فرح واحدة صاحبتنا تانية

وكان وقتها لسة الموبيل 6600 نازل واشتريت واحد حيث انى غاوية تصوير فكان طبعا غالى بالمقارنة باسعار باقى الموبيلات ، واحنا قاعدين انا وهى على الترابيزة فى الفرح الموبيل رن فطلعت اتكلم فهى شافته قالت لى حلو اوى قلت لها ميرسى اتفضليه . وبعدين انا قمت ارقص بقى واهيص لصاحبتى فلقيتها جاية تسلم عليا وبتقولى انها هتروح وان جوزها جه ياخدها فقلت اوك وابقى اتصلى وكده .

وبعد كام دقيقة فجأة من غير مناسبة حسيت ان الموبيل اتسرق فرحت على الترابيزة فتحت الشنطة ملقيتهوش وكان قاعد على الترابيزة ناس كتير وكلهم شافوه معايا وشنطتى كانت من النوع الصغير المفتوح يعنى اى حد هيمد ايده هياخده .

فرحت قلت للعروسة اللى هى صاحبتى فقالت لى ازاى وقالت لجوزها ومسكو موبيل وحاولو يتصلوا فكان الموبيل طبعا اتقفل وفجأة لمبة مخى نورت ورحت جارية وهما افتكرونى اتجننت او حاجة ونزلت جرى وكان شارع ضلمة بس انتى عارفة احساسى ميكدبش قعدت ابص فى الشارع على مستوى بعيد وفعلا طلع ظنى فى محله لقيت صاحبتى واقفة بعييييد ومفيش جوزها اللى قالت انه مستنياها ولا حاجة فانا لما قربت هى كانت ساندة على عربية ومديانى ضهرها

فانا بمنتهى الهدوء رحت قربت منها وقلت لها هاتى الموبيل ... فهى من المفاجئة لقيتها بتطلعه من شنطتها وبتقولى ان بنتها اخدته من الشنطة وهى كانت هترجعهولى قلت لها فعلا !!!!! ايه دا وبنتك برضه اللى شالته من الجراب وشالت منه السيم كارد ؟؟ دى عفريتة اوى ( على فكرة بنتها كان عندها اقل من سنة ) وعموما محبش اشوف وشك تانى وانا لو مقدرة انك بقيتى واحدة متجوزة وعندك بنت انا كنت حبستك النهاردة . وسيبتها ومشيت .. ومن ساعتها مشفتهاش ولا سمعت عنها وطبعا الكل قاطعها بعد الموقف دا بس اللى وجعنى اننا كنا فعلا اصحاب اوى غير انها ماديا مستواها كويس جداااااا يعنى تقدر تجيب 500 موبيل

فاللى عايزة اوصل له ان مش حد علشان صاحبك او قريب منك معنى كده انه ملاك واحب اقولك ان الخوازيق كلها مبتطلعش غير من الاصحاب اللى بنتخيل انهم قريبين ومصدر ثقة . علشان كده انا اصاحب ايوة لكن اسلم دقنى لحد واديله ثقة عمياء ؟؟؟ أكيد نوووووو
وعلى رأى اصحابى سما بتشك فى ضوافر رجليها :)


اللغز التانى

انا شايفة ان الولدين اسوأ من بعض :

1- جمال اعجب بهدى وهى رفضته
2- حسين صاحب جمال وراح ارتبط بهدى فى السر
3- حسين ساب هدى بحجة انهم مش مناسبين وجرحها
4- جمال يوضح لك ان حسين شرد لهدى قدامه

فيه مثل بيقول ما شتمك الا من بلغك يعنى لو جمال محترم مكنش هيجى يقول الكلام اللى حسين قالهوله لسببين الاول انه المفروض صاحبه فالمفروض يحافظ على الكلام اللى صاحبه ائتمنه عليه حتى لو صاحبه انسان واطى وكان بيتسلى فعلا ، تانى حاجة المفروض ان الاخ جمال دا كان معجب بهدى وعارف انك صاحبتها فاكيد لما الكلام دا وصلها عن طريقه دا هيجرحها زيادة فمن الغباء انه يعمل كده الا اذا كان قاصد يجرحها نظام انتى رفضتينى ورحتى لحد تانى شوفى بقى التانى بيقول عليكى ايه .

بصراحة هما الاتنين عايزين100 قلم فياريت تدينى عنوانهم بس يا ريت ميكونش ايجيبت أير ههههههه



اللغز التالت

بصراحة هو موقف مريب وحقيقى لغز بس الحمد لله ان العصير مكنش فيه حاجة ونزلتى سليمة الله اعلم كان نيتهم ايه ههههههه انتى عارفة فيه رجالة وستات كده بيكون ليهم تفكير معين واكيد انتى فاهمة بقى وبرضه مش شرط انهم اغنياء ومراكز مرموقة انهم ناس سويين

بس عموما انا مش سهل ابدا ادخل بيت حد معرفوش كويس حتى لو بنت وعايشة لوحدها انا بطبعى قلوقة وبخاف على نفسى شويتين وبحب ادرس الناس كويس اوى قبل ما اخد خطوة مقابلات البيت دى

فانتى اسلم شىء انك بعدتى عن الشر او حتى الشك وغنتيله والافضل طبعا انك تحطى اى حد هتتعرفى عليه تحت الميكروسكوب الاول اد سنتين تلاتة كده زي ما انا بعمل يكون زهق منك وقطع معاكى لوحده ويبقى هو دا المطلوب اثباته

تحياتى يا قمر على البوست الجامد دا

صباح الخير يا مصر said...

blackcairorose
*************
هذه المره الاولى لمرورى عندك و اعدك بتكرار الزياره.
بصى ياستى.. اللغز الاول مش مهم مين اللى خد البلوفر ....الاهم ان يتعلم الانسان من المواقف(الزباله) دى...والحكمه هنا او مانتعلمه من هذا الموقف ان المال اللى سايب يعلم السرقه
اما اللغز التانى
بالنسبه لجمال وحسين فالاتنين اسوأ من بعض _ ده نتن والتانى انتن و الواضح انها انسانه طيبه و ربنا رحمها منهم
اما الموقف الثالث و ده اخطرهم على الاطلاق فالنصيحه موجها لك بعدم التسرع فى الحكم على الاخريين

Anonymous said...

روز
اكبر لغز شايفه فى الالغاز الثلاثة
عقلك
فينه
مسلمة امورك كده وماشية على البساطة

الطيب فى الزمان ده بيقولوا عليه ...

منذر

kasber said...

قرأت مره..سأل رجل حكيم قائلا:
ماهو الغيب؟
فأجابه الحكيم :
ليس الغيب هو المقدر حدوثه في اللوح المحفوظ..وإنما الغيب هو مالا تستطيع رؤيته وأدراكه بمعني ان شقة جارك ان لم تدخلها تعتبر غيباً وما خلف ظهرك يعتبر غيباً..ما دمت لا تراه
فإن أكملت أنا أقول لك َ عن
أ لغازك
لو علمتم الغيب لأختارتم الواقع
بمعني ماذا لو كانت أعز أصدقائك السارقه ألم المعرفه أشد وطئاً من المجهول
وماذا لو عرفتي ان واحد ناقل كلام والآخر فاسد خلقيا..
عدم المعرفه أهون
وماذا لو تكشف لكِ سوء النوايا وأنتي بييت صديقتك
أليس الغيب أهون وأرحم

Anonymous said...

rose ya rose:
ezayek,bisy ba2a ana 2areet el post 3ala fekrah bas mesh fel mood 7'ales 2a2olek ra2y,bas ana menazelah real story keda 3ayzaky te2reha o te2olely ra2yek
aslaha 2 be continued ya fandem

someone in life said...

اهلا عزيزتي

اوافق كاسبر تماما فالمعرفه احيانا تقتل الأفضل احيانا التجاوز و عدم الفهم مع الحذر و الحيطة
المواقف الثلاث فعلا صعبة و اصعبهم الثالث بسبب الشئ المجهول فية و ربما يكون خطر كان يحدق بكي و الثالث للخوض في سمعة ناس و هذا فعلا صعب
ارجوا ان لا تقعي في هذه المواقف ثانية

تحياتي

momken said...

ها..........
البلوفر ياستى فى احتمالات كتير
ممكن يكون ضاع من حد من التلاته
او اتسرق من حد من التلاته
اصل مش معقول ان التلاته فضلوا شيلين الشنطه فى ايدهم لحد انتى ماترجعى

اما لو كانت حاجه تانيه
يبقى لازم تدققى فى اختيار اصحابك بقى

نيجى لتانى حاجه
حسين مكنش محتاج وقت يتعرف على صحبتك وكونه طلب منها او اتفق معاها الموضوع يكون سر
يبقى فعلا بيلعب بيها
لان الى بيزمر مش بيخبى بقه

اما جمال فهو كاره صحبتك وكاره حسين لانه غريمه وعاوز ينتقم منه
غهو نقى اوحش كلمات علشان يعبر بيها عن الموضوع
فاستفزك
بس
نيجى لاخر واحده
اعتقد انها تعرف حد مشترك بينكم
والحد ده هو الى قلها على موضوع الماستر بتاعك الى عملتيه بره
والشخص ده كان عاوز يشوفك من غير متشوفيه
وغالبا الشخص ده انتى عرفتيه اثناء التحضيره بره للماستر

مالناش دعوة بقى صحبها جوزها اخوها ابنها
مش مشكلتنا

طريقتك فى النميمه جميله جميله جميله
اكنك قاعده ترغى معايا على فوتيه الانتريه



تحياتى

Anonymous said...

ليس بمقدورى الاتفاق مع أحمد شقير

لو أن تلك الألغاز من السهل التغاضى عنها لكنت نسيتيها بالفعل

كونها عاشت معاك طيلة هذه الفترة معناه انها لازالت هناك .. لم تختفى تماما

لنا كلنا مواقف كتلك .. لكن لأننا أسوياء وحسنى النية فإننا نفترض أن البلوفر يمكن أن يكون سقط هنا أو هناك
وبأن أحد هذين يكذب ربما كان جمال لأن حسين كان سيخجل من مواجهته .. اعتقد أن عدم الاستلطاف التى ذكرتيه ماهو الا الحاسة السادسة للمرأة

وأخيرا مديحة
وباختصار .. هذه لايشفع لها مركزها ولامركز زوجها

ماأريد أن أقول أن الجميع لايمكن أعفاؤهم من احتمال التصرف الخاطئ .. مهما كانت نياتنا تجاهم حسنة .. فهذا لايشفع لهم

تحياتى لقدرتك الرائعة على التنوع

BCR
هل تقبلى دعوتى لك بتشريفنا بمنزلنا العامر أنت ومن تحبين فى أقرب فرصة تمرين فيها بمصر؟

أرجو الا تعتذرى بلطف

كلبوزة لكن سمباتيك said...

اشعر ان حل الالغاز هو انكي تتمتعي بذاكرة ضعيفة للغاية
و هذه الذاكرة اخرجت البلوفر من الحقيبة و نسيتي


تحياتي

عين فى الجنة said...

الالغاز من هذه النوعية تجعل الحياة مثيرة ومشوقة
هذه الالغاز ليست بالغاز يقدر ماهى انعكاس لحالة السيولة الاخلاقية لكثير من الناس هذه الايام
بس البوست لذيذ كالعادة

someone in life said...

انتي بقالك سنه في التدوين ؟ كل سنه و انت بتدوني اكتر و اكتر
تحياتي

كتابة said...

موضوع مثير يا
BLACK CAIRO ROSE

بصراحة جدا غامض...
يعني بشكل خاص اللقطة الثالثة
لأن الاولى
رغم غرابتها بتحدث
و الثانية
تحدث جدا
لكن الثالثة
غامضة جدا،الحدث نفسه مريب بس مش واضح
ومالحقه من تصرفات زادته سوءا

بكل الأحوال
الحمدلله
:)

Unknown said...

القاسم المشترك بين الالغاز التلاته هي "النتانه"

في حد بيتحاقر في النص

بس أخطر واحد صراحه التالت: في شي غلط كتير يا روزا

و كون الست من عيله و جوزها صاحب منصب ما بيعني شي ابدا

انا بظن انها خافت فتراجعت و قطعت العلاقه و هيك احسن

الله يحميكي يا رب

روابط said...

ألغاز ألغاز ألغاز

اللغز الأول
بالنسبة للبلوفر أحتمالات سرقته متساوية بالنسبة للثلاثة

كون هدى صديقتك المقربة لا يعنى انها فوق مستوى الشبهات ده موضوع انا مجربه بشكل شخصى

نديم ممكن يكون خده بدافع غير سوى, انها حاجة من ريحتك .. متستغربيش

بالنسبة لسميرة فالثراء ليس مبرر لعدم السرقة فداء السرقة منتشر بين الطبقات الثرية, هل تعرفى ان الملك فاروق كان مصاب بمرض السرقة

أرى اننى لم افيدك كثيرا فى اللغز الأول
ـ ـ ـ ـ ـ ـ ـ
اللغز الثانى

حسين وجمال سيئ النية وعايزين ضرب النار ويحتمل الموضوع بكامله كان رهان بينهم, شغل شباب
ـ ـ ـ ـ ـ ـ ـ
اللغز الثالث
بعض الناس لديهم أطوار غريبة فعلا, وغير قابلة للتفسير, ويحتمل انه كان هناك ما يدبر من وراء ظهرك, او انها كانت تدارى شيئا ما

أرجو ان أكون أفدتك

تحياتى يا ملكة الألغاز

blackcairorose said...

أحمد

أتفق معك أن أحيانا راحتنا فى عدم معرفة الحل، ولكن كما تعلم الصراع الازلى بين الرغبة فى المعرفة ولوعلى حساب أشياء كثيرة

شرفت وشكرا للمرور والتعليق

blackcairorose said...

بنت القمر

لم يخطر ببالى أبدا احتمال ان يكون الشخص معنى بى وليس بها، على كل من يدرى؟

أنا أيضا أتذكر بوست مروة ولكنه كان أكثر دراماتيكية بكثير

صباح الفل

blackcairorose said...

مثلية تبحث عن ذاتها

تقرأين بين سطورى حتى لو لم أقلها صراحة

نعم سميرة هى الاكثر شكا تجاهها والله أعلم ، هى جميلة جدا وعيونها خضراء مميزة وشخصيتها اجتماعية وتعزف جيتار وأيضا تغنى بصوت جميل، أى أن كثيرين ومن بينهم أنا أتمنى صفة واحدة فقط من بين هذه الصفات ومع ذلك احتمال أن تكون سرقت بلوفر عادى منى

اليس الحياة ساخرة جدا أحيانا؟

كذلك قلت فى تعليقك اذا كانت مديحة تعنى لى شيئا

هل تصدقى انها فعلا تعنى لى شيئا رغم مضى سنوات على هذه الحادثة؟؟ لأنى بصراحة على اعجاب بشخصيتها واحسست بكيمياء واضحة بيننا رغم أن الامور سارت بالشكل الذى وصفته فى البوست

ومع أنى لا اعلم أين هى الآن فى مصر ام عادت الى حيث كانت الا انه يساورنى شعور غير معتاد بالنسبة لى أنى ساقابلها مرة أخرى لا أدرى كيف ولا أين ولكن لدى دائما هاجس اننا سنلتقى، لا أدرى ماذا سيخبأ القدر

ألم أقل تقرأين بين سطورى؟

blackcairorose said...

سما

بجد نورتى وكان ليكى غيبة وحشة، فقلت مفيش غير كاسبر اللى توصلك اطيب التحيات

حمدا لله على السلامة

والصورة دى لشعرك؟
لونه غامق أوى وحلو، وبعدين ايه حكاية الصور معاكى؟ كده شفنا العين وشفنا الشعر المرة جاية ناوية على أيه لول

سلامى لناردين كتير وكل ده بتمتحن ولا ايه؟ ايه يا بنتى دى ولا رسالة الدكتوراه

طبعا رغيك دايما ظريف ومسلى وبيفتح ابواب جديدة للكلام

اولا موضوع التليفون ده عجيب جدا، وبصراحة الظاهر انك جريئة قوى لانك اعتمدتى على احساسك فقط، انا بشخصيتى لا يمكن كنت هعمل كده لانى دايما هاقول لابد يبقى فيه دليل مادى يأكد الاحساس عشان اتهم حد صراحة بحاجة، بس احساسك طلع فى محله

بالنسبة للبلوفر احتمال ان يكون حد رابع اخده من الشنطة احتمال موجود ولكنه ضعيف جدا فى رأيى

بالنسبة للموضوع التالت، ما لمحتى ليه فى تعليقك يا سما برضه وارد، وياريت تقرى تعليقى لمثلية تبحث عن ذاتها بخصوص مديحة لأنه زى ما قلت احيانا بيصعب علية ان الامور شارت بينا بالشكل ده، فى حين كان توقعى لعلاقتنا شكل أكثر تميزا

وعلى فكرة لأنى بحاول اضغط بوستاتى بشكل عام اقصى ضغط غير مخل، فيه اضافة مذكرتهاش فى موضوع مديحة انى قابلتها مصادفة بعد الحادثة دى بكام شهر

كنت مرة بالليل ركنت العربية فى ميدان المساحة وكان مفروض اعدة الميدان علشان اجيب حاجة حلوة من محل الحلويات اللى جنب ماكدونالك، المحل اسمه كراميل اذا كانت ذاكرتى لسه بخيرها

المهم وانا لسه هعدى الميدان اخدت بالى انها جاية فى الاتجاه المعاكس لى وبتعدى برضه على رجلها الظاهر كانت فى عمارة الدبلوماسيين وراجعة لعربيتها فى نفس الجنب اللى انا ركنت فيه

ولكن كانت بعيد عنى يعنى لو كل واحده عدت فى طريقها ممكن منشفش بعض وكمان الدنيا ضلمة، لكن انا غيرت طريقى وعديت من نفس المنطقة اللى هى بيتعدى منها علشان نتقابل وعملت انى مش واخدة بالى لحد ما شفنا بعض

وهى كانت ظريفة جدا كالعادة وحبوبة وفينك اختفيتى الخ الخ وانا برضه كنت على نفس الدرجة من اللطف

وبعدين سألتنى اذا كانت نمرة موبايلى هىه هيه ولا اتغيرت، قلتها هيه هيه وسالتها عن نمرتها فقالت برضه انها متغيرتش فقلنا ضرورى نتكلم ونتقابل

ولكن برضه لا انا اتصلت ولا هى اتصلت

قلت لمثلية انى عندى احساس هنتقابل يوما ما

لما نشوف، وساعتها هاجى وحاكيلك

سلام ياقمر ومتغبيش كده تانى بجد بنفتقدك

blackcairorose said...

صباح الخير يامصر

اهلا وسهلا بيك فى المدونة وسعدت بمرورك وتعليقك اللى بتفق معاك فيه واستنانى انا أيضا فى مدونتك

وخالص المودة والشكر

blackcairorose said...

منذر

أهلا بيك

لماذا اين عقلى؟

لا اعتقد اننى تصرفت بشكل يوحى بغياب العقل، يعنى هذا على الاقل ما اعتقده

فحسن النية فى حدود مطلوبة

الا ترى ذلك؟

blackcairorose said...

كاسبر

الغيب أهون وأرحم، لكن هل تتذكرى رواية العنكبوت للدكتور مصطفى محمود وكيف كانت الرغبة فى المعرفة لدى الدكتور راغب أقوى من أى شعور آخر؟

أحيانا ليست بالقليلة نكون كلنا كذلك

شكرا عزيزتى على توصيل الرسالة والتى أعلم دائما أنها بين ايد أمينة

blackcairorose said...

سولا

ازى اخبارك

ابتديت اقرا بوستك الطويل فى المدونة لحد ما تعبت من العربى اللى بالاتينى وبعدين قلت اكمله يوم تانى لقيتك شلتى البوست كله

ان شاء الله تكون الامور دلوقتى احسن، وازالة البوست كان نتيجة لان الامور اتصلحت بينك وبين الناس اللى اتكلمتى عنهم؟؟

واطيب تمنياتى يا عزيزتى

blackcairorose said...

Someone in life

شكرا على تهنئتك الرقيقة والجميلة وفعلا مر عام رغم أنى لم أكن على انتباه لهذا الأمر

ارجو ايضا ان لا اتعرض لألغاز أخرى بها خيبة أمل تجاه اشخاص اعتز بهم

أرجو!

blackcairorose said...

ممكن

بالنسبة للشنطة كل شىء ممكن ولكن طرف خارجى أخذ البلوفر احتمال ضعيف جدا بالنظر لملابسات الموضوع

حلو مثال الللى بيزمر مش بيخبى بقه، أول مره اسمعه بس فعلا له دلالة

فعلا وصفك صحيح لان كلام جمال فعلا استفزنى فلم ادر بنفسى الا وانا بروح لحسين وانتقده على كلامه

أما بالنسبة لان مديحة تعرف شخص كان معى فى الخارج فلا اعتقد ان هذا سيناريو محتمل

انت عارف انى للحظة افتكرتها بتتكلم جد لما قالت ده عفريت؟ يمكن لأنى بؤمن بالحاجات دى الى حد ما ـ بكرر الى حد ما ـ فقلت مش بعيد يكون حقيقة ولكنها محبتش وانا فى بيتها تخوفنى كده فغيرت الكلام وقالت انه جوزها

هتقول انى اتجننت؟؟

معلش هسامحك لول

وشكرا على الكلام الحلو

blackcairorose said...

العزيز شريف

شكرا على الدعوة الكريمة جدا وهذا شرف لى أن أكون على معرفة بك وبأسرتك وسأبلغك قبل نزولى لمصر إن شاء الله

المسألة أنى حتى الان لا أدرى متى سأعود لمصر، لدى اجازة فى يوليو ولكن لدى دعوة مغرية جدا من أصدقاء كوبل للذهاب بعيدا الى حيث اتمنى ، والى حيث لم أزر منذ عدة سنوات

وهو الامر الذى يشحذ كل حماسى للذهاب، اضافة الى أنى بصراحة اتجنب نزول مصر فى الصيف، القاهرة فى الشتاء تكون بها ما تزال مسحة آدمية وبرودة جميلة

حقيقى أشكرك والى ان نلتقى باذن الله

blackcairorose said...

سمباتيك

اهلا بيكى وشرفتى

أحيانا فعلا تكون الذاكرة ضعيفة

واحيانا ندعى ضعفها من أجل أن نتناسى

واحيانا ندعى غير الحقيقة لأننا لا نعرف كيف نصل للحقيقة، مثلما أدعيت أمام نفسى أننى قد أكون ذكرت لمديحة موضوع الدراسة بالخارج رغم أنى على يقين أنى لم أقله!!

الحل بسيط لول

واطيب التحيات وانتظرينى فى مدونتك يا عزيزتى

blackcairorose said...

راجى

هى والحمد لله أمور بسيطة فى النهاية وهذا ما جعلنى أصفها بالالغاز الصغيرة

الحمد لله لم تصادفنى حتى الان الغاز من العيار الثقيل وأتمنى الا تصادفنى

خالص الود

blackcairorose said...

كتابة

اشعاعاتك متباعدة يا عزيزتى ولكنها نافذة تصل بين تعليق وآخر

نورتنى واسعدتنى كالعادة

blackcairorose said...

مياسى

كل الاحتمالات مفتوحة وكل التفسيرات واردة

طالما الاصابة ليست خطيرة هذا هو المهم

خالص ودى وامنياتى

blackcairorose said...

حازم

تفتح لى باب لم يرد بخاطرى قط

احتمال سرقة بدافع أنه شىء يخصنى؟؟!!

والله ممكن، لا شىء مستبعد

جميل ومثير ان نسمع تعليقات الاخرين لأنها فعلا تتطرق لاراضى مجهولة

خالص التحية والود

سمـــــــــا said...

روزا

يا قمر ربنا يخلى ذوقك ورقتك وحقيقى فرق معايا سؤالك جداا وعلى فكرة انتى كنتى ممكن تطمنى بنفسك لو خطفتى ايدك لغاية البروفايل وبعتتى ايميل .. طبعا انا دلوقتى بحرجك بذوق ههههههه

المهم بقى يا ستى دى صورة شعرى فعلا و بمناسبة الصورة دى انا مضطرة اعمل فضيحة صغننة لناردين على الهوا ههههه بصى يا ستى وقت لما اتصورت الصورة دى من كام كنت صورت كذا صورة ببوزات مختلفة وقتها ناردين كانت نايمة فالمهم انا حطيتها على البروفايل وتوقعت ان الطبيعى ان ناردين هتعرفنى يعنى عشرة 900 سنة الطبيعى انه تشم ريحتى فى الصورة حتى

المهم بقى تانى يوم هى شافت تعليقى عند كاسبر فبتقولى انتى ليه حاطة صورة كئيبة كده ؟؟ قلت لها ليه كئيبة ؟؟ قالت لى يعنى واحدة حاطة ايديها على شعرها هتكون ايه غير مكتئبة ؟؟ قلت لها بس انا مكنتش مكتئبة .. فبصت لى بذهول وقالت لى اييييييييه ؟؟ هى دى انتى ؟؟ قلت لها نعممم ؟؟ هو انتى معرفتيش ان دى انا ؟؟ قالت لى خاااااالص دا انا حتى كبرت الصورت ونزلتها عندى واقول هى سيمو حاطة صورة واحدة مكتئبة ليه ؟ .... بصراحة كنت هموت واقوم اعضها بس كنا فى مكان عام .. قلت لها ازاى متعرفنيش ؟؟ بعد كل اللى بينا دا يا جاكى ومتعرفنيش ؟؟ قالت لى مجاش فى دماغى انها انتى بس انا عجبتنى البنت اوى شعرها حلو:)))
و دى اخرة اللى يحضر ماجستير فاضل لها شوية وتقولى انا شفتك قبل كده فين يا انسة ؟

اما من ناحية ناوية على ايه المرة الجاية ؟؟ فانا بينى وبينك ناوية على فردة الشراب اليمين اصلها عجبانى :)

ناردين لسه يادوبك هتبدأ امتحانات الترم التانى ومطحونة يا حرام ربنا يكون فى عونها انا متضايقالها سلف بس يا مسهل بقى كلها شهر وتخلص

موضوع التليفون كان عجيب اوى فعلا وخصوصا اننا كنا اصحاب بس انتى عارفة مناخيرى صعب تخدعنى فى حاجة والاصعب انى احس بحاجة طالما لمبة جوايا نورت فجأة فى اى موضوع بمشى وراها جرى بس ساعات بندم انى مشيت وراها لانى بتصدم فى بعض الناس اللى المفروض ليهم معزة خاصة عندى بس عادة انا قراراتى بتكون حاسمة مهما كان درجة قرب الشخص دا ليا وقتها بحط مشاعرى على جنب وعقلى هو اللى بيتحكم فى الموقف كله وعلى رأى بعض الاصحاب ربنا ميوقعش حد فى ايدي :)

موضوع مديحة دا انا لسة شايفاه مريب والاصعب ان الانسان ينجذب او يحصل كيميا بينه وبين حد اول مواقف بينهم مريبة وغير مريحة بس انا عن نفسى حتى لو حد اعجبت بيه وشدنى اوى وحسيت ان فيه حاجة مريبة او حصل من طرفه حاجة مريبة او حسيت انه كداب اكيد هبعد نهائى لانى مش هسمح انى ادخل فى علاقة من اى نوع مع حد مش هقدر اديله ضهرى وانا مطمنة لان الثقة ملهاش بديل عندى مهما كان الانسان دا رائع فى اى حاجة تانية ... ازاى اقرب من حد هيفضل جوايا حيرة من ناحيته طول الوقت و اسئلة ملهاش اجابة ولو حتى فيه اجابة فانا مش مصدقاها او مش مقتنعة بيها ؟؟

بذمتك دا مش عذاب ؟؟ اكيد طبعا عذاب .. يبقى الحل اننى نكبر دماغنا وننساه بدل ما يجى يوم ونندم اننا غامرنا فى حاجة طلعت ملهاش قيمة

شفتينى وانا بسأل وبرد على نفسى وكمان بديلك الحل ؟؟ اى خدمة يا ستى مستشار انسانى مفيش زيه اتنين على البلوج سبوت كله اهو بس انتى تؤمرى

هستنى سؤال المرة الجاية بس على الايميل :)

باى يا قمر

Anonymous said...

حسن النية مطلوبة وكل حاجة انما عدم المواجهة والمكاشفة حتى مع اقرب الاصدقاء والسير خلف مشاعرى واحاسيسى على طول الخط شى مو منيح

فى الموقف الاول وبعيد عن المشاعر اسهل شى سؤال بسيط واحد ورا التانى ومواجهنه بالتالى له
كان فيه هنا بلوفر
بدون شك او اتهام والى يزعل او يفتكر انى باتهمه هو حر لانه لو اتسرق من واحد فيهم على الاقل يعرف ان الامانة شى مو سهل
الموقف التانى
الاتنين قمة فى الاحترام هههههههه
بس برضه هدى اين هى
وبدل ما تلومى حسين وتواجهيه بجمال اتاكدى الاول منها وخليها هى الى تقوم بكده او قومى بكده فى وجودها
لان الى سوى شى يتحمل عواقبه

الموقف الثالث
اذا حضرت الكيميا ذهبت الشياطين الى بتخلى الوساوس والهسهس يشتغل ويخليكى تتصرفى على ابسط من البساطة

تذكر لك معلومات عنك ما قولتيها وتستدرجك لبيتها وتعتذر بدون سبب
كل ده بدون شك

ساعات الواحد بيتسائل هى ماشية بالفعل والا برد الفعل

منذر