Saturday, January 24, 2009

اتنين مكالمة وواحد تشات



المكان: الليفنج
الزمان: أوائل يناير
الشخصيات: أنا وهو وهي

ـ فلانة؟
ـ أيوة
ـ طبعا مش فاكرة صوتي
ـ لا لا مؤاخذه مش واخده بالي
ـ طيب فكري كده شوية، الصوت مش بيفكرك بحد خالص؟
ـ ............معلش طيب ممكن تديني أي هنت؟
ـ المنجة
ـ افندم؟
ـ أنا زمان كنت بحب المشمش دلوقتي بموت فى المنجة
ـ حضرتك بتهزر الظاهر، متهيألي النمرة غلط، انت عايز مين بالظبط؟
ـ فلانه الفلانية
ـ ايوه أنا، بس أنا مش فاكرة الصوت ومعلش لو مقلتش مين هاضطر أنهي المكالمة
ـ أخص عليكي، كده نسيتي ايام سندوتشات مؤمن
ـ معرفش انت بتتكلم عن أيه ومعلش أنا هقفل
ــــــــــــــ
.
.
ـ الو متقفليش تاني، هاقولك أنا فلان الفلاني اللى كنت بشتغل معاكى سنة 1996 فى شركة
.....
ـ لسه مش فاكرة؟
ـ آه أهلا أزيك أخبارك ايه؟ انت بتتكلم من هنا؟
ـ آه أنا وصلت من 3 ايام، خضيتك مش كده؟
ـ معلش أصلي افتكرت حد بيعاكس رغم ان نمرة التليفون ظاهره عندي، ازيك عامل ايه وايه اللى جابك البلد دي؟
ـ جالي شغل وقلت اجرب، انا سمعت ان بقالك كذا سنة
ـ آه بالضبط، ان شاء الله تكون امورك كويسة
ـ عال العال،وأخبارك انتي ايه ، عايشة هنا مع جوزك وأولادك؟
ـ لا، أنا لوحدي والدي ووالدتي أتوفوا فى مصر من كام سنة
ـ البقاء لله، ها قوليلي هشوفك امتى؟
ـ بص بصراحة اليومين دول عندي لخبطة كتير فى الشغل ومش عارفة اذا كنت هستمر ولا ارجع مصر، ادينى كده وقت اشوف اموري ماشية ازاى وهتصل بيك، دي نمرتك مش كده؟
ـ آه
ـ انت جبت ازاي نمرتي بالمناسبة؟
ـ قبل ماجي قابلت عفاف بالصدفة، فاكراها؟ كانت برضه معانا في الشركة وبقولها اني مسافر قالتلي انك هنا بقالك فترة، ولما سألتها على نمرتك مكنتش عندها بس سألت وبعد يومين جبتهالي
ـ بنت حلال قوى عفاف دي، ابقى سلملي عليها لحسن مفيش بنا اتصال
ـ أكيد
ـوأيه حكاية المنجة اللى كنت بتغنيها دي؟
ـ مش فاكرة؟ مش لما كنا فى الشغل مرة قعدنا نتكلم على شريط عيد ميلاد سحر حمدي واغنية المنجة؟
ـ ياه دا انت ذاكرتك حلوة قوي، لا طبعا مش فاكرة خالص، طيب خلينا على اتصال
ـ مستني مكالمتك، متطنشيش
ـ لا ان شاء الله، يللا ربنا يوفقك فى شغلك الجديد، سلام
ـ سلام
ـــــــــــــ
.
.
ـ عارفة مين كلمني امبارح؟ فاكره فلان اللي كان بيشتغل معانا فى شركة كذا زمان؟
ـ مين؟
ـ فلان الفلاني اللي كان معجب بليلى واتقدم لها؟
ـ آه وده ايه اللى فكره بيكي؟
ـ جه هنا يشتغل وعفاف الفلاني فاكراها؟ هي اللى ادته نمرتي
ـ غريبة دا انتي وعفاف اساسا مكنش فيه ود بينكو ومفيش اتصال من زمان، ايه اللي خلاها تعرف نمرتك وتديهالو؟
ـ مش عارفة، بس انا برضه استغربتها، مش معقوله يكون بيكدب ، وهيدخل اسم عفاف ليه فى الموضوع؟
ـ وكان عايز ايه؟
ـ ابدا بيسلم، وبيتكلم كأننا مثلا كنا اعز الاصحاب مع انى افتكرته بالعافيه، احنا اشتغلنا مع بعض تلات شهور تقريبا مش اكتر
ـ ولسه على السماجة بتاعته؟
ـ لا من ناحية السماجة متهيألي زادت حبتين
ـ ها ها
ـ وهتتقابلوا؟
ـ لا طبعا، قلتله اني مشغولة ولما افضى هكلمه
ـ ليه متقابليه؟
ـ والنبي ايه
ـ بجد دا انا كنت سمعت انه طلق مراته، يللا يا عم مرزقه طول عمرك
ـ آه تصدقي وانا أطول واحد زيه؟
ـ لا مطوليش
!ـ بيتش
!ـ مرسي
.
.

17 comments:

Anonymous said...

hahahah
3arfa 2a7la 7aga fel 7ewar dah
bitch elly fel 2a7'er deh
bosy 2ableh o have fun
ana 3andy mabda2 bey2ol
if im not gonna looose anything then fuck off and why not
salamoz

Enbee said...

الأميرة الغالية

حبايبنا "الحلوين" اللي متصورين..
إنهم عسل وسكر عسل ...

لما يحسوا انهم فاضيين
يدوروا على دفاتر قديمة لقتل الملل

لكن الحقيقة اللي مش شايفين
إنهم بس "حلوين" في سواقة الشيطنة ع الهبل

وعجبي



تحياتي العطرة

مثليه said...

صباح الخير يا روز الروز
تصدقي بالله
والله العظيم نفس الموقف حصل لي من يومين بالضبط كان معايا واحد بيشتغل في شركه معايا في مصر و كان راجل سخيف بشكل ومن كتر سخافته حتى صباح الخير مكونتش بقولها برغم اني اجتماعيه و بحب الناس جدا لكن الراجل ده كان اوفر يعني حاجه فوق الوصف المهم لقيت رقم غريب بيرنلي قل معاكسه المهم طنشت و فضل مصر الرقم ده يتصل فقولت اما اشوف ايه الموضوع لقيت واحد بيتكلم و كأنه كان صاحبي الانتيم في مصر وفوجئت انه هشام ده وانه بقاله فتره مش كبيره هنا و اتصل بيهم في مصر و عرف اني هنا و دور على رقمي عشان يكلمني و نتقابل اعتقد ان الناس لما بتيجي من مصر سخنه وطازه بتبقى مش قصه واحشاه و عاز يطمن ماهو بيعدي مليون سنه و محدش بيسأل لا القصه انه بيكون محتاج سابورت فالمكان الجديد ده عارف البلد وزي الطفل لما بيجي يمشي لازم اللي ياخد بايده يلا ادينا عايشين نتفرج عالدنيا لاصغيره اللي عامله زي البحر و كل شويه تيجي موجه تحدفلنا حاجه:)

بونجورنيه يا جميله

Unknown said...

ههههههههههه

المسبه اللي في الاخر أحلى شي مع اني ما فهمتش هي لمين موجهه بالزبط

بس هاي جزئية انو السماجه زادت كمان حلوه

السمج في رأيي دايما سمج وما بيتغير؛ في ناس الزوق عندهم معدوم

يعني المكالمتين كانو مع هاد الشخص والشات مع صاحبتك مش هيك؟

سؤال تاني: يعني شو مرزقه؟

وعفاف كتر خيرها الصراحه؛ الظاهر انها صحبه مع اخونا السمج

الناس في الغربه بيكونو بيدورو ع بعض يعني بدهم حد يعرفهم كل شي بأول فتره بعدين سلامتك بيبطلو يسألو

عيّنات ونماذج:)

سمـــــــــا said...

أولا عنوان البوست جميل أوي اوي وانا دايما بيلفت نظري اختيارك للعناوين بذكاء شديد وتميز وطبعا مش محتاجة افسر العنوان تقصدي بيه ايه بس ابقي فكريني اقتلك لهدف في نفس ابن يعقوب :)) . انا بتفق مع صديقتي مثلية ان الناس في الغربة بيدوروا علي بعض مش حب ولكن بيمشوا بمبدأ اللي منحتاجش النهاردة لوشه بكرة نحتاج لقفاه :)). فانتي علشان تثبتي جدعنتك وفي نفس الوقت توقفي ماسورة السماجة اللي هتنفجر دي ابقي قولي نورت البلد وانا معلش ظروفي ومواعيدي ملخبطة بس لو محتاج حاجة ابقي قول. يعني شرفتونا وهتوحشونا :) وبكده هتكوني كبرتي دماغك ووقفتيه عند الحاجة اللي بيلف حواليها . وربنا يجعله عامر :))) المنحة يا رورو

قلب امراه said...

عزيزتي بلاك روز
هو انا رايي من راي صاحبتي سما ان العنوان حلو وفيه اكشن كمان القصه وانا من راي صاحبتك طب ليه منشوفش الراجل عاوز ايه بجوز يكون تغيير والسماجه بتاعته خفت مع ان الواضح انها زادت يعني خساره فيه االكلمتين
اما الي ادته العنوان فهي اكيد اسمج منه لانها مكنش لازم تتصرف برقمك قبل ما تسالك الاول ده زوقا
حلو الكلام ودايما تمتعينا معك
دمتي بخير

karim said...

جميعنا نتعرض لتلك الظروف الغير ظريفة عندما تلتقى بشخص سمج وتتفاجئى بة ويكون عايز يلزقلك,بتقى اوقات صعبة و بطيئة .تحياتى

Desert cat said...

ياربى على الناس اللى بتفرض نفسها دى ومجرد ما تعرف حد تبقى عايزة تقابله
دى بس مش سماجه دى منتهى الفضول و السفاله
معلشى اصلى مش بحب الموضوع ده وبالرغم من انك بتطلعى مبررات برضه بتلاقيهم لازقين لك
علشان كدا بطلت استعمل الزوق والمتبع سورى مش بقابل حد العملية مش اوبن لكل من هب ودب

تحياتى

روابط said...

ده رايق قوى بصراحة, انا لو مكانك اعمل نفسى مش عارفه حتى لو طلع من الموبيل
سلام يا روز

Enbee said...

ولا يهمك يا أميرة

ولا بخل ولا حاجة .. بس يمكن قلة فضا.. عموما .. شوفي حطيت 2 بوست جديد علشان خاطر كلمتك دي بس
:)
تحياتي العطرة

Anonymous said...

بوست لذيذ

ويخوف فى نفس الوقت .. مذيل بتحذير خفى لطيف

ممنوع الاقتراب والتصوير

ولابد ان لهذه الهالة ومبرر .. قد يكون لحماية النفس من التدخلات .. أو بسبب مواقف سابقة انتهت لهذه النتيجة

وفاتك أن شخصية جميلة مثلك لن تخلو من محاولات الاقتراب .. ومن جميع الألوان .. سواء شخص سمج .. أو لطيف

:)

مثليه said...

انتي يا سما كارثه حقيقيه فعلا العنوان جامد و للأسف ملفتش نظري غير لما قريت تعليقك فعلا عنوان شديد اشيل البورنيطه احتراما والله:)روز انا مبشربش عصير الله يكرمك كفايه على سما ماشاء الله مظبطاني عصاير اشي كوكتيل و اشي تروبيكال ياريت متجيبيليش مانجا انتي كمان:))))

Anonymous said...

black .... 3ndk godra hayla 3ala tswer al7warat ... bs keaf 3afaf jabt nmrtek ??? soual mohm :)

سمكه واحده said...

مدونتك واسلوبك مميز وشكل تاني
انا بقالي في مدونتك كام ليله كده بشوف بوستاتك الجميله بتشدني وعجبتني واللي قالي علي مدونتك عرف انها فعلا هتعجبني وفعلا واضح انه عارفني كويس لانها بجد عجبتني واسلوبك شيق جدا
ولو هعلق علي كل بوست من بوستاتك الجميله مش هنام انهارده حكويكي جميله جميله
بجد تسلم ايدك ودماغك وذاكرتك الحلوه
مفيش احلي من الذكريات
مدتي بكل ود ارجو تقبل مروري

soly88 said...

العزيزه بلاك روز
بعد ان قرأت تذكرت بوست الراجل الملزق
الخاص ب someone
ولكنك ايضا اصبت هدفا آخر وضح جليا فى احد التعليقات
ربما كان 2009 عاما يحمل مفاجأه
اتمنى ان تكون سعيده

FOrty said...

اكيد زى ما صحبتك قالت لك الرجل مطلق و بيدور فى دفاتره القديمه و اكيد كنتى معلقه فى دماغه من زمان و قال نفتح حديث لو استجابت يبقى فى امل بس المهم يكون غرضه شريف احيانا الناس فى الغربه بتستهبل و تعمل بالمثل القائل اللى يعرف ابويا يروح يقول له بس الحوار مكتوب بطريقه لذيذه قوى
تحياتى

تشات said...

هههه و الله جمييييييييييل
Arab chat