Saturday, July 5, 2008

آخر كلام قبل الأجازة

تعليقين صغيرين فى الجرنان يومين ورا بعض

الأول خبر الجمهورية على الحادثة الشهيرة بقيام سيدة بضرب الداعية المعروف، كتب الجرنان فى نهاية الخبر التالى" والداعية معروف بزواجاته المتعددة بين رسمى وعرفى ومسيار"

!بجد لما قريت الخبر لقيت نفسى بقول تلقائى الله أكبر

برضه تانى يوم فى نفس الجرنال خبر عن قضية فساد مالى بين مسئولين فى بنك وسيدة أعمال تم ذكر اسمها بالكامل كتبوا انها مالكة لشركة أسمها الايمان
ومن غير تعليق
ــــــــــــــــــ

على هامش موضوع الموافقة على جواز المثليات والمثليين فى ولاية كاليفورنيا

لفت انتباهى فى صور وفيديو نشرات الاخبار فى تغطية الموضوع اشكال تورتات الفرح فى أمريكا، شكلها حلو قوى، مش كبيرة سبع وتمن أدوار زى عندنا فى مصر، دور أو دورين بس لكن متزوقة بشكل جميل جدا، تورته كانت كلها متغطية حتى من الجناب بحلوى مصنوعة على شكل ورود بيضاء رقيقة، وتورته تانية لونها أحمر فاقع كلها برضه ورود كأنها طبيعية

حاجة تفتح النفس

على الاكل مش الجواز

ـــــــــــــــــــ
حتة العسلية شيرين ليها البوم جديد بس يا خساره فيه بس تلات اغنيات جديدة

بحب شيرين وبحب صوتها وطريقة غناها، وعجبتنى اغنية بكلمة منك وكمان اغنية الالبوم أطمنك

وبمناسبة الاغانى برضه
ميريام فارس ليها أغنية جديدة أسمها أنا مش أنانية
موضوع الأغنية انها بتقول لحبيبها اللى بيحب اتنين انه لازم يسيب التانية عشان يبقى ليها لوحدها، والظاهر انها حاسة أن الطلب ده عيب قوى فعماله تأكد له إنها مش أنانية علشان تطلب الطلب ده

أنا قلت فى نفسى فعلا دى أنانية جامدة قوى وعايزة حبيبها يكتفى بواحدة إزاى يعنى؟
ــــــــــــــــــــــ

قريت تصريح مساعد وزير الداخلية على الشكل الجديد لنمر العربيات واللى هتكون مكونة من تلات حروف منفصلة بالاضافة للارقام، وتأكيد سيادة اللواء أنه هيتم مراعاة ان التلات حروف المنفصلة مش هتشكل كلمة مخلة بالاداب أو خادشة للحياء

حلو قوى ان المسئولين عندنا يعملوا مقدما حساب الكوارث اللى زى دى قبل ما تحصل، بس ياريت كمان يعملوا حساب كوارث أصغر زى حوادث القطارات والمراكب وخلافه

فكرنى موضوع الكلمات المخلة دى بواحد زميل فى شغل سابق فى مصر كان قافل بعربيته على عربية تانية فى الشارع ولما طلع لقى العربية المزنوقة طلعت ميعرفش ازاى، بس صاحبها من غيظه ان عربيته كانت مزنوقة سابله ذكرى فحفر له بالمسمار على عربيته كلمة الشتيمة المشهورة اللى من تلات حروف بشكل واضح جدا على كبوت العربية، زميلنا اتعمل له زفة لحد ما راح لبتاع الدوكو وشال الكلمة

ــــــــــــــــــــ

الايام دى مجنونة وزحمة بس خلاص هركب جناحين واطير لاجازة صيفية
مدونتى هتوحشنى والتواصل مع أصدقائها هيوحشنى وكمان المدونات اللى متعودة على قرايتها هتوحشنى
وياريتنى برضه أوحش اللى نفسى إنى أوحشهم

شوية اسابيع وهرجع إن شاء الله
أشوفكوا بخير

19 comments:

بنت القمر said...

خبر ضرب الداعيه
http://zamanalwasl.blogspot.com/2008/06/blog-post_22.html
اتفق مع التحليل ده تماما ويا ريت تتابعي المدونه دي
====================
تورت جواز المثليين وانا اشعر ان ليكي موقف _غيرحاد_ منهم قد لاتجعلني اكل تورته علي الاطلاق
لانه لي موقف حاد منهم مبني علي موقف نفسي قبل ما يكون ديني
اوعي تزعلي بس كنت عاوزة اقول كده وخلاص
:))
=======
بحب شيرين كمان
بس مش عارفه بعد شحتفتها علي الولاده في امريكا _زي كتير غيرها_وبعد مشاكلها مع جوزها بعد ما نالت غرضها وبقت ام:))
كسر بيني وبينها شيئ حاجز نفسي كمان بقا بيني وبينها
===========
ميريام فارس
طبعا انايه وسافله وعاوزة الحرق عاوزة تكوش علي الراجل لوحدها؟؟!! خدتي بالك الكليب وهما في اوضتين جنب بعض وهي قاعده اصلا مستنيه قرارة!!
============
كوارث تعليم وقطارات وطيارات وعيش كله كوم والقباحه كوم تاني
:))
واحلي من الشرف ايه مفييييييييش
تروحي وترجعي بالسلامه
بس هي حته ما فيهاش انترنت نطمن عليكي ولاايه؟؟!
اوعي تكوني راحه الاسكيمو:))
تحياتي

kasber said...

ربما ما يضايقني ربط سلوك الانسان بتوجهه الديني والدين برئ من سفهه هؤلاء
..................
بالنسبه للتورته ( انا بحبها بس وشي بيتملي كريمه فأضطر أكلها بعيد لاني اتصورت كتير صور فضيحة
(
....................
بكلمه منك لشرين رائعة أضم صوتي لكي
......................
مريام وشعرها لوحة من عصور النهضه
او ربما هربت من أعمال رامبرانت
......................
دائما ما أرد علي الأخبار السياسيه بالصمت لانه إن لم تستحي فأفعل ما شئت
...........

بالنسبه لسفرك هتوحشينا
أستمتعي بالاجازه

صباح الخير يا مصر said...

blackcairorose
**************
بالنسبه لاخبار الجرائد..اتعودت ماصدقش اللى بيقولوه عشان هما اصلا معندهمش مصداقيه وعملا بالايه الكريمه
بسم الله الرحمن الرحيم
يا ايها الذين امنوا اذا جاءكم فاسق بنبأ فتبينوا عسى ان تصيبوا قوم بجهالة فتصبحوا على ما فعلتم نادمين
صدق الله العظيم
_____________*______________
فن تزيين التورته له كورسات و دراسه لمن يرغب فى العمل فى هذا المجال
___________*______________*________
بكلمه منك ...اطمنك ...هاجيب الشريط
_____*_______________*_____________
بس بالنسبه لميريام فارس فدى بأه
عايزه تتسمع و تتشاف كويس
:)))))_______________*________________
اللى يسمع تصريح المسؤل يحس ان كل مشاكلنا اتحلت و مش فاضل الا... الاباحه!!!1
على العموم يشكر... بس ياريت يحلوا مشكلة المرور الاول
________*_________*_________*______
يبقى ان اقول ...ها توحشينا

تحياتى

Samraa said...
This comment has been removed by the author.
Samraa said...

hey BCR.
Well about the swear words,aw shatyma as u said,i recently did dat.:D
I do it,when am over the edge 4m sum1,n i make sure its an english word!
Bikilma minak,afriend told me about it,song is real nice,its my fon ring tone actually.
I dont mixd wid v.religious ppl,ive had such abad stories wid them,n rather have sum1 who practice x to tell ppl about it,its even abetter way.
Oi,have fun yeah?coz we going to miss u alot,so it got to be worth it yeah?:).
Kind wishes.

مثليه said...

الصديقه العزيزة جدا روز
أولا انا هعلق براحتي واقول كل اللي فنفسي على بلاطه اكمني في بلاد الحريه بقى ههههه

ضرب الداعية المعروف
انا قريت الخبر ده من فترة و بصراحه الراجل ده يستاهل اكتر من الضرب لانه خرب بيوت ناس كتير بفتاويه الفاشله يعني نقدر نقول ان ده اقل واجب معاه

برضه تانى يوم فى نفس الجرنال خبر عن أما عن قضيه الفساد باسم الايمان فلا جديد زي الهدى وغيرهابس اللي بيغيظني سذاجه الناس ونقدر نقول برضه طمعهم بيوديهم فدهيه
ــــــــــــــــــ

موضوع الموافقة على جواز المثليات والمثليين فى ولاية كاليفورنيا (عقبال الباقي هههههههههه)وياريت التورت في مصر لما يكون في جواز لينا او حتى شبكه تكون التورته دور واحد عشان هنكون عجزنا ومفيناش حيل نطلع 7 ادوار

ـــــــــــــــــــ
حبيبه قلبي شيرين البومها مفيهوش غير اغنيتين بس اللي جداد يا روز وده زعلني اوي بس تامر صالحني بشريطه الجديد اللي بجد يجنن أنا من عشاق شيرين لأن احساسها بالكلمات يجنن وصوتها فيه حنيه فظيعهوالاغنيتين اللي ذكرتيهم هما الجداد ويجننوا

أما عن ميريام فارس وأغنيتها الجديدة أنا مش أنانية (تصدقي بالله كان عندي نفس التعليق علي الاغنيه) بس انا بحبها لأنها كيوت وشقيه فنفس الوقت
ــــــــــــــــــــــ

تصريح مساعد وزير الداخلية على الشكل الجديد لنمر العربيات ومراعاته على ان الحروف متكونش شتيمه دي عجبتني اوي اوي دا راجل مسخره والله ورايق
سايب كل المصايب اللي البلد فيها وماسك فالهجايس بس برضه ملاحظه لطيفه منه ولو انها كانت هتبقى مسخره لو كان مخدش باله وكان الشعب هيتلهي في حدوته جديدهوضوع صاحبك ده عجبني اوي وضحكني مووووت
ــــــــــــــــــــ
موضوع الاجازه بقى00000000
كاااااام اسبوع!!!!! ده كتير اوي ي ي ي ي بس يلا انبسطي وهيصي الاجازه مبتتعوضش بس هتوحشيني اوي اوي اوي ياريت من وقت للتاني كده تظهري وتطمنينا عنك بتعليق ولا اي حاجه واجازه سعيده

maria said...

تروحي وترجعي بالسلامه وتنبسطي لنا ولكي

وانبسطت كثير لما شفت سؤالك عني..لما غبت الفتره اللي فاتت
واكيد رح توحشينا وتوحشنا كتابتك واخبارك
واكيد كل ما رح افتح كتاب لادونيس
او تيجي سيرته ح تكوني اول وحده تخطر في بالي

اجازه سعيده جداً جداً

Anonymous said...

Bon Vacances ..

Unknown said...

وياريتنى برضه أوحش اللى نفسى إنى أوحشهم
+++++++++++++++++++++++

مين هادول؟؟ لوول

ان شالله ترجعي بالسلامه رح أفتقدك كتير الصراحه

استمتعي بالصيف:)

blue-wave said...

بجد حاجات تفرس

someone in life said...

اجازة سعيدة هانشتاقلك كتير

تحياتي

Anonymous said...

اجازه سعيده روز و تروحي و ترجعلنا بسلامه
حاولي تستمتعي بيها علي اد ماتقدري

حتوحشينا لحد ماترجعي
سلام ياجميله

He and She said...

what is the كلمة الشتيمة المشهورة اللى من تلات حروف?

Desert cat said...

خبر الداعيه نشرته عندى وحدث ولا حرج على التعليقات
جواز المثليين امممممممم
انت حر مالم تضر
بحب شيرين اصلنا شبه بعض
اجازة سعيدة
هتوحشينى جدا جدا جدا

Heart Beat said...

يارب تكون اجازة سعيدة عليكي

على فكرة اما ترجعي من الاجازة في ليكي واجب عندي اتمنى انك تاخديه و تجاوبيه

تحياتي

مثلية فقط said...

بدي بس قول
عطلة سعيدة

بتمنى تنبسطي فيها و تسترخي و تنسي كل شي وجع راس و ضغط كان بالشغل و الحياة اليومية

و ناطرين منك تخبرينا كيف قضيتي العطلة

تحياتي

someone in life said...

هي الاجازة هاتخلص امتي بجد وحشتينا

تحياتي

مثليه said...

ايه ياروز كل ده انتي مش ناويه ترجعي ولا ايه

He and She said...

Afashtek...Where have you been ya bannootah.